Oilonga 5:1-42

  • Ananias naSafira (1-11)

  • Ovayapostoli tava longo oikumwifilonga ihapu (12-16)

  • Va tulwa modolongo nokumangululwa mo (17-21a)

  • Va etwa mOmhangu yoPombada yOvajuda (21b-32)

    • ‘Otu na okudulika kuKalunga ponhele yokudulika kovanhu’ (29)

  • Omayele aGamaliel (33-40)

  • Okuudifa eumbo neumbo (41, 42)

5  Omulumenhu wedina Ananias pamwe nomukulukadi waye Safira ova landifa po epya lavo.  Ndele oimaliwa imwe okwe i holeka po, nomukulukadi waye okwa li e shi shii, opo nee ei ya xupa po okwe i yandja kovayapostoli.  Petrus okwa tya kuye: “Ananias, omolwashike wa efa Satana e ku pukife u fufye omhepo iyapuki nou holeke po oimaliwa imwe oyo wa landifa po epya?  Epya olo kala li loye hano fimbo ino li landifa po? Naashi we li landifa po, oimaliwa kaya li yoye? Omolwashike wa diladila okuninga oshinima osho sha puka? Havanhu wa fufya, ndele oKalunga.”  Ananias eshi a uda eendjovo odo, okwa ongotela pedu nokwa fya. Ndele ovanhu aveshe eshi ve shi uda, ova li va tila unene.  Opo nee ope uya ovalumenhu vamwe ovanyasha, tave mu dingile momalapi nove mu tumba po ve ke mu pake.  Konima yeevili nhatu lwaapo, omukulukadi waye okwe uya po yo, ndele ka li e shii kutya oshike sha ningwa po.  Petrus okwa tya kuye: “Lombwele nge, oimaliwa ei i fike apa oyo mwa landifa po epya leni?” Okwa ti: “Heeno, opo i fike opo.”  Onghee Petrus okwa tya kuye: “Omolwashike mwa udafana okushinda omhepo yaJehova? Tala, eemhadi odo da enda poshivelo odaavo va ka paka omushamane woye, naave otave ku ile.” 10  Opo nee okwa wila diva peemhadi daPetrus nokwa fya. Eshi ovalumenhu ovanyasha va aluka, ova hanga a fya, ndele tave mu tumbu po noku ke mu paka popepi nomushamane waye. 11  Eongalo alishe nosho yo ovanhu aveshe ovo va uda oshinima osho ova li va tila neenghono. 12  Ndele ovayapostoli ova twikila okulonga oikumwifilonga ihapu nomadidiliko mokati kovanhu, nova kala hava ongala aveshe mOmukala waSalomo. 13  Ovanhu vamwe ova li va tila okuwaimina ovahongwa; ndele vamwe ova li tave va popile mouwa. 14  Kakele kaasho, omuvalu wovalumenhu novakainhu ovo va li va itavela Omwene owa enda tau hapupala neenghono. 15  Ovanhu ova li nokuli va eta ovanaudu vavo momapandavanda ve va nangeka koumbete nokomalutala. Ova li ve lineekela kutya ngeenge Petrus okwa ende po, omudidimbe waye otau va hange ndele tava veluka. 16  Ndele eengudu dovanhu da dja moilando oyo ya dingilila Jerusalem oda kala tadi eta ovanaudu naavo va hepekwa keemhepo da nyata, naaveshe ovo va etwa ova li va velulwa. 17  Opo nee omupristeri munene naaveshe ovo a li pamwe navo vongudu yelongelokalunga lOvasadukai, ova fikama nova li va handuka unene. 18  Ndele ova kwata po ovayapostoli nove va tula modolongo. 19  Opo nee omweengeli waJehova okwe uya oufiku nokwa yeulula omivelo dodolongo ndele ta ti: 20  “Indeni kotembeli ndele tamu twikile okulombwela ovanhu kutya oshike ve na okuninga opo va ka mone omwenyo waalushe.” 21  Eshi ve shi uda, ova ya kotembeli ongula inene nova li va hovela okuhonga ovanhu. Ndele eshi omupristeri munene naavo a li pamwe navo va fika, ova ifana oilyo aishe yOmhangu yoPombada yOvajuda nosho yo ovakulunhu aveshe voshiwana shOvaisrael ndele tava tumu kodolongo va ka etelwe ovayapostoli. 