Inda koshikalimo

Inda koshikalimo

 OSHITUKULWA SHOKUKONAKONWA 23

‘Lungameni opo muha yulwe nande okomunhu’!

‘Lungameni opo muha yulwe nande okomunhu’!

“Lungameni, paha kale umwe te mu yulifa ounongo wovanhu nomapukifo ongaho, te likwatelele meenghedinghulu.” — KOL. 2:8.

EIMBILO 96 Ombiibeli emona la dja kuKalunga

EXUKU LOSHITUKULWA *

1. She likolelela kOvakolossi 2:48, Satana oha kendabala ngahelipi okuyula omadiladilo etu?

SATANA okwa hala oku tu amuna ko kuJehova. Opo a hange elalakano laye, oha kendabala okunwefa mo omadiladilo etu, kokutya okuyula omadiladilo etu noku tu ningifa tu dulike kuye. Oha kendabala oku tu pukifa ta longifa oinima oyo tu hole opo tu mu shikule. — Lesha Ovakolossi 2:4, 8.

2-3. (a) Omolwashike tu na okuyandja elitulemo kelondwelo olo li li mOvakolossi 2:8? (b) Oshike hatu ka konakona moshitukulwa eshi?

2 Mbela otu li ngoo lelalela moshiponga shokupukifwa kuSatana? Heeno. Dimbuluka kutya, Paulus ina shangela ovo vehe fi Eendombwedi elondwelo olo li li mOvakolossi 2:8. Okwa li e li shangela Ovakriste ovo va li va vaekwa nomhepo iyapuki. (Kol. 1:2, 5) Ovakriste ovo ova li moshiponga pefimbo olo, nafye kunena otu li moshiponga sha kula. (1 Kor. 10:12) Omolwashike mbela? Omolwaashi Satana okwa umbilwa kombada yedu, nota yandje elitulemo kokupukifa ovapiya vaKalunga ovadiinini. (Eh. 12:9, 12, 17) Shikwao vali, otu li pefimbo opo ovanhu vai novakengeleledi va ehena komesho “mowii.” — 2 Tim. 3:1, 13.

3 Moshitukulwa eshi, ohatu ka kundafana nghee Satana ha longifa ‘omapukifo ongaho’ opo a nwefe mo omadiladilo etu. Ohatu ka didilika mo ‘omakonda’ atatu aye. (Ef. 6:11) Opo nee, moshitukulwa tashi shikula ko, ohatu ka konakona nghee hatu dulu okududa mo oinima ii oyo tashi dulika a tula momadiladilo etu. Ashike tete natu ka konakoneni kutya oshike hatu  dulu okulihonga konghedi oyo Satana a li a longifa opo a pukife Ovaisrael konima eshi va ya mEdu lEudaneko.

NGHEE SATANA A LI A YELEKA OVAISRAEL VA LONGELE OIKALUNGA

4-6. She likolelela kuDeuteronomion 11:10-15, onghedi ipe i na sha nounamapya ilipi Ovaisrael va li ve na okulihonga eshi va ya mEdu lEudaneko?

4 Satana okwa li a yeleka Ovaisrael va longele oikalunga. Okwa li e shi ninga ngahelipi? Okwa li e shii kutya ova pumbwa oikulya, onghee okwa li a longifa omhumbwe oyo opo va ninge osho a hala. Eshi Ovaisrael va ya mEdu lEudaneko, ova li ve na okulundulula onghedi yavo yokulima. Eshi Ovaisrael va li muEgipti, ova li hava tekele omapya avo tava kufa omeva momulonga waNil. Ashike mEdu lEudaneko kamwa li omulonga wa kula, onghee oimeno yavo oya li i na okukula komeva odula nosho yo komume. (Lesha Deuteronomion 11:10-15; Jes. 18:4, 5) Onghee hano, Ovaisrael ova li ve na okulihonga eenghedi dipe dokulima. Osho kasha li shipu molwaashi vahapu vomwaavo va li ve na eshiivo mounamapya ova fila mombuwa.

Satana okwa li a lundulula ngahelipi omadiladilo Ovaisrael shi na sha nounamapya? (Tala okatendo 4-6) *

5 Jehova okwa li a yelifila oshiwana shaye kutya onghalo oya lunduluka. Okwa li yo a weda ko elondwelo, olo potete la li tali monika la fa inali pambafana noinima younamapya, a ti: “Lungameni, omitima deni diha pukifwe, mu liteeke nokufimaneka oikalunga imwe noku i longela noku i linyongamena.” (Deut. 11:16, 17) Omolwashike Jehova e va londwela shi na sha nokulongela oikalunga eshi a li ta popi kombinga yokulihonga eenghedi dipe di na sha nounamapya?

