1 Ovakorinto 12:1-31

  • Eeshali dopamhepo (1-11)

  • Olutu limwe, ndele oilyo oihapu (12-31)

12  Ovamwatate, onda hala mu kale mu shii nawa kombinga yeeshali da dja kuKalunga.  Omu shi shii kutya fimbo inamu ninga ovaitaveli,* omwa li mwa pukifwa mu lambalale nokulongela oikalunga ihai popi.  Onda hala mu shiive kutya kape na ou ta dulu okupopya ta wilikwa komhepo yaKalunga ta ti: “Jesus okwa fingwa,” nokape na ou ta dulu okutya: “Jesus Omwene,” okuninga ta wilikwa komhepo iyapuki.  Ope na eeshali da yoolokafana, ndele adishe oda yandjwa komhepo iyapuki.  Ope na oilonga ya yoolokafana, ndele aishe oyOmwene.  Kalunga oha kwafele ovanhu meenghedi da yoolokafana va longe oilonga ya yoolokafana, ndele Kalunga oo umwe aeke.  Osho Kalunga e va kwafela va longe okupitila momhepo iyapuki oshi liwetikile notashi etele vakwao ouwa.  Umwe okwa kwafelwa komhepo iyapuki a popye eendjovo dounongo, umwe oku popye neshiivo,  umwe oku kale e na eitavelo, umwe oku kale e na oshali yokuvelula, 10  umwe okulonga oikumwifilonga, umwe okuxunganeka, umwe okukonakona ngeenge eendjovo oda dja kuKalunga ile hasho, umwe okupopya omalaka e lili noku lili, ofimbo umwe okufatulula omalaka e lili noku lili. 11  Oilonga aishe oyo oya longwa mewiliko lomhepo iyapuki, nakeshe umwe okwa pewa oshali yaye pahalo laKalunga.* 12  Olutu oli na oilyo ihapu, ndele nande ongaho oli li olutu limwe; osho osha faafana yo naKristus. 13  Osheshi atusheni otwa ninginifwa momhepo imwe notwa ninga olutu limwe kutya nee Ovajuda ile Ovagreka, ovapika ile ovovo vehe fi ovapika, atusheni otwa pewa omhepo imwe. 14  Olutu inali fikama po moshilyo shimwe, ndele omoilyo ihapu. 15  Ngeenge omhadi oya ti, “Molwaashi ame kandi fi eke, kandi fi oshitukulwa sholutu,” osho itashi i ningifa i kale ihe fi oshitukulwa sholutu. 16  Ngeenge okutwi okwa ti, “Molwaashi ame kandi fi eisho, kandi fi oshitukulwa sholutu,” osho itashi ku ningifa ku kale kuhe fi oshitukulwa sholutu. 17  Ngeno olutu alishe ola li eisho, ngeno ohatu pwilikinifa shike? Ile ngeno olutu alishe ola li okutwi, ngeno ohatu udu ngahelipi omadimba? 18  Kalunga okwa unganeka oilyo aishe yolutu i kale ngaashi a hala. 19  Ngeno oilyo aishe oya li ya faafana, ngeno olutu ola tya ngahelipi? 20  Ndele paife oilyo oihapu, ashike olutu limwe. 21  Eisho itali dulu okulombwela eke kutya, “Inandi ku pumbwa,” nomutwe itau dulu okulombwela eemhadi kutya, “Inandi ku pumbwa.” 22  Mepingafano naasho, oilyo yolutu oyo ya talika ko inai fimana oya pumbiwa, 23  noilyo yolutu oyo hatu diladila kutya inai fimana, ohatu i file oshisho, naayo ififa ohoni, ohatu i uvike nawa, 24  ofimbo ei ihatu fi ohoni, ihatu i uvike. Kalunga okwa shita olutu nokwa fimaneka unene oilyo yolutu oyo twa tala ko inai fimana, 25  opo molutu muha kale etukauko, ndele oilyo aishe i filafane oshisho. 26  Ngeenge oshilyo shimwe tashi yahama, aishe ohai kala i udite ouyahame pamwe nasho, ile ngeenge shimwe tashi fimanekwa, aishe ohai hafele pamwe nasho. 27  Nye olutu laKristus, nakeshe umwe oku li oshilyo sholutu laye. 28  Kalunga okwa nangeka po vamwe meongalo va kale ngaha: tete, ovayapostoli; oshitivali, ovaprofeti; oshititatu, ovahongi; vamwe ohava longo oikumwifilonga, vamwe ove na oshali yokuvelula, vamwe ohava kwafele vakwao, vamwe ohava wilike, ofimbo vamwe hava popi omalaka e lili noku lili. 29  Mbela aveshe ovayapostoli? Mbela aveshe ovaprofeti? Mbela aveshe ovahongi? Mbela aveshe ohava longo oikumwifilonga? 30  Mbela aveshe ove na oshali yokuvelula? Mbela aveshe ohava popi omalaka e lili noku lili? Mbela aveshe ohava fatulula?* 31  Onghee hano, lalakaneneni* eeshali odo da denga mbada. Opo nee ohandi ke mu ulikila oshinima osho sha denga mbada shi dule ikwao.

Eshangelo lopedu

Eln., “mwa li ovanhu vomoiwana.”
Ile “pahalo lomhepo yaKalunga.”
Ile “ovatoloki.”
Ile “kongeni mwa mana mo.”