Inda koshikalimo

Omalombwelo e na sha nokafo Onghalamwenyo yopaKriste noilonga yokuudifa

Omalombwelo e na sha nokafo Onghalamwenyo yopaKriste noilonga yokuudifa

Oshikalimo

1. Okwoongala ku na sha nonghalamwenyo yopaKriste noilonga yokuudifa oku na okuningwa metwokumwe naasho shi li mokafo Onghalamwenyo yopaKriste noilonga yokuudifa — Okafo kokulongifwa pokwoongala she likolelela komalombwelo taa landula. Ovaudifi aveshe ove na okuladipikwa va kale hava yandje oipopiwa. Vamwe ovo hava endafana neongalo pandjikilile navo otava dulu okukufa ombinga ngeenge ova itavela osho Ombiibeli tai hongo nongeenge onghalamwenyo yavo oi li metwokumwe nomafinamhango dopaKriste. — be ep. 282.

OMATYEKOSHA OPEHOVELO

 2. Omunute umwe. Oshivike keshe, konima yeimbilo neilikano lotete, omunashipundi wokwoongala kwoshivike osho ota ka tumbula oitukulwa oyo tai kundafanwa pokwoongala oko. Omunashipundi na yandje elitulemo koitwa oyo tai etele unene eongalo ouwa.

OMAMONA OMEENDJOVO DAKALUNGA

  3. Oshipopiwa: Ominute omulongo. Oshipalanyole ile ouyelele oko kwa kanghamena oshipopiwa osho otau hangwa mokafo Onghalamwenyo yopaKriste noilonga yokuudifa. Oshipopiwa osho oshi na okukala hashi pewa ovakulunhuongalo ile ovayakuliongalo ovo va pyokoka. Ngeenge taku  hovelwa nembo lOmbibeli lipe melesho lOmbiibeli lokoshivike, otaku kala haku danwa okavidio ke na sha netwalemo lembo olo. Omupopi ota dulu okukundafana ouyelele oo u li mokavidio u li enenediladilo. Ashike ota dulu yo okukundafana oitwa imwe vali oyo ya ulikwa mokafo. Oku na yo okulongifa nawa omafano oo e li mokafo, oo a nuninwa okuyambidida ouyelele oo tau kundafanwa.

 4. Konakona moule omamona opamhepo: Ominute omulongo. Oshitukulwa eshi osha kwatela mo omapulo nomanyamukulo nokashi na okukala shi na etwalemo ile exulifo. Oshi na okukala hashi yandjwa kovakulunhuongalo ile kovayakuliongalo ovo va pyokoka. Ou te shi kwatele komesho oku na okulongifa nawa efimbo opo a kundafane nghee oitwa itatu tai dulu okutulwa moilonga meongalo. Ashike oku na okupula ovapwilikini omapulo aeshe. Oku na yo okutokola kutya omishangwa odo di li pomapulo avali otete otadi leshwa ile hasho. Ovo tava ningi omatyekosha, nave a ninge moule weesekonde 30 ile dinini.

  5. Elesho lOmbiibeli: Ominute nhee ile dinini. Oshitukulwa eshi oshi na okupewa ovamwatate. Omunafikola oku na okulesha eevelishe odo a pewa nopehe na okuninga etwalemo ile exulifo. Omunashipundi wokwoongala ota ka kala ta kwafele ovanafikola va kale hava lesha mondjila, ve udite ko osho tava lesha, tava lesha oitya tai kunguluka nawa, tava divilike opo sha pumbiwa, tava longifa omawi a yeleka, tava tula opo sha pumbiwa notave shi ningi monghedi i li paushitwe. Molwaashi elesho lOmbiibeli omafimbo amwe ohali kala lixupi ile lile, omupashukili wofikola oku na okukaleka momadiladilo okudula kwovanafikola ngeenge te va pe oipopiwa.

