1 Timoteus 3:1-16

  • Oiteelelwa yokuninga omukulunhuongalo (1-7)

  • Oiteelelwa yokuninga omuyakuliongalo (8-13)

  • Oshiholekwa shiyapuki shi na sha netilokalunga (14-16)

3  Eendjovo edi odi shii okulineekelwa, edi tadi ti: Ngeenge ope na ou ta lalakanene okuninga omukulunhuongalo, okwe lihalela oshilonga shiwa.  Omukulunhuongalo oku na okukala e na elihumbato liwa, omushamane e na omukulukadi umwe, e na ondjele, eendunge,* elandulafano, e shii okuyakula ovaenda, e shii okuhonga,  ke na okukala ongholwe, omukwanyanya, e hole okutanguna ile e na olwisho loimaliwa, ndele oku na okukala e na ondjele,  omulumenhu ha file oshisho* ovaneumbo laye, e na ounona hava dulika nove na elihumbato liwa.  (Osheshi ngeenge omulumenhu ita dulu okufila oshisho* ovaneumbo laye, ongahelipi ta ka dula okufila oshisho eongalo laKalunga?)  Ke na okukala opo a ningi omwiitaveli, opo aha kwatwe kounhwa, ndele ta tokolwa ngaashi Ondiaboli.  Oku na yo okukala ha popilwa mouwa* kwaavo vehe fi ovaitaveli, opo aha shekwe kovanhu nokuwila momwiyo wOndiaboli.  Ovayakuliongalo nava kale ve shii okulineekelwa, vehe na eendaka mbali,* kave na okukala hava nu oikolwifa sha pitilila, vehe fi ovanalwisho voimaliwa noihava kongo ouwa wavo vene,  ndele ove na okudiinina eitavelo olo li li oshiholekwa shiyapuki shaKalunga ve na eliudo la koshoka. 10  Kakele kaasho, nava talike tete ngeenge ova wana okuyakula, nongeenge ova wana, nava ninge ovayakuliongalo molwaashi ove na elihumbato liwa. 11  Ovakainhu navo nava kale ve shii okulineekelwa, havalundili, ndele nava kale ve na ondjele novadiinini moinima aishe. 12  Omuyakuliongalo oku na okukala omushamane e na omukulukadi umwe, e shii okufila oshisho nawa ovana novaneumbo laye aveshe. 13  Osheshi ovalumenhu ovo tava yakula nawa otave liningile edina liwa notava kala ve na emanguluko lokupopya shi na sha neitavelo lavo muKristus Jesus. 14  Ohandi mu shangele kombinga yoinima ei nonande onda diladila okuuya kunye diva, 15  ndele ngeenge onda kala inandi uya, omu shii nghee mu na okukala meumbo laKalunga, sha hala okutya meongalo laKalunga omunamwenyo, olo tali yambidida nokupopila oshili. 16  Oshiholekwa shiyapuki shi na sha netilokalunga sha fimanenena osheshi: ‘Jesus okwa li a ninga omunhu wopambelela, naashi a ninga vali omunhu wopamhepo, Kalunga okwe mu tala ko omuyuki, a holoka moipafi yovaengeli, a udifilwa oiwana, a itavelwa kovanhu mounyuni, a ya meulu nokwa tumbalekwa.’

Eshangelo lopedu

Ile “eendunge dokuyoolola.”
Ile “ha ungaunga nawa.”
Ile “okuungaunga nawa.”
Ile “e li oshihopaenenwa shiwa.”
Ile “vehe na oihelele.”