Oilonga 16:1-40

  • Paulus ta hoolola Timoteus (1-5)

  • Emoniko li na sha nomulumenhu Omumakedonia (6-10)

  • Lidia wokuFilippi a ninga omwiitaveli (11-15)

  • Paulus naSilas va tulwa modolongo (16-24)

  • Omukeleli wodolongo novaneumbo laye va ninginifwa (25-34)

  • Paulus ta pula va pewe ombili kovapangeli (35-40)

16  Eshi Paulus a fika muDerbe nomuListra, okwa hanga mo omuhongwa wedina Timoteus oo a dalwa komukainhu Omujuda omwiitaveli, naxe okwa li Omugreka.  Timoteus okwa li e na epopilo liwa mokati kovamwatate vomuListra nomuIkonium.  Paulus okwa li a halelela okuya naTimoteus, onghee okwe mu kufa nokwe mu pitifa etanda omolwOvajuda ovo va li moilando oyo, molwaashi aveshe ova li ve shii kutya xe Omugreka.  Ova enda noilando tava lombwele ovamwatate va diinine osho sha tokolwa kovayapostoli nokovakulunhu vomuJerusalem.  Opo nee eitavelo lovamwatate momaongalo oo ola li la pamekwa, nomuvalu wavo owa enda tau hapupala efiku keshe.  Ndele ova ya kuFrigia nokuGalatia molwaashi omhepo iyapuki oya li ye va kelela vaha udife eendjovo daKalunga moshitukulwa shaAsia.  Eshi ve uya kuMisia, ova li tava kendabala okuya kuBitinia, ndele Jesus okwe va kelela ko okupitila momhepo iyapuki.  Onghee ove uya kuTroas va pitila muMisia.  Paulus okwa mona emoniko oufiku omulumenhu Omumakedonia e li ofika puye te mu indile ta ti: “Ila kuMakedonia u tu kwafele.” 10  Diva eshi Paulus a mona emoniko olo, otwa ya kuMakedonia molwaashi otwa li twa didilika kutya Kalunga oye te tu tumu tu ke va udifile onghundana iwa. 11  Opo nee otwa dja noshikepa muTroas notwa ya twa yukilila kuSamotrake, ndele mefiku la shikula ko otwa ya kuNeapolis. 12  Okudja opo otwa ya kuFilippi, oshilando sha fimanenena shomuMakedonia osho sha li koshi youhamba waRoma. Moshilando osho otwa kala mo oule womafiku onhumba. 13  Ndele mefiku lEshabata otwa ya kondje yoshilando popepi nomulonga, oko twa li twa uda kutya oku na onhele yokwiilikanena. Onghee otwa kala omutumba ndele hatu hovele okuudifila ovakainhu ovo va li va ongala. 14  Omukainhu omutilikalunga wedina Lidia a dja kuTiatira, oo a li ha landifa oiyata* yoluvala lipeepela, okwa li ta pwilikine, na Jehova okwa li a patulula omutima womukainhu oo opo a yandje elitulemo keendjovo daPaulus. 15  Eshi Lidia novaneumbo laye va ninginifwa, okwe tu indila ta ti: “Ngeenge omu wete kutya ondi li omudiinini kuJehova, ileni mu kale meumbo lange.” Onghee okwa kala te tu lilile tu ye naye. 16  Ndele fimbo twa li hatu i konhele yokwiilikanena, otwa li twa shakeneka omupiya umwe okakadona oo a li e na ondemoni. Okakadona oko oka li haka xunganeke onakwiiwa,* noovene vako ova li hava likola oupuna muhapu mokuxunganeka kwako. 17  Oka kala ke tu landula taka ingida taka ti: “Ovalumenhu ovo ovapiya vaKalunga Omukombadambada notave mu udifile ondjila yexupifo.” 