6 Jehova okwa li e shii kutya Ovaisrael otava dulu okuyelekwa ve lihonge eenghedi dipe di na sha nounamapya kovapaani ovo va li ve va dingilila. Oshiwana shaKalunga osha li  tashi dulu okulihonga shihapu kovapaani ovo molwaashi ova li ve na eshiivo lihapu mounamapya ve va dule, ashike osho osha li sha nyika oshiponga. Ovakaanan ova li va nwefwa mo keitavelo lavo muBaal. Ova li va itavela kutya Baal oye mwene wewangadjo noye ha lokifa odula. Jehova ka li a hala oshiwana shaye shi pukifwe komaitavelo oipupulu. Ashike omafimbo nomafimbo, Ovaisrael ova kala hava longele Baal. (Num. 25:3, 5; Ovatok. 2:13; 1 Eeh. 18:18) Didilika nghee Satana a li a dula okuyula Ovaisrael.

EENGHEDI NHATU ODO SATANA A LI A LONGIFA OPO A YULE OVAISRAEL

7. Eitavelo lOvaisrael ola li la yelekwa ngahelipi eshi va li va ya mEdu lEudaneko?

7 Onghedi yotete oyo Satana a li a longifa oyo okuningifa Ovaisrael va yandje elitulemo koinima oyo ovanhu hava kala va halelela paushitwe ngaashi odula. MEdu lEudaneko omwa li hamu lokwa odula inini omudo keshe okudja pexulilo laAprili fiyo omuSeptemba. Opo Ovaisreal ve limonene oikulya, ova li hava kala ve lineekela modula oyo hai loko okuhovela muOktoba lwaapo. Satana okwa li a pukifa Ovaisrael moku va itavelifa kutya opo ve limonene oikulya, ova li ve na okutambula ko eenghedindjikilile dovapaani ovo va li ve va dingilila. Ovapaani ovo ova li va itavela kutya oikalunga yavo otai ka lokifa odula, ngeenge ova shikula eenghedindjikilile delongelokalunga lonhumba. Ovo va li vehe na eitavelo muJehova ova li va itavela kutya oyo oyo ashike onghedi tava dulu okuhenuka oshikukuta, onghee ova li va kufa ombinga meenghedindjikilile doshipaani mokufimaneka oshikalunga Baal.

8. Onghedi onhivali ilipi Satana a li a longifa? Shi yelifa.

8 Satana okwa li a longifa onghedi onhivali opo a yule Ovaisrael. Okwa li e va ningifa ve liyandje komahalo opambelela. Oiwana yovapaani oya li hai longele oikalunga mokukufa ombinga moilonga itondifa. Oilonga oyo i li oludi lelongelokalunga la puka oya li ya kwatela mo okukufa ombinga moumbwada kotembeli, naasho osha li sha kwatela mo ovalumenhu novakainhu. Oushenge nosho yo oludi likwao loluhaelo kaya li ashike hai lididimikilwa, ndele oya li yo ya tambulwa ko. (Deut. 23:17, 18; 1 Eeh. 14:24) Ovapaani ovo ova li va itavela kutya oinima ya tya ngaho ohai linyengifa oikalunga yavo i ningife edu li meneke oikulya ihapu. Ovaisrael vahapu ova li va nanwa va ye moluhaelo ngaashi ovapaani ovo, nova li va hovela okulongela oikalunga. Paulelalela, ova li va yulwa kuSatana.

9. Metwokumwe naHosea 2:16, 17, Satana okwa li a ningifa ngahelipi Ovaisrael va dimbwe Jehova?

9 Onghedi onhinhatu oyo Satana a li a longifa. Okwa li a ningifa Ovaisrael va dimbwe Jehova. Pefimbo lomuprofeti Jeremia, Jehova okwa li a popya kutya ovaprofeti ovanaipupulu ova dimbwifa ovapiya vaYe edina laYe “omolwaBaal.” (Jer. 23:27) Osha fa shi li ngaha kutya ovapiya vaKalunga ova li va efa po okulongifa edina laJehova noku li pingena po nedina Baal, olo tali ti “Omwene.” Oshinima sha tya ngaho osha li she shi ningifa shidjuu kOvaisrael va mone eyooloko pokati kaJehova naBaal, nosha li she shi ningifa shipu kuvo okumbwanga mumwe elongelokalunga laBaal nolaJehova. — Lesha Hosea 2:16, 17.

