Lukas 3:1-38

  • Johannes ta hovele oilonga yaye (1, 2)

  • Johannes ta udifa kombinga yeninginifo (3-20)

  • Okuninginifwa kwaJesus (21, 22)

  • Omusholondodo wepata laJesus Kristus (23-38)

3  Momudo 15 wepangelo lOmukesari Tiberius, Pontius Pilatus okwa li ngoloneya waJudea, Herodes* okwa li omupangeli woshitukulwalongo* shaGalilea, omumwaina Filippus okwa li omupangeli woshitukulwalongo shaIturea naTrakonitis, Lisanias okwa li omupangeli woshitukulwalongo shaAbilene,  Hannas okwa li omupristeri omukulunhu, naKajafas omupristeri munene. Pefimbo opo Kalunga okwa li a yandja etumwalaka kuJohannes omona waSakaria eshi a li mombuwa.  Opo nee Johannes okwa ya moitukulwa aishe oyo ya dingilila Jordan, ndele ta udifile ovanhu kutya ove na okuninginifwa va ulike kutya ove lidilulula opo va diminwe po omatimba avo,  ngaashi sha shangwa membo lomuprofeti Jesaja, a ti: “Ondaka otai ingida mombuwa, tai ti: ‘Longekidileni Jehova ondjila! Lalakanifeni omalila aye.  Omalufilu aeshe naa fufilwe, eemhunda adishe noikulundudu nai lalakanifwe, eendjila da ngolyoka nadi yukililifwe, neendjila domalambo nadi lalakanifwe;  opo ovanhu aveshe* va mone nghee Kalunga te ke va xupifa.’”  Opo nee okwa lombwela eengudu dovanhu odo da li de uya okuninginifwa kuye, ta ti: “Oludalo lomayoka omauta nye, olyelye e mu londwela mu ye onhapo efiku lehandu laKalunga?  Onghee hano, imikeni oiimati oyo tai ulike elidilululo. Inamu tya, ‘Fye otu na tate yetu Abraham.’ Osheshi ame ohandi mu lombwele kutya Kalunga ota dulu okushitila Abraham ovana okudja momamanya aa.  Ekuva ola tulwa nale pefina lomuti. Omuti keshe oo ihau ima oiimati iwa otau kewa po ndele tau ekelwa momundilo.” 10  Ndele eengudu dovanhu ode mu pula da ti: “Otu na okuninga po shike?” 11  Opo nee okwa tya kuvo: “Keshe ou e na oikutu ivali* na yandje shimwe kwaau ehe na sha, naau e na oikulya na ninge sha faafana.” 12  Nokuli novafendelifi ovo va li ve uya okuninginifwa ova tya kuye: “Omuhongi, oshike tu na okuninga po?” 13  Okwa tya kuvo: “Inamu futifa oifendela ya pitilila pwaayo ya tulwa po.” 14  Ovakwaita navo ove mu pula va ti: “Oshike tu na okuninga po?” Johannes okwa tya kuvo: “Inamu nyeka ovanhu ile mu va lundile opo mu pewe ombubo, ndele kaleni mwa wanenwa kwaasho mu na.”* 15  Molwaashi ovanhu ova li va teelela Kristus, aveshe ova li tave lipula kombinga yaJohannes tava ti, “Pamwe ou oye Kristus?” 16  Johannes okwe va nyamukula aveshe a ti: “Ame ohandi mu ninginifa momeva, ashike ou te uya konima yange oku na eenghono e dule nge, noinandi wana nokuli okumangulula eemwiya deenghaku daye. Ye ote ke mu ninginifa nomhepo iyapuki nosho yo nomundilo. 17  Oku na oshiyelifo* meke laye, ndele ta kombo nawanawa oshipale shaye, noilya ote ke i tuvikila momaanda, ashike olungu ote ke li xwika po momundilo oo ihau dimi.” 18  Onghee okwe va lombwela oinima ikwao ihapu opo e va twe omukumo, nokwa twikila oku va udifila onghundana iwa. 19  Ndele Herodes, omupangeli woshitukulwalongo, okwa pewa omayele kuJohannes e na sha noilonga yaye aishe ii, naashi a kufa po Herodias, omukulukadi wamumwaina. 20  Herodes okwa longa yo omunyonena eshi a idililifa Johannes modolongo. 21  Konima eshi Johannes a ninginifa vahapu, okwa ninginifa yo Jesus. Fimbo Jesus a li ta ilikana, eulu ola yeuluka, 22  nomhepo iyapuki ya fa onghuti oya kulukila kuye. Opo nee meulu omwa dja ondaka tai ti: “Ove Omona wange omuholike; onde ku hokwa.” 23  Eshi Jesus a hovela oilonga yaye yokuudifa, okwa li e na omido 30 lwaapo. Ovanhu ova li ve mu tala ko e liomona waJosef,oo a li omona waEeli, 24  omona waMatat,omona waLevi,omona waMelki,omona waJannai,omona waJosef, 25  omona waMatatia,omona waAmos,omona waNahum,omona waEsli,omona waNagai, 26  omona waMaat,omona waMatatia,omona waSemei,omona waJosek,omona waJooda, 27  omona waJohanan,omona waResa,omona waSerubbabel,omona waSalatiel,omona waNeri, 28  omona waMelki,omona waAddi,omona waKosam,omona waElmadam,omona waEr, 29  omona waJesus,*omona waElieser,omona waJorim,omona waMatat,omona waLevi, 30  omona waSimeon,omona waJudas,omona waJosef,omona waJonam,omona waEliakim, 31  omona waMelea,omona waMenna,omona waMatat,omona waNatan,omona waDavid, 32  omona waIsai,omona waObed,omona waBoas,omona waSalmon,omona waNashon, 33  omona waAminadab,omona waArni,omona waHesron,omona waPeres,omona waJuda, 34  omona waJakob,omona waIsak,omona waAbraham,omona waTera,omona waNahor, 35  omona waSeruh,omona waRehu,omona waPeleg,omona waEber,omona waShela, 36  omona waKainan,omona waArfasad,omona waSem,omona waNoa,omona waLamek, 37  omona waMetusala,omona waHenok,omona waJared,omona waMahalalel,omona waKainan, 38  omona waEnos,omona waSet,omona waAdam,omona waKalunga.

Eshangelo lopedu

Sha hala okutya, Herodes Antipas. Tala omafatululo oitya.
Eln., “omupangeli woshitine shoshilongo.”
Ile “ombelela aishe.”
Ile “oshikutu sha wedwa po.”
Ile “kondjabi yeni.”
Ile “oshilongifo shokuyela oilya.”
“Joses,” pamashangelo amwe onale.