Inda koshikalimo

Inda koshikalimo

 OSHITUKULWA SHOKUNONAKONWA 15

Hopaeneneni Jesus mu kale nombili

Hopaeneneni Jesus mu kale nombili

“Nombili yaKalunga ei i dule eendunge adishe, otai ka amena omitima deni.” — FIL. 4:7.

EIMBILO 113 Otwa punikwa nombili

EXUKU LOSHITUKULWA *

1-2. Omolwashike Jesus a li a fininikwa unene?

MEFIKU laJesus laxuuninwa kombada yedu, okwa li a fininikwa. Okwa li e li poku ka hepekwa kovanhu ovakolokoshi nokufya efyo linyanyalifi. Jesus ka li ashike te lipula molwaashi a li poku ka fya. Okwa li e hole unene Xe nokwa li a hala oku mu hafifa. Okwa li e shii kutya ngeenge okwa kala omudiinini pefimbo leyeleko olo lidjuu, ota ka yambidida okuyapulifwa kwedina laJehova. Jesus okwa li yo e hole ovanhu, nokwa li e shii kutya otava dulu ashike okukala neteelelo loku ka mona omwenyo waalushe ngeenge okwa kala omudiinini kuJehova fiyo omefyo.

2 Nonande Jesus okwa li a wililwa po unene, okwa li e na ombili. Okwa li a lombwela ovayapostoli vaye a ti: “Ombili yange ohandi i mu pe.” (Joh. 14:27) Okwa li e na ‘ombili yaKalunga,’ engungumano olo hali di mokukala u na ekwatafano liwa naJehova. Ombili ya tya ngaho oya li ya kwafela Jesus aha kale te lipula nasha. — Fil. 4:6, 7.

3. Oshike hatu ka konakona moshitukulwa eshi?

3 Kape na nande oumwe womufye a taalela eyeleko olo Jesus a li e lididimikila, ndele aveshe ovo have mu shikula ohava shakeneke omayeleko. (Mat. 16:24, 25; Joh. 15:20) Ngaashi Jesus, nafye ohatu kala twa fininikwa omafimbo amwe. Oshike osho hatu dulu okuninga opo tuha kale hatu lipula unene notuha kanife ombili yopamadiladilo? Natu ka konakoneni oinima itatu oyo Jesus a li a ninga pefimbo loukalele waye kombada yedu nokumona nghee hatu dulu oku mu hopaenena ngeenge twa taalela omayeleko.

 JESUS OKWA KALA ALUSHE HA ILIKANA

Ngeenge ohatu ilikana, ohatu dulu okukala tu na ombili (Tala okatendo 4-7)

4. U na momadiladilo omushangwa wo 1 Ovatessaloniki 5:17, yandja oihopaenenwa imwe u ulike kutya Jesus okwa li a ilikana lwoikando mefiku laxuuninwa kombada yedu?

4 Lesha 1 Ovatessaloniki 5:17. Jesus okwa li a ilikana lwoikando ihapu mefiku laye laxuuninwa kombada yedu. Eshi a ulikila ovahongwa vaye nghee ve na okudimbuluka efyo laye, okwa li a ilikanena omungome nomaviinyu. (1 Kor. 11:23-25) Ofimbo ina dja po ponhele opo va li tava danene Opaasa, okwa li a ilikana pamwe novahongwa vaye. (Joh. 17:1-26) Eshi ye novahongwa va fika kuGetsemane oufiku oo, okwa li a ilikana lwoikando. (Mat. 26:36-39, 42, 44) Neendjovo daxuuninwa odo a popya fimbo ina fya okwe di popya monghedi yeilikano. (Luk. 23:46) Jesus okwa li a ilikana kuJehova kombinga yoshinima keshe sha ningwa monghalamwenyo yaye mefiku laye laxuuninwa kombada yedu.

5. Omolwashike ovayapostoli va li va kanifa ouladi?

5 Etomheno limwe eshi Jesus a dula okulididimikila eyeleko olo omolwaashi okwa kala e lineekela Xe nokwe shi ulika eshi a kala ta ilikana lwoikando. Shimwe vali, ovayapostoli ova li va dopa okudiinina okwiilikana oufiku oo. Oshidjemo, eshi efimbo leyeleko la fika ova li va kanifa ouladi. (Mat. 26:40, 41, 43, 45, 56) Ngeenge twa taalela omayeleko, ohatu ka kala ashike ovadiinini ngeenge otwa shikula oshihopaenenwa shaJesus nohatu “indile.” Oshike hatu dulu okwiilikana kombinga yasho?

