Mafiku Jehova ite ke lididimikila vali ounyuni ou. Omalongelokalunga oipupulu otaa ka hanaunwa po, oiwana ye limbwanga mumwe otai ka ponokela oshiwana shaKalunga, na Jehova ota ka hanauna po ovakolokoshi puArmagedon. Ovakriste ova teelela nodjuulufi oiningwanima oyo ya fimana noitunhula.

Oshoshili kutya katu shi shii ashishe osho tashi ka ningwa poudjuu munene. Pashihopaenenwa, katu shi shii kondadalunde kutya otau ka hovela naini. Katu shi shii kutya ovakwanepangelo otava ka yandja omatomheno elipi, opo va yukife eenghatu davo, eshi tava ponokele omalongelokalunga. Katu shi shii kutya oiwana otai ka ponokela oshiwana shaKalunga oule wefimbo li fike peni, ile kutya oshike sha kwatelwa mo. Katu shi shii yo kondadalunde kutya Jehova ota ka longifa shike, opo a hanaune po ovakolokoshi puArmagedon.

Ashike nande ongaho, Ombiibeli oye tu pa ouyelele oo tau dulu oku tu kwafela, opo tu dule okutaalela onakwiiwa tu na omukumo nouladi. Pashihopaenenwa, otu shi shii kutya otu li “momafiku axuuninwa.” (2Tm 3:1) Otu shi shii kutya eponokelo lomalongelokalunga otali ka “xupipikwa,” opo elongelokalunga lashili liha hanaunwe po. (Mat 24:22) Otu shi shii kutya Jehova ota ka xupifa oshiwana shaye. (2Pe 2:9) Otu shi shii yo kutya oo a hoololwa kuJehova, opo a hanaune po ovakolokoshi noku xupife ongudu inene puArmagedon, omuyuki nomunaenghono. — Eh 19:11, 15, 16.

Ovanhu “otava ka haluka omolwoumbada” koiningwanima yomonakwiiwa. Ashike ngeenge otwa kala hatu lesha nokudilonga kunghee Jehova a xupifa oshiwana shaye monakudiwa nosho yo kwaasho a holola kombinga yonakwiiwa, ohatu ka kala ‘tu li ofika twa yukilila notwa yelula omitwe detu pombada,’ tu na omukumo kutya exupifo letu oli li popepi. — Luk 21:26, 28.