Inda koshikalimo

Inda koshikalimo

 ETUKULWA 5

“Ou Omona Wange”

“Ou Omona Wange”

OVANHU ovo hava file oshisho ounona ohava kala va hafa ngeenge ounona va longa oilonga iwa. Xe omudali oha kala a hafa okulombwela vamwe kutya: “Ou omonakadona wange ile omonamati wange,” ngeenge ovana vaye va longa oilonga iwa.

Jesus oha longo alushe oilonga oyo hai hafifa Xe. Onghee hano, Xe oku udite etumba omolwaye. Mbela oto dimbuluka kutya Xe yaJesus okwa ningile po shike efiku limwe eshi Jesus a li pamwe novashikuli vaye vatatu? — Kalunga okwa li a popya okudja meulu a ti: “Ou Omona wange omuholike, onde mu hokwa.” — Mateus 17:5.

Jesus oha hafele alushe okulonga oilonga oyo tai hafifa Xe. Mbela ou shi shii kutya omolwashike? Omolwaashi oku hole Xe shili. Ohashi kala shidjuu okulonga oshinima shonhumba molwaashi ashike u na oku shi ninga. Ndele ohashi kala shipu ngeenge omunhu oku na ehalo loku shi ninga. Mbela ou shi shii kutya otashi ti shike okulonga oshinima shonhumba nehalo liwa? —  Otashi ti omunhu okwa halelela okulonga oshinima osho.

Jesus okwa li ha kala e na ehalo okuninga oshinima keshe osho Xe a li e mu pula a ninge, nokuli nofimbo a li ine uya kombada yedu. Okwa li e shi ninga molwaashi oku hole Xe, Jehova Kalunga. Jesus okwa li e na onhele iwa yokukala meulu eshi a li pamwe naXe. Ndele Xe okwa li e mu nine oilonga ye likalekelwa. Jesus okwa li e na okuuya kombada yedu opo a longe po oilonga oyo. Onghee hano, okwa li e na okudalwa e li okahanana kombada yedu. Ndele Jesus okwa li e na ehalo loku shi ninga molwaashi Jehova osho a li a hala a ninge.

Omweengeli Gabriel okwa li a lombwela Maria shike?

Opo a dalwe e li okahanana kombada yedu, Jesus okwa li e na okukala e na ina. Mbela ou shi shii kutya ina yaJesus oye lyelye? —  Edina laye oMaria. Jehova okwa li a tuma omweengeli waye Gabriel okudja meulu e uye a popye naMaria. Gabriel okwa li a lombwela Maria kutya ota ka dala  okaana kokamati, oko taka ka lukwa Jesus. Mbela olyelye a li ta ka kala xe yokaana oko? —  Omweengeli oo okwa li a lombwela Maria kutya Xe yokaana oko okwa li ta ka kala Jehova Kalunga. Nomolwaasho Jesus a li ta ka ifanwa Omona waKalunga.

Mbela Maria okwa li e udite ngahelipi kombinga yaasho? —  Mbela okwa li a tya kutya: “Ina hala okukala ina yaJesus”? Ahowe, Maria okwa li a halelela okuninga osho a li ta pulwa kuKalunga. Ndele mbela ongahelipi Omona waKalunga oo a li meulu a li ta ka dalwa e li okahanana kombada yedu? Okudalwa kwaJesus okwa li kwa yooloka ko ngahelipi kokudalwa kwouhanana vakwao? Mbela ou shii kutya okwa li kwa yooloka ko ngahelipi?  — 

Kalunga okwa li a shita ovadali vetu votete, Adam naEva, tava dulu okuya momilele, sha hala okutya, tava nangala pamwe nokukwatafana pambelela monghedi ye likalekelwa, tava longifa oilyo yavo yoludalo. Ngeenge omushamane nomukulukadi va i momilele, omukulukadi oha ningi eteelelo nokaana ohaka kulile moshidalelo shaina. Ovanhu vahapu ohava ti kutya oshinima osho oshikumwifilonga, onde lineekela kutya naave osho to diladila ngaho.

Omolwashike Jesus ta tulwa metemba?

Kalunga okwa li a longa po oshikumwifilonga shimwe shinenenene. Okwa li a lundululila omwenyo wOmona waye moshidalelo shaMaria okudja meulu. Kalunga ka li a ninga nale oshinima sha tya ngaho, noite ke shi ninga vali. Kungaho, Jesus okwa kulila moshidalelo shaMaria ngaashi ashike ouhanana vakwao hava kulile moidalelo yooina. Konima yaasho, Maria okwa ka hombolwa kuJosef.