LONGA NOUDIININI MOILONGA YOKUUDIFA

 6. Ominute 15 ile dinini. Oshitukulwa eshi shokwoongala osha nuninwa okupa aveshe omhito va kufe ombinga moukalele nova xwepopaleke ounghulungu wavo wokuudifa nowokuhonga. Oipopiwa yovanafikola ngaashi etalelepo lotete nelishuneko otai ka kala ya kanghamena koihopaenenwa yeenghundafana oyo tai hangwa pepandja 1 lokafo Onghalamwenyo yopaKriste noilonga yokuudifa. Ovanafikola ovo vene tava ka tokola ngeenge otava yandje oshishangomwa shonhumba ile okuulikila omuneumbo okavidio. Opo shi tu kwafele moukalele, oihopaenenwa yeenghudafana oyo hai kala mokafo oya kwatela mo oshitukulwa “Omushangwa oo otau hangwa moileshomwa ei i li mOshikefa shetu shOkuhonga.” Ovanafikola otava dulu okutokola ngeenge otava longifa oshitukulwa osho ile hasho. Mokafo Onghalamwenyo yopaKriste noilonga yokuudifa ovanafikola ova tulilwa po kutya otava longifa efimbo li fike peni, nomafimbo amwe otashi dulika va tulilwe po omalombwelo onhumba. Ovanafikola inava pumbwa okuweda po ouyelele wonhumba opo vaha mane po efimbo. Oshipopiwa ngeenge osha longekidwa nawa, otashi ka kwata ashike oule wefimbo lixupi. Ngeenge otashi shiiva, ovakulunhuongalo navo otava dulu okukala hava kufa ombinga mofikola..

 7. Ouvidio ve na sha noihopaenenwa yeenghundafana: Ouvidio ve na sha noihopaenenwa yeenghundafana otava ka kala hava danwa omwedi keshe nokukundafanwa. Ouvidio ovo ove na sha nanghee hatu dulu okuninga etalelepo lotete nosho yo elishuneko. Oshitukulwa osho oshi na okukwatelwa komesho komunashipundi.

 8. Etalelepo lotete: Oshipopiwa eshi otashi dulu okuyandjwa komumwatate ile komumwameme. Omuneumbo na kale woukashike kookanhu waao ta yandje oshipopiwa ile oshilyo shoukwaneumbo. Ovanafikola otava dulu okuyandja oshipopiwa shavo ve li ofika ile omutumba. Omunafikola na popife monghedi oyo hai longifwa moshitukulwa. Eenghundafana davo nadi kale de likolelela koihopaenenwa yeenghundafana oyo i li mokafo Onghalamwenyo yopaKriste noilonga yokuudifa.

 9. Elishuneko: Oshipopiwa eshi otashi dulu okuyandjwa komumwatate ile komumwameme. Omuneumbo na kale woukashike kookanhu waao ta yandje oshipopiwa. (km-E 5/97 ep. 2) Ovanafikola otava dulu okuyandja oshipopiwa shavo ve li ofika ile omutumba. Omunafikola na ulike nghee ta ka ninga elishuneko komunhu oo a ulika ohokwe petalelepo lotete. Eenghundafana davo nadi  kale da kanghamena koihopaenenwa yeenghundafana oyo tai hangwa mokafo Onghalamwenyo yopaKriste noilonga yokuudifa.

 10. Ekonakonombiibeli: Oshipopiwa eshi otashi dulu okuyandjwa komumwatate ile komumwameme. Omuneumbo na kale woukashike kookanhu waao ta yandje oshipopiwa. (km-E 5/97 ep. 2) Ovanafikola otava dulu okuyandja oshipopiwa shavo ve li ofika ile omutumba. Oshitukulwa eshi oshi nasha nekonakonombiibeli olo hali ningwa pandjikilile. Inava pumbwa okuninga etwalemo ile exulifo okuninga shapo ovaudifi va pewa va longele koshitwa osho. Ouyelele aushe oo wa yandjwa inau pumbwa okuleshwa, nonande otashi dulika osho shi ningwe. Omuudifi na longife ounghulungu opo a divilike oitwa ya fimana.

