Inda koshikalimo

Inda koshikalimo

 OKUKALA OMUKRISTE WASHILI

Mona ehafo olo hali di mokuudifa onghundana iwa

Mona ehafo olo hali di mokuudifa onghundana iwa

Mbela oho mono shidjuu omafimbo amwe okuudifa? Vahapu vomufye ngeenge otwa pulwa epulo olo ohatu ka tya: Heeno. Omolwashike mbela? Otashi dulika hatu shakeneke ovanhu ovo have tu kembaula ile hava kala va handuka ile ofye tu na oumbada wokupopya novanhu. Oinima ya tya ngaho otai dulu oku tu kanififa ehafo letu. Ashike nande ongaho, ohatu longele Kalunga omuhafi oo a hala tu mu longele twa hafa. (Eps 100:2; 1Tim 1:11) Otu na okukala hatu hafele oilonga yokuudifa nomatomheno atatu elipi?

Etomheno lotete, ohatu udifa etumwalaka leteelelo. Nonande kunena ovanhu ova kanifa eteelelo, ohatu dulu okuyadeka omitima dovanhu ‘nondaka iwa oyo tai udifa ekulilo.’ (Jes. 52:7) Ashike onghundana iwa yOuhamba waKalunga otai dulu yo oku tu etela ehafo. Fimbo ino ya moukalele, dilonga komanangekonoupuna oo Ouhamba waKalunga tau ka eta kombada yedu.

Etomheno etivali, onghundana iwa oyo hatu udifa ohai etele ovanhu ouwa palutu nopamhepo. Ohai va kwafele va efe po oilonga ii opo va ka mone omwenyo waalushe. (Jes. 48:17, 18; Rom. 1:16) Ohatu dulu oku shi faneka noilonga yokukonga ovanhu noku va xupifa. Nonande ovanhu vamwe inava hala okuxupifwa, ohatu twikile nokukonga ovo va hala okuxupa. — Mat. 10:11-14.

Etomheno etitatu nola fimana ololo kutya oilonga yetu yokuudifa ohai fimanekifa Jehova. Okwa lenga oilonga yetu yokuyandja oundombwedi. (Jes. 43:10; Heb. 6:10) Ohe tu pe omhepo yaye iyapuki opo tu dule okupondola moilonga yokuudifa. Onghee hano, indila Jehova e ku pe ehafo olo li li oiimati yomhepo iyapuki. (Gal. 5:22) Kekwafo laye ohatu dulu okufinda oumbada nokuudifa nouladi. (Oil. 4:31) Kashi na nee mbudi kutya ovanhu otave linyenge ngahelipi moshitukulwa shetu, natu hafele oilonga yetu yokuudifa. — Hes. 3:3.

Oukwatya ulipi wa hala okukala u na ngeenge u li moukalele? Ongahelipi to dulu okuulika kutya owa hafa?

DANENI OKAVIDIO MONA EHAFO MOKUKALA HO KONAKONA NOKUDILONGA, NDELE TAMU KUNDAFANA OMAPULO TAA SHIKULA:

  • Nonande ohatu longo eevili dihapu omwedi keshe, omolwashike tu na okukala hatu lipalula alushe pamhepo?

  • Omonghedi ilipi tu na okuhopaenena Mary?

  • Onaini ho kufa efimbo u dilonge kEedjovo daKalunga?

  • Oshike hashi ku etele ehafo ngeenge to udifa onghundana iwa?