2 Timoteus 3:1-17

  • Omafimbo madjuu momafiku axuuninwa (1-7)

  • Shikula filufilu oshihopaenenwa shaPaulus (8-13)

  • “Diinina oinima oyo we lihonga” (14-17)

    • Omishangwa adishe oda nwefwa mo kuKalunga (16)

3  Kala u shi shii kutya momafiku axuuninwa otapa ka kala omafimbo madjuu okukaliwa muo.  Osheshi ovanhu otava ka kala ve lihole vo vene, ovanalwisho voimaliwa, ovalitangi, ovalinenepeki, ovasheki, ihava dulika kovadali, vehe shii okupandula, vehe fi ovadiinini,  vehe na ohole, vehe na elongelokumwe, ovalundili, vehe na elipangelo, ovakwanyanya, ovatondi vouwa,  ovakengeleledi, ve na omitwe dikukutu,* ve na ounhwa, ve hole omalihafifo ponhele yokuhola Kalunga,  have limonikifa va fa ovatilikalunga, ndele ihava kala metwokumwe nonghedi omo Kalunga a hala okulongelwa; ovanhu va tya ngaho va kala kokule.  Mokati kovanhu ovo otamu ka dja ovalumenhu ovapukifi ovo tave ke livakela momaumbo ovakainhu ovo va nghundipala nova pikwa koulunde nokomahalo e lili noku lili, ndele tava yulu omitima davo.  Nonande ovanhu ovo alushe ohave lihongo, ihava kala ve udite ko nandenande oshili.  Ndele ngaashi Jannes naJambres va li omhinge naMoses, ovanhu ovo navo ove li omhinge noshili. Ovanhu va tya ngaho ove na omadiladilo mai, na Kalunga ine va hokwa molwaashi kave na eitavelo.  Kakele kaasho, itava ka ninga exumokomesho molwaashi oulai wavo otau ka kala u liwetikile kwaaveshe, ngaashi wovalumenhu ovo vavali. 10  Ndele ove owa landula filufilu ehongo lange, eenghedi dange, elalakano, eitavelo, onheni, ohole nelididimiko lange. 11  Kakele kaasho, ou shii nghee nda li handi hepekwa nokumona oixuna muAntiokia, muIkonium nomuListra. Ashike onde lididimikila omahepeko oo, nOmwene okwa xupifa nge mo muo aeshe. 12  Aveshe ovo va hala okulongela Kalunga ve li ovahongwa vaKristus Jesus navo otava ka hepekwa. 13  Ovakolokoshi novapukifi otava ka xuma komesho mokulonga owii, notava ka pukifwa nokupukifa ovanhu vakwao. 14  Ndele ove diinina oinima oyo we lihonga nowa tomhwa u itavele, osheshi ou shii ou e i ku honga 15  nou shii omishangwa diyapuki okdja kounona, odo tadi ku kwafele u kale u na eendunge opo u dule okuxupifwa omolweitavelo loye muKristus Jesus. 16  Omishangwa adishe oda nwefwa mo kuKalunga, notadi dulu okuhonga, okupukulula, okuyukifa oinima nokutekula mouyuki, 17  opo omupiya waKalunga a kale a wana okulonga filufilu oshilonga keshe shiwa.

Eshangelo lopedu

Ile “ihava tambula ko omayele.”