Inda koshikalimo

Inda koshikalimo

 ETUKULWA 13

Ovanhu vamwe ovo va li va ninga ovahongwa vaJesus

Ovanhu vamwe ovo va li va ninga ovahongwa vaJesus

Omulumenhu ou oye lyelye, nongahelipi a li a ninga omuhongwa waJesus?

OLYELYE omupiya waKalunga a denga mbada oo a li ko? —  Osho naanaa, oJesus Kristus. Mbela oto diladila kutya ohatu dulu oku mu hopaenena? —  Ombibeli otai ti kutya okwe tu tulila po oshihopaenenwa tu shi shikule. Jesus ote tu shivi yo tu ninge ovahongwa vaye.

Mbela ou shi shii kutya osha hala okutya shike okukala omuhongwa waJesus? —  Osha kwatela mo oinima ihapu. Shotete, otu na okulihonga kuye. Ndele osho hasho ashike twa pumbwa okuninga. Otu na yo okwiitavela filufilu osho a popya. Ngeenge otwa ningi ngaho, ohatu ka ninga osho te tu lombwele tu ninge.

Ovanhu vahapu ohava ti kutya ova itavela muJesus. Mbela oto diladila kutya ovanhu aveshe ovahongwa vaye shili? —  Ahowe, haaveshe ve li ovahongwa vaye. Otashi dulika hava i kongeleka, ndele nande ongaho, vahapu vomuvo ihava longifa efimbo okulihonga kombinga yaasho Jesus a li a honga. Onghee hano, ovo tava shikula oshihopaenenwa shaJesus ovo ashike ve li ovahongwa vaye vashili.

Paife natu ka popye kombinga yavamwe ovo va li ovahongwa vaJesus eshi a li kombada yedu. Umwe womwaavo va li va ninga ovahongwa vaJesus votete okwa li Filippus. Filippus okwa li a ifana yo kaume kaye Natanael (oo a li yo ha ifanwa Bartolomeus), oo u wete e li omutumba momuti. Eshi Natanael a li e uya kuJesus, Jesus okwa ti: ‘Tala, Omuisrael washili, omunashili.’ Natanael okwa li a kumwa ndele ta pula Jesus a ti: ‘Owa shiiva nge ngahelipi?’

Jesus ota ifana oolyelye va ninge ovahongwa vaye?

Jesus okwa li e mu nyamukula a ti: “Fimbo Filippus ine  ku ifana, eshi wa kala momukwiyu, onde ku mona.” Natanael okwa li a kumwa eshi Jesus a li e shii filufilu apa a li. Onghee hano, Natanael okwa ti kuye: “Oove Omona waKalunga, Oove ohamba yaIsrael.” — Johannes 1:49.

Judas Iskariot, Judas (oo yo ha ifanwa Tadeus), naSimon

Opa li vamwe ovo va li va ninga ovahongwa vaJesus fimbo Filippus naNatanael inava ninga ovahongwa vaye. Ovahongwa ovo ova li Andreas, nomukulu waye Petrus, Johannes nosho yo tashi dulika omukulu waye Jakob. (Johannes 1:35-51) Konima yefimbo, ovahongwa ovo vane ova ka shuna kongeshefa yavo yokukwata eeshi. Efiku limwe fimbo Jesus a li ta ende pomunghulo wEfuta laGalilea, okwa li a mona Petrus naAndreas tava lukile oiyulifo yavo. Jesus okwa li e va lombwela a ti: “Shikuleni nge.”

Jakob (omona waAlfeus), Tomas naMateus

Eshi Jesus a li ashike a enda ko oshinano shinini, okwa li a mona Jakob naJohannes. Jakob naJohannes ova li mowato natate wavo tava vandeke oiyulifo yavo. Jesus okwa li yo e va lombwela ve mu shikule. Mbela ngeno  okwa li oove ngeno owa ninga po shike eshi wa ifanwa kuJesus u mu shikule? Mbela ngeno owe mu shikula ngoo diva pefimbo opo? —  Ovalumenhu ovo ova li ve shii Jesus. Ova li ve shi shii kutya okwa tumwa kuKalunga. Onghee hano, ova li va fiya po diva ongeshefa yavo yokuyula eeshi, ndele tava shikula Jesus. — Mateus 4:18-22.

