1 Ovakorinto 16:1-24

  • Okwoongelela Ovakriste vokuJerusalem eeshali (1-4)

  • Omhangela yolweendo laPaulus (5-9)

  • Etalelepo laTimoteus naApollos la unganekwa (10-12)

  • Omakumaido nomakundo (13-24)

16  Eshi tamu ongelele ovayapuki oimaliwa, ohandi mu indile mu shikule omulandu oo nda pa omaongalo Omugalatia.  Mefiku lotete loshivike keshe, keshe umwe womunye na ongele sha she likolelela kwaasho e na, opo muha ka ongele eshi handi uya.  Ndele ngeenge nda fiki kunye, ohandi ka tuma ovalumenhu ovo mwa popya monhumwafo kutya ove shii okulineekelwa opo va twale eeshali deni kuJerusalem.  Ngeenge otashi shiiva, naame ohandi ka ya pamwe navo.  Ohandi ke uya kunye handi dilile kuMakedonia molwaashi muMakedonia omo ndi na okupitila.  Ohandi ka kala yo punye efimbo lile ile nokuli okufu akushe opo mu ka findikile nge ondjilakati oku handi ka ya.  Inandi hala oku mu talela po paife okafimbo kaxupi, ndele onda hala okuuya ndi kale po efimbo lile, ngeenge Jehova e shi pitike.  Ndele ohandi kala muEfeso fiyo Oshivilo shOpentekoste,  osheshi omhito oya yeulukila nge* ndi longe shihapu, ashike ope na ovapataneki vahapu. 10  Ngeenge Timoteus okwa fiki kunye, longeleni kumwe naye opo aha kale e na omalipulo asha, osheshi ota longo oilonga yaJehova ngaashi ame. 11  Onghee hano, inamu mu dina. Mu lekeleni nombili opo e uye kwaame, osheshi onde mu teelela pamwe novamwatate. 12  Ndele shi na sha nomumwatate Apollos, onde mu ladipika e uye kunye pamwe novamwatate. Ka li a hala okuuya paife, ndele ote ke uya ngeenge okwa mono omhito. 13  Kaleni oupafi, kaleni mwa pama meitavelo, kaleni ovaladi nokukala mwa pamenena. 14  Keshe osho tamu ningi, shi ningeni pahole. 15  Ovamwatate, ohandi mu ladipike: Omu shi shii kutya ovaneumbo vaStefanas ovo va ninga ovahongwa votete muAkaia nova kala hava yakula noudiinini ovayapuki. 16  Nanye dulikeni kovanhu va tya ngaho nokwaaveshe ovo ve na elongelokumwe nohava longo noudiinini. 17  Onda hafa unene eshi Stefanas, Fortunatus naAkaikus ve uya, nova kwafela nge unene ponhele yeni. 18  Osheshi ove tu tweni omukumo.* Onghee hano, fimanekeni ovalumenhu va tya ngaho. 19  Otamu kundilwa po komaongalo okuAsia. Otamu kundilwa po yo nomutima aushe mu li ovashikuli vOmwene kuAkwila naPriskila nokeongalo olo hali ongalele meumbo lavo. 20  Ovamwatate aveshe otave mu kundile po. Kundilafaneni po nokuxupitafana pahole. 21  Ame Paulus ohandi mu tumine omakundo oo nda shanga ame mwene. 22  Ngeenge ope na ou ehe hole Omwene, na fingwe. Omwene wetu, ohatu ku indile, ila! 23  Efilonghenda lOmwene Jesus nali kale nanye. 24  Ondi mu hole amushe molwaashi omu li ovahongwa vaKristus Jesus.

Eshangelo lopedu

Eln., “oshivelo shinene osha yeulukila nge.”
Eln., “ova talaleka eemwenyo detu.”