6. Eitavelo ohali tu kwafele ngahelipi tu kale tu na ombili?

6 Ohatu dulu okwiilikana Jehova e ‘tu wedele eitavelo.’ (Luk. 17:5; Joh. 14:1) Otwa pumbwa eitavelo molwaashi Satana oha yeleke keshe umwe oo ta shikula Jesus. (Luk. 22:31) Ongahelipi eitavelo hali tu kwafele tu kale tu na ombili, nokuli nongeenge hatu ungaunga  nomaupyakadi a shikulafana? Ngeenge otwa ningi ngaashi hatu dulu opo tu finde eyeleko lonhumba, eitavelo otali ke tu kwafela tu li efele momake aJehova. Ohatu kala tu na ombili yokomutima noyopamadiladilo, molwaashi otwe lineekela kutya oku shii osho e na okuninga po shi dulife osho fye hatu dulu okuninga. — 1 Pet. 5:6, 7.

7. Oshike we lihonga mo mwaasho sha popiwa kuRobert?

7 Eilikano ohali tu kwafele tu kaleke po ombili yetu yopamadiladilo kashi na nee mbudi kutya otwa taalela omayeleko a tya ngahelipi. Diladila koshihopaenenwa shaRobert, omukulunhuongalo omudiinini oo e na omido 80 nasha paife. Okwa ti: “Omayele oo e li mOvafilippi 4:6, 7, okwa kwafela nge ndi lididimikile omayeleko mahapu monghalamwenyo yange. Onda li ndi na okuungaunga noupyakadi wopashimaliwa. Onda li nda kanifa oufembanghenda wokukala omukulunhuongalo oule wefimbo.” Oshike sha li sha kwafela Robert a kale e na ombili yokomutima? Okwa ti: “Ohandi ilikana diva shimha ashike nda hovele okulipula noisho. Onda itavela kutya eshi ngoo handi ilikana lwoikando ihapu, osho ngoo handi kala ndi na ombili.”

JESUS OKWA LI A UDIFA NOULADI

Ngeenge ohatu udifa, ohatu dulu okukala tu na ombili (Tala okatendo 8-10)

8. Ngaashi sha tumbulwa muJohannes 8:29, onetomheno vali lilipi Jesus a li e na ombili yokomutima?

8 Lesha Johannes 8:29. Jesus okwa li e na ombili yokomutima, nokuli naashi a li ta hepekwa, molwaashi okwa li e shii kutya ota hafifa Xe. Okwa li ha dulika, nongeenge sha li shidjuu kuye okudulika. Okwa li e hole Xe, nokwa li a tala ko oku mu longela ku li oshinima sha fimanenena monghalamwenyo yaye. Ofimbo  ine uya kombada yedu, okwa kala “omunongoelela” puKalunga. (Omayel. 8:30) Naashi a li kombada yedu, okwa li a honga nouladi vamwe kombinga yaXe. (Mat. 6:9; Joh. 5:17) Oilonga oyo oya li hai etele Jesus ehafo linene. — Joh. 4:34-36.

9. Ongahelipi okulonga nouladi moukalele haku tu kwafele tu kale tu na ombili yokomutima?

9 Ohatu dulu okuhopaenena Jesus mokukala hatu dulika kuJehova ‘nokukala ovaladi moilonga yomwene.’ (1 Kor. 15:58) Ngeenge otwa kala hatu ‘hongo nouladi’ moilonga yokuudifa, ohatu ka kala tu na etaleko liwa li na sha nomaupyakadi etu. (Oil. 18:5) Pashihopaenenwa, ovo hatu shakeneke moukalele luhapu ohava kala ve na omaupyakadi a kwata moiti ve tu dule. Ashike ngeenge ove lihongo okukala ve hole Jehova nokutula moilonga omayele aye, eenghalamwenyo davo ohadi xwepopala nohava kala va hafa. Efimbo keshe hatu mono eenghalamwenyo dovanhu tadi xwepopala, ohatu kala tu na elineekelo kutya Jehova ote tu file oshisho. Nelineekelo la tya ngaho ohali tu kwafele tu kale tu na ombili yokomutima. Omumwameme umwe oo a li e udite ehe na oshilonga nokwa polimana okwa mona kutya osho oshoshili. Okwa ti: “Ngeenge ndi li moukalele, ohandi dulu okupangela omaliudo ange nohandi kala nda hafa. Molwaashi ngeenge ndi li momapya, ohandi kala ndi udite nda ehena elela popepi naJehova.”

