لۇقا 22:1—71
-
ٴدىني قىزمەتكەرلەردىڭ يسانى ٶلتىرۋدىڭ جولىن ىزدەۋى (1—6)
-
سوڭعى قۇتقارىلۋ مەيرامىنا دايىندىق (7—13)
-
يەمىزدىڭ كەشكى اسىن ەنگىزۋ (14—20)
-
«ماعان وپاسىزدىق جاسايتىن ادام مەنىمەن داستارقان باسىندا» (21—23)
-
ەڭ ۇلىسى كىم ەكەنىنە قاتىستى قىزۋ داۋ (24—27)
-
يسانىڭ پاتشالىق كەلىسىمى (28—30)
-
پەتىردىڭ يسادان تاناتىنى جايلى الدىن الا ايتۋ (31—34)
-
دايىن بولۋعا شاقىرۋ؛ ەكى سەمسەر (35—38)
-
يسانىڭ ٴزايتۇن تاۋىنداعى دۇعاسى (39—46)
-
يسانىڭ تۇتقىندالۋى (47—53)
-
پەتىردىڭ يسادان تانۋى (54—62)
-
يسانى كەلەكە-مازاق قىلۋ (63—65)
-
جوعارعى كەڭەس الدىندا سوتتالۋى (66—71)
22 اشىماعان نان مەيرامى جاقىنداپ قالعان ەدى. ول قۇتقارىلۋ مەيرامى* دەپ اتالاتىن+.
2 جوعارعى ٴدىني قىزمەتكەرلەر مەن ٴدىن مۇعالىمدەرى يسانىڭ كوزىن قۇرتۋدىڭ ٴتيىمدى جولىن ىزدەستىردى+، سەبەبى حالىقتان قورىقتى+.
3 شايتان 12 ەلشىنىڭ ٴبىرى ياھۋدا يسقاريوتتىڭ جۇرەگىنە كىردى+.
4 ياھۋدا جوعارعى ٴدىني قىزمەتكەرلەر مەن عيباداتحانانىڭ باس ساقشىلارىنا بارىپ، يسانى قالاي ۇستاپ بەرۋگە بولاتىنى تۋرالى سويلەستى+.
5 ولار قۋانىپ كەتىپ، وعان كۇمىس اقشا بەرۋدى ۋادە ەتتى+.
6 ول بۇعان كەلىسىپ، جۇرت جوق كەزدە يسانى ۇستاپ بەرۋدىڭ قولايلى ٴساتىن ىزدەي باستادى.
7 اشىماعان نان مەيرامى كەلىپ جەتتى. بۇل كۇنى قۇتقارىلۋ مەيرامىنا ارنالعان قۇرباندىق شالىنۋ كەرەك ەدى+.
8 سوندىقتان يسا پەتىر مەن جوحاندى: «بارىپ، بىزگە قۇتقارىلۋ مەيرامىنىڭ اسىن ازىرلەڭدەر+»،— دەپ جۇمسادى.
9 ولار: «استى قايدا دايىنداعانىمىزدى قالايسىز؟»— دەپ سۇراعاندا،
10 يسا بىلاي دەدى: «قالاعا كىرگەندە، قۇمىرامەن سۋ الىپ بارا جاتقان ادامدى كەزدەستىرەسىڭدەر. سوعان ەرىپ، ول كىرگەن ۇيگە كىرىڭدەر دە+،
11 ٷي يەسىنە: —ۇستازىمىز شاكىرتتەرىمەن بىرگە قۇتقارىلۋ مەيرامىنىڭ اسىن ىشۋگە بولاتىن قوناق بولمەنىڭ قايدا ەكەنىن سۇراپ جاتىر،— دەڭدەر.
12 ول سەندەرگە جوعارى قاباتتاعى ازىرلەنىپ قويىلعان ۇلكەن بولمەنى كورسەتەدى. استى سول جەرگە دايىنداڭدار».
13 شاكىرتتەر بارعاندا، ٴبارى ٴدال يسا ايتقانداي بولىپ شىقتى. ٴسۇيتىپ، ولار قۇتقارىلۋ مەيرامىنا دايىندالدى.
14 تاماق ىشەتىن ۋاقىت كەلگەندە يسا ەلشىلەرىمەن بىرگە داستارقان باسىنا جانتايدى+.
15 سوسىن ولارعا بىلاي دەدى: «ازاپ شەگەرىمنىڭ الدىندا وسى قۇتقارىلۋ مەيرامىنىڭ اسىن سەندەرمەن جەۋدى قاتتى قالاعان ەدىم.
