Inda koshikalimo

Inda koshikalimo

 ETUKULWA 85

Jesus ta velula omulumenhu mEshabata

Jesus ta velula omulumenhu mEshabata

Ovafarisai ova li ve tonde Jesus nova li va hala okukonga omatomheno oku mu kwatifa po. Ova li ve mu lombwela kutya ina velula ovanaudu mEshabata. MEshabata limwe, Jesus okwa li a hanga omulumenhu omupofi ta ehela mepandavanda. Okwa li a lombwela ovahongwa vaye a ti: ‘Taleni nghee eenghono daKalunga tadi ka kwafela omulumenhu ou.’ Jesus okwa li a lumbakanifa omate aye nedu opo a ninge onhata, ndele te i vaeke pomesho omulumenhu oo. Jesus okwa lombwela omulumenhu oo a ti: ‘Inda u ka koshe omesho oye metale laSiloa.’ Omulumenhu oo okwa ninga ngaashi a lombwelwa, ndele ta hovele okukala e wete ko oshikando shotete monghalamwenyo yaye.

Ovanhu ova li va kumwa, ndele tava ti: ‘Omulumenhu ou oye ngoo ou a li ha kala omutumba ta ehela, ile omunhu umwe e mu fa?’ Omulumenhu okwa ti: ‘Aame ou nda li nda dalwa omupofi.’ Ovanhu ove mu pula va ti: ‘Omolwashike uhe fi vali omupofi?’ Eshi e va lombwela osho sha ningwa po, ova li ve mu twala kOvafarisai.

Omulumenhu oo okwa lombwela Ovafarisai a ti: ‘Jesus okwa vaeka nge onhata pomesho ndele ta lombwele nge ndi ke i koshe po. Onda ninga ngaashi a lombwela nge, ndele paife ondi wete ko.’ Ovafarisai ova ti: ‘Ngeenge Jesus oha velula mEshabata, eenghono daye inadi dja kuKalunga.’ Ashike vamwe ova ti: ‘Ngeenge eenghono daye inadi dja kuKalunga, ita dulu okuvelula nandenande.’

Ovafarisai ova li va ifana ovadali vomulumenhu oo ndele tave va pula tava ti: ‘Osha enda ngahelipi opo  omona weni a kale e wete ko?’ Ovadali vaye ova li va tila molwaashi Ovafarisai ova ti kutya keshe oo ta itavele Jesus ota kondwa mo moshinagoga. Onghee ova ti: ‘Katu shi shii, mu puleni nye vene.’ Ovafarisai ova li va pula omulumenhu oo omapulo mahapu fiyo te va lombwele ta ti: ‘Onde mu lombwela ashishe osho ndi shii. Omolwashike tamu twikile okupula nge?’ Ovafarisai ova li va handuka, ndele tave mu undulile pondje.

Jesus okwa li a ka konga omulumenhu oo, ndele te mu pula ta ti: ‘Owa itavela ngoo Messias?’ Omulumenhu okwa ti: ‘Ohandi mu itavele ngeno onda li ndi mu shii.’ Jesus okwa ti: ‘Aame Messias.’ Mbela Jesus kali a ulika olune? Kali ashike a velula omulumenhu oo ndele okwe mu kwafela yo a kale e na eitavelo.

“Nye omwa puka, osheshi inamu shiiva omishangwa neenghono daKalunga.” — Mateus 22:29