ەلشىلەردىڭ ىستەرى 17:1—34
17 ولار امفيپول مەن اپولونيا ارقىلى ٶتىپ، سالونيكاعا كەلدى+. بۇل جەردە ياھۋديلەردىڭ ٴماجىلىسحاناسى بار ەدى.
2 پاۋىل ادەتى بويىنشا+ سوندا بارىپ، ٷش دەمالىس كۇن قاتارىنان جازبالاردىڭ نەگىزىندە پىكىر الىستى+.
3 ول ٴماسىحتىڭ ازاپ شەگۋى+ جانە قايتا ٴتىرىلۋى+ كەرەك بولعانىن ٴتۇسىندىرىپ، جازبالاردان دالەلدەر كەلتىردى دە: «مەن سىزدەرگە جاريالاپ جۇرگەن يسا — سول ٴماسىحتىڭ ٶزى»،— دەدى.
4 ناتيجەسىندە، سوندا وتىرعانداردىڭ كەيبىرى، سونداي-اق قۇدايعا عيبادات ەتەتىن كوپتەگەن گرەكتەر مەن بەدەلدى ايەلدەردىڭ ٴبىرازى يسانىڭ ٸزباسارى بولىپ، پاۋىل مەن سيلاسقا+ قوسىلدى.
5 الايدا مۇنى كورە الماعان ياھۋديلەر+ بازار الاڭىندا ساندالىپ جۇرگەن كەيبىر بۇزاقىلاردى وزدەرىنە قوسىپ الدى دا، توبىر ۇيىمداستىرىپ، قالانى دۇرلىكتىردى. سونداي-اق پاۋىل مەن سيلاستى قالىڭ توبىردىڭ الدىنا اپارماق بولىپ، ياسوننىڭ ۇيىنە باسا-كوكتەپ كىردى.
6 ولاردى تاپپاعان سوڭ، ياسون مەن كەيبىر باۋىرلاستاردى قالا اكىمدەرىنە سۇيرەپ اپارىپ: «بۇكىل جەرجۇزىن شۋلاتىپ جۇرگەن ادامدار ەندى وسىندا كەلىپتى+.
7 ال ياسون ولاردى ۇيىنە قوناق ەتتى. بۇلاردىڭ ٴبارى يسا دەگەن باسقا پاتشا بار دەپ، يمپەراتوردىڭ* جارلىقتارىنا قارسى شىعىپ ٴجۇر»،— دەپ ايقايلادى+.
8 قالا اكىمدەرى مەن جينالعان حالىق وسىنى ەستىپ، قاتتى ابىرجىدى.
9 سودان قالا اكىمدەرى ياسون مەن باسقالاردان اقشالاي كەپىلدىك العاننان كەيىن، ولاردى بوساتىپ جىبەردى.
10 قاراڭعى تۇسىسىمەن باۋىرلاستار پاۋىل مەن سيلاستى بەرەياعا اتتاندىردى. سوندا جەتكەن سوڭ، ولار ياھۋديلەردىڭ ٴماجىلىسحاناسىنا باردى.
11 مۇنداعىلار سالونيكالىقتارعا قاراعاندا دۇرىس كوزقاراس ۇستانادى ەكەن. ولار ەستىگەن نارسەلەرىنىڭ راستىعىنا كوزدەرىن جەتكىزۋ ٷشىن جازبالاردى كۇن سايىن مۇقيات زەرتتەپ، قۇداي ٴسوزىن زور ىقىلاسپەن قابىل الدى.
12 سوندىقتان ولاردىڭ كوبىسى يسانىڭ ٸزباسارى بولدى، ارالارىندا ەلگە سيلى گرەك ايەلدەر مەن ەرلەر دە از بولعان جوق.
13 ٴبىراق سالونيكاداعى ياھۋديلەر پاۋىلدىڭ قۇداي ٴسوزىن بەرەيادا دا ۋاعىزداعانىن بىلگەن سوڭ، جۇرتتى دۇرلىكتىرمەك بولىپ سول جەرگە باردى+.
14 سوندا باۋىرلاستار پاۋىلدى دەرەۋ تەڭىز جاعاسىنا جونەلتىپ جىبەردى+، ال سيلاس پەن تىموتە بەرەيادا قالا بەردى.
15 شىعارىپ سالۋشىلار پاۋىلمەن افيناعا دەيىن بارىپ، ودان سيلاس پەن تىموتە+ مۇمكىندىگىنشە تەزىرەك كەلسىن دەگەن نۇسقاۋ العاننان كەيىن، كەرى قايتىپ كەتتى.
16 ولاردى افينادا كۇتىپ جۇرگەن پاۋىل قالانىڭ پۇتتارعا تولى ەكەنىن كورىپ، قاتتى اشىندى.
17 سودان ٴماجىلىسحاناداعى ياھۋديلەرمەن، قۇدايعا عيبادات ەتەتىن وزگە ادامدارمەن جانە كۇن سايىن بازار الاڭىندا كەزىككەندەرمەن پىكىر الىسىپ ٴجۇردى.
18 ەپيكۋر* مەن ستويك* ٴپالساپاشىلارىنىڭ كەيبىرى ونىمەن ايتىسىپ: «مىنا مىلجىڭ نە ايتقىسى كەلەدى؟»— دەسە، وزگەلەرى: «ول بوتەن قۇدايلاردى ۋاعىزداپ جۇرگەن سياقتى»،— دەستى. ويتكەنى ول يسا تۋرالى جانە قايتا ٴتىرىلۋ جايلى ىزگى حاباردى جاريالاعان ەدى+.