16 سەبەبى سەندەرگە مىنانى ايتامىن: قۇداي پاتشالىعىندا ٴبارى تۇگەلدەي ورىندالمايىنشا، بۇل استى قايتىپ جەمەيمىن».
17 ول توستاعاندى الىپ، قۇدايعا ريزاشىلىق ٴبىلدىردى دە، بىلاي دەدى: «مىنانى الىپ، ٴبارىڭ وسىدان ىشىڭدەر.
18 ويتكەنى سەندەرگە مىنانى ايتامىن: قۇداي پاتشالىعى كەلگەنشە، ەندى قايتىپ شاراپ ىشپەيمىن».
19 بۇدان كەيىن قولىنا نان الىپ+، ريزاشىلىق ٴبىلدىردى دە، ولارعا سىندىرىپ بەرىپ جاتىپ: «بۇل سەندەر ٷشىن ۇسىنىلاتىن دەنەمدى بىلدىرەدى+. مەنى ەسكە الۋ ٷشىن وسىلاي ىستەپ تۇرىڭدار»+،— دەدى.
20 سول سياقتى، كەشكى استان كەيىن توستاعاندى دا الىپ، بىلاي دەدى: «مىنا توستاعان سەندەر ٷشىن توگىلەتىن+ قانىما نەگىزدەلگەن+ جاڭا كەلىسىمدى بىلدىرەدى+.
21 ماعان وپاسىزدىق جاسايتىن ادام مەنىمەن بىرگە داستارقان باسىندا وتىر+.
22 ادام ۇلى، شىنىندا دا، الدىن الا ايتىلعانعا ساي كەتىپ بارا جاتىر+، ٴبىراق وعان وپاسىزدىق جاساعان كىسى قاسىرەتكە قالادى+!»
23 سوندا ەلشىلەر بۇنى كىم ىستەۋى مۇمكىن دەپ، ٶزارا تالقىلاي باستادى+.
24 سونداي-اق ارالارىندا ەڭ ۇلىسى كىم ەكەنىنە قاتىستى قىزۋ داۋ تۋدى+.
25 ٴبىراق يسا بىلاي دەدى: «پاتشالار قول استىنداعى حالىقتى بيلەپ-توستەيدى، ولارعا ۇستەمدىك ەتەتىندەر قامقورشىلار* دەپ اتالادى+.
26 ٴبىراق سەندەردىڭ ارالارىڭدا بۇنداي بولماسىن+. ەڭ ۇلىلارىڭ ەڭ كىشىدەي+، ال باسشىلىق ەتەتىندەرىڭ قىزمەت كورسەتۋشىدەي بولىڭدار.
27 داستارقان باسىندا جانتايعان كىسى ۇلى ما، الدە قىزمەت كورسەتىپ جۇرگەنى مە؟ داستارقان باسىندا جانتايعانى ەمەس پە؟ ال مەن ارالارىڭدا قىزمەت كورسەتۋشى ىسپەتتىمىن+.
28 الايدا قيىندىققا ۇشىراعان كەزدەرىمدە+ مەنىمەن بىرگە بولعان سەندەرسىڭدەر+.
29 اكەمنىڭ مەنىمەن پاتشالىق كەلىسىمىن جاساسقانىنداي، مەن دە سەندەرمەن سونداي كەلىسىم جاساسامىن+.
30 وسىلايشا سەندەر مەنىڭ پاتشالىعىمدا داستارقانىمنان ٸشىپ-جەيسىڭدەر+ جانە يسرايلدىڭ 12 رۋىن سوتتاۋ ٷشىن تاقتارعا وتىراسىڭدار+.
31 شيمون، شيمون! شايتان ٴبارىڭدى بيداي ىسپەتتى ەلەكتەن وتكىزۋدى تالاپ ەتتى+.
32 ٴبىراق سەنىمىڭ السىرەمەسىن دەپ، سەن ٷشىن جالبارىندىم+. ال سەن ىسىڭە وكىنگەن سوڭ، باۋىرلاستارىڭنىڭ سەنىمىن نىعايت+».
33 سوندا ول: «يەم، سىزبەن بىرگە تۇرمەگە دە، ولىمگە دە بارۋعا دايىنمىن»،— دەدى+.
34 ٴبىراق يسا: «پەتىر، ساعان ايتامىن، بۇگىن اتەش شاقىرماي تۇرىپ-اق، سەن مەنى بىلمەيتىنىڭدى ايتىپ، ٷش رەت تاناسىڭ»،— دەدى+.