18  Oka kala taka ningi ngaho omafiku mahapu. Xuuninwa, Paulus okwa ka loloka, ndele ta piluka nokwa lombwela ondemoni oyo ya li muko ta ti: “Medina laJesus Kristus ohandi ku lombwele, dja mo muko.” Opo nee oya dja mo diva. 19  Eshi oovene vako va mona kutya omukalo wavo wokulikola owa iwa moshipala, ova kwata po Paulus naSilas, ndele tave va twala kovakulunhu voshilando konhele yomalandifilo. 20  Ova lombwela ovakulunhu voshilando tava ti: “Ovalumenhu ava otava piyaaneke unene oshilando shetu. Vo Ovajuda, 21  ndele otave tu udifile oinima oyo inatu pitikwa tu ninge tu li Ovaroma.” 22  Ongudu yovanhu oye va ponokela, novakulunhu voshilando ova pombaula oikutu yavo, ndele tava yandje elombwelo va dengwe neengola. 23  Konima eshi ve va hepeka neenghono, ove va tula modolongo nova lombwela omukeleli wodolongo e va pashukile. 24  Eshi a pewa elombwelo olo, okwe va tula mokanduda kodolongo komeni, ndele ta tula eemhadi davo meti. 25  Ndele mokati koufiku, ovanadolongo ova li tava pwilikine eshi Paulus naSilas tava ilikana notava imbi tava hambelele Kalunga. 26  Ohaluka opa ningwa ekakamo ledu linene, nodolongo oya li ya kakama. Opo nee omivelo adishe dodolongo oda yeuluka nomalyenge ovanadolongo okwa li a yululuka. 27  Eshi omukeleli wodolongo a penduka nokwa mona kutya omivelo oda yeuluka, okwa kufa eongamukonda laye e lidipae molwaashi okwa li ta diladila kutya ovanadolongo ova dja mo. 28  Paulus okwa ingida mokule ta ti: “Ino lidipaa; atushe omo tu li!” 29  Omukeleli wodolongo okwa pula a pewe olamba nokwa tondokela meni ta kakama unene, ndele ta tu eengolo peemhadi daPaulus naSilas. 30  Okwe va twala pondje, ndele te va pula ta ti: “Ovafimanekwa, oshike ndi na okuninga opo ndi xupifwe?” 31  Ova ti: “Itavela Omwene Jesus opo u ka xupifwe pamwe novaneumbo loye.” 32  Opo nee ove mu udifila eendjovo daJehova pamwe novaneumbo laye aveshe. 33  Oufiku oo tuu oo, okwa ya pamwe navo ndele ta hakula oipute yavo. Opo nee okwa ninginifwa diva pamwe novaneumbo laye aveshe. 34  Okwe va twala meumbo laye ndele te va longekidile oikulya, nokwa li a hafa neenghono pamwe novaneumbo laye aveshe eshi va itavela Kalunga. 35  Eshi kwa sha, ovakulunhu voshilando ova tuma ovanambelewa va ka lombwele omukeleli wodolongo tava ti: “Mangulula ovalumenhu ovo.” 36  Omukeleli wodolongo okwa lombwela Paulus eendjovo odo, ta ti: “Ovakulunhu voshilando ova tuma ovalumenhu opo nye vavali mu mangululwe. Djeni mo, ndele tamu i nombili.” 37  Paulus okwa tya kovanambelewa: “Ove tu dengifa moipafi yovanhu nove tu tula modolongo inatu tokolwa nonande fye Ovaroma. Omolwashike paife va hala oku tu mangulula mo meholeko? Osho itashi shiiva nandenande; nave uye vo vene ve tu pitife mo.” 38  Ovanambelewa ova ka lombwela ovakulunhu voshilando eendjovo odo. Eshi ovakulunhu voshilando va uda kutya ovalumenhu ovo Ovaroma, ova li va tila neenghono. 39  Opo nee ove uya ndele tave va pe ombili, nokonima eshi ve va mangulula mo, ove va lombwela va dje mo moshilando. 40  Eshi va dja modolongo, ova ya keumbo laLidia, naashi va mona ovamwatate, ove va twa omukumo, ndele tava i.

Eshangelo lopedu

Ile “ondomo.”
Ile “haka nyanekele.”