Inda koshikalimo

Inda koshikalimo

 ETUKULWA 31

Olyelye ta dulu oku tu hekeleka

Olyelye ta dulu oku tu hekeleka

MBELA ope na efiku limwe wa li wa nyika oluhodi ile u udite oudja? —  Mbela ope na efiku limwe wa li to lipula ngeenge ope na ngoo oo e ku hole? —  Ounona vamwe osho hava kala ve udite ngaho. Ndele Kalunga okwa udaneka a ti: ‘Ame itandi ku dimbwa.’ (Jesaja 49:15) Mbela kashiwa okudiladila komushangwa oo? — Jehova Kalunga oku ku hole shili!

Mbela oto diladila kutya okadjona aka oka ka kana ke udite ngahelipi?

Omushangi umwe wOmbibeli okwa ti: “Osheshi tate [nameme], vo ova efa nge ngaho, ndelenee Omwene Oye ta kombelele nge.” (Epsalme 27:10) Okukala tu shii kombinga yaasho, otashi tu hekeleke filufilu, hasho mbela? —  Jehova ote tu lombwele ta ti: ‘Ino tila, osheshi Ame ondi li pamwe naave. Ame ohandi ku kwafa.’ — Jesaja 41:10.

Ndele omafimbo amwe Jehova oha efa Satana e tu etele omaupyakadi. Jehova oha efa yo Satana a yeleke ovapiya vaYe. Ondiaboli oya li ya hepeka Jesus neenghono, nomolwaasho Jesus okwa li a ilikana kuJehova a ti: “Kalunga kange, Kalunga kange, oshike wa ekela nge shi?” (Mateus 27:46) Nonande Jesus okwa li ta mono oixuna, okwa li e shi shii kutya Jehova oku mu hole. (Johannes 10:17) Ndele Jesus okwa li yo e shii kutya Kalunga oha efa Satana a yeleke ovapiya vaYe nonokutya oha efa Satana e va hepeke. Metukulwa li li komesho, ohatu ka kundafana kutya omolwashike Kalunga ha efa Satana a yeleke noku hepeke ovapiya vaYe.

Ngeenge tu li ounona, luhapu ohatu kala twa tila. Pashihopaenenwa, mbela ope na efimbo limwe wa li wa kana? —  Mbela owa li wa tila? — Ounona vahapu ohava kala va tila ngeenge va kana. Omuhongi Munene okwa hokololele ehokololo lonhumba li na sha nokukana. Ashike oshinima osho sha li sha kana kasha li okaana, ndele osha li odi.

 Ounona otava dulu okufaafanifwa nodi. Ngahelipi mbela? Omolwaashi eedi kadi fi oinamwenyo ya kula unene noka di na eenghono dihapu. Eedi oda pumbwa yo omunhu wonhumba e di life noku di amene. Omunhu oo ha lifa eedi oha ifanwa omufita weedi.

Jesus okwa li a hokolola ehokololo li na sha nomufita oo a li e na eedi efele, ndele ta kanifa po odi imwe. Odi oyo ya li ya kana otashi dulika ya li ya hala oku ka tala kutya kombinga ikwao yoshikulundudu oku li ngahelipi. Ndele fimbo ya li tai kendabala okuninga ngaho, oya li ya ya kokule nadikwao. Mbela oto diladila kutya odi oyo oya li i udite ngahelipi eshi ya li ya mona kutya oyo aike i li po pomudingonoko opo?  — 

Mbela omufita oo okwa li ta ka ninga po shike eshi a li a didilika kutya odi yaye imwe oya kana? Mbela okwa li ashike ta ka tya kutya odi oyo oyo ya ninga epuko, nomolwaasho ite ke lipula nayo? Ile mbela okwa li ta ka fiya eedi dikwao 99 ponhele ya amenwa ndele ta i a ka konge odi imwe oyo ya kana? Mbela odi imwe oya wana ngoo okukongwa noudiinini? —  Ngeno oove wa li odi oyo ya kana, mbela ngeno ito kala wa hala omufita e ku konge?  — 

Olyelye a fa omufita ou a xupifa odi yaye?

Omufita oo okwa li e hole neenghono eedi daye adishe, nokuli naayo ya li ya kana. Onghee hano, okwa li a ya a ka konge odi yaye imwe oyo ya li ya kana. Diladila ashike kunghee odi oyo ya li  ya hafa eshi ya li ya mona omufita wayo te uya kuyo! Jesus okwa ti kutya omufita oo okwa li a hafa eshi a li a mona odi yaye oyo ya li ya kana. Okwa li e i hafela neenghono shi dulife eedi dikwao 99 odo da li inadi kana. Mbela olyelye ta faafanifwa nomufita weedi womehokololo laJesus? Olyelye he tu file oshisho neenghono ngaashi omufita oo a li ha file oshisho eedi daye? —  Jesus okwa ti kutya Xe womeulu, Jehova, oye he tu file oshisho.

