Inda koshikalimo

Inda koshikalimo

 ETUKULWA 7

Okudulika otaku dulu oku ku amena koiponga

Okudulika otaku dulu oku ku amena koiponga

MBELA owa hala okukala wa manguluka okuninga keshe osho wa hala? Mbela ope na omafimbo amwe oo ho kala ino hala okulombwelwa kuumwe kutya ninga shike? Lombwele nge oshili kutya oho kala udite ngahelipi shi na sha naasho.  — 

Omolwashike tu na okukala hatu pwilikine kovanamido?

Mbela shilipi shi li xwepo kwoove? Mbela oshi li ngoo pandunge okuninga keshe osho wa hala? Ile oshi na ouwa okuninga osho meme woye natate woye tave ku lombwele u ninge? —  Kalunga ota ti kutya ou na okudulika kovadali voye, nope na etomheno liwa loku shi ninga. Natu tale ngeenge ohatu dulu okuuda ko etomheno olo.

Ou na eedula ngapi? —  Mbela ou shii kutya tate woye oku na eedula ngapi? — Mbela ou shii kutya meme woye, meekulu woye, ile tatekulu woye ove na eedula ngapi? —  Ova kula ve ku dule. Omunhu oha ende te lihongo oinima ihapu eshi ta kulu. Oha udu oinima ihapu, oha mono oinima ihapu, noha ningi oinima ihapu omudo keshe. Onghee hano, ounona otava dulu okulihonga kovakulunhu.

Mbela ou shii umwe oo munini kwoove? —  Mbela ou shii oinima ihapu u mu dule? —  Omolwashike mbela? — Omolwaashi owa kula u mu dule, nowe lihonga oinima ihapu shi dulife oo munini kwoove.

Olyelye mbela oo a kala ko efimbo lile e dule ovanhu aveshe? —  OJehova  Kalunga. Oku shii oinima ihapu e tu dule fye naave. Ngeenge te tu lombwele tu ninge oshinima shonhumba, ohatu dulu okukala noushili kutya osho sha yuka okuninga, nonande otashi dulika shi kale shidjuu okuninga. Mbela owa kala ngoo u shii kutya nOmuhongi Munene pomhito imwe okwa li a mona shidjuu okudulika?  — 

Pomhito imwe, Kalunga okwa li a pula Jesus a ninge oshinima shidjuu neenghono. Jesus okwa li a ilikana kombinga yasho, ngaashi tu shi wete mefano olo. Okwa li a ilikana ta ti: “Ngenge wa hala kufe nge eholo eli.” Mokwiilikana ngaho, Jesus okwa li a ulika kutya kashipu alushe okulonga ehalo laKalunga. Jesus okwa li a xulifa eilikano laye ngahelipi? Mbela ou shi shii?  — 

Oshike hatu lihongo meilikano laJesus?

Jesus okwa li a xulifa eilikano laye a ti: “Hahalo lange, ndelenee oloye.” (Lukas 22:41, 42) Jesus okwa li a hala ehalo laKalunga olo li wanifwe, ndele hahalo laye. Okwa li a longa ehalo laKalunga, ponhele yokulonga osho a li ta diladila kutya osho shiwa kuye.

Oshike hatu lihongo mwaasho? —  Ohatu lihongo kutya osha yuka alushe okuninga osho Kalunga te tu lombwele tu ninge, nonande otashi dulika shi kale shihe fi shipu okuninga. Ashike ope na vali oshinima shimwe osho hatu lihongo mo. Mbela ou shii kutya oshike? —  Ohatu li hongo kutya Kalunga naJesus kave fi omunhu umwe, ngaashi ovanhu vamwe hava ti. Jehova Kalunga oku dule Omona waye, Jesus, noku shii oinima ihapu e mu dule.

Ngeenge hatu dulika kuKalunga, ohatu ulike kutya otu mu hole. Ombibeli otai ti: “Ohole yokuhola Kalunga oyo tuu ei nokutya, tu diinine oipango yaye.” (1 Johannes 5:3) Onde lineekela kutya paife ou udite ko kutya ovanhu aveshe ova pumbwa okudulika kuKalunga. Mbela ino hala okukala ho dulika kuKalunga?  — 

Natu pandje Eembibeli detu tu tale osho Kalunga ta lombwele  ounona va ninge. Natu ka leshe Ovaefeso etukulwa eti-6, ovelishe 1, 2 nosho yo 3. Otava ti: “Ounona nye, dulikeni kovakulunhu veni mOmwene, osheshi osho sha yuka. Fimaneka xo nanyoko osho oshipango shotete shi neudaneko opo u kale nelao nomwenyo mule kombada yedu.”

Owa didilika ngoo kutya, Jehova Kalunga oye mwene te ku lombwele kutya ou na okudulika kumeme woye nokutate woye? Osha hala okutya shike oku va “fimaneka”? Osha hala okutya okukala we va lenga. Kalunga okwa udaneka kutya oto ka ‘kala nelao,’ ngeenge owa kala ho dulika kovadali voye.

