Inda koshikalimo

Inda koshikalimo

 ETUKULWA 10

Jesus oku na eenghono e dule eendemoni

Jesus oku na eenghono e dule eendemoni

MBELA oto dimbuluka kutya omolwashike omweengeli umwe waKalunga a li a ninga Satana Ondiaboli? —  Omolwaashi okwa li e lihole mwene nokwa li a hala okulongelwa nomolwaasho a li a efa po okulongela Kalunga. Mbela opa li ovaengeli vamwe ovo va li ve limbwanga mumwe naye? —  Heeno, opa li. Ombibeli otai ti kutya ovaengeli ovo ove li ‘ovaengeli vaSatana,’ ile tu tye eendemoni. — Ehololo 12:9.

Mbela ovaengeli ovo ovakolokoshi ile eendemoni oda itavela muKalunga? —  Ombibeli otai ti kutya ‘eendemoni oda itavela kutya Kalunga oko e li.’ (Jakob 2:19) Ndele paife eendemoni odo oda tila, molwaashi odi shii kutya Kalunga ote ke di handukila omolwoinima ii oyo da ninga. Oda ninga shike mbela osho sha puka? — 

Ombibeli otai ti kutya ovaengeli ovo ova li va fiya po onhele yavo yokukala meulu, ndele tave uya okukala kombada yedu ngaashi ovanhu. Ovaengeli ovo ova li va ninga ngaho molwaashi okwa li va hala okuya momilele novakainhu vawa  kombada yedu. (Genesis 6:1, 2; Judas 6) Mbela ou shii shike shi na sha nomilele? — 

Okuya momilele ongeenge omushamane nomukulukadi tava nangala pamwe nokukwatafana pambelela monghedi ye likalekelwa, tava longifa oilyo yavo yoludalo. Ngeenge ova i momilele oshi na oupu omukulukadi a fimbapale, nokaana oha ka hovele okukula moshidalelo shaina. Ashike osha puka kovaengeli okuya momilele. Kalunga okwa hala ashike omushamane nomukulukadi ovo va hombola ovo va ye momilele. Opo nee ngeenge pa dalwa okaana, omushamane nomukulukadi waye otava dulu oku ka fila oshisho.

Oshike osho ovaengeli ovo vakolokoshi va ninga shii?

Eshi ovaengeli va li ve lidika omalutu opambelela ndele tava i momilele novakainhu kombada yedu, ounona vavo ovo va li va dala ova ka ninga ovatongolume eshi va kula. Ovana vavo ova li ovakwanyanya nova li hava hepeke ovanhu. Onghee hano, Kalunga okwa li a hanauna po ovatongolume ovo nosho yo ovakolokoshi aveshe neyelu linene. Ndele Kalunga okwa li a lombwela Noa a tunge onguluwato, opo ovanhu vanini ovo va li hava longo osho sha yuka va xupifwe. Omuhongi Munene okwa ti kutya osha fimana okudimbuluka osho sha li sha ningwa po pefimbo lEyelu. — Genesis 6:3, 4, 13, 14; Lukas 17:26, 27.

 Mbela ou shi shii kutya oshike sha li sha ningilwa ovaengeli ovo ovakolokoshi eshi Eyelu le ke uya? —  Ova li ve lidula omalutu opambelela, ndele tava shuna meulu. Ndele kava li vali tava dulu okukala ovaengeli vaKalunga, onghee hano, ova li va ninga ovaengeli vaSatana, ile eendemoni. Mbela oshike sha li sha ningilwa ovana vavo, ovatongolume? — Ova li va hanaunwa po kEyelu pamwe novanhu aveshe ovo va li ihava dulika kuKalunga.

Omolwashike kombada yedu ku yadi omaupyakadi kunena shi dulife nale?

Okudja pefimbo lEyelu, Kalunga ka li vali a pitika eendemoni di djale omalutu opambelela ngaashi ovanhu. Ndele nonande ihatu di mono, eendemoni ohadi kendabala natango okuningifa ovanhu va ninge oinima ii neenghono. Eendemoni otadi etifa po omaupyakadi mahapu paife shi dulife nale, molwaashi oda umbwa mo meulu, da umbilwa kombada yedu.

Mbela ou shi shii kutya omolwashike itatu dulu okumona eendemoni? — Omolwaashi odi li oishitwa yopamhepo ihai monika. Ndele ohatu dulu okukala noushili kutya oko di li shili. Ombibeli otai ti kutya Satana ota ‘hongaula ovanhu mounyuni aushe,’ neendemoni daye otadi mu kwafele mwaasho. — Ehololo 12:9, 12.

Mbela Ondiaboli neendemoni dayo otava dulu oku tu pukifa? —  Heeno, otava dulu oku tu pukifa ngeenge inatu lungama. Ndele katu na okukala twa tila. Omuhongi Munene okwa ti: ‘Ondiaboli kai na nande sha muame.’ Kalunga ote ke tu amena kOndiaboli neendemoni dayo, ngeenge otwa kala popepi naye. — Johannes 14:30.

