Inda koshikalimo

Inda koshikalimo

 ETUKULWA 17

Twikila okulikaleka mohole yaKalunga

Twikila okulikaleka mohole yaKalunga

‘Litungileni kekanghameno leitavelo leni liyapuki. Likalekeni mohole yaKalunga.’ — JUDAS 20, 21.

1, 2. Otu na okuninga po shike opo tu likaleke mohole yaKalunga?

ATUSHENI otwa hala okukala tu na eenghono nosho yo oukolele. Onghee hano, ohatu kendabala okulya oikulya i na oukolele, okuninga omalideulo pandjikilile nosho yo okufila oshisho omalutu etu. Nonande osho ohashi pula eenghendabala, ohatu mono oidjemo iwa, nomolwaasho ihatu sholola. Ashike otwa pumbwa yo okukala tu na eenghono noukolele monghedi imwe vali.

2 Nonande otwa ninga nawa eshi twa hovela okulihonga kombinga yaJehova, otwa pumbwa okutwikila okukaleka po ekwatafano letu naye la kola. Eshi Judas a li a ladipika Ovakriste ve ‘likaleke mohole yaKalunga,’ okwa li e va yelifila nghee tava dulu oku shi ninga. Okwe va lombwela a ti: “Litungileni kekanghameno leitavelo leni liyapuki.” (Judas 20, 21) Ndele mbela ongahelipi hatu dulu okupameka eitavelo letu?

TWIKILA OKUPAMEKA EITAVELO LOYE

3-5. (a) Satana okwa hala u kale wa tala ko ngahelipi omifikamhango daJehova? (b) Ou uditile ngahelipi eemhango nomafinamhango aJehova?

3 Osha fimana okukala wa tomhwa pauhandimwe kutya omifikamhango daJehova oda denga mbada. Satana okwa hala tu diladile kutya oshidjuu neenghono okudulika komifikamhango  daKalunga nonokutya ohatu ka kala twa hafa ngeenge otwa tokola kufye vene osho shi li mondjila naasho sha puka. Okudja koshikunino shaEden, Satana okwa kala ta kendabala okwiitavelifa ovanhu oshinima osho. (Genesis 3:1-6) Nokunena ota kendabala neenghono okuninga ngaho.

4 Mbela Satana oku li ngoo mondjila? Omifikamhango daKalunga oda ngabeka ngoo shili ovanhu? Ahowe. Natu shi faneke ngaha: Natu tye nee ngeno oto ende moparka iwa. Opo nee owa mona odalate ile ya tukula ko oshitukulwa shonhumba. Otashi dulika u lipule kutya: ‘Omolwashike va tulila po odalate?’ Ohaluka ou udite onghoshi tai kumbu kombinga ikwao yodalate. Paife oto ka kala u uditile ngahelipi odalate oyo? Oto ka kala wa hafa molwaashi oye ku amena opo uha like po konghoshi. Omafinamhango aJehova oku li ngaashi odalate oyo, ofimbo Ondiaboli i li ngaashi onghoshi oyo. Eendjovo daKalunga ode tu londwela da ti: “Kaleni mu nelidiliko nomwa pashuka, omutondi weni, Satana, ohe mu dingilile ngaashi onghoshi hai kumbu, nota kongo ou te mu xwake po.” — 1 Petrus 5:8.

5 Jehova okwa hala tu kale tu na onghalamwenyo ya denga mbada. Ina hala tu pukifwe kuSatana. Nomolwaasho okwe tu pa eemhango nomafinamhango opo e tu amene notu kale twa hafa. (Ovaefeso 6:11) Jakob okwa ti: ‘Ou ta tale nokukonakona momhango ei ya wana yemanguluko ndele ta kala mo, ota kala omunelao mokulonga kwaye.’ — Jakob 1:25.