Natu ka tale kehokololo limwe li na sha naavo vali va xupifa eemwenyo davo molwaashi va li va dulika. Ovanhu ovo ova li ko nale nova li hava kala moshilando shinene shaJerusalem. Ovanhu vahapu vomoshilando osho kava li hava dulika kuKalunga, onghee hano, Jesus okwa li e va londwela kutya Kalunga okwa li ta ka hanauna po oshilando shavo. Jesus okwa li yo e va lombwela kutya otava dulu okuya onhapo, ngeenge ova longo osho sha yuka. Okwa ti ‘Ngeenge tamu mono ovakwaita va dingilila Jerusalem ashishe, opo nee shiiveni kutya oshi li pokuhanaunwa po. Olo efimbo lokufiya po Jerusalem nokuya onhapo keemhunda.’ — Lukas 21:20-22.

Ovo va dulika kelombwelo laJesus ova li va xupa ngahelipi?

Ngaashi naanaa Jesus a li a popya, omatangakwaita osho e ke uya okuhomona Jerusalem. Etangakwaita laRoma okwa li la dingilila Jerusalem ashishe. Ndele omolwetomheno lonhumba, ovakwaita ovo ova li va fiya po Jerusalem. Ovanhu vahapu kava li vali ve wete eemwenyo davo da li moshiponga. Onghee hano, kava li va fiya po oshilando. Ndele mbela Jesus okwa li e va lombwela va ninge shike? —  Ngeno owa li muJerusalem pefimbo opo, mbela ngeno owa ninga po shike? — Ovo va li va itavela eendjovo daJesus ova li va fiya po omaumbo avo, nokuya onhapo keemhunda odo da li kokule naJerusalem.

Opa li pa pita omudo umwe ndele Jerusalem kasha li sha hanaunwa po, nomudo wa ka shikula ko kapa li pa ningwa sha. Momudo omutitatu, natango kapa li pa ningwa sha. Ovanhu vamwe otashi dulika  kwa li tava diladila kutya ovo va fiya po oshilando kava li va katuka pandunge. Ndelenee momudo omutine, etangakwaita lOvaroma ola li la aluka. Natango ova li va dingilila Jerusalem ashishe. Ovanhu kava li vali tava dulu okuya onhapo. Pomhito oyo, oshilando osha li sha hanaunwa po kovakwaita. Ovanhu vahapu ova li va fya, vakwao ova li va twalwa moukwatwa.

Ndele mbela oshike sha li sha ningilwa ovo va li va dulika kuJesus? — Ova li va amenwa, molwaashi ova li va ya kokule naJerusalem. Ova li va xupifa eemwenyo davo omolwokudulika.

Ngeenge owa kala ho dulika, mbela naave oto ka amenwa? —  Ovadali voye otashi dulika ve ku lombwele kutya ino danauka moshitauwa ile popepi nomeva. Omolwashike mbela tava tile ngaho? —  Omolwaashi otashi dulika u lyatwe kohauto ile u fye omeva. Efiku limwe otashi dulika u diladile kutya: ‘Itandi dulu okulyatwa koihauto, molwaashi kape na  oihauto tai ende moshitauwa. Ounona vakwetu navo ohandi mono tava danauka moshitauwa ile popepi nomeva ndele ihava mono oiponga.’

Omolwashike u na okudulika nonande ku wete oshiponga?

Ovakalimo vomuJerusalem vahapu navo osho naanaa va li ve udite ngaho. Konima eshi etangakwaita lOvaroma la li la fiya po Jerusalem, ova li ve udite ve li meameno. Vamwe eshi va li va mona kutya vakwao inava ya onhapo, navo ova li va kala mo moshilando. Ova li va londwelwa, ndele kava li va pwilikina. Oshidjemo, ova li ve likanifila eemwenyo davo.

Natu ka tale vali koshihopaenenwa shimwe. Mbela owa danauka nale nokapalwa? —  Otashi dulika shi kale tashi monika shihokwifa okufaula okapalwa. Ndele otashi dulu okukala sha nyika oshiponga okudanauka nokapalwa. Eumbo alishe otali dulu okupya po, ndele to file mo.

Dimbuluka kutya katu na ashike okukala hatu dulika omafimbo amwe. Ndelenee ngeenge owa kala ho dulika alushe, oto ka kala wa amenwa. Mbela olyelye ta ti kutya “ounona nye, dulikeni kovakulunhu veni”? —  OKalunga. Dimbuluka kutya Kalunga okwe ku lombwela u dulike kovadali voye, molwaashi oku ku hole.

Paife lesha omishangwa odo tadi ulike nghee sha fimana okudulika: Omayeletumbulo 23:22; Omuudifi 12:13; Jesaja 48:17, 18; nosho yo Ovakolossi 3:20.