1 Ovakorinto 2:1-16

  • Paulus ta udifile muKorinto (1-5)

  • Ounongo waKalunga owa denga mbada (6-10)

  • Eyooloko pokati komunhu wopambelela naao ha wilikwa komhepo iyapuki (11-16)

2  Ovamwatate, eshi nde uya kunye, inandi uya ko handi udifa oshiholekwa shiyapuki shaKalunga neendjovo ile nounongo wovanaendunge.  Inandi kala handi yandje elitulemo kushimwe shi lili, ndele okuJesus Kristus, oo a valelwa komuti.  Eshi nde uya kunye, onda li ndi na oungone, oumbada nonda li handi kakama neenghono.  Osho nda li handi udifa nosho yo eendjovo dange kada li eendjovo dounongo notadi tomho, ndele oda li tadi holola eenghono nomhepo yaKalunga  opo eitavelo leni liha kale la kanghamena kounongo wopanhu, ndele okeenghono daKalunga.  Ohatu popi shi na sha nounongo mokati kaavo ve na eitavelo la kola, ndele haunongo womounyuni ou* ile wovapangeli vomounyuni ou, ovo tava ka xulifwa po.  Ohatu popi kombinga yoshiholekwa shiyapuki, sha hala okutya ounongo waKalunga oo wa holekwa. Kalunga okwe u tula po nale fimbo ounyuni inau shitwa omolwefimano letu.  Ounongo oo inau shiivika kovapangeli vounyuni ou,* molwaashi ngeno ova li ve u shii, ngeno inava dipaa* Omwene Jesus.  Omishangwa oda ti: “Kape na ou a mona, ile a uda ile a diladila momutima waye oinima oyo Kalunga a tuvikilila ovo ve mu hole.” 10  Ndele Kalunga okwe i tu hololela okupitila momhepo yaye, osheshi omhepo iyapuki ohai holola oinima yomoule yaKalunga. 11  Olyelye e shii omadiladilo omunhu kakele komunhu mwene?* Sha faafana, kape na oo e shii omadiladilo aKalunga kakele komhepo yaye. 12  Fye inatu pewa omhepo younyuni, ndele otwa pewa omhepo yaKalunga opo tu shiive oinima oyo twa pewa kuKalunga pafilonghenda laye. 13  Ohatu popi oinima oyo twa hongwa komhepo yaKalunga, ndele hakounongo wopanhu, naasho ohatu shi ningi eshi hatu longifa eendjovo domhepo iyapuki opo tu yelife oinima yaKalunga. 14  Ndele omunhu oo ha diladila pambelela iha tambula ko oinima oyo tai hololwa komhepo yaKalunga, molwaashi kuye oyo oulai, noite i shiiva molwaashi ohai konakonwa pamhepo. 15  Omunhu oo ha wilikwa komhepo iyapuki oha konakona oinima aishe, ndele kape na ou ta dulu oku mu tokola. 16  “Olyelye e shii omadiladilo aJehova opo a dule oku mu pukulula?” Ashike fye otu shii omadiladilo aKristus.

Eshangelo lopedu

Ile “womonghalelo ei yoinima.” Tala omafatululo oitya.
Ile “vonghalelo ei yoinima.” Tala omafatululo oitya.
Ile “inava valela komuti.”
Ile “komhepo yaye.”