Eshi Jesus a li e li pokudalwa, Maria naJosef ova li va ka talela po  kuBetlehem, ndele oshilando osho osha li shi yadi ovanhu. Maria naJosef kava li nokuli ve na onhele yokukala, onghee hano, ova li va ka kala monhele omo hamu nangala oimuna. Jesus okwa li a dalelwa monhele omo, nokwa li a nangekwa metemba loimuna, ngaashi u shi wete mefano olo eshi ta nangekwa mo. Etemba loimuna omomo hamu tulwa oikulya yeengobe nosho yo yoimuna ikwao.

Opa li pa ningwa oinima ihokwifa moufiku omo Jesus a dalwa. Ovafita vamwe ova li va holokelwa komweengeli popepi naBetlehem. Omweengeli oo okwa li e va lombwela kutya Jesus omunhu a fimana. Okwa ti: ‘Ame ohandi mu lombwele onghundana iwa oyo tai ka hafifa ovanhu aveshe. Nena tuu eli okwa dalwa oo ta ka xupifa ovanhu.’ — Lukas 2:10, 11.

Onghundana iwa ilipi omweengeli umwe a lombwela ovafita veedi?

Omweengeli oo okwa li a lombwela ovafita ovo kutya ngeenge ova i kuBetlehem, otava ka hanga Jesus a nangekwa metemba lokulila oimuna.  Ohaluka, ovaengeli vamwe ova li ve limbwanga mumwe nomweengeli oo ndele tava tange Kalunga. Ova li va imba tava ti: ‘Efimano ola Kalunga nombili kombada yedu movanhu e va hokwa.’ — Lukas 2:12-14.

Eshi ovaengeli va dja po povafita, ovafita ova li va ya kuBetlehem va ka tale Jesus. Eshi ovafita va li va fika kuBetlehem, ova li va lombwela Josef naMaria oinima aishe iwa oyo va li va uda. Maria ka li tuu a hafa eshi a li a itavela okukala ina yaJesus!

Konima yefimbo, Josef naMaria ova li va twala Jesus koshilando shaNasaret, oko Jesus a ka kulila. Eshi Jesus a kula okwa li a hovela noshilonga shaye shinene shokuhonga ovanhu. Oshilonga osho osha li shimwe shomoilonga oyo Jehova Kalunga a li a hala Jesus a longe kombada yedu. Jesus okwa li e na ehalo  okulonga oshilonga osho, molwaashi okwa li e hole Xe yomeulu neenghono.

Fimbo Jesus a li ina hovela oshilonga shaye e li Omuhongi Munene, okwa li a ninginifwa momulonga waJordan, kuJohannes Omuninginifi. Opo nee opa li pa ningwa oshinima shikumwifi eshi Jesus a dja koshi yomeva. Jehova okwa li a popya okudja meulu a ti: “Ou Omona wange omuholike, onde mu hokwa.” (Mateus 3:17) Mbela iho kala wa hafa ngeenge ovadali voye tave ku lombwele kutya ove ku hole? —  Ohatu dulu okukala noushili kutya Jesus naye osho a li e udite ngaho.

Jesus okwa li ha ningi alushe osho sha yuka. Ka li ha kala e lihalela ondodo oyo ihe fi yaye. Ka li ha lombwele ovanhu kutya oye Kalunga. Omweengeli Gabriel okwa li a lombwela Maria kutya Jesus ota ka ifanwa Omona waKalunga, na Jesus ye mwene okwa li a popya kutya ye Omona waKalunga. Ndele Jesus ka li a lombwela ovanhu kutya oku shii shihapu e dule Xe. Okwa ti: “Tate oku dule nge.” — Johannes 14:28.

Nokuli naashi a li meulu, Jesus okwa li ha ningi osho Xe he mu lombwele a ninge. Ka li ashike ha itavele kutya ota ka ninga oshinima shonhumba, ndele mboli hasho ta ka ninga shili. Okwa li e hole Xe, nomolwaasho okwa li ha pwilikine kwaasho Xe te mu lombwele a ninge. Eshi Jesus e ke uya kombada yedu, okwa li yo a longa osho Xe yomeulu a li e mu tuma a longe. Ka li a longifa efimbo laye moinima imwe i lili. Hano itashi kumwifa eshi Jehova a hokwa Omona waye.

Mbela nafye inatu hala okuhafifa Jehova? —  Ngeenge osho, natu ulike kutya ohatu pwilikine kuJehova shili, ngaashi Jesus a li a ninga. Kalunga oha popi nafye okupitila mOmbibeli. Mbela otashi ka kala ngoo sha yuka okuliningifa tu kale twa fa hatu pwilikine kuKalunga, ndele osho twa itavela naasho hatu ningi oshi li omhinge naasho Ombibeli tai ti? — Dimbuluka kutya ohatu ka kala twa hala okuhafifa Jehova ngeenge otu mu hole shili.

Paife natu ka leshe omishangwa dimwe dOmbibeli odo tadi ulike kutya otwa pumbwa okwiitavela nokushiiva kombinga yaJesus: Mateus 7:21-23; Johannes 4:25, 26; nosho yo 1 Timoteus 2:5, 6.