6. Oshike tashi dulu oku tu kwafela tu kale twa tomhwa kutya omifikamhango daKalunga oda denga mbada?

6 Ngeenge ohatu dulika kewiliko laJehova, onghalamwenyo yetu ohai xwepopala noukaume wetu naye ohau kolo. Pashihopaenenwa, ohatu mono ouwa ngeenge twa tambula ko eshivo laye olo kutya natu kale hatu mu ilikana  luhapu. (Mateus 6:5-8; 1 Ovatessaloniki 5:17) Ohatu kala twa hafa ngeenge hatu dulika koshipango shaye shi na sha nokukala hatu ongala opo tu mu longele nosho yo ngeenge hatu kufa ombinga pauyadi moilonga yokuudifa nokuhonga ovanhu. (Mateus 28:19, 20; Ovagalati 6:2; Ovaheberi 10:24, 25) Ngeenge hatu dilonga kunghee oinima oyo ye tu kwafela tu pameke eitavelo letu, ohashi tu kwafele tu kale twa tomhwa filufilu kutya omifikamhango daJehova oda denga mbada.

7, 8. Oshike tashi dulu oku tu kwafela tuha kale hatu lipula nomayeleko oo tashi dulika e ke tu hange monakwiiwa?

7 Otashi dulika tu kale hatu lipula kutya ohatu ka hangika komayeleko mahapu omolweitavelo letu monakwiiwa nonokutya otashi ka kala shidjuu kufye. Ngeenge osho ho kala u udite ngaho, dimbuluka eendjovo daJehova odo tadi ti:  “Omwene Omukulili woye, Omuyapuki waIsrael ota ti ngaha: Aame Omwene Kalunga koye, ou handi ku longo eshi tashi ku wapalele, ndele handi ku tula mondjila ei u nokweenda nayo. Akutu, ngeno ove wa li wa diinina oipango yange, ngeno ombili yoye oya kala ngaashi omulonga tau tondoka, nouyuki woye ngaashi omakufikufi omefuta.” — Jesaja 48:17, 18.

8 Ngeenge otwa dulika kuJehova, ombili yetu otai ka kala ngaashi omulonga oo ihau pwiinine. Ouyuki wetu otau ka kala ngaashi omakufikufi efuta oo haa kala tae lidenge alushe komunghulofuta. Ohatu dulu okukala ovadiinini kashi na nee mbudi kutya oshike sha ningwa po monghalamwenyo yetu. Ombiibeli oya udaneka ya ti: “Omutengi woye u undulila kOmwene, Ye ote ku kalele noshisho. Oye ita efa nande omuyuki a kale alushe nokutengauka.” — Epsalme 55:22.

“TU LALAKANENENI EWANENENO”

9, 10. Oukulunhu wopamhepo owa hala kutya shike?

9 Eshi to pameke ekwatafano loye naJehova, oto ‘lalakanene ewaneneno’ ile oukulunhu wopamhepo. (Ovaheberi 6:1) Osha hala okutya ngahelipi okulalakanena ewaneneno ile oukulunhu wopamhepo?

10 Inatu pumbwa okukula palutu opo tu ninge Ovakriste va pyokoka. Opo tu kule pamhepo, otwa pumbwa okuninga Jehova kaume ketu kopofingo nokukendabala okukala tu na etaleko la fa laye. (Johannes 4:23) Paulus okwa ti: “Ava ve li pambelela otava diladila eshi shopambelela, ndelenee ava ve li pamhepo otava diladila eshi shOmhepo.” (Ovaroma 8:5) Omunhu oo a pyokoka pamhepo iha yandje elitulemo komalihafifo ile komaliko monghalamwenyo yaye. Ponhele yaasho, oha yandje elitulemo kokulongela Jehova nokuninga omatokolo e li pandunge  monghalamwenyo. (Omayeletumbulo 27:11; lesha Jakob 1:2, 3.) Iha efa a nwefwe mo koinima ya puka. Omunhu oo a pyokoka pamhepo oku shii osho shi li mondjila noha kala a tokola osho a ninge.

11, 12. (a) Paulus okwa popya shike kombinga ‘yokwiika okutongola’ kwOvakriste? (b) Okukula pamhepo kwOmukriste okwa faafana ngahelipi nokuninga omutondoki?

11 Ohashi pula eenghendabala opo omunhu a kule pamhepo. Omuyapostoli Paulus okwa ti: “Eendja da pama odaava va kula, ava tava dulu [okwiika] okutongola ouwa nowii.” (Ovaheberi 5:14) Oshitya osho sha tolokwa ‘okwiika’ ile tu tye okudeula, otashi dulika shi tu diladilife kedeulo olo omutondoki ha pewa.