 11. Oshipopiwa: Oshipopiwa eshi oshi na okuyandjwa komumwatate noshi na okuyandjwa ngaashi oshipopiwa meongalo.

OKUKALA OMUKRISTE WASHILI

 12. Ominute 15. Konima yeimbilo, oshipopiwa tashi landula ko shoshitukulwa osho otashi ka kala shi na oshitukulwa shimwe ile ivali ya nuninwa okukwafela ovapwilikini va tule moilonga Eendjovo daKalunga. Oitukulwa oyo oi na okupewa ovakulunhuongalo ile ovayakuliongalo ovo va pyokoka, kakele keemhumbwe deongalo odo di na ashike okuyandjwa kovakulunhuongalo.

  13. Ekonakonombiibeli lEongalo: Ominute 30 ile dinini. Oli na okukwatelwa komesho kovakulunhuongalo ovo va pyokoka. (Momaongalo omo mu na ovakulunhuongalo vanini, otaa dulu okulongifa ovayakuliongalo va pyokoka ngeenge osha pumbiwa.) Olutu lovakulunhuongalo oli na okutokola kutya olyelye a wana okukwatela komesho Ekonakonombiibeli leongalo. Ovo va popilwa ove na okukala tava dulu okukwatela komesho monghedi tai eta ouwa opo ekonakono li pwe pefimbo, tava divilike omishangwa da fimana, nokukwafela keshe umwe a ude ko efimano laasho tashi kundafanwa. Otava dulu okumona omafinamhango taa kwafa mokulesha ouyelele u na sha nanghee Ekonakono lOshungonangelo li na okuningwa. Konima ngeenge oshikundafanwa shoshivike osho osha kundafanwa nawanawa, inashi pumbiwa vali okulelepeka ekonakono. Ngeenge otashi shiiva, naku longifwe ovakwatelikomesho novaleshi va yoolokafana oshivike keshe. Ngeenge omunashipundi wokwoongala kwOnghalamwenyo yopaKriste noilonga yokuudifa okwa pula ekonakono li xupipikwe, oo ta kwatele komesho oku na okutala kutya openi e na okuteta. Ota dulu okuhoolola opo outendo vamwe vaha leshwe.

OMATYEKOSHA EXULIFO

  14. Ominute nhatu ile dinini. Omunashipundi wokwoongala woshivike osho ota kala ha endulula pauxupi oitwa kondadalunde oyo ya kundafanwa mokwoongala. Ota kala yo ha tumbula oitukulwa oyo tai ka kundafanwa moshivike tashi landula ko, mwa kwatela epulo la fimana loshivike osho. Ota dulu okutumbula omadina ovanafikola opo e va dimbulukife kutya ove na oipopiwa moshivike sha landula ko, ngeenge ope na efimbo. Omunashipundi na ninge omashiivifo oo a pumbwa okuningwa ile a leshe eenhumwafo donhumba odo da pumbwa okuleshelwa eongalo moule wominute odo daxuuninwa. Ouyelele wakwalukeshe, ngaashi elandulafano lelongekido loilonga yomomapya nosho yo elandulafano lokuwapaleka, kai na okushiivifwa komutune ndele oku na okutulikwa kekafa lomauyelele. Ngeenge omashiivifo ile eenhumwafo odo da pumbwa okuleshwa itadi pu moule wominute 3 daxuuninwa, omunashipundi na ninipike efimbo pehovelo opo a kale nominute di dulife pu 3 pexulilo ile a pule ovamwatate ovo tava yandje oipopiwa oyo i li moshitukulwa Okukala Omukriste washili va ninipike oipopiwa yavo. (Tala  okatendo 13,  17.) Okwoongala oku na okuxulifwa neimbilo neilikano.

DIININA OKU VA LESHELA NOKU VA HONGA

 15. Omunafikola keshe oku na okweetelela okambo kaye Okuhonga, kutya nee okomudidi ile opaeleketronika pokwoongala kwOnghalamwenyo yopaKriste noilonga yokuudifa. Omunashipudi oo ta kwatele komesho oshivike osho oku na okulongifa okambo oko eshi ta yandje omayele  kovanafikola. Omunafikola keshe oku na okulongela koshitwa osho ta hange pamwe noshitukulwa osho a pewa mOkafo Onghalamwenyo yopaKriste noilonga yokuudifa. Oshitukulwa “Didilika exumokomesho loye” osha nuninwa ovanafikola, nokashi na okuningwa omadidiliko komunashipundi.

