پەتىردىڭ 2-حاتى 3:1—18
3 سۇيىكتى باۋىرلاستار، وزدەرىڭە جازىپ وتىرعان ەكىنشى حاتىمدا، ٴبىرىنشى حاتىمداعىداي، بەلگىلى ٴبىر جايتتاردى ەستەرىڭە سالۋ ارقىلى انىق ويلاۋ قابىلەتتەرىڭدى وياتقىم كەلىپ وتىر+.
2 مەن مۇنى قاسيەتتى پايعامبارلاردىڭ بۇرىن ايتىپ كەتكەن سوزدەرىن جانە ەلشىلەرىڭ ارقىلى بەرىلگەن يەمىز ٵرى قۇتقارۋشىمىزدىڭ وسيەتىن ەستەرىڭدە ساقتاساڭدار ەكەن دەپ ىستەپ وتىرمىن.
3 ەڭ الدىمەن، مىنانى بىلىڭدەر: سوڭعى كۇندەرى مازاق سوزدەر ايتاتىن مازاقتاۋشىلار كەلەدى. ولار ٶز قالاۋلارىن ورىندايدى+
4 جانە بىلاي دەيتىن بولادى: «ول كەلەم دەپ ۋادە ەتكەن ەدى عوي، كەلگەنى قايدا+؟ اتا-بابالارىمىز ٶلىم ۇيقىسىنا كەتكەلى بەرى ەشتەڭە وزگەرگەن جوق، جاراتىلىس باستالعالى بەرى ٴبارى دە سول كۇيى جالعاسىپ كەلەدى+».
5 ٴبىراق ولار مىنانى ادەيى ەسكەرمەيدى: اسپان باياعىدان بەرى بار بولعان، قۇدايدىڭ ٴسوزى بويىنشا، جەر دە قاتتى دەنە بولىپ سۋدان شىعىپ جانە سۋعا ورانىپ تۇردى+.
6 ەجەلگى زامانداعى دۇنيە وسى سۋلاردىڭ استىندا قالىپ، جويىلدى+.
7 ال قازىرگى اسپان مەن جەر، سول ٴسوز بويىنشا، وتپەن جويىلۋ ٷشىن قۇدايسىزداردىڭ سوتتالىپ، جويىلاتىن كۇنىنە ساقتالىپ وتىر+.
8 الايدا، سۇيىكتى باۋىرلاستار، ەحوبا ٷشىن ٴبىر كۇن مىڭ جىلعا، ال مىڭ جىل ٴبىر كۇنگە تەڭ ەكەنىن ەسكەرۋسىز قالدىرماڭدار+.
9 كەيبىرەۋلەر ويلاعانداي، ەحوبا ۋادەسىن ورىنداۋدى باياۋلاتىپ جاتقان جوق+، قايتا، سەندەرگە شىدامدىلىق تانىتىپ وتىر، ويتكەنى ول بىردە-ٴبىر ادامنىڭ جويىلماي، ٴبارىنىڭ وكىنگەنىن قالايدى+.
10 ەحوبانىڭ كۇنى+ ۇرى ىسپەتتى كەلەدى+. سول كۇنى اسپان قاتتى شۋمەن جوق بولىپ+، اسپان مەن جەردىڭ قۇرامداس بولىكتەرى شوقتاي قىزىپ، بالقىپ كەتەدى. ال جەر مەن ونداعى ىستەر اشكەرە بولادى+.
11 مۇنىڭ ٴبارى وسىلاي قۇرىپ كەتەتىن بولسا، سەندەردىڭ ٴجۇرىس-تۇرىستارىڭ قاسيەتتى، ال ٸس-ارەكەتتەرىڭ قۇدايعا شىن بەرىلگەن ادامدارعا ٴتان بولۋ كەرەك ەمەس پە؟!
12 ويتكەنى سەندەر ەحوبانىڭ كۇنىنىڭ كەلگەنىن+ كۇتىپ، ونى ەستەرىڭدە مىقتاپ ۇستاپ جۇرسىڭدەر عوي. سول كۇنى اسپان ورتەنىپ بالقىپ+، اسپان مەن جەردىڭ قۇرامداس بولىكتەرى قاتتى قىزىپ ەرىپ كەتەدى.
13 ال ٴبىز ونىڭ ۋادەسىنە ساي، ادىلدىك ورنايتىن+ جاڭا اسپان مەن جاڭا جەردى كۇتۋدەمىز+.
14 سوندىقتان، سۇيىكتى باۋىرلاستار، وسىلاردى كۇتىپ جۇرگەندەرىڭدە، اقىر سوڭىندا ول سەندەردى كىرشىكسىز، تازا ٵرى تاتۋ دەپ تابۋ ٷشىن قولدان كەلگەننىڭ ٴبارىن ىستەڭدەر+.
15 سونداي-اق يەمىزدىڭ شىدامدىلىعىن قۇتقارىلۋدىڭ مۇمكىندىگى دەپ بىلىڭدەر. سۇيىكتى باۋىرلاسىمىز پاۋىل دا وزىنە بەرىلگەن دانالىقپەن وسى تۋرالى سەندەرگە جازعان+.
16 ول وسى جايتتار جونىندە بارلىق حاتتارىندا ايتىپ ٴجۇر. الايدا ولاردىڭ ىشىندە تۇسىنۋگە قيىن جەرلەر دە بار. بۇلاردى نادان، سەنىمدە تۇراقسىز ادامدار وزگە جازبالاردى بۇرمالاعانداي بۇرمالاپ، وزدەرىن جويىلۋعا جەتەلەۋدە.
17 سول سەبەپتى، سۇيىكتى باۋىرلاستار، وسىنى الدىن الا بىلگەندىكتەن، ساق جۇرىڭدەر: بۇزىق ادامدار سەندەردى جاڭساق ويلارىمەن اداستىرىپ، بەرىك تۇرعان نەگىزدەرىڭنەن قۇلاتپاسىن+.
18 قايتا، يەمىز ٵرى قۇتقارۋشىمىز يسا ٴماسىحتىڭ راقىمىنا بولەنە بەرىپ، ول جايلى بىلىمدەرىڭ ارتا ٴتۇسسىن. ول قازىر دە، ماڭگىلىك بويى دا داڭقتالا بەرسىن! اۋمين.
