Inda koshikalimo

Inda koshikalimo

 OSHITUKULWA SHOKUKONAKONWA 24

Natu efe po keshe osho tashi tu imbi tu shiive Kalunga

Natu efe po keshe osho tashi tu imbi tu shiive Kalunga

“Ohatu hanauna po omapopilongulu, nelinenepekifo keshe tali nenepekele okushiiva kwaKalunga.” — 2 KOR. 10:5.

EIMBILO 124 Kala alushe omudiinini

EXUKU LOSHITUKULWA *

1. Elondwelo lilipi Paulus a li a shangela Ovakriste ovavaekwa?

OMUYAPOSTOLI Paulus okwa yandja elondwelo a ti “inamu faafana.” Inamu faafana nashike? “Inamu faafana nounyuni ou.” (Rom. 12:2) Eendjovo odo, Paulus okwa li e di shangela Ovakriste vomefelemudo lotete. Omolwashike a li a yandja elondwelo olo la kwata moiti kovalumenhu novakainhu ovo va li ve liyapulila Kalunga nova vaekwa nomhepo iyapuki? — Rom. 1:7.

2-3. Satana oha kendabala ngahelipi oku tu amuna ko kuJehova, nongahelipi hatu dulu okweefa po oinima ii oyo i li momadiladilo etu?

2 Paulus okwa li te lipula molwaashi Ovakriste vamwe ova li va nwefwa mo komadiladilo mai ounyuni ou tau pangelwa kuSatana. (Ef. 4:17-19) Osho otashi dulu okuningilwa keshe umwe womufye. Kakele ashike kokukendabala oku tu amuna ko kuJehova, Satana, e li kalunga kounyuni ou, oha longifa eenghedi da yoolokafana opo e tu nwefe mo. Pashihopaenenwa, ngeenge otwa hala okukala twa fimana ile twa shiivika apeshe, ota ka longifa onghedi oyo opo e tu amune ko kuJehova. Otashi dulika nokuli a longife oinima imwe yomonakudiwa yetu, yomeputuko letu, ile youhongelwe wetu opo e tu nwefe mo nomadiladilo aye.

3 Mbela otashi shiiva ngoo “okuhanauna po” ile tu tye okweefa po oinima ii oyo i li momadiladilo etu? (2 Kor. 10:4)  Didilika nghee Paulus a nyamukula a ti: “Ohatu hanauna po omapopilongulu, nelinenepekifo keshe tali nenepekele okushiiva kwaKalunga, nakeshe ediladilo ohatu li tula meti li dulike kuKristus.” (2 Kor. 10:5) Heeno, kekwafo laJehova ohatu dulu okweefa po omadiladilo mai. Ngaashi ashike omiti hadi dulu okuvelula omikifi, Eendjovo daKalunga otadi dulu oku tu kwafela tu kondjife oinima ii yomounyuni waSatana.

“SHITUKENI VAPE MOMADILADILO ENI”

4. Omalunduluko elipi vahapu vomufye twa li tu na okuninga eshi twe lihonga oshili?

4 Diladila komalunduluko oo wa li u na okuninga eshi we lihonga oshili yEendjovo daKalunga nowa tokola oku mu longela. Kuvahapu vomufye, osho osha li sha kwatela mo okweefa po elihumbato inali koshoka. (1 Kor. 6:9-11) Otwa pandula Jehova neenghono eshi e tu kwafela tu efe po elihumbato la tya ngaho.

5. Oinima ivali ilipi Ovaroma 12:2 ve tu lombwela tu ninge?

5 Ashike inatu diladila kutya inatu pumbwa okuninga nandenande omalunduluko. Nonande otwa efa po okunyona omanyono a kwata moiti oo twa li hatu nyono nale fimbo inatu ninginifwa, natango otu na okulonga noudiinini opo tu henuke keshe osho tashi dulu oku tu yeleka tu nyone sha kwata moiti. Ongahelipi hatu dulu okuninga ngaho? Paulus okwa ti: “Nye inamu faafana nounyuni ou, ndelenee shitukeni vape momadiladilo eni.” (Rom. 12:2) Osho osha kwatela mo okuninga oinima ivali. Shotete, ‘inatu faafana,’ ile inatu nwefwa mo kounyuni ou. Oshitivali, ‘natu shituke vape’ momadiladilo etu.

