Inda koshikalimo

Inda koshikalimo

 ETUKULWA 37

Dimbuluka Jehova nosho yo omona waye

Dimbuluka Jehova nosho yo omona waye

NATU tye nee ngeno omunhu wonhumba okwe ku pa oshali ya denga mbada. Oto ka kala u udite ngahelipi shi na sha noshali oyo? —  Mbela oto ka tya ashike iyaloo ndele to dimbwa filufilu kombinga yomunhu oo e ku pa oshali oyo? Ile oto ke mu dimbuluka nosho yo osho e ku ningila? — 

Jehova Kalunga okwe tu pa oshali ya denga mbada. Okwa li a tuma Omona waye kombada yedu opo e tu file. Mbela ou shi shii kutya omolwashike Jesus a li e na oku tu fila? —  Oshinima osho osha fimanenena, nomolwaasho otu na okukala tu shi udite ko nawa.

Adam okwa nyona mokuhadulika komhango yaKalunga ya wanenena, ngaashi twe lihonga mEtukulwa 23. Onghee hano, atusheni otwa fyuulula oulunde kutatekulululwa yetu Adam. Mbela oto diladila kutya otwa pumbwa okuninga po shike? —  Oku shi popya pafaneko, otwa pumbwa tatekulululwa umwe a wanenena, oo ta dulu okukanyatela oudiinini waye kombada yedu. Mbela oto diladila kutya olyelye a li ta dulu okuninga tatekulululwa oo? —  Jesus oye ashike a li ta dulu oku shi ninga.

Jehova okwa li a tuma Jesus kombada yedu opo a ninge tatekulululwa yetu ponhele yaAdam. Ombibeli oya ti: “Omunhu wotete, Adam, okwa ninga omunamwenyo, Adam ou axuuninwa okwa ninga omhepo ei hai yandje omwenyo.” Olyelye a li Adam wotete? —  Okwa li omunhu wotete oo a li a shitwa kuKalunga okudja mondwi yedu. Olyelye a li Adam omutivali? —  Okwa li Jesus. Ombibeli otai shi ulike eshi ya ti: ‘Omunhu wotete [Adam] okwa dja medu, omukwadu; omunhu omutivali [Jesus], okwa dja meulu.’ — 1 Ovakorinto 15:45, 47; Genesis 2:7.

Molwaashi Kalunga okwa li a lundulula omwenyo waJesus okudja meulu  ndele te u tula moshidalelo shomukainhu Maria, osha yela kutya Jesus ka li a fyuulula oulunde waAdam. Onghee hano, Jesus okwa li omunhu a wanenena. (Lukas 1:30-35) Nomolwaasho omweengeli umwe okwa li a lombwela ovafita shi na sha naasho eshi Jesus a li a dalwa, a ti: “Onena tuu eli mwa dalelwa Omukulili.” (Lukas 2:11) Opo okahanana Jesus ka dule oku ka ninga Omukulili, oka li tete ke na okuninga shike? — Okwa li ke na okukula ndele taka ningi omukulunhu a wanenena, ngaashi Adam a li pehovelo. Kungaho, Jesus okwa li ta ka kala “Adam ou axuuninwa.”

Ombibeli oya ti kutya Jesus, Omukulili wetu, okwa li yo ta ka ninga “Tate yaalushe.” (Jesaja 9:5, 6) Jesus a wanenena ota dulu okuninga shili tate yetu ponhele yaAdam, oo a ka kala ina wanenena vali eshi a nyona. Kungaho, ohatu dulu okuhoolola okukala tu na “Adam ou axuuninwa,” e li tate yetu. Ndele nande ongaho, Jesus Omona waJehova Kalunga.

Adam naJesus ova li faafana meityo lilipi, nomolwashike oshinima osho sha fimanenena?

