Inda koshikalimo

Inda koshikalimo

 ETUKULWA 38

Omolwashike tu na okukala tu hole jesus?

Omolwashike tu na okukala tu hole jesus?

NATU tye nee ngeno ou li moshikepa i li pokuningina. Mbela oto ka kala wa hala umwe e ku xupife? —  Oto ka kala u udite ngahelipi ngeenge omunhu wonhumba okwa yambe po omwenyo waye opo e ku xupife? —  Jesus Kristus naye osho naanaa a ninga ngaho. Okwa yamba po omwenyo waye u li ekulilo opo tu dule okuxupifwa, ngaashi twe lihonga mEtukulwa 37.

Ashike Jesus ita dulu oku tu xupifa kunena tuha fye omeva. Mbela oto dimbuluka kutya Jesus okwe tu xupifa kushike? —  Okwe tu xupifa moulunde nefyo olo atusheni twa fyuulula kuAdam. Nonande ope na ovanhu vamwe ovo va longa oilonga ii neenghono, navo Jesus okwe va fila. Mbela ngeno okwa li oove ngeno oto ka yandja omwenyo woye opo u kendabale okuxupifa ovanhu va tya ngaho? — 

Ombibeli oya ti: “[Walye] nee, ngenge taku monika ou te liyandje mokufya omolwomuyuki; heeno kashiimba ku na tuu ou e nouladi a file ou muwa.” Ndele nande ongaho, Ombibeli oya ti kutya Jesus okwa fila “ovahenakalunga.” Okwa fila yo nokuli novanhu ovo ihava longele Kalunga. Ombibeli oya ti vali: ‘Kristus okwe tu fila fimbo twa li natango ovalunde’ hatu longo oilonga ii. — Ovaroma 5:6-8.

Mbela ou shii omuyapostoli umwe oo a li ha longo oilonga ii? — Omuyapostoli oo okwa shanga a ti: ‘Kristus Jesus okwe uya mounyuni okuxupifa ovalunde, muava aame omunene ndi va dule aveshe.’ Omuyapostoli oo a popya eendjovo odo oPaulus. Paulus okwa ti yo kutya okwa li ‘ehe na eendunge’ nale nokwa li a longa ‘owii.’ — 1 Timoteus 1:15; Titus 3:3.

Kalunga ke na tuu ohole inene eshi a li a tuma Omona waye opo a file ovanhu ovo va longa oilonga ii! Kufa Ombibeli yoye ndele to lesha  kombinga yohole yaKalunga muJohannes 3:16. Ovelishe oyo otai ti: “Osho Kalunga a kala e hole ounyuni, [sha hala okutya, ovanhu ovo ve li kombada yedu] Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.”

Jesus okwa li e lididimikila oinima ilipi eshi e tu yandjela omwenyo waye?

Jesus okwa li a ulika kutya oku tu hole ngaashi Xe. Otashi dulika to dimbuluka kutya mEtukulwa 30 lembo eli otwe lihonga shi na sha nanghee Jesus a li a mona oixuna moufiku oo kwa li a kwatwa po. Jesus okwa li a twalwa keumbo lomupristeri omukulunhu wedina Kajafas opo a ka pangulwe. Ovanhu ova li va eta eendombwedi opo di yandje oumbangi woipupulu kombinga yaJesus, nova li ve mu denga neengonyo. Pomhito oyo opo Petrus a li e lidimbika Jesus. Paife kala nee ngeno wa fa opo u li eshi Jesus ta pangulwa, nou wete keshe osho tashi ningwa po.

Jesus ka li a kofa oufiku aushe, molwaashi monghedi omo a li ta pangulwa kaya li metwokumwe noiteelelwa yopaveta. Ovapristeri ova li va ongela divadiva oilyo yOmhangu yopombada yOvajuda ndele tava pangula vali Jesus. Ndele pomhito oyo natango ova li va lundila Jesus kutya ota sheke Kalunga.

Opo nee, ovapristeri ova li va mangifa Jesus ndele tave mu twala kuPilatus, omupangeli waRoma. Ovanhu ova li va lombwela Pilatus va ti: ‘Jesus ota tu ondubo nepangelo, nomolwaasho oku na okudipawa.’ Pilatus okwa li a mona kutya ovapristeri ova li tava popi oipupulu. Onghee hano, okwa li e va lombwela a ti: ‘Inandi mona momunhu ou nande etimba laasho tamu mu hokololifa. Ame ohandi mu mangulula.’ Ashike ovapristeri nosho yo ovanhu vamwe ova li va ingida tava ti: ‘Ahowe, mu dipaa!’