6. Oshike hatu lihongo meendjovo daJesus odo di li muMateus 12:43-45?

6 Omalunduluko oo Paulus a li ta popi okwa kwatela mo shihapu shihe fi ashike eholokepo letu lokombada. Ohaa kumu ounhu wetu aushe. (Tala oshimhungu “ Owa lunduluka ile  oto lifefa?”) Otwa pumbwa okushituka vape momadiladilo etu, momutima wetu, momaliudo nosho yo omahalo etu. Onghee atusheni otwa pumbwa okulipula kutya, ‘Mbela omalunduluko oo handi ningi opo ndi kale Omukriste oku na sha ashike neholokepo lokombada, ile otaa kwafele nge ngoo ndi kale Omukriste washili?’ Enyamukulo kepulo olo ola fimana. Jesus okwa li a ulika osho shi na okuningwa meendjovo daye odo di li muMateus 12:43-45. (Lesha.) Eendjovo odo otadi tu hongo oshilihongomwa sha fimana kutya: Inashi wana ashike okweefa po omadiladilo a puka, ndele otwa pumbwa yo oku a pingena po nomadiladilo oo Kalunga a hokwa.

“MU SHITUKE VAPE MOMHEPO YOMADILADILO ENI”

7. Ongahelipi hatu dulu okulundulula omadiladilo etu?

7 Mbela otashi shiiva ngoo tu shituke vape momadiladilo etu? Eendjovo daKalunga oda ti: “Mu shituke vape momhepo yomadiladilo eni, ndele nye mu djale omunhu mupe a shitwa a fa Kalunga omouyuki nomouyapuki woshili.” (Ef. 4:23, 24) Heeno, otashi shiiva okulunduluka momadiladilo, ndele kashi pu okuninga ngaho. Otwa pumbwa okuninga shihapu shihe fi ashike okukondjifa omahalo neenghatu da puka. Otwa pumbwa okulundulula ‘omhepo yomomadiladilo’ etu. Osho osha kwatela mo omahalo etu, eamo letu nosho yo omauko etu. Naasho otashi pula eenghendabala tadi twikile.

8-9. Oshihopaenenwa shomumwatate umwe osha divilika ngahelipi omhumbwe yokulundulula omadiladilo etu?

8 Natu ka konakoneni oshihopaenenwa shomumwatate umwe oo a li e hole elongifo leenghono monakudiwa. Konima eshi a efa po okunwa sha pitilila nokulwa, okwa li a ninginifwa naasho osha li sha yandja oundombwedi muwa momudingonoko wavo. Ashike onguloshi imwe, diva ashike konima yeninginifo laye, okwa li a yelekwa monghedi omo ine shi teelela. Peumbo laye opa li pe uya omulumenhu a kolwa nokwa hala oku mu lwifa. Potete omumwatate okwa li ta kondjifa ehalo laye lokulwa. Ndele eshi omulumenhu oo a hovela okusheka edina laJehova, osha li sha handukifa omumwatate neenghono. Okwa li a dja mo meumbo ndele ta lafa omulumenhu oo oupuka. Omolwashike a li a ningila ngaho? Nonande ekonakonombiibeli laye ola li le mu kwafela a kondjife elongifo leenghono, ka li natango a lundulula omadiladilo aye.

9 Ashike omumwatate oo ka li a sholola. (Omayel. 24:16) Kekwafo lovakulunhuongalo, okwa li a twikila okuninga exumokomesho. Okwa li a ninga omukulunhuongalo diva. Onguloshi imwe, pondje ashike yOlupale lOuhamba, okwa li a shakeneka vali eyeleko la faafana naalo a shakenekele nale. Omulumenhu a kolwa okwa li a hala okudenga omukulunhuongalo umwe. Omumwatate oo okwa li a ninga po shike? Okwa li a popya nengungumano nomulumenhu oo a kolwa, e mu kwafela a ngungumane noku ye keumbo. Omolwashike omumwatate oo a li e linyenga monghedi i lili pomhito oyo? Omumwatate oo okwa li a lundulula omadiladilo aye. Okwa li a ninga omunhu omunambili nomulininipiki, naasho osha li sha fimanekifa Jehova.

