2 Timoteus 1:1-18

  • Epopifo (1, 2)

  • Paulus ta pandula Kalunga omolweitavelo laTimoteus (3-5)

  • Longifa oshali oyo wa pewa kuKalunga u na exwamo (6-11)

  • Diinina eendjovo diwa (12-14)

  • Ovatondi nookaume kaPaulus (15-18)

1  Ame Paulus, omuyapostoli waKristus Jesus pahalo laKalunga nometwokumwe nomwenyo oo twa udanekelwa okupitila muKristus Jesus,  ohandi shangele omumwange omuholike Timoteus: Efilonghenda nombili yaKalunga Tate noyOmwene wetu Kristus Jesus nai kale pamwe naave.  Ohandi pandula unene Kalunga, ou handi longele oilonga iyapuki ngaashi ootatekulululwa va li hava ningi, ndi na eliudo la koshoka noihandi dimbwa oku ku tumbula momaindilo ange omutenya noufiku.  Ngeenge handi dimbuluka omahodi oye, ohashi ningifa nge ndi kale nda halelela oku ku mona, opo ndi kale nda hafa neenghono.  Osheshi ohandi dimbuluka eitavelo loye lihe na oihelele, olo nyokokulu Loide nanyoko Eunike ve na, nonde lineekela kutya natango ou li na.  Onghee ohandi ku dimbulukifa u kale wa xwama ngaashi omundilo eshi to longifa oshali oyo wa pewa kuKalunga eshi nde ku tenheka omake.  Osheshi Kalunga ine tu pa omhepo youmbada, ndele oyeenghono, yohole noyeendunge dokuyoolola.  Onghee ino fya ohoni okuudifa kombinga yOmwene wetu ile u fye nge ohoni eshi ndi li modolongo omolwaye, ndele lididimikila omaudjuu omolwonghundana iwa nokukala we lineekela meenghono daKalunga.  Okwe tu xupifa nokwe tu ifana tu kale ovayapuki, hamolwoilonga yetu, ndele omolwefilonghenda nomolwelalakano laye. Okwe tu ulikila nalenale efilonghenda laye okupitila muKristus Jesus. 10  Ashike paife oli liwetikile nawanawa okupitila mokuhololwa kwOmuxupifi wetu, Kristus Jesus, oo a xulifa po efyo nokwe tu hololela nghee hatu dulu okukala nomwenyo nosho yo nomalutu ihaa xulu po okupitila monghundana iwa, 11  oyo nda nangekwa po ndi kale omuudifi, omuyapostoli nomuhongi wayo. 12  Ohandi mono oixuna omolwoilonga oyo handi longo, ndele inandi fya ohoni. Osheshi Kalunga oo nda itavela ondi mu shii nonde lineekela kutya ota dulu okupashukila oinima aishe oyo nde mu lineekelela fiyo okefiku letokolo. 13  Diinina oshihopaenenwa shi na sha neendjovo diwa* odo wa uda kwaame, nokuulika ohole neitavelo olo u na eshi u na ekwatafano naKristus Jesus. 14  Pashukila emona olo we lineekelelwa okupitila momhepo iyapuki, oyo i li mufye. 15  Ou shi shii kutya ovanhu aveshe moshitukulwa shaAsia ova amuka ko kwaame, mwa kwatelwa Figelus naHermogenes. 16  Omwene na file onghenda ovaneumbo laOnesiforus, osheshi okwa kala ha hekeleke nge alushe, noina fya nge ohoni eshi ndi li modolongo. 17  Kakele kaasho, eshi a li muRoma, okwa li a konga nge noudiinini fiyo osheshi a mona nge. 18  Omwene Jehova ne mu file onghenda mefiku letokolo. Ou shii oilonga aishe oyo a longela nge muEfeso.

Eshangelo lopedu

Ile “tadi tungu.”