Konima yefimbo, Pilatus okwa li a kendabala vali okulombwela ovanhu kutya ota ka mangulula Jesus. Ndele ovapristeri ova li va xwaxwameka ongudu yovanhu i ingide tai ti: ‘Ngeenge owe mu mangulula, naave oto tu ondubo nepangelo! Mu dipaa!’ Ongudu yovanhu oya li tai weelele neenghono. Mbela ou shi shii kutya Pilatus okwa li a ninga po shike? — 

Pilatus okwa li e liyandja kovanhu, ndele ta dengifa Jesus neeshokoto  noku mu shunifa kovakwaita a ka dipawe. Ovanhu ova li va dika Jesus oshishani shomakiya nova li tave mu sheke moku mu twila eengolo. Opo nee ova li va humbatifa Jesus opala inene ndele tave mu twala kondje yoshilando, konhele hai ifanwa onhele yOshipongolo shOmutwe. Ova li va valela omake neemhadi daJesus kopala oyo, ndele tave i diki opo Jesus a kale a endjelela. Jesus okwa li ta di eehonde nokwa li ta ehama neenghono.

Jesus ka li a fya pefimbo opo, ndele okwa kala oule wefimbo a endjelela kopala oko. Ovapristeri ovakulunhu ova li tave mu sheke. Ovanhu ovo va li tava ende po ova li tava ti: ‘Ngenge oove Omona waKalunga, dja ko komuti womahepeko.’ Ashike Jesus okwa li e shii kutya omolwashike Xe e mu tumina kombada yedu. Okwa li e shi shii  kutya oku na okuyandja omwenyo waye wa wanenena opo tu dule okumona omhito yoku ka mona omwenyo waalushe. Xuuninwa, potundi onhinhatu yomutenya wefiku olo, Jesus okwa li a ilikana kuXe ndele ta fi. — Mateus 26:36–27:50, yelekanifa NW; Markus 15:1; Lukas 22:39–23:46; Johannes 18:1–19:30.

Jesus ka li tuu a yooloka ko kuAdam! Adam ka li e hole Kalunga molwaashi ka li a dulika kuYe. Adam ka li yo e tu hole, molwaashi okwa nyona ndele atusheni hatu fyuulula oulunde waye. Ashike Jesus oku hole Kalunga nosho yo ovanhu aveshe. Jesus oha dulika yo alushe kuKalunga, nokwa yandja omwenyo waye opo a kufe po owii oo twa etelwa kuAdam.

Mbela ino pandula omolwoshinima shikumwifa osho Jesus a ninga? — Ngeenge to ilikana kuKalunga, oho mu pandula ngoo eshi e tu pa Omona waye? —  Omuyapostoli Paulus okwa li a pandula omolwouwa oo Kristus e mu ningila. Paulus okwa shanga a ti kutya Omona waKalunga oku ‘mu hole nokwe liyandja ponhele yaye.’ (Ovagalati 2:20) Jesus okwe tu fila yo fye naave. Okwa yandja omwenyo waye wa wanenena opo tu dule oku ka mona omwenyo waalushe. Onghee hano, osho oshi na oku tu linyengifa tu kale tu hole Jesus.

Oshike hatu dulu okuninga opo tu ulike kutya otu hole Jesus?

Omuyapostoli Paulus okwa li a shangela Ovakriste vokuKorinto a ti: “Ohole yaKristus tai tu fininike.” Mbela ohole yaKristus oi na oku tu fininika tu ninge shike? Oto diladila ngahelipi? —  Tala kenyamukulo laPaulus eshi a ti: ‘Kristus okwa fya ponhele yaaveshe, opo ovo ve nomwenyo ve he likalele vali vo vene.’ — 2 Ovakorinto 5:14, 15.

 Mbela omeenghedi dilipi to dulu okuulika kutya oto hafifa Kristus? — Onghedi imwe omokulombwela ovanhu osho we lihonga kombinga yaJesus. Ile diladila kwaashi: Natu tye nee pamwe ou li poima oove auke, nomolwaasho meme woye natate woye nosho yo ovanhu vamwe itava dulu okumona kutya oto ningi shike. Mbela oto ka tala eeprograma do-TV ile pamwe u tale oinima yonhumba ko-Internet oyo u shii kutya inai hokiwa kuJesus? —  Dimbuluka kutya Jesus oku na omwenyo nota dulu okumona keshe osho hatu ningi.

Olyelye ha dulu okumona oinima aishe oyo hatu ningi?

Etomheno limwe molwaashi tu na okukala tu hole Jesus ololo kutya otwa hala okuhopaenena Jehova. Jesus okwa ti: ‘Tate oku hole nge.’ Mbela ou shi shii kutya omolwashike Jehova e hole Jesus nonokutya omolwashike nafye tu na okukala tu mu hole? —  Omolwaashi Jesus okwa li a halelela okufya opo ehalo laKalunga li wanifwe. (Johannes 10:17) Onghee hano, natu kale hatu ningi ngaashi Ombibeli tai tu lombwele tai ti: “Ningeni hano [ovahopaeleli] vaKalunga ngaashi ovana ovaholike, nye mu kale nokweenda mohole ngaashi Kristus kwa li e mu hole nokwe liyandja molwetu.” — Ovaefeso 5:1, 2.

Opo u kale u na olupandu linene li na sha naJesus nosho yo osho e tu ningila, lesha Johannes 3:35; 15:9, 10 nosho yo 1 Johannes 5:11, 12.