Ngeenge otwa shiiva nawa Jesus, ohatu ke mu tambula ko e li Omuxupifi wetu. Mbela oto dimbuluka kutya otwa pumbwa okuxupifwa kushike? —  Otwa pumbwa okuxupifwa moulunde nefyo olo twa fyuulula kuAdam. Omwenyo wa wanenena oo Jesus a yamba po, ohau ifanwa ekulilo. Jehova okwe tu longekidila ekulilo opo tu dule okudiminwa po omatimba etu. — Mateus 20:28; Ovaroma 5:8; 6:23.

Inatu hala nandenande okudimbwa osho Kalunga nOmona waye ve tu ningila, hasho mbela? —  Jesus okwa li a ulikila ovashikuli vaye onghedi ye likalekelwa oyo tai dulu oku tu kwafela tu kale hatu dimbuluka osho a ninga. Natu ka kundafane kombinga yaasho.

Kala nee ngeno wa fa u wete Jesus novayapostoli vaye ve li monduda  yopombada muJerusalem, ve li omutumba va dingilila oshitaafula. Koshitaafula osho okwa li ku na odjona ya yofwa, omingome nosho yo omaviinyu. Jesus novayapostoli vaye ova li tava li ouvalelo we likalekelwa. Mbela ou shi shii kutya omolwashike? — 

Ouvalelo oo owa li hau va dimbulukifa osho Jehova a li a ninga omido omafele da pita eshi oshiwana shaye shaIsrael sha li moupika muEgipti. Pefimbo opo Jehova okwa li a lombwela oshiwana shaye a ti: ‘Eumbo keshe nali dipae odjona ndele tamu vaeke ohonde koikulo yomivelo deumbo.’ Jehova okwa li yo e va lombwela a ti: ‘Indeni momaumbo eni, ndele tamu li ombelela yodjona.’

Ohonde yodjona oya li ya amena ngahelipi ovaisrael?

 Ovaisrael ova li va ninga ngaashi Jehova a li e va lombwela. Ndele moufiku oo tuu oo, omweengeli waKalunga okwa li a endaenda nedu laEgipti, ndele ta dipaa oiveli momaumbo mahapu. Ashike eshi omweengeli a li a mona poikulo yomivelo domaumbo amwe pa vaekwa ohonde yodjona, okwa li a pitilila po omaumbo a tya ngaho. Onghee hano, ounona vomomaumbo oo kava li va dipawa. Farao ohamba yaEgipti okwa li a tila neenghono kwaasho omweengeli waJehova a li a ninga po, nomolwaasho okwa li a lombwela Ovaisrael a ti: ‘Omwa manguluka okuya. Djeni mo muEgipti!’ Okudja opo Ovaisrael ova li va londeka oinima yavo keengamelo nokeendongi ndele tava di mo muEgipti.

Jehova ka li a hala oshiwana shaye shi dimbwe kombinga yanghee a li e shi mangulula. Onghee hano, okwa li e shi lombwela a ti: ‘Omudo keshe, omu na okulya lumwe ouvalelo ngaashi oo mwa lya onguloshi yonena.’ Ovaisrael ova li hava ifana ouvalelo oo we likalekelwa Opaasa. Oshitya Opaasa osha dja koutumbulilo “pitilila po.” Nonguloshi oyo omweengeli waKalunga okwa li a “pitilila po” omaumbo oo a li a didilikwa nohonde. — Exodus 12:1-13, 24-27, 31.

Jesus novayapostoli vaye ova li tava dimbuluka shi na sha noshiningwanima osho eshi va li tava li ouvalelo wOpaasa. Konima eshi va mana okulya ouvalelo wOpaasa, Jesus okwa li a ninga po oshinima sha fimanenena. Ndele fimbo a li ine shi ninga, okwa li a lekela tete omuyapostoli Judas oo a li ehe fi omudiinini. Opo nee, Jesus okwa li a kufa omungome umwe womwaado da li da xupa po, ndele ta ilikana noku u pambula ndele te u pe ovahongwa vaye. Okwa li e va lombwela a ti: “Tambuleni, lyeni.” Opo nee okwa li e va lombwela vali a ti: ‘Omungome ou otau faneke olutu lange olo handi ke mu yandjela eshi handi ke mu fila.’

