Inda koshikalimo

Inda koshikalimo

 ETUKULWA 39

Kalunga oha dimbuluka omona waye

Kalunga oha dimbuluka omona waye

JESUS okwa li a lila eshi kaume kaye Lasarus a li a fya. Mbela oto diladila kutya Jehova okwa li a nyemata eshi Jesus a li ta mono oixuna nokufya? —  Ombibeli otai ti kutya Kalunga ota dulu ‘okunyika oluhodi’ nosho yo ‘okuhandukifwa’ koinima oyo hai ningwa. — Epsalme 78:40, 41, yelekanifa OB-1986; Johannes 11:35.

Mbela oto diladila kutya Jehova okwa li a nyemata shi fike peni eshi a li ta tale Omona waye omuholike ta fi? —  Jesus okwa li e na elineekelo kutya Kalunga ite ke mu dimbwa. Nomolwaasho eshi a li ta fi, okwa li a popya eendjovo daye daxuuninwa a ti: ‘Tate, [omwenyo] wange ohandi u yandje momake oye.’ — Lukas 23:46.

Jesus okwa li e na oushili kutya ota ka nyumunwa, sha hala okutya, ka li ta ka efuwa a kale “moshovafi.” Konima eshi Jesus a li a nyumunwa, omuyapostoli Petrus okwa li a tofa mo osho sha shangwa mOmbibeli kombinga yaJesus a ti: “Omwenyo waye inau fiwa mo moshovafi, nombelela yaye inai mona eolelo.” (Oilonga 2:31; Epsalme 16:10) Osho otashi ulike kutya olutu laJesus kala li la olela mo mombila.

 Eshi Jesus a li kombada yedu, okwa li nokuli a lombwela ovahongwa vaye kutya ita ka kala a fya oule wefimbo lile. Okwa li e va yelifila kutya ota ka ‘dipawa, ndele efiku etitatu oku na okunyumuka.’ (Lukas 9:22) Onghee hano, ovahongwa kava li ve na okukala va kumwa eshi Jesus a nyumuka. Ndele mbela ovahongwa vaJesus ova li va kumwa eshi a nyumuka? —  Natu ka tale ngeenge ova li va kumwa ile hasho.

Omuhongi Munene okwa li a fila komuti womahepeko lwoponhatu yomutenya mEtitano. Omulumenhu umwe oshipuna wedina, Josef, oo a li oshilyo shOmhangu yopombada yOvajuda, ka li a shiivifila vamwe kutya okwa itavela Jesus. Eshi a li a mona kutya Jesus okwa fya, okwa li a ya kuPilatus, omupangeli waRoma, ndele ta pula epitikilo a kufe ko oshimhu shaJesus komuti opo e ke shi pake. Konima yaasho, Josef okwa li a twala oshimhu shaJesus koshikunino oko kwa li ombila, oko kwa li haku pakwa ovanhu ovo va fya.

Konima eshi oshimhu shaJesus sha pakwa mombila, poshivelo opa li pa idilwa nemanya. Paife osha li Osoondaxa, efiku etitatu okudja eshi Jesus a fya. Ovakwaita ova li natango va nangela ombila yaJesus, fimbo etango la li inali pita natango, nokwa li natango kwa laula. Ovapristeri ovo va li va tuma ovakwaita va ka nangele ombila yaJesus. Mbela ou shi shii kutya omolwashike va li ve shi ningila? — 

Ovapristeri navo ova li va uda kutya Jesus okwa ti kutya ota ka nyumuka. Ovapristeri ova li va tula po ovakwaita pombila opo va kelele ovahongwa vaye vaha vake mo oshimhu shaye ndele tava ti kutya Jesus okwa nyumuka. Ombadilila, fimbo ovakwaita va li va nangela ombila, edu ola li la hovela okukakama. Opa li pa monika ouyelele womweengeli waJehova tau minikile momilaulu. Ovakwaita ova li va tila neenghono nomolwaasho kava li tava dulu okulinyenga. Omweengeli okwa li a ya pombila ndele ta undula ko emanya olo la li la idila po, na Jesus okwa li a nyumunwa.

Omolwashike Jesus ehe mo mombila omo? Mbela oshike sha ningwa po?

Jesus okwa li a nyumuka shili, ngaashi omuyapostoli Petrus e ke shi popya konima yefimbo a ti: ‘Jesus Oye tuu ou Kalunga e mu nyumuna.’ (Oilonga 2:32) Kalunga okwa li a nyumuna Jesus nolutu la fa olo a li e na fimbo a li ine uya kombada yedu. Jesus okwa li a nyumunwa nolutu lopamhepo la fa lovaengeli. (1 Petrus 3:18) Onghee hano, opo ovanhu pefimbo  opo va dule okumona Jesus, okwa li e na okulundululila olutu laye lopamhepo molutu lopambelela. Mbela osho a li a ninga ngaho? —  Natu ka tale ngeenge osho a li a ninga ile hasho.

Eshi etango la li pokupita, ovakwaita ovo va li va nangela ombila yaJesus ova hangwa va dja po nale. Maria Magdalena nosho yo ovakainhu vakwao ovo va li ovahongwa vaJesus ova li tava i kombila. Ova li tave lipopile tava ti: ‘Olyelye te ke tu kufila ko emanya linya lidjuu?’ (Markus 16:3) Ndele eshi va li va fika pombila, emanya ova hanga nale la kufwa ko, na Jesus inave mu hanga mo mombila. Olutu laJesus lopambelela olo la li la fya kala li mo vali mombila. Diva, Maria Magdalena okwa li a ya ta endelele opo a ka konge ovayapostoli vaJesus vamwe.

