Inda koshikalimo

Inda koshikalimo

 ETUKULWA 14

Omolwashike tu na okukala hatu dimine po vamwe?

Omolwashike tu na okukala hatu dimine po vamwe?

MBELA owa ningilwa ngoo nale oshinima shii kuumwe? —  Mbela okwa li e ku yahameka ile a ungaunga nai naave? —  Mbela naave ou na okuungaunga nai naye? — 

Ovanhu vahapu ngeenge va yahamekwa kuumwe ohava kendabala okushunifila omunhu oo owii. Ndele Jesus okwe tu honga kutya otu na okukala hatu dimine po ovo ve tu ningila oinima ii. (Mateus 6:12) Ndele mbela ongahelipi ngeenge omunhu wonhumba oha ungaunga nai nafye luhapu? Mbela otu na oku mu dimina po lungapi? — 

Petrus okwa li a hala okushiiva kutya otu na okudimina po vamwe lungapi ngeenge ve tu ninga nai. Onghee hano, efiku limwe okwa li a pula Jesus a ti: ‘Mbela ondi na oku mu dimina po lwoikando iheyali?’ Inashi wana ashike okudimina po vamwe lwoikando iheyali. Jesus okwa li a nyamukula Petrus a ti kutya ngeenge omunhu wonhumba okwe ku ningila owii luhapu ‘ou na oku mu dimina po lwo-77.’

Petrus okwa li a hala okushiiva shike kombinga yokudimina po?

Okudimina po vamwe lwo-77 oikando ihapu neenghono! Itatu dulu nokuli okudimbuluka kutya omunhu wonhumba okwe tu ningila owii u fike peni. Jesus ote tu hongo kutya: Katu na okudimbuluka owii oo vamwe tashi dulika ve tu ningile. Ngeenge umwe okwe tu pula tu mu dimine po, otu na oku mu dimina po.

Jesus okwa li a hala okuhonga ovahongwa vaye kutya osha fimana neenghono okukala hatu dimine po vamwe. Onghee  hano, konima eshi a li a nyamukula epulo laPetrus, okwa li a hokololela ovahongwa vaye ehokololo. Owa hala mbela okuuda ehokololo olo? — 

Opa li ohamba imwe oyo ya li hai longo ouwa noya li i na onghenda. Ngeenge ovapiya vayo va li va pumbwa ekwafo, ohamba oyo oya li nokuli hai va pe eendjo doimaliwa. Ndele efiku limwe, ohamba oya li ya hala ovapiya vayo ovo va li ve na oikolo yayo yoimaliwa ve i fute. Ohamba oya li ya etelwa omupiya wayo umwe oo a li e na oikolo yayo oimaliwa omamiliyona 60, oyo oya li oimaliwa ihapu neenghono.

Oshike sha li sha ningwa po eshi omupiya ou a li a pula ohamba i mu pe efimbo la wana opo a fute oikolo yaye?

 Ndele omupiya oo okwa li a longifa po oimaliwa aishe yohamba, noka li ta dulu okushunifa oikolo yohamba. Onghee hano, ohamba oya li ya popya kutya omupiya oo na landifwe po. Ohamba oya li yo ya tya kutya omukulukadi womupiya oo, nounona vaye nava landifwe po nosho yo keshe osho a li e na. Opo nee oimaliwa oyo kwa li tai ka dja mokulandifwa po kwavo nosho yo kwoiniwe yaye, okwa li tai ka futila po oimaliwa yohamba. Mbela oto diladila kutya omupiya oo okwa li e udite ngahelipi? — 

Omupiya oo okwa li a twa eengolo koshipala shohamba, ndele ta indile ohamba a ti: ‘Kwafele nge u pe nge efimbo la wana opo ndi dule okwaalula oikolo yoye.’ Ngeno oove wa li ohamba oyo, mbela ngeno owa ningila shike omupiya oo? —  Ohamba oya li i uditile onghenda omupiya wayo. Onghee hano, oya li ye mu dimina po. Oya li ye mu lombwela kutya ke na okwaalula nandenande oikolo yayo. Ka li nokuli e na okuyandja nandenande oimwe yomoimaliwa oyo. Osho kasha li tuu sha hafifa omupiya oo!

Ndele mbela omupiya oo okwa ka ninga po shike? Eshi a ya pondje okwa ka shakena po nomupiya mukwao umwe oo a li ashike e na oikolo yaye efele limwe. Omupiya oo a li a filwa onghenda kohamba okwa li a kwata omupiya mukwao pofingo, ndele te mu pondo ta ti: ‘Futa efele lange olo u na!’ Diladila ashike komunhu oo opo a li a diminwa po shihapu kohamba, ndele ota ningi mukwao ngaho!

Omupiya oo okwa li a ungaunga ngahelipi nomupiya mukwao oo a li ita dulu okufuta oikolo yaye?