35 سوسىن ولاردان: «سەندەردى اقشا سالاتىن قالتا دا، تاماق سالاتىن دوربا دا، ساندال دا العىزباي جىبەرگەنىمدە+، ٴبىر نارسەدەن مۇقتاجدىق كوردىڭدەر مە؟»— دەپ سۇراعاندا، ولار: «جوق!»— دەپ جاۋاپ بەردى.
36 سوندا يسا بىلاي دەدى: «ال ەندى كىمنىڭ اقشا سالاتىن قالتاسى بولسا، سونىسىن، سونداي-اق تاماق سالاتىن دورباسىن السىن. سەمسەرى جوق ادام جامىلعىسىن ساتىپ، سەمسەر السىن.
37 ويتكەنى سەندەرگە مىنانى ايتامىن: «ول قىلمىسكەرلەر قاتارىندا سانالدى»+ دەگەن سوزدەر ماعان قاتىستى ايتىلعان. سەبەبى مەن تۋرالى جازىلعاندار ورىندالۋدا+».
38 ولار: «يەم، مىنە، مۇندا ەكى سەمسەر بار»،— دەگەندە، يسا: «وسى جەتكىلىكتى»،— دەدى.
39 بۇدان كەيىن سول جەردەن شىعىپ، داعدىسى بويىنشا ٴزايتۇن تاۋىنا قاراي ٴجۇردى. شاكىرتتەرى دە سوڭىنان ىلەستى+.
40 الگى جەرگە كەلگەندە، يسا ولارعا: «ازعىرىلماۋ ٷشىن دۇعا ەتە بەرىڭدەر»،— دەدى+.
41 ال ٶزى تاس لاقتىرىمداي جەرگە باردى دا، تىزە بۇگىپ، دۇعا ەتە باستادى:
42 «اكە، ەگەر قالاساڭ، بۇل توستاعاننان* ماعان ىشكىزە كورمە. ٴبىراق مەنىڭ ەمەس، سەنىڭ ەركىڭ بولسىن»+.
43 سوندا كوكتەن ٴبىر پەرىشتە كەلىپ، ونى نىعايتتى+.
44 ٴبىراق جان ازابىنا تۇسكەنى سونشا — ول ودان بەتەر قاتتى جالبارىنىپ دۇعا ايتتى+. ال ونىڭ تەرى قان تامشىلارى سياقتى جەرگە تامىپ جاتتى.
45 سوسىن ورنىنان تۇرىپ، شاكىرتتەرىنە كەلدى. ولاردىڭ قايعىدان تيتىقتاپ ۇيىقتاپ كەتكەنىن كورىپ+:
46 «نەگە ۇيىقتاپ جاتىرسىڭدار؟ تۇرىڭدار، ازعىرىلماۋ ٷشىن دۇعا ەتە بەرىڭدەر+»،— دەدى.
47 ول ٵلى سويلەپ تۇرعاندا، ٴبىر توپ ادام كورىندى. ولاردى ياھۋدا ەسىمدى 12 ەلشىنىڭ ٴبىرى باستاپ كەلە جاتتى. ول يسانىڭ بەتىنەن سۇيمەك بولىپ، جانىنا كەلدى+.
48 يسا وعان: «ياھۋدا، ادام ۇلىنا بەتىنەن ٴسۇيىپ وپاسىزدىق جاساپ تۇرسىڭ با؟»— دەدى.
49 يسانىڭ قاسىنداعىلار ٴمان-جايدى اڭعارىپ: «يەم، سەمسەرمەن شاۋىپ تاستايىق پا؟»— دەدى.
50 بىرەۋى ٴتىپتى سەمسەرىن سىلتەپ قالىپ، باس ٴدىني قىزمەتكەردىڭ قۇلىنىڭ وڭ قۇلاعىن شاۋىپ ٴتۇسىردى+.
51 سوندا يسا: «جەتەر ەندى!»— دەدى دە، قۇلدىڭ قۇلاعىنا قولىن تيگىزىپ، ساۋىقتىرىپ جىبەردى.
52 بۇدان كەيىن ٶزىن ۇستاۋعا كەلگەن جوعارعى ٴدىني قىزمەتكەرلەرگە، عيباداتحانانىڭ باس ساقشىلارى مەن اقساقالدارعا بىلاي دەدى: «قاراقشىنى ۇستاۋعا كەلگەندەي، سەمسەر، سويىلمەن كەلگەندەرىڭ قالاي+؟
53 كۇن سايىن سەندەرمەن بىرگە عيباداتحانادا بولعانىمدا+، تۇتقىنداماپ ەدىڭدەر+. ٴبىراق قازىر سەندەردىڭ ۋاقىتتارىڭ جانە تۇنەكتىڭ بيلىك جۇرگىزەتىن ۋاقىتى+».
