Inda koshikalimo

Inda koshikalimo

 ETUKULWA 11

Ovaengeli vakalunga ohave tu kwafele ngahelipi?

Ovaengeli vakalunga ohave tu kwafele ngahelipi?

OVANHU vamwe ohava ti kutya ohava itavele ashike oinima oyo tava dulu okumona. Ndele osho kashi li pandunge, molwaashi ope na oinima ihapu yolela oyo inatu mona nomesho etu. Mbela oto dulu okutumbula shimwe shomuyo? — 

Mbela ongahelipi shi na sha nomhepo oyo hatu fudile mo naayo hatu fuda mo? Mbela oho i udu ngeenge to fuda? —  Fudila peke loye. Mbela owa uda po sha? —  Heeno, owa uda sha, ndele mbela oto dulu okumona omhepo? — 

Otwa kundafana nale shi na sha noishitwa imwe yopamhepo oyo itatu dulu okumona. Otwe lihonga kutya imwe ohai longo ouwa, ofimbo imwe oikolokoshi. Tumbula omadina oishitwa imwe yopamhepo oyo hai longo ouwa oyo itatu dulu okumona. —  Heeno, ope na Jehova Kalunga, Jesus nosho yo ovaengeli ovo hava longo ouwa. Mbela ope na ovaengeli vamwe ovakolokoshi? —  Ombibeli otai ti kutya ope na ovaengeli vamwe ovakolokoshi. Lombwele nge kutya owe lihonga shike kombinga yavo. — 

Oshinima shimwe osho kwa li twe lihonga oshosho kutya ovaengeli aveshe, ovo hava longo ouwa naavo vakolokoshi ove na eenghono ve tu dule. Omuhongi Munene okwa li e shii shihapu kombinga yovaengeli, molwaashi okwa li omweengeli fimbo ina dalwa e li okahanana kombada yedu. Jesus okwa li e shii ovaengeli omamiliyona, molwaashi okwa li pamwe navo meulu. Mbela ovaengeli aveshe ovo ove na omadina? — 

Otwe lihonga nale kutya Kalunga okwa luka eenyofi omadina. Onghee hano, ohatu dulu okukala noushili kutya ovaengeli aveshe navo ove na omadina. Otu shii kutya ovaengeli ohava popi novaengeli vakwao, molwaashi Ombibeli otai popi kombinga ‘yelaka lovaengeli.’ (1 Ovakorinto 13:1) Mbela oto diladila kutya ovaengeli ohava popi kombinga yashike? Mbela ohava popi kombinga yetu? — 

 Otu shii kutya ovaengeli vaSatana, eendemoni, ohava kendabala oku tu ningifa tu kale ihatu dulika kuJehova. Onghee hano, otashi dulika hava popi kombinga yanghee tava dulu oku shi ninga. Ova hala tu kale twe va fa opo nafye tu kale inatu hokiwa kuJehova. Ndele mbela ongahelipi shi na sha novaengeli vaKalunga ovadiinini? Mbela navo ohava popi kombinga yetu? —  Heeno, ohava popi. Ova hala oku tu kwafela. Paife natu ka tale kunghee ovaengeli vaKalunga vamwe va li va kwafela ovanhu ovo ve hole Jehova nova li have mu longele.

Pashihopaenenwa, okwa li ku na omulumenhu wedina Daniel oo a li ha kala muBabilon. Ovanhu vahapu vomuBabilon kava li ve hole Jehova. Okwa li nokuli va tota po omhango opo ku handukilwe keshe oo a li ha ilikana kuJehova Kalunga. Ndele Daniel ka li a efa po okwiilikana kuJehova. Mbela ou shi shii kutya ova li va ningila Daniel shike? — 

Ovanhu ovo vai ova li va ekela Daniel mekololo leenghoshi da fya ondjala. Mbela ou shi shii kutya oshike sha li sha ningwa po? — Daniel okwa ti: ‘Kalunga okwa tuma  omweengeli waye, ndele ta kwata omilungu deenghoshi.’ Daniel ka li a yahamekwa nandenande. Ovaengeli otava dulu okuningila ovo hava longele Jehova ouwa. — Daniel 6:19-23.

Kalunga okwa li a ninga po shike opo a amene Daniel?

Oshihopaenenwa vali shimwe oshi na sha naPetrus oo a li modolongo. Dimbuluka kutya Petrus okwa li kaume kOmuhongi Munene, Jesus Kristus. Ovanhu vamwe kava li hava kala va hafa ngeenge Petrus a li te va lombwele kutya Jesus Omona waKalunga. Onghee hano, ova li va tula Petrus modolongo. Opa li ovakwaita ovo va li va nangela Petrus opo ehe li vake mo modolongo. Mbela opa li umwe oo a li ta dulu oku mu kwafela? — 

Petrus okwa li a nangala a kofa pokati kovalumenhu vavali ovo va li ve mu nangela, nokwa li a mangwa komaoko nomalyenge. Ombibeli  otai ti: ‘Tala, omweengeli wOmwene okwa li e uya, nouyelele wa minikila modolongo, omweengeli okwa twa Petrus molupati, e mu pendula, ta ti: Fikama diva!’