Jehova Kalunga oye Omufita Munenenene woshiwana shaye. Oku hole ovanhu aveshe ovo have mu longele, mwa kwatelwa nounona ngaashi ove. Ina hala nande oumwe womufye a mone oshiponga ile a ka hanaunwe po. Itashi hekeleke tuu okushiiva kutya Kalunga ohe tu file oshisho neenghono! — Mateus 18:12-14.

Mbela owa itavela ngoo shili Jehova Kalunga? —  Oku li ngoo omunhu wolela kwoove? —  Ashike itatu dulu okumona Jehova, molwaashi oku na olutu lopamhepo olo itatu dulu okumona nomesho etu. Ndele nande ongaho, Jehova omunhu wolela noha dulu oku tu mona. Oha kala yo e shi shii kutya onaini twa pumbwa ekwafo. Ndele fye ohatu dulu  okupopya naye meilikano, ngaashi ashike hatu popi novanhu vakwetu oku kombada yedu, molwaashi Jehova okwa hala tu kale hatu popi naye.

Mbela Jehova oku li ngoo omunhu wolela kwoove ngaashi ashike tate woye ile ovanhu vamwe ve lili?

Onghee hano, ngeenge owa kala wa nyika oluhodi ile u udite oudja, mbela ou na okuninga po shike? —  Ou na okupopya naJehova. Ehena popepi naye, note ke ku hekeleka noku ku kwafela. Dimbuluka kutya Jehova oku ku hole, nokuli nongeenge u udite wa fa u li oove auke. Natu kufe Eembibeli detu, ndele hatu pandje kEpsalme 23. Ovelishe yo-1 oya hovela tai ti: “Omwene Oye omufita wange, ihandi pumbwa sha. Oye ta lifa nge momatunda omwiidi mutalala, nota twala nge komeva ndi ka tulumukilwe ko.”

Didilika osho omushangi wepsalme olo a popya movelishe onhi-4, a ti: “Nande ondi ende molufilu lomudidimbe wefyo, itandi tila owii, osheshi Ove u li puame; odibo yoye nonhaili yoye, oyo ehekeleko lange.” Ovanhu ovo hava longele Jehova Kalunga osho hava kala ve udite ngaho. Ohava kala ve udite va hekelekwa ngeenge ve li moudjuu. Mbela naave osho u udite ngaho?

Ngaashi omufita woimuna omunahole ha file oshisho oufita waye, Jehova naye oha file oshisho ovapiya vaye. Ohe va ulikile ondjila ya yuka oyo ve na okweenda nayo, nohave mu landula nehafo. Nokuli nongeenge pe na omaupyakadi e va dingilila, inava pumbwa okukala va tila. Omufita oha longifa onhaili ile odibo yaye opo a amene eedi daye koifitukuti oyo tai dulu oku di etela oshiponga. Ombibeli otai popi kombinga  yanghee omufita woimuna omunyasha David a li a amena eedi daye konghoshi nosho yo kemwangha. (1 Samuel 17:34-36) Oshiwana shaKalunga oshi shii yo kutya Kalunga ote ke shi amena. Otashi dulu okukala shi udite sha amenwa molwaashi Kalunga oku li pamwe nasho.

Olyelye ta dulu oku tu kwafela ngeenge tu li moudjuu ngaashi omufita ha amene eedi daye?

Jehova oku hole shili eedi daye, nohe di file oshisho palukeno. Ombibeli oya ti kutya Jehova oku li “ngaashi omufita ta lifa oimuna yaye, ta ongele oudjona momaoko aye.” — Jesaja 40:11.

Mbela ino hafa eshi wa shiiva kutya Jehova ohe tu file oshisho? — Mbela ino hala okukala umwe womeedi daye? —  Eedi ohadi pwilikine kondaka yomufita wado nohadi kala popepi naye. Mbela naave oho pwilikine kuJehova? —  Mbela oho kala popepi naye? —  Onghee hano, ino pumbwa okukala wa tila nandenande, molwaashi Jehova ota ka kala pamwe naave.

Jehova oha file oshisho pahole ovo have mu longele. Natu leshe pamwe osho Ombibeli tai ti shi na sha naasho mEpsalme 37:25; 55: 23 nosho yo Lukas 12:29-31.