OKUYANDJA OMAYELE

  16. Konima yoshipopiwa keshe shomunafikola, omunashipundi wokwoongala kwOnghalamwenyo yopaKriste noilonga yokuudifa na longife omunute umwe lwaapo opo a pandule nokuyandja omayele a kanghamena kokambo Okuhonga. Ngeenge omunashipundi ta ningi etwalemo loshipopiwa, ke na okupopya kutya omunafikola ota longele koshitwa shilipi. Konima eshi omunashipundi a pandula omunafikola, ota dulu okupopya kutya omunafikola okwa li ta longele koshitwa shilipi ile a yelife pahole kutya omolwashike shiwa komunafikola okulongela natango koshitwa oko. Omunashipundi ota dulu okupopya oitwa yonhumba oyo e wete kutya otai dulu okukwafela omunafikola nosho yo ovapwilikini. Konima yokwoongala ile pomhito imwe tai wapalele, omunafikola ota dulu okupewa omayele taa tungu pauhandimwe e likolelela koshitwa oko a li ta longele ile kuimwe vali, nomayele oo oku na okukala taa di mokambo Okuhonga ile membo Ofikola yOukalele. Opo u mone ouyelele muhapu u na sha nonghandangala oyo tai danwa komunashipundi wokwoongala Onghalamwenyo yopaKriste noilonga yokuudifa nosho komuyandjimayele omutivali, tala tala  okatendo 17,  22 no  24.

EFIMBO

     17. Oitukulwa oi na okuyandjwa moule wefimbo olo la ufwa, nomatyekosha omunashipundi wokwoongala Onghalamwenyo yopaKriste noilonga yokuudifa kae na okuningwa a pitilila efimbo olo la ufwa. Oipopiwa yovanafikola oi na okukanghekwa nelungi ngeenge efimbo ola pitilila. Ngeenge oipopiwa imwe yokwoongala oya pitililifa efimbo, omuyandji woshipopiwa oku na okupewa omayele komuyandjimayele omutivali, te a pewa e li oye aeke. (Tala  okatendo 24.) Okwoongala akushe, mwa kwatelwa omaimbilo nomailikano, oku na okupwa moule wovili 1 nominute 45.

ETALELEPO LOMUPASHUKILISHIKANDJO

 18. Ngeenge eongalo otali talelwa po komupashukilishikandjo, okwoongala oku na okuningwa ngaashi sha ulikwa mokafo Onghalamwenyo yopaKriste noilonga yokuudifa, kakele koitukulwa tai landula: Ekonakonombibeli lEongalo olo li li koshi yoshitukulwa Okukala Omukriste washili, nali pingenwe po koshipopiwa shomupashukilishikandjo. Fimbo oshipopiwa inashi hovela, omunashipundi wokwoongala ota ka endulula pauxupi osho sha kundafanwa metetekelo, ta tumbula pauxupi osho tashi ka kundafanwa moshivike tashi landula, ta ningi omashiivifo oo a pumbwa okuningwa, ta lesha eenhumwafo odo da pumbwa okuleshwa, opo nee ta ifana omupashukilishikandjo a yandje oshipopiwa shoilonga. Konima yoshipopiwa, omupashukilishikandjo na tumbule eimbilo olo a hoolola li xulife okwoongala. Ota dulu okushiva omumwatate umwe a xulife neilikano. Eongalo olo tali talelwa po ka li na okuninga ofikola onhivali pefimbo letalelepo lomupashukilishikandjo. Ongudu otai dulu okuninga okwoongala kwayo nokuli nongeenge eongalo omo i li otali talelwa po komupashukilishikandjo. Ashike ongudu oi na oku waimina eongalo ngeenge omupashukilishikandjo ta yandje oshipopiwa shoilonga.

OSHIVIKE SHONGOONGALELE SHOSHIKANDJO ILE SHOSHITUKULWA

 19. Moshivike shoshoongalele shinini ile shoshitukulwa, eongalo kali na okuninga okwoongala. Ouyelele oo wa nuninwa okwoongala oshivike osho nau konakonwe komuudifi pauhandimwe ile komaukwaneumbo.