Natanael, Filippus naJohannes

Eshi ovalumenhu ovo va li va ninga ovashikuli vaJesus, mbela osho osha li sha hala okutya otava ka kala alushe hava ningi osho sha yuka? — Hasho nandenande. Otashi dulika to dimbuluka kutya ovalumenhu ovo efiku limwe ova li tava tu eemhata shi na sha nokutya olyelye a li a fimana mokati kavo. Ndele ova li va pwilikina kuJesus, nova li ve na ehalo okulundulula oikala yavo. Nafye ohatu dulu okuninga ovahongwa vaJesus ngeenge otu na ehalo okulundulula oikala yetu.

Jakob (omumwaina waJohannes), Andreas naPetrus

Jesus okwa li a shiva ovanhu vomaludi aeshe opo va ninge ovahongwa vaye. Efiku limwe omupangeli umwe omunyasha oshipuna okwa li e uya kuJesus ndele te mu pula kutya oku na okuninga po shike opo a ka mone omwenyo waalushe. Eshi omupangeli oshipuna oo a li a popya kutya okwa kala ha dulika koipango yaKalunga okudja kounona, Jesus okwa li e mu shiva a ti: “Ila ove u shikule nge.” Mbela ou shi shii kutya oshike sha li sha ningwa po? — 

Eshi omulumenhu oo a li e lihonga kutya okuninga omuhongwa waJesus okwa li kwa fimana shi dulife okukala oshipuna, okwa li she mu udifa nai neenghono. Ka li a ninga omuhongwa waJesus molwaashi okwa li e hole oimaliwa yaye shi dulife osho a li e hole Kalunga. — Lukas 18:18-25.

Konima eshi Jesus a li a udifa hanga oule womudo umwe netata, okwa li a hoolola ovahongwa 12 vomovahongwa vaye va ninge ovayapostoli. Ovayapostoli ova li ovalumenhu ovo Jesus a li ha tumu va ka longe oilonga ye likalekelwa. Mbela ou shii omadina avo? —  Paife natu ke lihonge omadina avo. Tala komafano avo pepandja la shikula ko, ndele to tale ngeenge oto dulu okupopya omadina avo momutwe.

Ovakainhu ovo va li va kwafela Jesus momalweendo aye okuudifa ovo oolyelye?

Umwe womovayapostoli ovo 12 okwa ka ninga omukolokoshi. Omuyapostoli oo okwa li Judas Iskariot. Ndele opa ka hoololwa omuhongwa umwe a ninge omuyapostoli ponhele yaye. Mbela ou shii edina laye? —  oMatias. Paulus naBarnabas navo ova ka ninga ovayapostoli, ndele vo kava li va kwatelwa mwaavo 12. — Oilonga 1:23-26; 14:14.

Ngaashi twe lihonga nale mEtukulwa lotete lembo eli, Jesus okwa li ha yandje elitulemo kounona vanini. Omolwashike a li ha ningi ngaho? —  Omolwaashi okwa li e shi shii kutya navo otava dulu okuninga ovahongwa vaye. Ounona luhapu ohava dulu okupopya oinima monghedi oyo tai dulu okuningifa ovakulunhu va kale va hala okuuda nokulihonga shihapu shi na sha nOmuhongi Munene.

Ovakainhu vahapu navo ova li va ninga ovahongwa vaJesus. Vamwe ova li hava ende pamwe naye eshi kwa li ha i a ka udife koilando imwe i lili. Pashihopaenenwa, Maria Magdalena, Johanna naSusanna ova  li hava i pamwe naJesus ngeenge a li ta ka udifa koilando imwe i lili. Otashi dulika va li yo hava kwafele mokulongekida oikulya nosho yo okukosha oikutu yaJesus. — Lukas 8:1-3.

Mbela owa hala okuninga omuhongwa waJesus? —  Dimbuluka kutya, okupopya ashike kutya otu li ovahongwa vaJesus hasho tashi ulike kutya otu li ovahongwa vaJesus shili. Otu na okulihumbata ngaashi ovahongwa vaJesus keshe a pa tu li, ndele hangeenge ashike hatu i kokwoongala kwopaKriste. Mbela openi sha fimana okulihumbata ngaashi ovahongwa vaJesus? — 

Otu na okulihumbata ngaashi ovahongwa vaJesus peumbo nosho yo kofikola. Fye naave otu na okudimbuluka kutya opo tu kale ovahongwa vaJesus vashili, otu na okulihumbata efiku keshe ngaashi naanaa Jesus a li a ninga, kashi na nee mbudi kutya otu li peni.

Openi sha fimana okulihumbata ngaashi ovahongwa vaJesus?

Paife natu ka leshe pamwe osho Ombibeli tai ti kombinga yovahongwa vaJesus, muMateus 28:19, 20; Lukas 6:13-16; Johannes 8:31, 32; nosho yo 1 Petrus 2:21.