12 Ngeenge tu wete omutondoki a deulikika e li mefiyafane po, otu shii kutya oshe mu pula efimbo nedeulo opo a kale a deuka. Ina dalwa e li omutondoki. Ngeenge okaana opo ka dalwa, ihaka kala ke shii nawa okulongifa omaoko nomaulu ako. Ashike mokweendela ko kwefimbo, ohake lihongo okukwata oinima nosho yo okweenda. Opo omunhu a ninge omutondoki, ohe lideula. Sha faafana, ohashi pula efimbo nedeulo opo tu ninge Ovakriste va pyokoka.

13. Oshike tashi ke tu kwafela tu lihonge okukala hatu diladila ngaashi Jehova ha diladila?

13 Membo eli, otwa kundafana nghee hatu dulu okukala hatu diladila ngaashi Jehova ha diladila nokutala ko oinima ngaashi he i tale ko. Otwe lihonga okukala twa lenga notu hole omifikamhango daJehova. Ngeenge hatu ningi omatokolo, otwa pumbwa okulipula kutya: ‘Eemhango ile omafinamhango Ombiibeli elipi handi dulu okutula moilonga monghalo ei? Ongahelipi handi dulu oku di tula moilonga? Jehova ota ka kala a hala ngeno ndi ninge shike?’ — Lesha Omayeletumbulo 3:5, 6; Jakob 1:5.

14. Opo tu pameke eitavelo letu, oshike twa pumbwa okuninga?

14 Ohatu twikile okupameka ekwatafano letu naJehova.  Ngaashi ashike okulya oikulya i na oukolele hashi tu kwafele tu pameke omalutu etu, okulihonga kombinga yaJehova ohashi tu kwafele tu pameke eitavelo letu. Eshi twa hovela okukonakona Ombiibeli, otwe lihonga oshili ya fimana kombinga yaJehova nosho yo onghedi yaye yokuninga oinima. Ndele mokweendela ko kwefimbo, otwa pumbwa okuuda ko oinima yomoule. Paulus osho a li a hala kutya ngaho eshi a ti: “Eendja da pama odaava va kula.” Ngeenge otwa kala hatu tula moilonga osho hatu lihongo, ohatu ka mona ounongo. Ombiibeli oya ti: “Efina lounongo” olo oshinima sha fimanenena. — Omayeletumbulo 4:5-7; 1 Petrus 2:2.

15. Omolwashike sha fimana okukala tu hole shili Jehova nosho yo ovamwatate novamwameme?

15 Omunhu ota dulu okukala e na eenghono noku na oukolele, ashike opo a kaleke po oinima oyo, okwa pumbwa okutwikila okukala te lifile oshisho. Sha faafana, omunhu oo a pyokoka pamhepo oku shii kutya okwa pumbwa okulonga noudiinini opo a kaleke ekwatafano laye naJehova la pama. Paulus okwe tu dimbulukifa a ti: “Liyelekeni nye vene, ngeenge omu li meitavelo; lipulapuleni.” (2 Ovakorinto 13:5) Ashike otwa pumbwa okuninga shihapu shihe fi ashike okupameka eitavelo letu. Otu na okutwikila okukala tu hole Jehova nosho yo ovamwatate novamwameme nohole yomoule. Paulus okwa ti: ‘Nonande ondi shiive, ndele nande ondi kale ndi neitavelo alishe lokudikula eemhunda, ndelenee ame nghi nohole, ame nghi fi sha.’ — 1 Ovakorinto 13:1-3.

YANDJA ELITULEMO KETEELELO LOYE

16. Satana okwa hala tu kale tu udite ngahelipi?

16 Satana okwa hala tu diladile kutya katu na efiku tu hafife Jehova. Okwa hala tu kale twa teka omukumo nokudiladila kutya kape na ekandulepo lomaupyakadi etu. Ina  hala tu kale twe lineekela Ovakriste vakwetu noina hala tu kale twa hafa. (Ovaefeso 2:2) Satana oku shii kutya omadiladilo mai otaa dulu oku tu teya omukumo nokunyona po ekwatafano letu naJehova. Ashike Jehova okwe tu pa eteelelo opo tu dule okufinda omadiladilo mai.