Ovakainhu vakwao vamwe ova li va fyaala pombila. Ova li tave lipula kutya: ‘Mbela olutu laJesus oli li peni?’ Ombadilila, ova li va holokelwa kovalumenhu vavali va djala oikutu tai vilima. Ovalumenhu ovo ova li ovaengeli, nova li va pula ovakainhu ovo va ti: ‘Omolwashike tamu kongo Jesus apa? Jesus okwa nyumuka nale, ndele indeni diva mu ka lombwele ovahongwa vaye.’ Ovakainhu ovo kava li tuu tava endelele! Ndele fimbo va li mondjila, ova li va shakena nomulumenhu wonhumba. Mbela ou shi shii kutya omulumenhu oo okwa li lyelye? — 

Omulumenhu oo okwa li Jesus, a li a lundulukila molutu lopambelela. Jesus naye okwa li a lombwela ovakainhu ovo a ti: ‘Indeni mu ka lombwele ovahongwa vange.’ Ovakainhu ovo ova li va hafa, naashi va li va mona ovahongwa, ova li ve va lombwela va ti: ‘Jesus oku na omwenyo! Fye otwe mu mona!’ Ashike Maria okwa hangwa nale a lombwela Petrus naJohannes kutya Jesus ke mo mombila. Petrus naJohannes ova li va ya kombila va ka tale, ngaashi u shi wete mefano olo. Ova li tava tale omalapi oo a li a tonyenwa Jesus, nova li va kumwa eshi inava hanga mo oshimhu shaye mombila. Ova li ve wete kutya Jesus okwa nyumuka, ndele osha li shidjuu okwiitavela.

Petrus naJohannes otashi dulika va li tava diladila ngahelipi?

MOsoondaxa komatango, Jesus okwa li e lihololela ovahongwa vaye vavali ovo va li tava i kuEmaus. Jesus okwa li a enda ta popi navo, ndele vo kava li ve mu dimbuluka molwaashi ka li e na olutu lopambelela la fa olo a li e na nale. Ovahongwa ova li ashike ve mu dimbuluka eshi va li tava li  pamwe naye nosho yo eshi a li a ilikana. Ovahongwa ovo ova li va hafa neenghono ndele tava endelele va shune kuJerusalem osho sha li kokule. Otashi dulika Jesus a li e lihololela Petrus kutya okwa nyumuka konima yoshiningwanima osho.

Konguloshi mOsoondaxa osho tuu osho, ovahongwa vahapu vaJesus ova li va ongala monduda yonhumba, ashike ova li ve lipatela mo. Ombadilila, Jesus okwa li e li pamwe navo monduda omo. Paife ova li va mona kutya Omuhongi Munene oku na shili omwenyo. Kava li tuu va hafa! — Mateus 28:1-15; Lukas 24:1-49; Johannes 19:38–20:21.

Jesus okwa kala te lihololele ovahongwa vaye momalutu opambelela a yoolokafana, opo e va ulikile kutya okwa nyumuka. Nokonima yaasho okwa li a dja ko kombada yedu ndele ta shuna kuXe meulu. (Oilonga 1: 9-11) Diva, ovahongwa ova li tava lombwele ovanhu kutya Kalunga okwa nyumuna Jesus koufi. Nokuli naashi ovapristeri va li ve va denga ndele tava dipaifa vamwe vomuvo, ovahongwa ova li va twikila okuudifa. Ova li ve shi shii kutya ngeenge ova fi, Kalunga ote ke va dimbuluka ngaashi ashike a li a dimbuluka Omona waye.

Ovashikuli vaJesus vonale inava yooloka ko tuu kovanhu vahapu kunena! Ovanhu vahapu kunena ngeenge tava fiki lwopefimbo opo Jesus a li a nyumunwa, ohava kala ashike tava diladila kombinga yoinima oyo hai longifwa pefimbo loshivilo sho-Easter, ngaashi oundiba nosho yo omai omaluvala e lili noku lili. Ndele Ombibeli inai popya sha kombinga youndiba vo-Easter nosho yo omai. Oya popya ashike kutya ovanhu ove na okulongela Kalunga.

Ovanhu vahapu kunena ngeenge tava fiki lwopefimbo opo Jesus a li a nyumunwa, ohava kala tava diladila kombinga yashike? Mbela ove oho kala to diladila kombinga yashike?

Fye ohatu dulu okuhopaenena ovahongwa vaJesus mokulombwela ovanhu kutya Kalunga okwa longa oshikumwifilonga eshi a nyumuna Omona waye. Inatu pumbwa okukala twa tila, nokuli nongeenge ovanhu ova ti kutya otave tu dipaa. Ngeenge otwa fi, Jehova ote ke tu dimbuluka ndele te tu nyumuna, ngaashi ashike a li a nyumuna Jesus.

Mbela inatu hafa eshi twa shiiva kutya Kalunga oha dimbuluka ovanhu ovo have mu longele nonokutya ote ke va nyumuna nokuli? —  Okushiiva oinima ya tya ngaho oku na oku tu linyengifa tu kale twa hala okushiiva kutya ongahelipi hatu dulu okuhafifa Kalunga. Mbela ou shi shii ngoo kutya ohatu dulu okuhafifa Kalunga? —  Natu ke shi kundafane metukulwa tali landula.

Okwiitavela kutya Jesus okwa nyumuka oku na oku tu kwafela tu kale tu na eteelelo la twa nosho yo eitavelo la pama. Lesha Oilonga 2:22-36; 4:18-20; nosho yo 1 Ovakorinto 15:3-8, 20-23.