54 ولار يسانى تۇتقىنعا الىپ+، باس ٴدىني قىزمەتكەردىڭ ۇيىنە اكەتتى. ال پەتىر الىستان ىلەسىپ وتىردى+.
55 ونداعىلار ىشكى اۋلانىڭ ورتاسىنا وت جاعىپ، سول جەرگە جينالعاندا، پەتىر دە ارالارىنا بارىپ وتىردى+.
56 ٴبىر قىزمەتشى قىز وتتىڭ جارىعىندا وتىرعان ونى كورگەندە، تەسىلە قاراپ: «مىناۋ دا ونىمەن بىرگە جۇرەتىن»،— دەدى.
57 ٴبىراق ول: «مەن ونى تانىمايمىن»،— دەپ مويىندامادى.
58 ٴبىرازدان كەيىن تاعى بىرەۋ كورىپ: «سەن دە سولاردىڭ ٴبىرىسىڭ»،— دەپ ەدى، پەتىر: «جوق، ولاي ەمەس»،— دەپ جاۋاپ بەردى+.
59 ٴبىر ساعاتتاي ۋاقىت وتكەن سوڭ باسقا ٴبىر ادام: «شىنىمەن دە، بۇل ونىمەن بىرگە جۇرەتىن. سەبەبى مىناۋ — عاليلەيالىق!»— دەپ قويمادى.
60 پەتىر بولسا: «نە ايتىپ تۇرعانىڭدى بىلمەيمىن»،— دەدى. ول ٵلى سويلەپ تۇرعاندا-اق، اتەش شاقىردى.
61 سول كەزدە يەمىز بۇرىلىپ، پەتىرگە قارادى. سوندا يەمىزدىڭ «بۇگىن اتەش شاقىرعانشا، سەن مەنەن ٷش رەت تاناسىڭ» دەگەن سوزدەرى پەتىردىڭ ەسىنە ٴتۇستى+.
62 ٴسۇيتىپ، سىرتقا شىعىپ، وكىرىپ جىلادى.
63 يسانى كۇزەتىپ تۇرعاندار ونى مازاقتاپ+، ۇرىپ-سوعا باستادى+.
64 سونداي-اق بەتىن جاۋىپ قويىپ، ۇرىپ: «ٵي، پايعامبار بولساڭ، سەنى كىم ۇرعانىن ايتشى؟»— دەستى.
65 وعان باسقا دا كوپتەگەن قورلىق سوزدەر ايتتى.
66 تاڭ اتا ەل اقساقالدارى، جوعارعى ٴدىني قىزمەتكەرلەر مەن ٴدىن مۇعالىمدەرى تۇگەل جينالىپ+، يسانى جوعارعى كەڭەسكە* الىپ كەلدى دە:
67 «ەگەر ٴماسىح بولساڭ، ايت بىزگە»،— دەدى+. ٴبىراق يسا ولارعا مىنانى ايتتى: «ايتسام دا، ٴبارىبىر سەنبەس ەدىڭىزدەر.
68 ال سۇراسام، ٴبارىبىر جاۋاپ بەرمەس ەدىڭىزدەر.
69 ٴبىراق ەندى ادام ۇلى+ قۇدىرەتتى قۇدايدىڭ وڭ جاعىندا وتىراتىن بولادى+».
70 بۇعان ٴبارى: «سونىمەن، سەن قۇدايدىڭ ۇلىسىڭ* با؟»— دەپ سۇراعاندا، يسا: «مۇنى وزدەرىڭىز ايتىپ تۇرسىزدار»،— دەپ جاۋاپ قاتتى.
71 سوندا ولار: «بىزگە بۇدان باسقا قانداي كۋالىك قاجەت؟ مۇنى ٶز اۋزىنان ەستىدىك قوي»+،— دەستى.
سىلتەمەلەر
^ تۇسىندىرمەنى قاراڭىز.
^ بۇل قۇرمەتتى لاۋازىمدى بىلدىرەدى.
^ «توستاعان» يساعا جالعان ايىپ تاعىلىپ، ولتىرىلەتىنىنە قاتىستى قۇدايدىڭ ەركىن بىلدىرەدى.
^ تۇسىندىرمەنى قاراڭىز.
^ تۇسىندىرمەنى قاراڭىز.