Onghee hano, osha fimana okushiiva kutya oinima ii ilipi oyo eendemoni tadi ka kendabala oku tu ningifa. Paife diladila nee kutya, mbela eendemoni oda li hadi ningi oinima ii ilipi eshi da li kombada yedu? — Fimbo Eyelu la li inali uya, eendemoni oda li da ya momilele novakainhu kombada yedu, oshinima osho sha li sha puka kovaengeli okuninga. Eendemoni ohadi kala da hafa kunena ngeenge ovanhu itava dulika keemhango daKalunga di na sha nomilele. Paife nandi ku pule nee kutya, oolyelye ashike ve na okuya momilele? —  Ou li mondjila, ovovo ashike va hombola.

Ovanyasha vamwe ovamati noukadona kunena ohava i momilele, ndele osho osha puka. Ombibeli oya popya shi na sha ‘noulumenhu,’ sha hala  okutya oilyo yoludalo yovalumenhu. (Leviticus 15:1-3) Oilyo yoludalo yovakainhu ohai ifanwa oukainhu. Jehova okwa shita oilyo oyo yolutu i longifwe monghedi ye likalekelwa kovanhu ovo va hombola. Eendemoni ohadi kala da hafa ngeenge ovanhu tava ningi oinima oyo Jehova a tya inai ningwa. Pashihopaenenwa, eendemoni ohadi kala da hafa ngeenge okaana kokamati nokakadona tava danenafana koulumenhu ile koukainhu. Mbela owa hala okuhafifa eendemoni? — 

Ope na vali oshinima shimwe osho eendemoni di hole, ndele Jehova oku shi tonde. Mbela ou shi shii kutya oshike? —  Elongifo leenghono. (Epsalme 11:5, NW) Elongifo leenghono ongeenge ovanhu tava ningi nai vakwao noku va ehameka. Dimbuluka kutya osho osho ovatongolume, ovana veendemoni va li hava ningi.

Eendemoni odi hole yo okutilifa ovanhu. Omafimbo amwe ohadi liningifa da fa ovanhu ovo va fya. Otashi dulika nokuli di hopaenene eendaka doonakufya. Ngeenge tadi ningi ngaho, ohadi pukifa ovanhu vahapu va itavele kutya oonakufya ove na omwenyo notava dulu okupopya  novanhu ovo ve na omwenyo. Eendemoni oda ningifa ovanhu vahapu va itavele kutya oku na oilulu.

Onghee hano, otu na okukala oupafi opo tuha pukifwe kuSatana neendemoni daye. Ombibeli otai londwele kutya: ‘Satana ohe lifefa omweengeli muwa, novapiya vaye navo osho hava ningi.’ (2 Ovakorinto 11:14, 15) Ndele paulelalela eendemoni odikolokoshi. Natu ka tale kutya ohadi kendabala ngahelipi oku tu ningifa tu kale twe di fa.

Mbela openi ovanhu have lihongo kombinga yelongifo leenghono, yomilele da nyata, yoilulu nosho yo shi na sha noumhulile? —  Omokutala eeprograma donhumba doko-TV neefilima nosho yo okupitila movanhu ovo hava endafana navo keefikola. Mbela okuninga oinima oyo otaku tu ehenifa popepi naKalunga ile onaSatana neendemoni daye? Oto diladila ngahelipi? — 

Oshike tashi ka holoka po ngeenge ohatu tale omaudano a nyika elongifo leenghono?

Mbela oto diladila kutya olyelye a hala tu pwilikine notu tale oinima ii? —  Heeno, oSatana neendemoni daye. Mbela fye naave otwa pumbwa okuninga shike? —  Otwa pumbwa okulesha, okupwilikina, nokutala oinima oyo iwa notai tu kwafele tu longele Jehova. Mbela oinima imwe iwa ilipi oyo hatu dulu okuninga? — 

Oshike osho shiwa kufye tu na okukondjifa omayeleko

Ngeenge ohatu ningi osho sha yuka, katu na okukala twa tila eendemoni. Jesus oku na eenghono e dule eendemoni, neendemoni ohadi mu tila. Efiku limwe eendemoni oda li da pula Jesus da ti: “Owe uya u tu hanaune po?” (Markus 1:24) Mbela itatu ka kala twa hafa ngeenge Jesus a hanauna po Satana neendemoni daye? —  Ohatu dulu okukala noushili kutya Jesus ote ke tu amena keendemoni ngeenge otwa kala popepi naye nosho yo naXe womeulu.

Natu ka leshe kutya otu na okuninga shike mu 1 Petrus 5:8, 9 nosho yo Jakob 4:7, 8.