Konima yaasho, Jesus okwa li a kufa eholo lomaviinyu, ndele ta pandula vali okupitila meilikano, opo nee te li yandje kovahongwa vaye ndele ta ti: “Nweni mo amushe.” Okwa li yo e va lombwela a ti: ‘Omaviinyu aa otaa faneke ohonde yange. Mafiku ohandi ka yandja ohonde yange opo ndi mu mangulule moulunde. Kaleni tamu shi ningi okudimbulukwa nge.’ — Mateus 26:26-28; 1 Ovakorinto 11:23-26.

Ohonde yaJesus oyo tai fanekwa komaviinyu otai dulu oku tu ningila shike?

 Mbela owa didilika kutya Jesus okwa li a lombwela ovahongwa vaye a ti kutya nava kale tave shi ningi oku mu dimbuluka? —  Kava li vali tava ka kala tava li ouvalelo wOpaasa. Ndele ponhele yaasho, ova li ve na okulya ouvalelo oo we likalekelwa lumwe omudo keshe opo va dimbuluke Jesus nosho yo efyo laye. Ouvalelo oo ohau ifanwa Ouvalelo wOmwene. Kunena ohatu u ifana luhapu Edimbuluko. Omolwashike mbela hatu u ifana Edimbuluko? —  Omolwaashi ohau tu dimbulukifa osho Jesus nosho yo Xe, Jehova Kalunga, ve tu ningila.

Omungome ou na oku tu dimbulukifa olutu laJesus. Jesus okwa li a halelela okuyamba po olutu laye opo tu dule oku ka mona omwenyo waalushe. Ongahelipi mbela shi na sha nomaviinyu matilyana? —  Oku na oku tu dimbulukifa kombinga yongushu yohonde yaJesus. Ohonde yaJesus oi na ondilo inene i dule yodjona yOpaasa oyo ya li ya liwa muEgipti. Mbela ou shi shii kutya omolwashike? —  Ombibeli oya ti kutya ohonde yaJesus otai dulu okudima po omatimba etu. Ngeenge omatimba etu okwa dimwa po, itatu ka kala vali hatu vele, hatu kulupa noitatu ka fya vali. Natu kale hatu diladila shi na sha naasho ngeenge hatu i kEdimbuluko.

Mbela keshe umwe oku na okulya omungome nokunwa omaviinyu pEdimbuluko? —  Jesus okwa li a lombwela ovo va li va lya omungome nova nwa omaviinyu a ti: ‘Otamu ka kufa ombinga mouhamba wange nokukala omutumba komalukalwa meulu.’ (Lukas 22:19, 20, 30, yelekanifa NW.) Osho osha hala okutya ovanhu ovo ova li tava ka ya meulu va ka kale eehamba pamwe naJesus. Onghee hano, ovo ve na eteelelo loku ka pangela pamwe naJesus meulu ovo ve na okulya omungome nokunwa omaviinyu.

Ndele naavo ihava li omungome nokunwa omaviinyu pEdimbuluko, ove na okuya kEdimbuluko. Mbela ou shi shii kutya omolwashike? — Omolwaashi Jesus okwe tu yandjela omwenyo waye atusheni. Ngeenge otwa kala hatu i kEdimbuluko, ohatu ulike kutya inatu dimbwa oshali ya denga mbada oyo Kalunga e tu pa.

ope na omishangwa dimwe odo tadi ulike kutya ekulilo lajesus ola fimana: 1 Ovakorinto 5:7; Ovaefeso 1:7; 1 Timoteus 2:5, 6; nosho yo 1 Petrus 1:18, 19.