19 سودان ولار پاۋىلدى ارەوپاگقا* الىپ بارىپ: «ٴسىز ۋاعىزداپ جۇرگەن جاڭا ٸلىم جايلى بىلسەك بولا ما؟
20 ايتىپ جۇرگەنىڭىز قۇلاعىمىزعا وعاش ەستىلەدى، سوندىقتان ونىڭ نە ەكەنىن بىلگىمىز كەلەدى»،— دەدى.
21 سەبەبى بارلىق افينالىقتار جانە سول جەردە تۇرىپ جاتقان شەتەلدىكتەر بوس ۋاقىتتارىن جاڭالىق ايتۋمەن يا تىڭداۋمەن عانا وتكىزەتىن.
22 پاۋىل ارەوپاگتىڭ+ ورتاسىندا تۇرىپ، بىلاي دەدى:
«افينالىقتار، بايقاۋىمشا، سىزدەر وزگەلەرگە قاراعاندا قۇدايلاردان كوبىرەك قورقاتىن* سياقتىسىزدار+.
23 مىسالى، قادىر تۇتاتىن* نارسەلەرىڭىزگە قاراپ ٶتىپ بارا جاتقانىمدا، «بەلگىسىز قۇدايعا» دەگەن جازۋى بار قۇرباندىق ورنىن كوردىم. مەن سىزدەرگە وزدەرىڭىز تانىماساڭىزدار دا عيبادات ەتىپ جۇرگەن وسى قۇدايدى جاريالاپ جاتىرمىن.
24 دۇنيەنى جانە سونداعىنىڭ ٴبارىن جاراتقان قۇداي، اسپان مەن جەردىڭ يەسى+، ادام قولىمەن سوعىلعان عيباداتحانالاردا تۇرمايدى+.
25 ول ادام بالاسىنىڭ وزىنە قىزمەت ەتۋىنە دە مۇقتاج ەمەس+، ويتكەنى ونىڭ ٶزى بارلىعىنا ٶمىر، تىنىس+ جانە قاجەتتىنىڭ ٴبارىن بەرەدى.
26 بۇكىل جەر بەتىن مەكەندەسىن دەپ+، ول ٴبىر ادامنان كۇللى حالىقتاردى شىعاردى+ ٵرى ولار تۇراتىن جەرلەردىڭ شەگىن جانە مەرزىمدەردى بەلگىلەپ قويدى+.
27 قۇداي مۇنى ادامدار ٶزىن ىزدەسىن ٵرى سەزىنىپ، تاۋىپ السىن دەپ ىستەدى+. ٴبىراق شىندىعىندا ول ٴارقايسىسىمىزدان الىس ەمەس.
28 ويتكەنى ونىڭ ارقاسىندا ٴبىز ٶمىر ٴسۇرىپ، ارەكەت ەتىپ، ٴتىرى ٴجۇرمىز. ارالارىڭىزداعى كەيبىر اقىندار «ٴبىز ونىڭ بالالارىمىز» دەگەن عوي.
29 ەندەشە، قۇدايدىڭ بالالارى بولساق+، ول التىنعا، كۇمىسكە، تاسقا نە ادامنىڭ اقىل-ويىنان شىققان نارسەلەرگە ۇقساس دەپ ويلاماۋىمىز كەرەك+.
30 ٴبىر كەزدەرى قۇداي ادامداردىڭ وسىلاي بىلمەستىك جاساعانىنا نازار اۋدارماعان+. ال قازىر ول جەر-جەردى مەكەندەيتىن ادامدارعا وكىنۋ كەرەكتىگىن ايتىپ جاتىر.
31 ويتكەنى ول بۇكىل جەرجۇزىن ادىلدىكپەن سوتتايتىن+ كۇندى بەلگىلەپ، سوتتى جۇرگىزەتىن كىسىنى تاعايىنداپ قويدى جانە سول كىسىنى قايتا ٴتىرىلتۋ ارقىلى بارلىق ادامزاتقا كەپىلدىك بەردى+».
32 قايتا ٴتىرىلۋ جايلى ەستىگەندە، كەيبىرى ونى كەلەكە ەتسە+، وزگەلەرى: «بۇل تۋرالى تاعى ٴبىر جولى ايتىپ بەرەرسىز»،— دەدى.
33 ٴسۇيتىپ، پاۋىل سول ارادان كەتىپ قالدى.
34 الايدا كەيبىرەۋلەر وعان قوسىلىپ، يسانىڭ ٸزباسارى بولدى. ولاردىڭ اراسىندا ارەوپاگتاعى سوتتىڭ مۇشەسى ديونيس جانە دامار ەسىمدى ايەل دە بار ەدى.
سىلتەمەلەر
^ سوزبە-ٴسوز «سەزاردىڭ».
^ تۇسىندىرمەنى قاراڭىز.
^ تۇسىندىرمەنى قاراڭىز.
^ ەجەلگى افيناداعى توبە. جوعارعى سوت تا سول جەردە جينالاتىن.
^ نەمەسە «ٴدىنشىل».
^ نەمەسە «ٴمىناجات ەتەتىن».