Ongahelipi omweengeli umwe a li a kwafela petrus a dja modolongo?

Opo nee, omalyenge okwa li a wako komaoko aPetrus, nomweengeli okwa li e mu lombwela a ti: ‘Djala oikutu yoye, ove u djale eenghaku doye, ndele to shikula nge.’ Ovanangeli kava li va dula okukelela Petrus, molwaashi okwa li ta kwafelwa komweengeli. Eshi va fika pomuvelo woshitenda opa li pa ningwa oshinima shikumwifi, omuvelo oo owa li we liyeulula wo vene. Omweengeli oo okwa li a mangulula Petrus opo a ka twikile okuudifa. — Oilonga 12:3-11.

Mbela ovaengeli vaKalunga otava dulu yo oku tu kwafela? —  Heeno, otava dulu. Mbela osho osha hala okutya otave ke tu amena alushe kowii? — Hasho nandenande. Ovaengeli itave ke tu amena kowii ngeenge ohatu ningi oinima ii. Kakele kaasho, nonande ihatu longo oinima ii, ovaengeli otashi dulika yo vehe tu amene, ngeenge hatu ningilwa oinima ii. Ovaengeli inava tulwa po ngeno va kelele oinima ii ihe tu ningilwe, ndele ponhele yaasho, Kalunga okwe va pa oshilonga she likalekelwa osho ve na okulonga.

Ombibeli otai popi kombinga yomweengeli oo ta lombwele ovanhu mounyuni aushe va longele Kalunga. (Ehololo 14:6, 7) Mbela omweengeli oo ohe shi ningi ngahelipi? Mbela oha ingida okudja meulu opo keshe umwe e mu ude? —  Ahowe, ovaengeli ohava wilike oilonga yovashikuli vaJesus kombada yedu i na sha nokulombwela vamwe kombinga yaKalunga. Ovaengeli ohava shilipaleke kutya keshe omunhu oo a hala shili okushiiva kombinga yaKalunga okwa pewa omhito yoku shi ninga. Ohatu dulu okukufa ombinga moilonga yokuudifa, novaengeli otave ke tu kwafela.

Ndele mbela ongahelipi ngeenge ovanhu ovo vehe hole Kalunga otave tu etele omaupyakadi? Ongahelipi ngeenge ove tu tula modolongo? Mbela ovaengeli otave ke tu mangulula mo? —  Heeno, otava dulu, ndele haalushe have shi ningi.

Omwengeli oo ota lombwele Paulus ashike?

Pashihopaenenwa, omuhongwa waJesus umwe wedina Paulus, okwa li a kwatwa po. Ndele ofimbo va li moshikepa ta twalwa komhangu, mefuta omwa li mwa tukuluka oshikungulu shomhepo shinene. Ashike ovaengeli  kava li ve mu mangulula, molwaashi opa li pe na ovanhu vamwe ovo va li va pumbwa okuuda kombinga yaKalunga. Omweengeli umwe okwa li e mu lombwela a ti: “Paulus ino tila, ove u nokuya koshipala shomukesari.” Paulus okwa li e na okuya kOmukesari opo e ke mu udifile. Ovaengeli ova li alushe ve shii kutya Paulus oku li peni, nova li have mu kwafele. Nafye otave ke tu kwafela yo ngeenge ohatu longele Kalunga shili. — Oilonga 27:23-25.

Ope na natango oshilonga sha fimana osho shi na okulongwa kovaengeli, notave ke shi ninga mafiku. Efiku laKalunga lokuhanauna po ovakolokoshi oli li popepi neenghono. Ovanhu aveshe ovo ihava longele Kalunga kashili otava ka hanaunwa po. Ovo hava ti kutya inava itavela kutya ovaengeli oko ve li molwaashi ihava dulu oku va mona, otava ka mona kutya ova li va puka filufilu. — 2 Ovatessaloniki 1:6-8.

Mbela osho otashi ka tya shike kufye? —  Ngeenge ohatu longele kumwe novaengeli vaKalunga, otave ke tu kwafela. Ndele mbela ohatu longele ngoo kumwe navo? —  Ohatu longele kumwe navo ngeenge ohatu longele Jehova. Ngeenge ohatu longele Jehova, otu na okulombwela vamwe navo va kale have mu longele.

Opo tu lihonge shihapu kombinga yanghee ovaengeli hava dana onghandangala mokukalamwenyo kwovanhu, natu leshe Epsalme 34:8; Mateus 4:11; 18:10; Lukas 22:43; nosho yo Oilonga 8:26-31.