11-قازان، 2024
يسپانيا
ەۋروپالىق سوتتىڭ جوعارعى پالاتاسى ەحوبا كۋاگەرلەرىنىڭ ەم تاڭداۋ قۇقىعىن جاقتايدى
سوت «پيندو مۋليا يسپانياعا قارسى» ٸسى بويىنشا ٴبىراۋىزدان شەشىم شىعاردى
2024-جىلدىڭ 17-قىركۇيەگىندە ادام قۇقىقتارى جونىندەگى ەۋروپالىق سوتتىڭ جوعارعى پالاتاسى ناۋقاستىڭ ٶز سەنىم-نانىمدارىنا ساي مەديسينالىق ەم تاڭداۋ قۇقىعى بار ەكەنىن ٵرى ونى قۇرمەتتەۋ كەرەكتىگى جايلى ٴبىراۋىزدان شەشىم شىعاردى. بۇل ماڭىزدى شەشىم ناۋقاستىڭ مەديسينالىق ەم تاڭداۋ قۇقىعىن سيلاۋعا تەك يسپانيانى عانا ەمەس، ەۋروپا كەڭەسىنىڭ مۇشەلەرى بولىپ تابىلاتىن 46 مەملەكەتتىڭ ٴبارىن مىندەتتەيدى.
روسا پيندو مۋليا باۋىرلاس كۇيەۋىمەن
2018-جىلى ماۋسىمدا 47 جاستاعى روسا پيندو مۋليا باۋىرلاس كۇردەلى ەمەس وتا جاساتۋ ٷشىن مادريدتەگى (يسپانيا) اۋرۋحاناعا جاتقان بولاتىن. ول «ٶز ەركىن ٴبىلدىرۋ مەن سەنىمحات» دەگەن مەديسينالىق قۇجاتتى دارىگەرلەرگە كورسەتىپ، جەكە سەنىم-نانىمى مەن كيەلى كىتاپ بويىنشا تاربيەلەنگەن ار-ۇجدانىنا ساي قان قۇيۋدان باس تارتاتىنىن تۇسىندىرگەن ەدى (ەلشىلەردىڭ ىستەرى 15:28، 29). اۋرۋحانا قىزمەتكەرلەرى روسانىڭ ايتقاندارىن مەديسينالىق قۇجاتىنا ەنگىزەدى. ٴبىراق كەزەكشى سۋديا روساعا ايتپاستان، دارىگەرلەرگە وعان كۇردەلى وتا جاساۋعا جانە قان قۇيۋعا رۇقسات بەرەدى. وتادان سوڭ روسا قان قۇيۋدان باس تارتامىن دەپ انىق ايتقانىنا قاراماستان، دارىگەرلەر وزىنە قان قۇيعانىن ەستىگەندە، توبە شاشى تىك تۇرادى.
«پيندو مۋليا يسپانياعا قارسى» ٸسى بويىنشا شىعارعان شەشىمىندە جوعارعى پالاتانىڭ 17 سۋدياسى «ارەكەتكە قابىلەتتى ەرەسەك ناۋقاستىڭ» كەيبىر مەديسينالىق ەم تۇرىنەن «باس تارتۋعا قۇقىلى ەكەنىمەن» ٴبىراۋىزدان كەلىستى. سوت سونداي-اق «ناۋقاستىڭ قانداي دا ٴبىر ەمگە كەلىسۋگە نە ودان باس تارتۋعا قۇقىعى بار ەكەنىن ٵرى وسى قۇقىعىن قۇرمەتتەۋ — دەنساۋلىق ساقتاۋ سالاسىنىڭ باستى ٴپرينسيپى ەكەنىن» راستادى.
بىرلىگى جاراسقان دۇنيەجۇزىلىك باۋىرلاستار بولىپ ٴبارىمىز سوتتىڭ وسى شەشىمىنە قۋانىشتىمىز. بۇل شەشىم پيندو مۋليا باۋىرلاستىڭ عانا ەمەس، باسقا دا ميلليونداعان ادامنىڭ جەكە سەنىم-نانىمدارى مەن قۇندىلىقتارىنا قايشى كەلمەيتىن مەديسينالىق ەم ٴتۇرىن تاڭداۋ قۇقىعىن جاقتايدى.