EENGHEDI ODO SATANA HA LONGIFA KUNENA

10. Eenghedi dilipi Satana ha longifa kunena?

10 Satana oha longifa eenghedi da faafana kunena. Oha ningifa ovanhu va yandje elitulemo koinima oyo hava kala va halelela, ha xumifa komesho oluhaelo noha ningifa ovanhu va dimbwe Jehova. Tete ohatu ka konakona  nghee Satana ha ningifa ovanhu va dimbwe Jehova.

11. Satana okwa ningifa ngahelipi ovanhu va dimbwe Jehova?

11 Satana oha ningifa ovanhu va dimbwe Jehova. Konima yefyo lovayapostoli vaJesus, vamwe ovo va li have liti Ovakriste ova li va hovela okutandaveleka omahongo oipupulu. (Oil. 20:29, 30; 2 Tes. 2:3) Ovashunimonima ova li va hovela okulombwela ovanhu oipupulu kombinga yaKalunga kashili. Pashihopaenenwa, ova li va efa po okulongifa edina laKalunga mEembiibeli davo noku li pingena po noutumbulilo “Omwene.” Eshi va kufa mo edina laKalunga lopaumwene noku li pingena po noutumbulilo “Omwene,” ove shi ningifa shidjuu kovaleshi vOmbiibeli va mone nghee Jehova a yooloka ko ‘koovene’ ovo va tumbulwa mOmishangwa. (1 Kor. 8:5) Ova longifa outumbulilo wa faafana, “Omwene,” tava ulike kuJehova nokuJesus, nove shi ningifa shidjuu okuuda ko kutya Jehova nOmona ova yoolokafana notava dana onghandangala ya yoolokafana. (Joh. 17:3) Elyalyakano olo otali yambidida ehongo lOukwatatu, olo lihe mo mEendjovo daKalunga. Oshidjemo, vahapu ova itavela kutya itatu dulu okushiiva Kalunga. Oyo kai fi tuu oipupulu itoka tootoo! — Oil. 17:27.

Satana oha longifa ngahelipi omalongelokalunga oipupulu opo a xumife komesho omahalo opambelela (Tala okatendo 12) *

12. Omalongelokalunga oipupulu okwa xumifa komesho shike, nosha eta oidjemo ilipi, ngaashi ya yelifwa mOvaroma 1:28-31?

12 Satana oha ningifa ovanhu ve liyandje komahalo opambelela. MuIsrael shonale, Satana okwa li ha longifa omalongelokalunga oipupulu opo a xumife komesho oluhaelo. Nokunena, oha ningi sha faafana. Omalongelokalunga oipupulu okwa tambula ko nohaa xumifa komesho elihumbato inali koshoka. Onghee hano, ovo have liti kutya otava longele Kalunga ihava dulika komifikamhango daye dopaenghedi. Omuyapostoli Paulus okwa li a yelifa oidjemo yomalongelokalunga oo haa xumifa komesho oluhaelo monhumwafo oyo a li a shangela Ovaroma. (Lesha Ovaroma 1:28-31.) ‘Oinima oyo inai wapala’ ongaashi oluhaelo, mwa kwatelwa oushenge. (Rom. 1:24-27, 32; Eh. 2:20) Osha fimanenena tu dulike komahongo Ombiibeli.

13. Onghedi ilipi vali Satana ha longifa?

13 Satana oha ningifa ovanhu va yandje elitulemo koinima oyo hava kala va halelela. Otwa halelela okulihonga nghee hatu dulu  okulifila oshisho nosho yo omaukwaneumbo etu. (1 Tim. 5:8) Luhapu, ohatu dulu ashike okumona owino ngeenge twa ya kofikola nokulihonga twa mana mo. Ashike otu na okukala twa lungama. Moilongo ihapu, ovanafikola ihava hongwa ashike ounongo oo tau va kwafele, ndele ohava hongwa yo nounongo wopanhu. Pashihopaenenwa, ovanafikola ohava kunwa omalimbililo ngeenge Kalunga oko ngoo e li, nova kale inava itavela mOmbiibeli. Ohava hongwa kutya oinima oyo i na omwenyo oye ya po okudja moevolusi. (Rom. 1:21-23) Omahongo a tya ngaho oku li omhinge ‘nounongo wopakalunga.’ — 1 Kor. 1:19-21; 3:18-20.