10. Oshike sha kwatelwa mo mokuninga omalunduluko oo?

10 Omalunduluko oo ihaa ningwa ashike moufiku umwe, noihaa ningwa ashike ngahenya nopehe na okuninga eenghendabala. Otashi dulika twa pumbwa okuninga “eenghendabala da mana mo” oule womido. (2 Pet. 1:5, NW) Itatu ka ninga ashike omalunduluko molwaashi ngeno twa kala “moshili” efimbo lile. Otwa pumbwa okuninga omalunduluko opo  tu lundulule omadiladilo etu. Ope na eenghatu dimwe odo tadi ke tu kwafela tu ninge elunduluko la tya ngaho. Natu ka konakoneni dimwe domudo.

NGHEE HATU DULU OKULUNDULULA OMADILADILO ETU

11. Eilikano ohali tu kwafele ngahelipi tu lundulule omadiladilo etu?

11 Eilikano olo onghatu yotete ya fimana. Otwa pumbwa okwiilikana ngaashi omupsalme a ti: “Kalunga, shitile nge omutima wa yela, nomeni lange tula mo omhepo ipe i neenghono.” (Eps. 51:10) Otu na okudimina kutya otwa pumbwa okulundulula omadiladilo etu, nokupula Jehova etu kwafele. Ongahelipi hatu dulu okukala noushili kutya Jehova ote ke tu kwafela tu ninge omalunduluko? Ohatu dulu okutuwa omukumo keudaneko olo Jehova a li a udanekela Ovaisrael ovatangalali, a ti: “Ndele Ame ohandi ke va pa omutima umwe nomhepo ipe meni lavo. . . . Ndele handi va pe omutima wonhumba,” sha hala okutya omutima u na ehalo lokushikula ewiliko laKalunga. (Hes. 11:19) Jehova okwa li a halelela okukwafela Ovaisrael ovo va ninge omalunduluko, nafye okwa halelela oku tu kwafela.

12-13. (a) She likolelela kEpsalme 119:59, oshike osho twa pumbwa okudilonga kusho? (b) Omapulo elipi wa pumbwa okulipula?

12 Okudilonga oko onghatu onhivali ya fimana. Eshi hatu lesha noukeka Eendjovo daKalunga efiku keshe, otwa pumbwa okukonga omhito tu dilonge, ile tu diladile moule kombinga yaasho twa lesha opo tu mone kutya omadiladilo nomaliudo elipi twa pumbwa okulundulula. (Lesha Epsalme 119:59; Heb. 4:12; Jak. 1:25) Otu na okudidilika omadiladilo nomaliudo oo tashi dulika tu na a nwefwa mo komadiladilo ounyuni ou. Otwa pumbwa okudimina kutya otu na omaunghundi notu na okulonga noudiinini opo tu a finde.

13 Pashihopaenenwa, lipula kutya: ‘Mbela ondi na olwisho ile ondubo momutima wange?’ (1 Pet. 2:1) ‘Mbela ohandi kala ndi udite kutya ondi li xwepo ndi dule vamwe omolwonhele opo nda dja, ouhongelwe wange, ile oimaliwa ihapu oyo ndi na?’ (Omayel. 16:5) ‘Mbela onda dina ovanhu ovo vehe na oinima ngaashi oyo ndi na ile ovo va dja meputuko la yooloka ko kulange?’ (Jak. 2:2-4) ‘Mbela ondi hole oinima oyo i li mounyuni waSatana?’ (Joh. 2:15-17) ‘Mbela ohandi hafele omalihafifo inaa koshoka nokwa kwatela mo elongifo leenghono?’ (Eps. 97:10; 101:3; Amos 5:15) Omanyamukulo komapulo oo otae ke ku kwafela u mone opo wa pumbwa okuninga omalunduluko. Ngeenge otwa findi omadiladilo oo mai, ohatu ka hafifa Tate yetu womeulu. — Eps. 19:14.

