2 Ovakorinto 6:1-18

  • Inamu hepifa efilonghenda laKalunga (1, 2)

  • Oilonga yokuudifa yaPaulus ya yelifwa (3-13)

  • Inamu humbata ondjoko imwe (14-18)

6  Tu li ovalongi pamwe naKalunga, ohatu mu kumaida yo mu tambule ko efilonghenda laKalunga nomu kale mu shii elalakano lalo.  Osheshi Kalunga okwa ti: “Onde ku uda pefimbo la wapala, nonde ku kwafa mefiku lexupifo.” Tala, paife eli olo efimbo la wapala. Tala, paife eli olo efiku lexupifo.  Fye itatu pundukifa omunhu moshinima nande oshimwe opo oilonga oyo hatu longele Kalunga iha shekwe.  Ohatu ulike moinima aishe kutya fye ovapiya vaKalunga: Ohatu lididimikile omayeleko e lili noku lili, omaudjuu, omafimbo madjuu, omaupyakadi,  okudengwa, okutulwa modolongo, omaponokelo ovakolokoshi, okulonga oilonga idjuu, ondjala nosho yo okuhakofa omaufiku amwe.  Otu na onghalamwenyo ya koshoka, eshiivo, onheni, olune, ohatu efa omhepo iyapuki i tu wilike notu na ohole ihe na oihelele.  Ohatu popi oshili, otwe lineekela eenghono domhepo yaKalunga notwa humbata oilwifo youyuki meke lokolulyo nolokolumosho.*  Ohatu fimanekwa nokudinwa, hatu tangwa nohatu shekwa. Nonande ohatu popi oshili, ovanhu ove tu tala ko tu li ovapukifi.  Nonande Kalunga oku tu shii, otwa talika ko ngaashi ovanhu vehe shiivike. Nonande otu na omwenyo, otwa talika ko ngaashi ovanhu ve li pokufya.* Nonande inatu dipawa, otwa talika ko onga ovo va handukilwa.* 10  Nonande otwa hafa, otwa talika ko twa fa twa nyika oluhodi. Nonande ohatu punapalifa vahapu, otwa talika ko ngaashi eehepele. Nonande otu na oinima aishe, otwa talika ko twa fa tuhe na sha. 11  Ovakorinto nye, otwe mu lombwela oshili* notwe mu mbwalangadjekela omitima detu. 12  Otwe mu ulikila ohole ya xwama, ndele nye inamu tu ulikila ohole ya xwama. 13  Ohandi popi nanye ngaashi ovana vange, nanye ningeni ngaashi twa ninga, mbwalangadjekeni omitima deni. 14  Inamu humbata ondjoko imwe pamwe* naava vehe na eitavelo. Ouyuki ou na ekwatafano lashike nouhenouyuki? Ile ouyelele ou na ekwatafano lashike nomulaulu? 15  Mbela Kristus naBelial* ohava longele kumwe? Ile omwiitaveli* oku na ekwatafano lashike naao ehe fi omwiitaveli? 16  Oikalunga itai dulu okukala motembeli yaKalunga. Osheshi ofye otembeli yaKalunga omunamwenyo, ngaashi Kalunga a ti: “Ohandi ka kala mokati kavo nokweenda mokati kavo, nohandi ka ninga Kalunga kavo, ndele tava ka ninga oshiwana shange.” 17  “Jehova okwa ti: ‘Djeni mo mokati kavo nokuliyoolola mo.’ ‘Inamu kuma osho sha nyata,’” “‘opo nee ohandi mu tambula ko.’” 18  “Jehova Omunaenghono adishe okwa ti yo: ‘Ohandi ka ninga xo yeni, ndele nye otamu ka ninga ovanamati novanakadona vange.’”

Eshangelo lopedu

Tashi dulika omolweameno.
Ile “va wana okufya.”
Ile “va pewa outekuduliko.”
Ile “otwa popya twa manguluka.”
Ile “inamu limbwanga mumwe.”
Oshitya shOshiheberi tashi ti, “omunhu wongaho.” Oshilukadina shaSatana.
Ile “omudiinini.”