Inda koshikalimo

Inda koshikalimo

 ETUKULWA 87

Ouvalelo waJesus waxuuninwa

Ouvalelo waJesus waxuuninwa

Ovajuda ova li hava dana Opaasa omudo keshe mo 14 omwedi Nisan. Osho osha li hashi va dimbulukifa nghee Jehova e va mangulula moupika muEgipti noku va twala mEdu lEudaneko. Momudo 33 O.P., Jesus novayapostoli vaye ova li va dana Opaasa monduda yopombada muJerusalem. Pexulilo louvalelo, Jesus okwa li e va lombwela a ti: ‘Umwe womunye ota kengelele nge.’ Ovayapostoli ova li va haluka, nokupula Jesus tava ti: ‘Olyelye te shi ningi?’ Jesus okwa ti: ‘Oyoo handi pe omungome ou.’ Opo nee okwa pa Judas Iskariot omungome. Diva, Judas okwa fikama ndele ta di mo monduda.

Konima yaasho, Jesus okwa ilikana ndele ta pambula omungome moipambu noku u pa ovayapostoli vaye ovo va xupa po. Okwa ti: ‘Lyeni omungome ou, otau faneke olutu lange olo handi mu yandjele.’ Opo nee okwa ilikana omolwomaviinyu ndele te a pe ovayapostoli vaye. Okwa ti: ‘Nweni omaviinyu aa, otaa faneke ohonde yange oyo handi ka yandja opo omatimba a dule okudimwa po. Ohandi mu udanekele kutya otamu ka kala eehamba pamwe naame meulu. Kaleni hamu ningi ngaha odula keshe opo mu dimbuluke nge.’ Ovashikuli vaJesus natango ohava ongala konguloshi yefiku olo odula keshe. Okwoongala oko paife ohaku ifanwa Ouvalelo wOmwene.

 Konima youvalelo, ovayapostoli ova li va twa eemhata kutya olyelye a fimana e dule vakwao. Ashike Jesus okwe va lombwela a ti: ‘Oo munene e dule vakwao mokati keni oyoo e litala ko munini, oo e wete ina fimana.’

‘Nye ookaume kange. Ohandi mu lombwele keshe osho Tate a hala ndi mu lombwele. Mafiku ohandi i kuTate meulu. Nye otamu fyaala po, novanhu otava ka shiiva kutya nye ovahongwa vange ngeenge omu holafane. Kaleni mu holafane ngaashi ame nda kala ndi mu hole.’

Hauxuuninwa, Jesus okwa ilikana, ta pula Jehova a amene ovahongwa vaye aveshe. Okwa pula Jehova e va kwafele va kale tava longo pamwe nombili. Okwa ilikana opo edina laJehova li yapulwe. Opo nee Jesus novayapostoli vaye ova imbila Jehova omaimbilohambelelo ndele tava i pondje. Jesus okwa li e li pokukwatwa po.

“Ino tila, okangudu ove, osheshi Xo a hala oku mu pa ouhamba.” — Lukas 12:32