كۇشى كەتپەيتىن ەم
بۇل جۋرنالدا ٴبىز ٴبىراز قاعيدالارعا توقتالدىق. وسىلاردىڭ ارقاسىندا ميلليونداعان ادام الالاۋشىلىقتان ايتارلىقتاي ارىلدى. ٴسوزدىڭ شىنى كەرەك، ٴبىز ونى ٶز كۇشىمىزبەن تولىقتاي جەڭە المايمىز. سوندا ٴبىز ونى ەش جەڭە الماي وتەمىز بە؟
ەڭ ۇزدىك ۇكىمەت
وسى ۋاقىتقا دەيىن ەشبىر ۇكىمەت الالاۋشىلىقتى جەڭە الماعان. سوندا بۇل جابىسقاق دەرتتى الىپ جىعاتىن ەشبىر ۇكىمەتتىڭ بولماعانى ما؟
الالاۋشىلىقتى الىپ تاستايمىن دەگەن ۇكىمەتتىڭ ٸس-قيمىلى مىناداي بولۋ كەرەك:
-
1. ادامداردىڭ ويلارىن وزگەرتۋگە، جاعىمسىز سەزىمدەردەن ارىلۋعا ىقىلاستارىن وياتادى.
-
2. ادىلەتسىزدىكتىڭ سالعان جاراسىن ەمدەيدى، سوندا ادامداردىڭ كەۋدەسىندە ىزا-كەك قالمايدى.
-
3. بيلىك باسىنا ازاماتتارىن ٴبولىپ-جارمايتىن شىنشىل باسشىلاردى قويادى.
-
4. بارلىق ۇلت وكىلدەرىن بىرىكتىرەدى.
كيەلى كىتاپتا جاراتۋشى وسىنداي ۇكىمەتتى قۇرعانى ايتىلعان. ول «قۇداي پاتشالىعى» دەپ اتالادى (لۇقا 4:43).
قازىر سول ۇكىمەت ٶز ازاماتتارىنا نە بەرەتىنىن كورەيىك.
1. وزىق تاربيە
«تۇرعىندارى ادىلدىك جاساۋدى ۇيرەنەدى» (يشايا 26:9).
«شىنايى تۋرالىقتىڭ ناتيجەسى تىنىشتىق، شىنايى تۋرالىقتىڭ جەمىسى ماڭگى جايباراقاتتىق پەن قاۋىپسىزدىك بولادى» (يشايا 32:17).
بۇل سوزدەردىڭ ٴمانى قانداي؟ قۇداي قۇرعان ۇكىمەت ازاماتتارىنا جاقسىنى جاماننان، ادىلدىكتى ادىلەتسىزدىكتەن اجىراتۋدى ۇيرەتەدى. سونىڭ ارقاسىندا ولاردىڭ ٴبىر-بىرىنە دەگەن كوزقاراستارى وزگەرەدى. سوندا بارلىق ادامدار ٴبىر-ٴبىرىن جاقسى كورەتىن بولادى.
2. شيپا
«قۇداي ولاردىڭ كوزىندەگى ٵربىر جاستى ٴسۇرتىپ تاستايدى، ەندى قايتىپ ٶلىم، جوقتاۋ، زار ەڭىرەۋ مەن اۋرۋ بولمايدى. بۇرىنعى جايتتار قۇرىپ جوق بولدى» (ايان 21:4).
بۇل سوزدەردىڭ ٴمانى قانداي؟ بۇل ۇكىمەت ادىلەتسىزدىك سالعان جارانى جازادى. سوندا كەزىندە ادىلەتسىزدىكتىڭ قۇربانى بولعاندار ىزا-كەكتەن ارىلادى.
3. جاقسى باسشى
«ول تەك كورگەنىنە ساي تورەلىك ەتپەيدى، تەك ەستىگەنىنە ساي تۇزەتپەيدى. قايتا، جارلىعا ٵدىل ۇكىم شىعارادى، جەردەگى مومىنداردىڭ مۇددەسى ٷشىن حالىقتى تۋراشىلدىقپەن تۇزەتەدى» (يشايا 11:3، 4).
بۇل سوزدەردىڭ ٴمانى قانداي؟ قۇدايدىڭ كوكتەگى ۇكىمەتىنىڭ پاتشاسى يسا ٴماسىح جەر بەتىنە ٵدىل بيلىك جۇرگىزەدى. ول ٴبىر ۇلتتى باسقا ۇلتتان بيىك قويمايدى، ول بارلىعىنا بىردەي قارايدى. يسا ٴماسىح جەردەگى بارلىق ادامدار ونىڭ ٵدىل زاڭدارىنا باعىنىپ جاتقانىنا كوز جەتكىزىپ وتىرادى.
4. بىرلىك
قۇدايدىڭ ۇكىمەتى ٶز ازاماتتارىن «نيەتتەس بولۋعا، ٴبىر-ٴبىرىن سۇيۋگە، ٶزارا بىرلىكتە ٵرى پىكىرلەس بولۋعا» ۇيرەتەدى (فىلىپىلىكتەرگە 2:2).
بۇل سوزدەردىڭ ٴمانى قانداي؟ ٴبىر-ٴبىرىمىزدى رياسىز جاقسى كورگەندىكتەن، بار ۇلتتىڭ بالاسى ٴبىر شاڭىراقتىڭ استىندا تاتۋ-ٴتاتتى ٶمىر سۇرەدى. قۇداي ۇكىمەتى ورناتاتىن بۇل بىرلىكتى ادام بالاسى بۇعان دەيىن كورگەن ەمەس. عاسىرلار بويى اڭساپ كەلگەن بىرلىككە ولار تەك قۇداي ۇكىمەتىنىڭ تۇسىندا جەتەدى.