14. Omolwashike sha fimana okuhoolola ookaume vawa?

14 Okuhoolola ookaume vawa oku li onghatu onhinhatu ya fimana. Kutya nee otwe shi didilika ile inatu shi didilika, ovo hatu endafana navo ohave tu nwefa mo neenghono. (Omayel. 13:20) Ngeenge tu li koilonga ile kofikola, ohatu kala novanhu ovo ihave tu kwafele tu diladile monghedi oyo Kalunga a hokwa. Ashike ohatu dulu okumona ookaume vawa meongalo. Meongalo omo ashike hatu dulu okutuwa omukumo “mohole nomoilonga iwa.” — Heb. 10:24, 25.

‘LIPAMEKELA MEITAVELO’

15-16. Satana oha kendabala ngahelipi okulundulula omadiladilo etu?

15 Dimbuluka kutya Satana okwa tokola toko okulundulula omadiladilo etu. Oha longifa eenghedi di lili noku lili opo a nyone po  enwefemo liwa olo twa mona mEendjovo daKalunga.

16 Satana ota twikile nokulongifa epulo olo a pulile Eva moshikunino shaEden, tali ti: “Kalunga okwa ti shili: . . . ?” (Gen. 3:1) Mounyuni ou tau pangelwa kuSatana, luhapu ohatu udu omapulo taa limbililike ngaashi: ‘Mbela Kalunga ina hokwa shili okuhombolafana kwomashenge? Mbela Kalunga ina hala shili u dane Okrismesa nomafiku omadalo? Mbela Kalunga keni okwa teelela shili mu anye okutulwa ohonde? Mbela Kalunga keni omunahole okwa teelela shili mu henuke okweendafana novaholike veni ovo va kondwa?’

17. Oshike tu na okuninga po ngeenge otwa shakeneke omapulo oo tae tu ningifa tu kale twa limbililwa eitavelo letu, noidjemo ilipi hatu ka mona she likolelela kOvakolossi 2:6, 7?

17 Otwa pumbwa okukala twa tomhwa keitavelo letu. Ngeenge inatu mona omanyamukulo omapulo a fimana e na sha neitavelo letu, ohatu dulu okukala twa limbililwa ngeenge osho twa itavela oshoshili ngoo. Omalimbililo oo otaa dulu okulundulula omadiladilo etu nokunyona po eitavelo letu. Mbela oshike twa pumbwa okuninga po? Eendjovo daKalunga ode tu lombwela tu shituke vape momadiladilo, opo tu shiive “okukonakona ehalo laKalunga olilipi, naashi shiwa, sha wapalela nosha wana.” (Rom. 12:2) Ngeenge otwa kala hatu konakona pandjikilile, ohatu dulu okukala noushili kutya osho twe lihonga mOmbiibeli oshi li mondjila. Ohatu dulu yo okukala twa tomhwa filufilu kutya omifikamhango daJehova oda yuka. Ngaashi ashike omiti odo di na omidi da ya moule, ‘eitavelo letu nalo otali ka kala la pama.’ — Lesha Ovakolossi 2:6, 7.

18. Oshike tashi ke tu kwafela tu liamene koinima ii yomounyuni waSatana?

18 Kape na umwe oo ta dulu okupameka eitavelo loye. Onghee twikila okushituka mupe momadiladilo oye. Ilikana pandjikilile; pula omhepo yaJehova i ku kwafele. Dilonga moule; twikila okukonakona omadiladilo nomauko oye. Hoolola ookaume vawa; kala ho kala naavo tave ku kwafele u lundulule omadiladilo oye. Ngeenge owa ningi ngaho, oto ka efa po oinima ii yomounyuni waSatana noto ka pondola ‘mokuhanauna po omapopilongulu, nelinenepekifo keshe tali nenepekele okushiiva kwaKalunga.’ — 2 Kor. 10:5.

EIMBILO 50 Eilikano lange leliyapulo

^ par. 5 Omadiladilo etu otaa dulu okunwefwa mo nawa ile nai keputuko letu, komuhoko wetu, ile kouhongelwe wetu. Otashi dulika tu mone kutya otu na elihumbato lii noshidjuu oku li efa po. Oshitukulwa eshi, otashi ka ulika nghee hatu dulu okupangela omahalo mai oo tashi dulika tu na.