Inda koshikalimo

Inda koshikalimo

 ETUKULWA 6

Omuhongi munene okwa li ha yakula vamwe

Omuhongi munene okwa li ha yakula vamwe

MBELA oho kala wa hafa ngeenge umwe e ku ningila oshinima shonhumba shiwa? —  Ovanhu aveshe ohava kala va hafa ngeenge va ningilwa oshinima shiwa kuumwe. Omuhongi Munene okwa li e shii kombinga yaasho, nokwa li alushe ha ningile vamwe ouwa. Okwa ti: ‘Inandi uya okuyakulwa, ndele okuyakula.’ — Mateus 20:28.

Ovashikuli vaJesus ova li tava tu eemhata kombinga yashike?

Opo tu kale ngaashi Omuhongi Munene, otu na okuninga shike mbela? —  Otu na okukala hatu yakula vamwe, moku va ningila ouwa. Ovanhu vahapu ihava ningile vakwao ouwa, ndele ovo ashike hava kala va hala okuyakulwa. Pomhito imwe, ovashikuli vaJesus navo osho va li ve udite kutya ovo ve na okuyakulwa kuvamwe. Keshe umwe womuvo okwa li a hala oye a kale munene ile oye a fimana.

Efiku limwe Jesus okwa li ta ende pamwe novahongwa vaye, ndele tava i meumbo lonhumba olo la li moshilando shedina Kapernaum, popepi nEfuta laGalilea. Fimbo va li meumbo olo, Jesus okwa li e va pula ta ti: “Omwa li tamu kundafana shike mondjila?” Kava li ve mu nyamukula molwaashi ova li ve shii kutya ova li tava tu eemhata kutya olyelye a li munene mokati kavo eshi va li ve li mondjila. — Markus 9:33, 34.

 Jesus okwa li e shii kutya inashi yuka kuumwe womovahongwa vaye a diladile kutya oye munene e dule vakwao. Ngaashi twe lihonga metukulwa lotete lembo eli, Jesus okwa li a fikameka okaana mokati kavo noku va lombwela kutya ove na okulininipika ngaashi okaana oko. Ndele nande ongaho, kava li ve lihonga po sha. Onghee hano, moufiku oo wa tetekela efyo laye, Jesus okwa li a honga ovashikuli vaye oshilihongomwa osho va li itave ke shi dimbwa nande. Okwa li a ninga po shike mbela?  — 

Ofimbo va li tava li pamwe, Jesus okwa li a fikama ndele ta kufa oshihaduku nokwe shi lidingila moshiya. Okwa li a kufa oshiyasha shokulikoshela ndele ta tula mo omeva. Ovashikuli vaye otashi dulika va li tave lipula kutya Jesus okwa li ta ka ninga po shike. Fimbo tave mu tale, Jesus okwa li a twa eengolo ndele ta hovele okukosha eemhadi davo. Opo nee okwa li a kufa oshihaduku ndele ta kukutike eemhadi davo. Diladila ashike kombinga yaasho! Natu tye nee ngeno opo wa li, mbela ngeno owa kala udite ngahelipi?  — 

Ovashikuli vaye ova li ve udite kutya inashi yuka kOmuhongi Munene a koshe eemhadi davo. Ova li va fya ohoni. Petrus ka li noku li a hala Jesus e mu longele oshilonga shi dinifa sha tya ngaho. Ndele Jesus okwa li a tya kutya osha fimana kuye okulonga oshilonga sha tya ngaho.

Oshilihongomwa shilipi Jesus a li ta hongo ovashikuli vaye?

Ihatu kosho eemhadi davamwe kunena, ashike osho osha li hashi ningwa pefimbo olo Jesus a li kombada yedu. Mbela ou shi shii kutya omolwashike? —  Ovanhu vomoshilando omo Jesus novashikuli vaye va li hava kala ova li hava djala eenghaku deesandala. Ngeenge va li va enda mondjila i na efululu, eemhadi davo oda li hadi kala da twima ondwi. Nomolwaasho osha li hashi kala oshilonga shouwa okukosha ko ondwi keemhadi domweenda.

Ndelenee pomhito opo, kapa li nande oumwe womovahongwa vaJesus a li e liyamba a koshe ko keemhadi davakwao. Onghee hano, Jesus okwa li e shi ninga ye mwene. Mokuninga ngaho, Jesus okwa li a honga ovahongwa vaye oshilihongomwa sha fimana, osho va li va pumbwa okulihonga. Nafye kunena otwa pumbwa okulihonga oshilihongomwa osho.