OSHIVIKE SHEDIMBULUKO

 20. Okwoongala itaku ka kala ko ngeenge Edimbuluko ola wile mefiku omo hamu ningi okwoongala kwOnghalamwenyo yopaKriste. Ashike elongekido loilonga yomomapya oli na okuningwa mefiku lEdimbuluko.

 OMUPASHUKILI WOKWOONGALA KWONGHALAMWENYO YOPAKRISTE NOILONGA YOKUUDIFA

 21. Oku na okukala omukulunhuongalo a hoololwa kolutu lovakunhuongalo a kale omupashukili wokwoongala kwOnghalamwenyo yopaKriste noilonga yokuudifa. Oku na oshinakuwanifwa shokushilipaleka kutya okwoongala oko okwa unganekwa nawa notaku ningwa naanaa metwokumwe nomalombwelo oo e li momukanda ou. Oku na okukala ha kundafana nomuyandjimayele omutivali. Ngeenge okafo Onghalamwenyo yopaKriste noilonga yokuudifa komwedi wonhumba oka piti, omupashukili wokwoongala kwOnghalamwenyo yopaKriste noilonga yokuudifa oku na okuninga meendelelo elandulafano lovanafikola vomwedi oo. (Tala  okatendo 5-11.) Oipopiwa aishe yovanafikola, oi na okupewa ovanafikola ofimbo ku na oivike itatu efiku loshipopiwa li fike, taku longifwa okafoloma kedina Oshitopolwa shoye pokugongala Onkalamwenyo yopaKriste niilonga yetu yokuuvitha (S-89-OD).

OMUNASHIPUNDI WOKWOONGALA ONGHALAMWENYO YOPAKRISTE NOILONGA YOKUUDIFA

  22. Oshivike keshe, omukulunhuongalo umwe oku na okuhoololwa a kale omunashipundi wokwoongala akushe kwOnghalamwenyo yopaKriste noilonga yokuudifa. (Momaongalo omo mu na ovakulunhuongalo vanini, otaa dulu okulongifa ovayakuliongalo va pyokoka ngeenge osha pumbiwa.) Oku na okulilongekidila etwalemo nexulifo lokwoongala akushe, oku na yo okukundafana okavido keshe koihopaenenwa yeenghundafana noku ninga etwalemo louvidio vape ovo tava hangwa mokambo Okuhonga. Oku na yo okushiivifa keshe oo ta ka yandja oshipopiwa, she likolelela komuvalu wovakulunhuongalo meongalo, naye ota dulu yo okuyandja oipopiwa imwe. Omatyekosha oo taa ningi pokati koitukulwa naa kale maxupi lela. Olutu lovakulunhuongalo olo li na okuhoolola ovakulunhuongalo ovo ta dulu okukala ovanashipundi vokwoongala. Ovakulunhuongalo ovo va hoololwa otava dulu okukala hava ningi ovanashipundi lwoikando. She likolelela keenghalo domoshitukulwa sheni, omupashukili wokwoongala kwOnghalamwenyo yopaKriste noilonga yokuudifa ota dulu okukala ha longifwa lwoikanda e li omunashipundi. Ngeenge omukulunhuongalo oha longifwa mokukwatela komesho Ekonakonombibeli lEongalo, nopehe na omalimbililo, ota dulu yo okuningwa omunashipundi wokwoongala. Ndele otamu indilwa mu dimbulukwe kutya omukulunhuongalo oo a hoololwa a kale omunashipundi okwa teelelwa a pandule nokukwafela pahole ovo tava yandje oipopiwa, noku va pa omapukululo. Omunashipundi oku na yo oshinakuwanifwa shokushilipaleka kutya okwoongala otaku pu pefimbo. (Tala  okatendo 14 no  17.) Ngeenge omunashipundi okwa hala nongeenge komutune oku na omhito, komutune naku kale embako la wedwa po opo a dule oku li longifa eshi ta shiivifa kutya oshipopiwa shilipi tashi landula ko, ofimbo omumwatate oo a landula ko ta fikama pembako olo tali longifwa kovayandji voipopiwa. Kakele kaasho, omunashipundi ota dulu okukala e li omutumba komutune ngeenge ta ifana omunafikola ta landula ko nongeenge ta yandje omayele. Kungaho, efimbo otali dulu okuxupifwa.