10. Oshike we lihonga mo mwaasho sha popiwa kuBrenda?

10 Diladila vali koshihopaenenwa shomumwameme Brenda. Ye nokamonakadona kaye ova li va kwatwa komukifi wa kwata moiti. Brenda oha kala mokatemba noke na naanaa eenghono. Omafimbo amwe oha udifa eumbo neumbo ngeenge ta dulu, ashike oha yandje unene oundombwedi mokushanga eenhumwafo. Okwa ti: “Shimha ashike nda diladila kutya omukifi oo ndi na itau dulu okupangwa mounyuni ou, ohandi yandje unene elitulemo koukalele. Ngeenge handi udifa ihandi diladila kombinga yoisho yange. Ohashi kwafele nge ndi yandje elitulemo mokukwafela ovo handi shakeneke moshitukulwa shetu. Osho ohashi dimbulukifa nge eteelelo olo ndi na li na sha nonakwiiwa.”

JESUS OKWA LI A TAMBULA KO EKWAFO LOOKAUME KAYE

Ngeenge ohatu endafana nookaume vawa, ohatu dulu okukala tu na ombili (Tala okatendo 11-15)

11-13. (a) Ongahelipi ovayapostoli nosho yo vamwe va ulika kutya ove li ookaume kaJesus vashili? (b) Ookaume kaJesus ova li ve mu kwafela a kale e udite ngahelipi?

11 Momukokomoko wefimbo olo Jesus a kala ta udifa, ovayapostoli vaye ovadiinini ova li va ulika kutya ove li ookaume kaye vashili. Ova li ookaume ovo Ombiibeli ya popya ya ti: ‘Ookaume ve dule ovamwaina ovalumenhu mokulineekelwa.’ (Omayel. 18:24) Jesus okwa li a lenga ookaume va tya ngaho. Pefimbo loukalele waye, kape na nande oumwe movamwaina vaye a li a itavela muye. (Joh. 7:3-5) Pomhito imwe, ovapambele vaye ova li nokuli tava diladila kutya otai eenghwengu. (Mark. 3:21) Mepingafano naasho, Jesus okwa li a lombwela ovayapostoli vaye ovadiinini moufiku oo wa tetekela efyo laye a ti: “Onye tuu ava mwa kala pwaame momayeleko ange.” — Luk. 22:28.

12 Ovayapostoli ova li hava nyemateke Jesus luhapu, ndele ka li a yandja elitulemo komapuko avo, ponhele yaasho, okwa li a mona kutya ove na eitavelo muye. (Mat. 26:40; Mark. 10:13, 14; Joh. 6:66-69) Moufiku waxuuninwa oo Jesus a kala pamwe novalumenhu ovadiinini ovo ofimbo ina dipawa, okwa li e va lombwela a ti: “Onde mu ifana ookaume, osheshi ashishe eshi nde shi uda muTate, onde shi mu shiivifila.” (Joh. 15:15) Nopehe na omalimbililo, ookaume kaJesus ova li ve mu twa  unene omukumo. Eshi va kwafela Jesus moukalele waye osha li she mu kwafela a kale a hafa unene. — Luk. 10:17, 21.

13 Kakele ashike kovayapostoli, Jesus okwa li e na vali ookaume vamwe, ovalumenhu novakainhu, ovo ve mu kwafela moilonga yokuudifa meenghedi tadi longo. Vamwe ova li ve mu shiva komaumbo avo, opo ve mu pe sha shokulya. (Luk. 10:38-42; Joh. 12:1, 2) Vamwe ova li va ya naye momalweendo nova tukulilafana naye oinima yavo. (Luk. 8:3) Jesus okwa li e na ookaume vawa molwaashi okwa li kaume muwa kuvo. Okwa li e va ningila oinima iwa noka li a teelela va ninge shihapu shi dulife pwaasho tava dulu. Nonande Jesus ka li omulunde, okwa li a lenga eyambidido lookaume kaye ovo ve li ovalunde. Nopehe na omalimbililo, ova li ve mu kwafela a kale e na ombili yokomutima.

14-15. Ongahelipi hatu dulu okumona ookaume vawa, nongahelipi tava dulu oku tu kwafela?