 Mbela ou shi shii kutya oshilihongomwa osho oshilipi? —  Konima eshi Jesus a shuna ponhele opo a li omutumba, okwa li e va pula a ti: ‘Omu udite ko tuu eshi nde shi mu ningila? Nye otamu ifana nge omuhongi nOmwene, ndele ohamu tongo sha yuka, osheshi Aame tuu ou. Hano Ame Omwene nomuhongi weni fimbo nda kosha eemhadi deni, nanye yo mu nokukoshafana keemhadi.’ — Johannes 13:2-14.

Oto dulu okuninga po shike opo u kwafele vamwe?

Omuhongi Munene okwa li a hala okuulikila ovahongwa vaye kutya ove na okuyakulafana. Ka li a hala va kale ve lihole vo vene. Ka li a hala va kale tava diladila kutya ova fimana neenghono ve dule vakwao nove na okukala alushe tava yakulwa kuvamwe. Okwa li a hala va kale ve na ehalo okuyakula vamwe.

Mbela osho kashi fi oshilihongomwa sha denga mbada? —  Mbela ino hala okukala ngaashi Omuhongi Munene mokukala ho yakula vamwe? — Atusheni ohatu dulu okuyakula vamwe, naasho otashi ke va hafifa. Ndelenee komesho yaaishe, ohatu ka hafifa Jesus nosho yo Xe.

Kashi fi oshinima shidjuu okuyakula vamwe. Ngeenge owa kala ho tale nawa, oto ka mona kutya ope na oinima ihapu oyo to dulu okuningila vamwe. Diladila kwaashi: Mbela ope na oshinima shonhumba omo to dulu okukwafela meme woye? Ou shii kutya meme woye ohe ku  ningile oinima ihapu nosho yo oukwaneumbo aushe. Mbela ito dulu oku mu kwafela mwaasho? —  Omolwashike ito mu pula?

Oto dulu okutula oiyasha poshitaafula fimbo oukwaneumbo inau lya. Ile oto dulu okukufa po oiyasha konima eshi oukwaneumbo weni wa mana okulya. Ounona vamwe ohava ka teka omeva keshe efiku. Keshe osho to ningi, oto yakula vamwe, ngaashi naanaa Jesus a li a ninga.

Mbela ou na oundenge ovo to dulu okuyakula? Dimbuluka kutya Jesus, Omuhongi Munene, okwa li a yakula ovahongwa vaye. Ngeenge owa kala ho yakula oundenge voye oto hopaenene Jesus. Mbela oto dulu oku va ningila shike? —  Oto dulu oku va kwafela va kale hava tuvikile oidanaukifo yavo ngeenge va mana okudanauka. Ile oto dulu oku va djaleka. Ile pamwe oto dulu oku va kwafela va yale eembete davo. Mbela oto dulu vali oku va kwafela  mushike? —  Oundenge voye otava ka kala ve ku hole ngeenge owa kala to va kwafele, ngaashi ashike ovashikuli vaJesus va li ve mu hole.

Oto dulu yo okuyakula vamwe kofikola, tashi dulika nande ovanafikola vomongudu yeni ile omuhongi woye. Ngeenge umwe a ufila embo laye pedu, otashi ka kala oshilonga shouwa oku mu kwafela u li toole po. Oto dulu okukwafela omuhongi woye u wapaleke ko koshipelende ile u mu kwafele moshinima shimwe shi lili. Oto dulu yo okuningila umwe ouwa moku mu yeululila omuvelo.

Omafimbo amwe, ovanhu otashi dulika vehe ku pandule nonande owe va ningila ouwa. Mbela oto diladila kutya osho oshi na oku tu imba tu ningile vamwe ouwa? —  Ahowe! Ovanhu vahapu kava li va pandula Jesus eshi a li e va ningila ouwa. Ndele nande ongaho, osho kasha li she mu imba okuningila vamwe ouwa.

Onghee hano, inatu efa okuyakula vamwe. Natu dimbuluke Omuhongi Munene, Jesus, nokukendabala alushe okushikula oshihopaenenwa shaye.

Omishangwa da wedwa po di na sha nokukwafela vamwe, Omayeletumbulo 3:27, 28; Ovaroma 15:1, 2; nosho yo Ovagalati 6:2.