Inda koshikalimo

Inda koshikalimo

 ETUKULWA 15

Natu kale hatu ungaunga navamwe nonghenda

Natu kale hatu ungaunga navamwe nonghenda

MBELA ou shi shii kutya onhondo oshike? —  Otashi ti kutya okukala u tonde vamwe molwaashi ova yooloka ko kwoove ile molwaashi ihava popi elaka loye, nou na nale etaleko lii li na sha navo nokuli nofimbo ino va shiiva.

Mbela osha yuka ngoo okukala tu tonde vamwe nokuli nofimbo inatu va shiiva kutya ovanhu va tya ngahelipi ile molwaashi kutya ova yooloka ko kufye? —  Ahowe inashi yuka okukala nonhondo, noitashi ulike kutya otu na onghenda. Katu na okuungaunga nai navamwe, molwaashi va yooloka ko kufye.

Diladila kwaashi, mbela ou shii umwe oo e na oluvala la yooloka ko kuloye ile ha popi elaka limwe li lili? —  Otashi dulika yo u shii ovanhu ovo inave ku fa molwaashi va mona oshiponga ile molwaashi tava vele. Mbela oho file onghenda nou hole ovanhu ovo va yooloka ko kwoove? — 

Otu na okuungaunga ngahelipi naavo va yooloka ko kufye?

Ngeenge otwa pwilikine kOmuhongi Munene, Jesus Kristus, ohatu ka ungaunga nonghenda novanhu aveshe. Otu na okukala hatu file ovanhu onghenda, kashi na nee mbudi kutya ova dja koshilongo shilipi ile kutya ove na oluvala la tya ngahelipi. Jesus okwa li a honga ovanhu oshilihongomwa kombinga yaasho, nonande havanhu aveshe va itavela kutya otu na okukala hatu file vamwe onghenda. Natu ka kundafane kombinga yoshilihongomwa osho.

Pomhito imwe, Omujuda umwe oo a li e tonde ovanhu vamwe okwa li e uya kuJesus ndele te mu pula ta ti: ‘Ondi na okuninga shike opo ndi mone omwenyo waalushe?’ Jesus okwa li e shi shii kutya omulumenhu oo otashi dulika a li a hala Jesus a tye kutya otu na ashike okufila onghenda ovanhu vomomuhoko ile vomoshiwana shetu. Ponhele yokunyamukula epulo laye, Jesus okwa li e mu pula a ti: ‘Mbela Omhango yaKalunga otai ti kutya otu na okuninga shike?’

 Omulumenhu oo okwa li a nyamukula Jesus a ti kutya Omhango otai ti: ‘Hola Omwene Kalunga koye nomutima woye aushe, na hola omukweni ngaashi ove u lihole mwene.’ Jesus okwa li e mu lombwela a ti: ‘Owa nyamukula sha yuka, twikila okuninga ngaho noto ka mona omwenyo waalushe.’

Omulumenhu oo ka li a hala okukala ha file onghenda nokukala e hole ovo va yooloka kuye. Onghee hano, okwa li a konga elipopilo. Okwa li a pula Jesus a ti: “Omukwetu olyelye?” Otashi dulika a li a hala Jesus a tye: “Oovakweni, ookaume koye,” ile “Ovanhu ovo ve ku fa.” Opo a nyamukule epulo lomulumenhu oo, Jesus okwa li a hokolola ehokololo li na sha nomulumenhu Omujuda nOmusamaria. Ehokololo ola li ngaashi tashi shikula.

Efiku limwe, omulumenhu umwe okwa li ta ende nondjila ya dja koshilando shaJerusalem a finda kuJeriko, omulumenhu oo okwa li Omujuda. Ofimbo a li ta ende, okwa li a hangwa kovanyeki, ovo va li ve mu denga ndele ta wile pedu nova li ve mu kufa oimaliwa noikutu yaye. Ovanyeki ovo ova li ve mu yahameka neenghono nova li ve mu fiya a nangala pomunghulo wondjila e na okamwenyo kanini.

Konima yokafimbo kanini, omupristeri wonhumba okwa li a enda nondjila oyo. Omupristeri oo okwa li a mona kutya omulumenhu oo okwa li a yahamekwa neenghono. Ngeno okwa li oove, mbela ngeno owa ninga po  shike? —  Omupristeri oo okwa li a kundulukila kombinga ikwao yondjila. Ka li nokuli a kanghama, noka li a ninga po sha opo a kwafele omulumenhu oo.

Natango, okwa li kwa dja vali omulumenhu umwe oo a li a lenga elongelokalunga. Omulumenhu oo okwa li Omulevi oo a li ha longo kotembeli muJerusalem. Mbela okwa li a kanghama po opo a kwafele omulumenhu oo a li a yahamekwa? —  Ahowe, okwa li a ninga naanaa ngaashi omupristeri a li a ninga.