14 Ookaume vawa otave ke tu kwafela tu kale ovadiinini kuJehova. Onghedi ya denga mbada hatu dulu okukala tu na ookaume vawa omokukala nafye tu li kaume muwa. (Mat. 7:12) Pashihopaenenwa, Ombiibeli otai tu ladipike tu longife efimbo neenghono detu tu kwafele vamwe, unene tuu “eehepele.” (Ef. 4:28) Mbela ito dulu okudiladila umwe meongalo leni oo to dulu okukwafela? Mbela ito dulu oku ka landa ko koinima yaumwe oo ihadi mo meumbo omolwoukulupe, ile ouyahame? Mbela oto dulu okulongekidila oikulya oukwaneumbo umwe oo u na oupyakadi wopashimaliwa? Ngeenge ou shii okulongifa o-website yo-jw.org® nosho yo o-JW Library® app, mbela ito dulu okukwafela vamwe meongalo leni va kale have i longifa? Ngeenge otwa  kala hatu yandje elitulemo mokukwafela vamwe, ohatu ka mona ehafo linene. — Oil. 20:35.

15 Ookaume ketu otave ke tu yambidida ngeenge tu na omaupyakadi notave ke tu kwafela tu kale tu na ombili yokomutima. Ngaashi ashike Elihu a li a pwilikina eshi Job a li te mu lombwele oupyakadi waye, ookaume ketu otava ka pwilikina kufye ngeenge hatu va lombwele omaupyakadi etu. (Job 32:4) Katu na okuteelela ookaume ketu ve tu ningile ko omatokolo, ndele otashi ka kala pandunge okupwilikina komayele avo a kanghamena kOmbiibeli. (Omayel. 15:22) Ngaashi ashike ohamba David ya li ya tambula ko nelininipiko ekwafo lookaume kayo, inatu kwatwa kounhwa tuha tambule ko ekwafo olo ookaume ketu tave tu pe ngeenge otwe li pumbwa. (2 Sam. 17:27-29) Ookaume vawa va tya ngaho, ove li oshali ya dja kuJehova. — Jak. 1:17.

NGHEE HATU DULU OKUKALA NOMBILI

16. She likolelela kOvafilippi 4:6, 7, omonghedi imwe ilipi omo ashike hatu dulu okumona ombili? Shi yelifa.

16 Lesha Ovafilippi 4:6, 7Omolwashike Jehova e tu lombwela kutya ohatu ka mona ombili oyo ha yandje okupitila “muKristus Jesus”? Ohatu kala ashike tu na ombili yopamadiladilo noyokomutima, ngeenge otu shii notu na eitavelo monghandangala oyo Jesus ta dana. Pashihopaenenwa, omatimba etu aeshe otaa dulu okudimwa po okupitila mekuliloyambo laJesus. (1 Joh. 2:12) Oshinima sha tya ngaho ohashi tu hekeleke. Jesus, oo e li Ohamba yOuhamba waKalunga, ota ka kufa po oupyakadi aushe oo Satana nounyuni waye ve tu etela. (Jes. 65:17; 1 Joh. 3:8; Eh. 21:3, 4) Osho ohashi tu pe eteelelo litunhula. Nonande Jesus okwe tu pa oilonga idjuu, oku li pamwe nafye, te tu yambidida fiyo opexulilo lounyuni ou. (Mat. 28:19, 20) Osho ohashi tu pe ouladi. Epepelelo, eteelelo nouladi oyo oinima ya fimanenena twa pumbwa opo tu kale tu na ombili.

17. (a) Ongahelipi Omukriste ta dulu okukaleka po ombili yokomutima? (b) Ngaashi sha udanekwa muJohannes 16:33, ohatu ka dula okuninga shike?

17 Ongahelipi to dulu okukaleka po ombili yoye yopamadiladilo ngeenge owa shakeneke omayeleko a kwata moiti? Oto dulu oku i kaleka po, mokuninga oinima oyo Jesus a li a ninga. Shotete, ilikana, ndele to diinine okwiilikana. Oshitivali, dulika kuJehova nosho yo udifa nouladi nokuli nonande oshidjuu kwoove okuninga ngaho. Oshititatu, konga ekwafo kookaume koye ve ku kwafele eshi u li momayeleko. Nombili yaKalunga otai ka amena omadiladilo nomitima deni. Ngaashi Jesus, oto ka finda eyeleko keshe. — Lesha Johannes 16:33.

EIMBILO 41 Uda eilikano lange

^ par. 5 Atusheni otu na omaupyakadi oo hae shi ningifa shidjuu kufye okukala nombili. Oshitukulwa eshi, otashi kundafana oinima itatu oyo Jesus a li a ninga nosho yo oyo hatu dulu okuninga opo tu kale nombili, nonande ohatu lididimikile omayeleko a kwata moiti.