Omupiya oo a li a lya oikolo yefele limwe komupiya mukwao okwa li ohepele. Ka li ta dulu okufuta oikolo yomupiya mukwao pefimbo opo tuu opo. Onghee hano, okwa li a twa eengolo koshipala shomupiya mukwao ndele te mu indile ta ti: ‘Pe nge efimbo la wana, opo ndi dule okufuta oikolo yoye.’ Mbela omupiya oo okwa li ngoo e na okupa omupiya mukwao efimbo la wana opo a dule okufuta oikolo yaye? —  Ngeno okwa li oove, mbela ngeno owa ninga po shike?

Omupiya oo ka li a fila onghenda omupiya mukwao, ngaashi ye a li a filwa onghenda kohamba. Okwa li a hala a pewe oimaliwa yaye pefimbo opo. Ndele molwaashi omupiya mukwao ka li ta dulu okufuta oikolo yaye, okwa li e mu tulifa modolongo. Ovapiya vakwao ova li va mona ashishe osho omupiya oo a li a ningila omupiya mukwao nokava li ve shi hokwa.  Ovapiya ovo ova li va etela onghenda omupiya oo a li a tulwa modolongo, onghee hano, ova li va ka lombwela ohamba osho sha li sha ningwa po.

Ohamba nayo kaya li ya hokwa osho omupiya oo a li a ningila omupiya mukwao. Ohamba oya li ya handukila neenghono omupiya oo a li ina dimina po omupiya mukwao. Ohamba oya li ya ufana omupiya oo ndele tai ti: ‘Omupiya ove mwii, inandi ku dimina po mbela omolwoikolo yange oyo u na? Mbela naave kwa li ngeno u na okudimina po omupiya mukweni?’

Omupiya oo a li ina dimina po omupiya mukwao okwa li e na okulihonga oshilihongomwa kohamba oyo ya li hai longo ouwa. Ndele hasho a li a ninga. Onghee hano, ohamba oya li ya tulifa omupiya oo modolongo nokwa li ashike ta ka dja mo ngeenge okwa futu omamiliyona 60 ohamba. Omupiya oo ka li ta dulu okufuta oikolo yohamba, molwaashi okwa li modolongo noka li e na apa ta dulu okuhanga oimaliwa. Onghee hano, okwa li ta ka kala modolongo fiyo a fya.

Ohamba oya li ya ningila shike omupiya oo a li ina dimina po omupiya mukwao?

Eshi Jesus a xulifa ehokololo olo, okwa li a lombwela ovashikuli vaye a ti: “Osho yo Tate meulu te mu ningile, ngenge itamu dimine po okomitima deni keshe tuu omumwaina.” — Mateus 18:21-35.

 Atusheni otu na oikolo ihapu yaKalunga. Kalunga oye e tu pa omwenyo. Onghee hano, oikolo yaKalunga oyo tu na oihapu i dule oikolo yetu oyo vamwe ve na. Oikolo yetu oyo ovanhu ve na otai yelekwa nefele limwe olo omupiya umwe a li a lya kumukwao. Ndele oikolo yaKalunga oyo tu na omolwoinima ii oyo hatu ningi otai yelekwa nomamiliyona 60 oo omupiya umwe oo a li a lya oikolo kohamba.

Kalunga ohe tu file onghenda, nohe tu dimine po nonande ohatu ningi oinima ya puka. Ihe tu handukile ndele te tu dipaa. Ndele otwa pumbwa okudimbuluka oshilihongomwa tashi landula: Kalunga ohe tu dimine po ashike ngeenge hatu dimine ovo ve tu ningila owii. Oshilihongomwa osho osha fimana, hasho mbela? — 

Oto ka ninga po shike ngeenge umwe okwe ku pula u mu dimine po?

Onghee hano, ngeenge umwe okwa kala ina ungaunga nawa naave ndele te ku pe ombili, mbela oto ka ninga po shike? Mbela oto ke mu dimina po ngoo? —  Ongahelipi ngeenge oha ungaunga nai naave lwoikando ihapu? Mbela oto ke mu dimina po ngoo natango? — 

Natu tye nee ngeno ohatu pula umwe e tu dimine po, itatu ka kala mbela twa hala omunhu oo e tu dimine po? —  Onghee hano, nafye otu na oku mu ningila sha faafana. Katu na ashike okupopya kutya otwe mu dimina po, ndele otu na yo oku mu dimina po shili tashi di komutima. Ngeenge hatu ningi ngaho, ohatu ulike kutya otwa hala shili okukala ovashikuli vOmuhongi Munene.

Opo tu ude ko nghee sha fimana okukala hatu dimine po vamwe, natu leshe yo Omayeletumbulo 19:11; Mateus 6:14, 15 nosho yo Lukas 17:3, 4.