OMUUNGANEKI WOLUTU LOVAKULUNHUONGALO

 23. Omuunganeki wolutu lovakulunhuongalo ile omukulunhuongalo oo te mu kwafele oye e na okutukula oipopiwa aishe yokwoongala, kakele koipopiwa yovanafikola. Oshinakuwanifwa osho osha kwatela mo okuninga elandulafano lovanashipundi vokwoongala kwoshivike keshe, ta longifa ovo va hoololwa kolutu lovakulunhuongalo. Omuunganeki wolutu lovakulunhuongalo oku na okulongela kumwe nomupashukili wokwoongala Onghalamwenyo yopaKriste noilonga yokuudifa, opo a shilipaleke kutya kekafa lomauyelele okwa tulikwa elandulafano lokwoongala akushe.

OMUYANDJIMAYELE OMUTIVALI

   24. Ngeenge otashi shiiva, oshiwa okulongifa omukulunhuongalo oo e na ounghulungu wokupopya oye a kale omuyandjimayele omutivali. Omuyandjimayele omutivali oku na oshinakuwanifwa shokuyandja omayele opaumwene kuvamwe, ngeenge osha pumbiwa, ta yandje omayele  kovakulunhuongalo novayakuliongalo kombinga yoitukulwa keshe oyo hava yandje, mwa kwatelwa oipopiwa oyo yokwoongala Onghalamwenyo yopaKriste noilonga yokuudifa, oipopiwa yomoipafi, okukwatela komesho nokulesha pEkonakono lOshungonangelo ile Ekonakonombiibeli lEongalo. (Tala  okatendo 17.) Ngeenge ope na ovakulunhuongalo vahapu meongalo ovo ve li ovapopi novahongi ovanekeka, otaku dulu okulongifwa omuyandjimayele umwe e lili omudo keshe. Omuyandjimayele omutivali ina pumbwa okuyandja omayele konima yoshipopiwa keshe.

OFIKOLA ONHIVALI

 25. Omaongalo otaa dulu okukala e na eefikola dopavali, she likolelela komuvalu wovaudifi meongalo. Ofikola keshe onhivali oi na okukala i na omuyandjimayele omutivali, nongeenge otashi shiiva na kale omukulunhuongalo. Otaku dulu yo okulongifwa omuyakuliongalo oo e na owino, ngeenge otashi shiiva. Olutu lovakulunhuongalo oli na okutokola kutya olyelye e na okupewa oshinakuwanifwa osho nosho yo ngeenge oshi na okukala tashi liyakulwa ile hasho. Omuyandjimayele oku na okulandula omalombwelo oo e li  mokatendo 16. Ngeenge ope na ofikola onhivali, ovanafikola ove na okupulwa va ye kokanduda okativali eshi taku hovelwa noshitukulwa Konakona moule omamona opamhepo koshi yoshitukulwa Omamona omEendjovo daKalunga. Konima yaasho, ovanafikola nava alukile mOlupale la kula ofimbo oshitukulwa Longa noudiinini moilonga yokuudifa inashi hovela. Ngeenge ota ku danwa okavidio, ovaudifi ovo ve li mokanduda okativali ove na okuuya mOlupale eli la kula opo va pwilikine kuko. Ile ngeenge mokanduda omo hava ongalele omu na oikwaelektronika, nava talele ashike omo noku ka kundafana.

OUVIDIO

 26. Otaku ka ulikwa ouvidio vonhumba shi na sha nokwoongala oko. Ouvidio vokwoongala kwomokati koshivike otava kala hava kala ko-JW Library® nokutapwa ko taku longifwa oikwaelektronika i lili noku lili. Omafimbo amwe, ouvidio ovo ve na oihopaenenwa yomatwalemo otava dulu okukala hava ulikwa pokwoongala kwoilonga yomomapya konima ngeenge ova ulikwa pokwoongala Onghalamwenyo yopaKriste noilonga yokuudifa.