14. Ounongo wopanhu ohau xumifa komesho shike?

14 Ounongo wopanhu ou li omhinge ile otau kondjifafana nomifikamhango daKalunga dopaenghedi. Ihau xumifa komesho oiimati yomhepo yaKalunga, ndele ponhele yaasho, “oilonga yombelela.” (Gal. 5:19-23) Ohau ningifa ovanhu va kale ve na ounhwa nove udite etumba, noshidjemo, ovanhu ohava kala ve ‘lihole vo vene.’ (2 Tim. 3:2-4) Omaukwatya oo otaa kondjifafana nonheni, omhepo yelininipiko oyo ovapiya vaKalunga tava ladipikwa va kale ve na. (2 Sam. 22:28) Ovakriste vamwe ovo va ya kehongo lopombada ova efa omadiladilo avo a nwefwe mo komadiladilo opanhu, ponhele yokweefa a nwefwe mo komadiladilo aKalunga. Natu ka konakoneni oshihopaenenwa shimwe kutya oshike tashi dulu okuningwa po.

Ongahelipi omadiladilo etu taa dulu okunwefwa mo kounongo wopanhu? (Tala okatendo 14-16) *

15-16. Owe lihonga mo shike moshimoniwa shomumwameme umwe?

15 Omumwameme umwe oo a kala moilonga yefimbo li yadi oule womido da konda po 15, okwa ti: “Ndi li Ondombwedi ya ninginifwa,  ohandi lesha nohandi udu kutya osha nyika oshiponga okuya kehongo lopombada, ashike onda li nde shi lidimbika. Onda li handi diladila kutya omayele oo itaa longo kwaame.” Okwa li a shakeneka omaupyakadi elipi? Okwa ti: “Onda li handi longifa efimbo lihapu mokulihonga, onghee kanda li vali handi mono omhito yokwiilikana ngaashi shito, nokanda li vali handi hafele eenghundafana dopaMbiibeli navamwe nosho yo okulilongekidila okwoongala molwaashi onda li handi kala nda loloka. Lao linene, eshi nda li nda mona kutya ehongo lopombada otali nyono po ekwatafano lange naJehova, onda li nde li efa po.”

16 Ehongo lopombada ola li la nwefa mo ngahelipi omumwameme oo? Okwa ti: “Onda fya ohoni okudimina kutya ehongo olo nda li handi lalakanene ola honga nge okukala handi yandje elitulemo komapuko avamwe, unene tuu ovamwatate novamwameme, okuteelela va ninge shihapu shi dulife pwaasho tava dulu nosho yo okuliyoolola ko kuvo. Osha pula nge efimbo lihapu opo ndi efe po okudiladila kwa tya ngaho. Oshimoniwa osho osha ulikila nge kutya osha nyika oshiponga okulidimbika omalondwelo oo hatu pewa kuTate yetu womeulu okupitila mehangano laye. Jehova oku shii nge nawanawa shi dulife ame mwene. Onda li ashike ndi na okudulika kuye.”

17. (a) Otu na okukala twa tokola toko okuninga shike? (b) Oshike hatu ka konakona moshitukulwa tashi shikula ko?

17 Kala wa tokola toko uha yulwe, ‘kounongo wovanhu nomapukifo ongaho’ omounyuni ou waSatana. Shikwao vali, kala wa lungamena omakoto aSatana. (1 Kor. 3:18; 2 Kor. 2:11) Ino efa nande Satana e ku dimbwife Jehova. Kala metwokumwe nomifikamhango daJehova dopaenghedi. Ino efa Satana e ku pukife u lidimbike omayele aJehova. Ndele ongahelipi ngeenge owa didilike kutya owa nwefwa mo nale komadiladilo ounyuni ou? Oshitukulwa tashi shikula ko otashi ka ulika nghee Eendjovo daKalunga tadi dulu oku tu kwafela tu ‘hanaune po’ ile tu efe po omadiladilo nelihumbato lii. — 2 Kor. 10:4, 5.

EIMBILO 49 Hafifa omutima waJehova

^ par. 5 Satana oku na owino mokupukifa ovanhu. Okwa pukifa ovanhu vahapu va itavele kutya ova manguluka, ashike paulelalela ove li mepangelo laye. Oshitukulwa eshi otashi ka kundafana eenghedi odo Satana ha longifa opo a pukife ovanhu.

^ par. 48 OMASHANGELO OMAFANO: Ovaisrael ovo tava endafana nOvakaanan otava yelekwa va longele Baal nova kufe ombinga moluhaelo.

^ par. 51 OMASHANGELO OMAFANO: Eshiivifo longeleka imwe oyo hai xumifa komesho oushenge.

^ par. 53 OMASHANGELO OMAFANO: Omumwameme omunyasha e li mounivesiti. Ye novanafikola vakwao tava hongwa komuhongi wavo kutya ounongononi nouteknologi otai dulu okukandula po omaupyakadi ovanhu. Lwanima, e li mOlupale lOuhamba, e liyoolola ko nota yandje elitulemo komapuko avamwe.