22  Eshi ovakeleli votembeli va fika kodolongo, inave va hanga mo. Onghee ova aluka 23  ndele tava ti: “Odolongo otwa hanga ya patwa novanangeli vayo ova fikama pomivelo, ndele eshi twa yeulula po, inatu hanga mo nande oumwe.” 24  Omukulunhu wotembeli nosho yo ovapristeri ovakulunhu eshi va uda eendjovo odo, ova li tave lipula kutya oshike vali tashi ka ningwa po. 25  Opo nee okwa dja umwe ndele te va lombwele ta ti: “Taleni, ovalumenhu venya mwa tula modolongo ove li motembeli tava hongo ovanhu.” 26  Ndele omukulunhu oo nosho yo ovakeleli votembeli ove ke va tala ko nopehe na oku va kondjifa, molwaashi ova li va tila okudengwa nomamanya. 27  Onghee ove va eta nove va fikamifa komesho yOmhangu yoPombada yOvajuda. Ndele omupristeri munene okwe va pula nokwe va lombwela 28  ta ti: “Otwe mu kunghilila muha twikile vali okuhonga ovanhu medina lomulumenhu oo, ndele taleni, natango otamu yadifa Jerusalem nehongo leni, nomwa hala tu kale tu na etimba omolwefyo lomulumenhu oo.” 29  Opo nee Petrus novayapostoli vakwao ova tya kuvo: “Otu na okudulika kuKalunga e li omupangeli ponhele yokudulika kovanhu. 30  Kalunga kootatekulululwa okwa nyumuna Jesus, oo mwa dipaa nomwe mu endjelelifa komuti. 31  Kalunga okwe mu tumbaleka eshi e mu tula kolulyo laye a ninge Nakupefa ovanhu omwenyo nOmuxupifi opo Ovaisrael ve lidilulule nova diminwe po omatimba avo. 32  Ndele fye eembangi doinima oyo, nomhepo iyapuki oyo Kalunga a yandja kwaavo hava dulika kuye oye tu kwafela tu koleke oushili waasho.” 33  Eshi va uda ngaho, ova li va handuka neenghono* nova li va hala oku va dipaa. 34  Opo nee Omufarisai wedina Gamaliel, oo a li omuhongimhango nokwa tumbalekwa kovanhu aveshe, okwa fikama mOmhangu yoPombada yOvajuda, ndele ta yandje elombwelo opo ovayapostoli ovo va ye manga pondje. 35  Okwa ti: “Ovalumenhu nye Ovaisrael, lungameni osho tamu diladila okuningila ovalumenhu ava. 36  Pashihopaenenwa, pefimbo linya opa li pa holoka omulumenhu Teodas, oo a li te liti kutya oye nhumba yangadi, nokwa li a waiminwa kovalumenhu 400 lwaapo. Ndele okwa li a dipawa, novashikuli vaye aveshe ova li va halakanifwa po. 37  Konima yaTeodas, opa ka holoka vali Judas Omugalilea pefimbo lomavalulo ovanhu, ndele ta nwefa mo ovanhu vamwe ve mu shikule. Omulumenhu oo naye okwa fya novashikuli vaye aveshe ova halakanifwa po. 38  Ohandi mu lombwele, ovalumenhu ovo va efeni, inamu va piyaaneka. Ngeenge omhangela ile oilonga oyo oya dja movanhu, otai xulu po, 39  ndele ngeenge oya dja kuKalunga, itamu dulu oku i xulifa po. Onghee lungameni, ngeenge hasho, otamu ke lihanga tamu lwifa Kalunga.” 40  Ova tambula ko omayele oo, ndele tava ifana ovayapostoli, tave va dengifa, nove va lombwela vaha popye vali kombinga yedina laJesus, ndele tave va efa va ye. 41  Opo nee ovayapostoli ova dja mo mOmhangu yoPombada yOvajuda va hafa eshi va talika ko va wana okuhepekwa omolwedina laJesus. 42  Ndele ova twikila efiku keshe okuhonga ovanhu noku va udifila onghundana iwa kombinga yaKristus Jesus motembeli nosho yo eumbo neumbo nopehe na okusholola.

Eshangelo lopedu

Ile “ova li va tuwa pomitima.”