Lukas 7:1-50

  • Eitavelo lomukulunhu wetangakwaita (1-10)

  • Jesus ta nyumuna omonamati womufiyekadi muNain (11-17)

  • Johannes Omuninginifi ta tangwa (18-30)

  • Epupi li na omitwe dikukutu tali tokolwa (31-35)

  • Omukainhu omulunde ta diminwa po (36-50)

    • Efaneko li na sha novanhu ve na oikolo (41-43)

7  Eshi Jesus a mana okupopya osho a li ta lombwele ovanhu, okwa ya kuKapernaum.  Ndele umwe womovapiya vomukulunhu wetangakwaita okwa li ta vele unene nokwa li e li pokufya, nomupiya oo okwa li e holike komwene waye.  Eshi a uda kombinga yaJesus, okwa tuma ovakulunhu vamwe vOvajuda ve ke mu ifane e uye a velule omupiya waye.  Ovakulunhu ovo ove uya kuJesus nova hovela oku mu indila va mana mo, tava ti: “Owa wana oku mu kwafela,  osheshi oku hole oshiwana shetu nokwe tu tungila oshinagoga.”  Opo nee Jesus okwa ya pamwe navo. Ndele fimbo a li pokufika meumbo, omukulunhu wetangakwaita okwa tuma ookaume kaye ve mu lombwele tava ti: “Omufimanekwa, ino lihepeka osheshi ame inandi wana oku ku tambula meumbo lange.  Onda mona yo kutya inandi wana okuuya kwoove. Popya ashike ondjovo ndele omupiya wange ta veluka.  Ame naame omupangelwa, nondi na yo ovakwaita handi va wilike; ngeenge nda ti kuumwe, ‘Inda!’ ota i, nongeenge onda ti kumukwao, ‘Ila!’ ote uya, ile ngeenge onda ti komupiya wange, ‘Ninga shonhumba!’ ote shi ningi.”  Ndele eshi Jesus a uda oinima oyo, okwa li a kumwa, ndele ta piluka nokwa tya kongudu yovanhu oyo ya li ye mu shikula: “Ohandi mu lombwele, muIsrael inandi mona mo nande oumwe e na eitavelo la kola la tya ngaho.” 10  Eshi ovo va li va tumwa va alukila keumbo, ova hanga omupiya oo a veluka. 11  Ndele diva konima yaasho, Jesus okwa ya pamwe novahongwa vaye nosho yo ongudu inene yovanhu koshilando shedina Nain. 12  Eshi a ehena popepi noshivelo shoshilando, okwa mona ovanhu va humbata omudimba. Nakufya oo okwa li ewifa lomufiyekadi. Omufiyekadi oo okwa li yo pamwe nongudu inene yovanhu ya dja moshilando osho. 13  Eshi Jesus a mona omufiyekadi oo, okwe mu kenukila, ndele ta ti kuye: “Ino lila vali.” 14  Okwa ehena popepi ndele ta kwata kolutala, naavo ve li humbata ova kanghama. Okwa tya komumati oo a fya: “Omunyasha, ohandi ku lombwele, penduka!” 15  Opo nee nakufya okwa nyumuka nokwa fikama ndele ta hovele okupopya, na Jesus okwe mu yandja kuina. 16  Ovanhu ova li va tila unene ndele tava hovele okuhambelela Kalunga tava ti: “Mokati ketu omwa holoka omuprofeti munene,” nonokutya, “Kalunga okwa dimbuluka oshiwana shaye.” 17  Ndele ehokololo li na sha naJesus ola tandavela muJudea ashishe nomoitukulwa aishe oyo ye shi dingilila. 18  Ovahongwa vaJohannes ove mu hokololela oinima aishe oyo. 19  Opo nee Johannes okwa ifana ovahongwa vaye vavali ndele te va tumu kuJesus ve mu pule tava ti: “Oove tuu ou e na okuuya, ile otu na okuteelela umwe e lili?” 20  Eshi ve uya kuJesus, ova tya kuye: “Johannes Omuninginifi okwe tu tuma kwoove tu ku pule kutya, ‘Oove tuu ou e na okuuya, ile otu na okuteelela umwe e lili?’” 21  Ndele pefimbo opo tuu opo, okwa velula ovanhu vahapu ovo va li ve na omaudu e lili noku lili, a twikulula ovapofi vahapu nokwa ta mo eemhepo da nyata. 22  Jesus okwe va nyamukula ta ti: “Indeni mu ka lombwele Johannes osho mwa uda naasho mwa mona: Ovapofi paife ove wete ko, oingudu otai ende, ovanashilundu otava velulwa, ovafitamatwi ove udite ko, ovafi otava nyumunwa neehepele otadi udifilwa onghundana iwa. 23  Ou ita limbililwa nge* ota kala a hafa.” 24  Fimbo ovo va li va tumwa kuJohannes tava i, Jesus okwa hovela okupopya neengudu dovanhu kombinga yaJohannes ta ti: “Omwa ka talele shike mombuwa? Mbela olumbungu tali telaanifwa komhepo? 25  Oshike naanaa mwa ka talele? Mbela omulumenhu a djala oikutu yondilo?