17. Eteelelo ola fimana shi fike peni?

17 Ovatessaloniki votete 5:8, ova faafanifa eteelelo letu nembale loshivela olo hali amene ovakwaita ngeenge tava ka lwa, va ti kutya ‘eteelelo lexupifo.’ Okukala tu na eteelelo momaudaneko aJehova otashi dulu okwaamena omadiladilo etu noku tu kwafela tu henuke omadiladilo mai.

18, 19. Jesus okwa li a pamekwa ngahelipi keteelelo?

18 Jesus okwa li a pamekwa keteelelo. Oufiku waxuuninwa wokukalamwenyo kwaye kombada yedu, okwa li a ungaunga neenghalo didjuu da shikulafana. Okwa li a kengelelwa kukaume kaye kopofingo. Umwe okwa li e mu lidimbika. Vamwe ova li ve mu fiya po nokufaduka po.  Ovalumenhu vomoshilongo shavo ova li ve mu pilukila po, nokupula a dipawe. Oshike sha li she mu kwafela e lididimikile omaupyakadi aeshe oo? Ombiibeli oya ti: “Omolwehafo e li tulikilwa, nokwa li ehe na ko nasha nomasheko, Oye a kala omutumba kolulyo lolukalwapangelo laKalunga.” — Ovaheberi 12:2.

19 Jesus okwa li e shii kutya ngeenge okwa kala omudiinini, ota ka fimanekifa Xe nokuulika kutya Satana omunaipupulu. Eteelelo olo ole mu etela ehafo linene nole mu kwafela e lididimike. Okwa li yo e shii kutya oku li poku ka hangana naXe meulu. Ngaashi Jesus, natu yandje elitulemo keteelelo. Osho otashi ke tu kwafela tu lididimike, kashi nee mbudi kutya oshike tashi ningwa po.

20. Oshike tashi dulu oku ku kwafela u kale u na etaleko liwa?

20 Jehova oku wete eitavelo nelididimiko loye. (Jesaja 30:18; lesha Malakia 3:10.) Okwa udaneka oku ku pa “eshi sha wapalela omutima woye.” (Epsalme 37:4) Onghee  hano, yandja elitulemo keteelelo. Satana okwa hala u kanife eteelelo noku ku ningifa u itavele kutya omaudaneko aJehova kae na fiku a ka wanifwe. Ashike ino shololifwa komadiladilo oo a puka. Ngeenge owa mono kutya oto ende to kanifa eteelelo, pula Jehova e ku kwafele. Dimbuluka eendjovo odo di li mOvafilipi 4:6, 7, tadi ti: “Kaleni muhe na nande oshisho shasha, ndelenee oufyoona weni u shiivifileni Kalunga momailikano nomomaindilo pamwe nomapandulo, nombili yaKalunga ei i dule eendunge adishe, otai ka amena omitima deni nomadiladilo eni muKristus Jesus.”

21, 22. (a) Elalakano laJehova olashike li nasha nedu? (b) Owa tokola toko okuninga shike?

21 Kala alushe ho dilonga konakwiiwa ikumwifi i li komesho. Mafiku, keshe oo e na omwenyo ota ka longela Jehova. (Ehololo 7:9, 14) Diladila ashike konghalamwenyo mounyuni mupe. Otai ka kala ya denga mbada neenghono i dulife pwaasho hatu diladila. Satana neendemoni daye nosho yo oukolokoshi aushe itau ka kala po vali. Ito ka vela vali noito ka fya nandenande. Ponhele yaasho, oto ka penduka u na eenghono efiku keshe nowa hafa eshi u na omwenyo. Ovanhu aveshe otava ka longela kumwe opo va ninge edu oparadisa. Keshe umwe ota ka kala e na oikulya iwa nonhele yokukala ya amenwa. Ovanhu itava ka kala ovakwanyanya ile ovakolokoshi, ndele otava ka kala ve holafane. Mokweendela ko kwefimbo, ovanhu aveshe kombada yedu ota ka hafela ‘emanguluko loshinge shovana vaKalunga.’ — Ovaroma 8:21.

22 Jehova okwa hala u kale kaume kaye kopofingo. Onghee hano, ninga ngaashi to dulu u dulike kuJehova nokweehena popepi elela naye efiku keshe. Atusheni natu twikileni okulikaleka mohole yaKalunga fiyo alushe. — Judas 21.