Ovagalati 6:1-18

  • Yakulafaneni momaudjuu (1-10)

    • Osho omunhu ta kunu osho ta teya (7, 8)

  • Epitotanda inali fimana (11-16)

    • Okushitululwa kuKalunga (15)

  • Exulifo (17, 18)

6  Ovamwatate, ngeenge umwe ota katuka shihe li pandunge ine shi nongela, nye ovo mu li Ovakriste va pyokoka* mu pukululeni nombili.* Ndele kaleni mwa lungama opo nanye muha wile momwiyo.  Kaleni hamu yakulafana momaudjuu, nokungaho otamu wanifa po omhango yaKristus.  Ngeenge ope na ou ta diladila kutya okwa fimana ndele hasho, ote lifufya.  Keshe umwe na konakone oilonga yaye mwene kutya oya tya ngahelipi opo e i litangele, ndele hakuliyelekanifa navamwe.  Osheshi keshe umwe oku na okuhumbata omutengi waye mwene.  Ndele keshe oo a hongwa eendjovo daKalunga na tukulilafane naao e mu honga oinima aishe iwa oyo e na.  Inamu lifufya: Kalunga iha kengelelwa. Osheshi keshe osho omunhu ta kunu osho ta ka teya.  Ou ta kunu pambelela ota ka teya enyonauko mombelela yaye, ndele ou ta kunu pamhepo ota ka mona omwenyo waalushe omolwomhepo iyapuki.  Inatu lolokeni okulonga ouwa osheshi ohatu ka teya oiimati pefimbo la wapala ngeenge inatu loloka.* 10  Onghee hano, fimbo tu na omhito,* natu longeleni aveshe ouwa, unene tuu ovaitaveli vakwetu. 11  Taleni, onde mu shangela ame mwene neendada da twa. 12  Aveshe ovo va hala okupandika kovanhu otava kendabala oku mu fininika mu pite etanda molwaashi inava hala okuhepekwa omolwomuti womahepeko* waKristus. 13  Osheshi nokuli naavo va pita etanda ihava diinine Omhango, ndele ova hala oku mu pitifa etanda opo ve litange eshi ve mu pitifa etanda. 14  Ame inandi hala okulitanga nandenande, okuninga handi litangele Omwene wetu Jesus Kristus oo a valelwa komuti womahepeko.* Pataleko lange, ounyuni owa tokolelwa efyo okupitila muye, ndele pataleko lounyuni, aame nda tokolelwa efyo okupitila muye. 15  Okupita etanda ile okuhapita etanda hako kwa fimana, ndele eshi sha fimana okushitululwa kuKalunga. 16  Aveshe ovo hava kala metwokumwe nefinamhango olo, sha hala okutya, Israel yaKalunga, ombili nefilonghenda nai kale pamwe navo. 17  Ndele molwaashi ondi na oivadi oyo tai ulike kutya ondi li omupiya waJesus, inandi hala vali okupiyaanekwa. 18  Ovamwatate, efilonghenda lOmwene wetu Jesus Kristus nali kale pamwe nanye omolwomhepo yeni iwa. Amen.

Eshangelo lopedu

Ile “ovo hamu wilikwa komhepo iyapuki.”
Ile “nomwenyo muwa.”
Ile “sholola.”
Eln., “eufwafimbo.”
Tala omafatululo oitya.
Tala omafatululo oitya.