* Ovo hava djala oikutu yondilo ohava kala meenhele diwa, momaumbo eehamba. 26  Omolwashike hano mwa ile mombuwa? Kamwa li mwa ka tala hamba omuprofeti? Ashike ohandi mu lombwele, ye oku dule kokule omuprofeti. 27  Oye a popiwa eshi kwa shangwa taku ti: ‘Tala, ame ohandi tumu omutumwa wange e ku tetekele,* oo te ke ku longekidila ondjila.’ 28  Ohandi mu lombwele, mwaava va dalwa kovakainhu kamu na nande oumwe e dule Johannes, ashike omunhu ou munini mOuhamba waKalunga oku mu dule.” 29  (Eshi ovanhu aveshe mwa kwatelwa ovafendelifi ve shi uda, ova popya kutya Kalunga omuyuki, molwaashi ova li va ninginifwa kuJohannes. 30  Ndele Ovafarisai novanongo vomhango kava li va hala okudulika komayele aKalunga oo va li tava pewa kuJohannes, molwaashi kava li va ninginifwa kuye.) 31  Jesus okwa twikila ko ta ti: “Epupi eli ohandi li yelekanifa nashike, nola fa oolyelye? 32  Ola fa ounona ve li omutumba pomalandifilo tava ingida vakwao, tava ti: ‘Otwe mu shikila eenyalilo, ndele inamu dana; otwa imba omaimbilo eenghali, ashike inamu lila.’ 33  Sha faafana, Johannes Omuninginifi okwe uyile ita li omungome noita nu omaviinyu, ndele otamu ti: ‘Oku na ondemoni.’ 34  Omona womunhu okwe uya ta li nota nu, ndele otamu ti: ‘Tala, omulumenhu ou omufukenhu nongholwe,* kaume kovafendelifi nokovalunde!’ 35  Ashike ounongo ohau hololwa koilonga* yao ya yuka.” 36  Umwe womOvafarisai okwa pula Jesus va ka lye pamwe naye. Opo nee Jesus okwa ya meumbo lOmufarisai oo, ndele ta kala omutumba poshitaafula. 37  Ndele tala, omukainhu umwe oo a li a shiivika moshilando ashishe kutya omulunde, eshi a uda kutya Jesus ota li* meumbo lOmufarisai oo, okwa ya ko e na oshanga yomaadi edimba liwa. 38  Okwa twa eengolo konima yaJesus, ta lili ndele ta hovele okututika eemhadi daye nomahodi, noku a pushula ko neexwiki daye. Okwe mu xupita yo keemhadi nokwe di vaeka omaadi edimba liwa. 39  Eshi Omufarisai oo a li e mu ifana e shi mona, okwe lipopila ta ti: “Omulumenhu ou ngeno okwa li omuprofeti shili, ngeno okwa didilika kutya omukainhu ou te mu kumu okwa tya ngahelipi. Ngeno oku shii kutya omulunde.” 40  Jesus okwa tya kuye: “Simon, onda hala oku ku lombwela sha.” Simon okwa tya: “Eewa Muhongi, popya.” 41  “Opa li ovalumenhu vavali va lya oikolo komulumenhu wonhumba; umwe okwa lya oikolo yeedenari 500, ofimbo mukwao 50. 42  Ndele eshi va li va nyengwa oku i shunifa, okwe va dimina po aveshe. Mbela olyelye womwaava vavali ta ka kala e mu hole unene?” 43  Simon okwa nyamukula ta ti: “Ondi wete kutya oyou a diminwa po oikolo ihapu.” Jesus okwa tya kuye: “Owa nyamukula sha yuka.” 44  Opo nee Jesus okwa tala komukainhu, ndele ta ti kuSimon: “Ou wete omukainhu ou? Onde uya meumbo loye ndele ino pa nge omeva okulikosha keemhadi. Ndele omukainhu ou okwa tutika eemhadi dange nomahodi nokwe a pushula ko neexwiki daye. 45  Ove ino xupita nge, ndele omukainhu ou, okudja ngoo eshi nde uya omu, ina efa okuxupita eemhadi dange. 46  Ove ino vaeka omutwe wange omaadi, ndele omukainhu ou okwa vaeka eemhadi dange omaadi edimba liwa. 47  Onghee ohandi ku lombwele, omatimba aye nonande omahapu, okwa dimwa po, osheshi oku hole nge unene. Ndele ou a diminwa po manini, ohole yaye oinini.” 48  Opo nee okwa tya komukainhu: “Omatimba oye okwa dimwa po.” 49  Ovo va li omutumba naye poshitaafula ova li va hovela okupulafana tava ti: “Omulumenhu ou okwa tya naanaa ngahelipi, ta dimi po nokuli nomatimba?” 50  Jesus okwa tya komukainhu oo: “Eitavelo loye ole ku xupifa; inda nombili.”

Eshangelo lopedu

Eln., “Ou ite lipumu mwaame nokulidenga po.”
Ile “oikutu youdjeko?”
Eln., “komesho yoye.”
Ile “nomufinyuni womaviinyu.”
Ile “koidjemo.”
Ile “oku li omutumba poshitaafula.”