Inda koshikalimo

Inda koshikalimo

 ETUKULWA 42

Jonatan okwa li ependa nomudiinini

Jonatan okwa li ependa nomudiinini

Jonatan, omonamati waSaul oo womukulunhu, okwa li omukwaita ependa. David okwa ti kutya Jonatan okwa li ha endelele e dule onhwa nokwa li e na eenghono e dule onghoshi. Efiku limwe, Jonatan okwa li a mona ovakwaita 20 Ovafilisti ve li komhunda. Okwa li a lombwela omuhumbati woilwifo yaye a ti: ‘Ohatu ke va lwifa ashike ngeenge Jehova okwe tu pe edidiliko. Ashike ngeenge Ovafilisti ove tu lombwele tu ye kuvo, opo nee ohatu ke va lwifa.’ Ovafilisti ova li va ingida tava ti: ‘Ileni tu lweni.’ Ovalumenhu vavali ova li va londa komhunda ndele tava findi ovakwaita ovo.

Molwaashi Jonatan oye a li omonamati waSaul oo a kula, oye a li ngeno ta ka ninga ohamba ya landula ko. Ashike Jonatan okwa li e shii kutya Jehova okwa hoolola David oye a ninge ohamba yaIsrael ya landula ko, noka li a twa ondubo. Jonatan naDavid ova li va ninga ookaume kopofingo. Ova li ve liudanekela kutya otava ka kala tava amenafana nokulipopila. Jonatan okwa  li a pa po David oshikutu shaye, omukonda, outa nosho yo omwiya onga edidiliko loukaume wavo.

Eshi David a li ta i onhapo Saul, Jonatan okwa li a ya kuye ndele ta ti: ‘Kala wa pama nowa nyatipala. Jehova okwe ku hoolola u kale ohamba. Tate naye oku shi shii.’ Mbela ino hala okukala u na kaume muwa ngaashi Jonatan?

Jonatan okwa li a tula omwenyo waye moshiponga lwoikando ihapu opo a kwafele kaume kaye. Okwa li e shii kutya ohamba Saul oya hala okudipaa David, nomolwaasho okwa li a lombwela xe ta ti: ‘Ngeenge owa dipaa David, oto nyono molwaashi ina ninga sha sha puka.’ Saul okwa li a handukila Jonatan neenghono. Konima yomido donhumba, Saul naJonatan ova li va fila molwoodi oshita.

Konima eshi Jonatan a fya, David okwa li a konga omonamati waJonatan, Mefiboset. Eshi David e mu mona, okwa li a lombwela Mefiboset a ti: ‘Molwaashi xo okwa li kaume kange kopofingo, ohandi kala handi ku file oshisho onghalamwenyo yoye aishe. Oto ka kala mombala yange noto kala to li poshitaafula shange.’ David ka li a dimbwa kaume kaye Jonatan.

‘Kaleni mu holafane, ngaashi Ame nda kala ndi mu hole. Kape na ou e nohole i dule yaau ta yandjele ookaume kaye omwenyo waye.’ — Johannes 15:12, 13