Inda koshikalimo

Inda koshikalimo

 ETUKULWA 89

Petrus te likale Jesus

Petrus te likale Jesus

Eshi Jesus a li novayapostoli vaye monduda yopombada, okwa li e va lombwela a ti: ‘Amushe otamu ke lidimbika nge oufiku wonena.’ Petrus okwa ti: ‘Ame itandi ku likale. Nonande aveshe nave ku fiye po, ame nghi na efiku ndi ku fiye po.’ Ashike Jesus okwa lombwela Petrus a ti: ‘Fimbo ekondobolo inali kwena, oto ka popya lwoikando itatu kutya ku shii nge.’

Eshi ovakwaita va twala Jesus keumbo laKajafas, ovayapostoli vahapu ova ya onhapo. Ashike vavali vomuvo ova li va landula ongudu yovanhu. Umwe womuvo oPetrus. Okwa ya moshihale sheumbo laKajafas ndele ta kala ta xuxumukwa pomundilo. Okakadona kamwe okapiya oka mona oshipala shaPetrus fimbo a li pomundilo wa tema ndele taka ti: ‘Ondi ku shii, owa kala pamwe naJesus.’

Petrus okwa nyamukula a ti: ‘Ahowe, inandi kala pamwe naye. Nghi shii kutya oto popi shike.’ Okwa ya lwokomuvelo, ndele diva okakadona kamwe vali okapiya oke mu mona ndele taka lombwele ovanhu taka ti: ‘Omulumenhu oo okwa li pamwe naJesus.’ Petrus okwa ti: ‘Jesus kandi mu shii nokuli.’ Omulumenhu umwe okwa ti: ‘Ove oumwe womuvo. Omutono wewi loye otau ulike kutya owa dja kuGalilea, ngaashi Jesus.’ Ashike Petrus okwa ana ta ti: ‘Ame nghi mu shii.’

Pomhito oyo, ekondobolo ola kwena. Petrus okwa mona Jesus ta keuka ndele ta tale kuye. Opo nee okwa dimbuluka eendjovo daJesus ndele ta i pondje nokulila neenghono.

Lwopokati opo, Omhangu yoPombada yOvajuda oya li ya tokola oku ka pangula Jesus meumbo laKajafas. Ova li va tokola nale okudipaa Jesus, ndele paife ova li va hala okukonga omatomheno. Ashike kava li va mona nande olimwe. Hauxuuninwa, Kajafas okwa pula Jesus ta ti: ‘Ove Omona waKalunga?’ Jesus okwa ti: ‘Heeno.’ Kajafas okwa ti: ‘Inatu pumbwa vali oumbangi umwe. Okwa sheka Kalunga.’ Omhangu oya dimina ya ti: ‘Omulumenhu ou oku na okufya.’ Opo nee ova denga Jesus nomanghava, ve mu fiila omate, ve mu manga komesho noku mu denga, tava ti: ‘Ngeenge ove omuprofeti, tu lombwela oo e ku denga.’

 Eshi kwa sha, ova twala Jesus konhele yOmhangu yoPombada yOvajuda ndele tave mu pula vali tava ti: ‘Ove Omona waKalunga?’ Jesus okwa nyamukula a ti: ‘Nye otamu ti kutya ame Omona waKalunga.’ Opo nee ove mu tokolela etimba kutya okwa sheka Kalunga ndele tave mu twala kombala yaPontius Pilatus, omupangeli Omuroma. Mbela oshike sha ka ningwa po vali? Natu ka tale osho sha ka ningwa po.

‘Efimbo ole uya nokuli, onye otamu ka halakanifwa keshe tuu te liyukile, ndele tamu fii nge po andike; ndele Ame kandi li po andike, osheshi Tate oku li naame.’ — Johannes 16:32