Hauxuuninwa okwa ka dja Omusamaria. Ou mu wete mbela ta dilile kwinya nondjila oyo ya ngolyoka? —  Okwa li a mona Omujuda oo a li a yahamekwa neenghono a nangala pomunghulo wondjila. Ashike, Ovasamaria nOvajuda vahapu kava li ve holafane nandenande. (Johannes 4:9) Mbela Omusamaria oo naye okwa li ta ka fiya po Omujuda oo nopehe na  oku mu kwafela? Mbela okwa li a tya kutya: ‘Omolwashike mbela ndi na okukwafela Omujuda ou? Mbela naye ota ka kwafela nge ngoo ngeenge onda yahamekwa?’

Omusamaria okwa li a etela onghenda omulumenhu oo a li a mona a nangala pomunghulo wondjila. Okwa li e udite kutya itashi ka kala sha yuka oku mu fiya po noku mu efa a file pomunghulo wondjila. Onghee hano, okwa li a londoloka ko kondongi yaye, ndele ta i komulumenhu Omujuda nokwa li a hovela okuhakula oipute yaye. Okwa li a tila omaadi nosho yo omaviinyu poipute yaye, naasho osha li tashi ka kwafela opo oipute oyo i veluke. Opo nee, okwa li a manga oipute yomulumenhu oo nomalapi.

Omolwashike Omusamaria a li omukwao womulumenhu ou?

Omulumenhu Omusamaria okwa li a yambula po omulumenhu oo a li a yahamekwa ndele te mu londeke kondongi yaye. Opo nee ova li va enda kanini nondjila fiyo osheshi va li va fika pongulu yovaenda. Eshi va fika oko, Omusamaria okwa li e mu kongela onhele yokukala nokwa li e mu fila nawa oshisho.

Eshi Jesus a mana ehokololo laye okwa li a pula omulumenhu oo a li ta popi naye a ti: ‘Olyelye womovalumehu ovo vatatu a li omukwao womunhu oo a hangikile kovanyeki?’ Oto ti ngahelipi mbela? Mbela okwa li omupristeri, Omulevi, ile Omusamaria? — 

Omulumenhu oo okwa li a nyamukula a ti: ‘Omusamaria oo a li a kanghama ndele ta kwafele omulumenhu oo a li a yahamekwa oye a li mukwao.’ Jesus okwa li e mu lombwela a ti:  ‘Owa nyamukula sha yuka, naave yo inda u ka ninge ngaho.’ — Lukas 10:25-37.

Ehokololo olo kala li tuu liwa! Otali tu kwafele tu ude ko kutya oovakwetu ovo oolyelye. Havovo ashike ve li ookaume ketu kopofingo, ile ovo ve na oluvala la fa letu ile hava popi elaka letu. Jesus okwe tu honga tu kale hatu file onghenda ovanhu aveshe, kashi na nee mbudi kutya ova dja peni, inave tu fa ile kutya ihava popi elaka letu.

Jehova Kalunga osho e li ngaho, ke na onhondo. Jesus okwa ti: ‘Xo yeni womeulu etango laye ohe li pitifile ava vai naava vawa, nodula ohe i lokifile ovayuki naava vehe fi ovayuki.’ Onghee hano, otu na okukala hatu file ovanhu aveshe onghenda, ngaashi Kalunga ha ningi. — Mateus 5:44-48.

Ongahelipi to dulu okukala omukwao wavamwe?

Mbela oto ka ninga po shike ngeenge owa mono umwe a yahamekwa? — Ongahelipi ngeenge omunhu oo okwa dja koshilongo shimwe shi lili ile oluvala laye ola yooloka ko kuloye? Osho kashi na mbudi, ou na ashike oku mu kwafela, molwaashi omukweni. Ngeenge ou udite kutya ou munini unene noku mu kwafela, oto dulu okupula omukulunhu wonhumba e mu kwafele. Ile oto dulu okupula omupolifi ile omuhongifikola e mu kwafele. Kungaho, oto ulike kutya ove omunanghenda, ngaashi omulumenhu Omusamaria.

Omuhongi Munene okwa hala tu kale hatu file vamwe onghenda. Okwa hala tu kale hatu va kwafele kashi na nee mbudi kutya ovo oolyelye. Nomolwaasho a hokolola ehokololo li na sha nOmusamaria omunanghenda.

Shi na sha noshilihongomwa kombinga yokukala hatu file vamwe onghenda, kashi na nee mbudi kutya ovomomuhoko ulipi ile ovomoshiwana shilipi, lesha omayeletumbulo 19:22; oilonga 10:34, 35; nosho yo 17:26.