Inda koshikalimo

Inda koshikalimo

 OSHITUKULWA SHOKUKONAKONWA 37

Omolwashike tu na okudulika nehalo liwa kuJehova, nongahelipi tu na oku shi ninga?

Omolwashike tu na okudulika nehalo liwa kuJehova, nongahelipi tu na oku shi ninga?

‘Ohatu kala ngahelipi tuha dulike ngeno kuTate?’​— HEB. 12:9.

EIMBILO 9 Jehova oye Ohamba yetu

EXUKU LOSHITUKULWA *

1. Omolwashike tu na okukala hatu dulika kuJehova?

OTU na okukala hatu dulika * kuJehova molwaashi oye Omushiti wetu. E li Omushiti wetu, oku na oufemba woku tu tulila po omifikamhango. (Eh. 4:11) Etomheno limwe molwaashi tu na okudulika kuJehova, omolwaashi onghedi yaye yokupangela oya denga mbada. Mondjokonona yovanhu, opa kala ovo ve na eenghonopangelo. Mokuyelekanifa novapangeli ovo, Jehova oye omunongo a shiya ko, omunahole, omunanghenda nomunalukeno kuhe na vali. — Ex. 34:6; Rom. 16:27; 1 Joh. 4:8.

2. PavaHeberi 12:9-11, omolwashike tu na okudulika kuJehova?

2 Jehova ina hala tu dulike kuye molwaashi twe mu tila, ndele omolwaashi tu mu hole nomolwaashi twe mu tala ko e li Tate yetu omunahole. Paulus okwa popya monhumwafo oyo a shangela Ovaheberi kutya otu na ‘okudulika kuTate’ yetu molwaashi otashi tu “wapalele.” — Lesha Ovaheberi 12:9-11.

3. (a) Ongahelipi hatu dulu okuulika kutya ohatu dulika kuJehova? (b) Omapulo elipi hatu ka nyamukula?

3 Ohatu dulu okuulika kutya ohatu dulika kuJehova mokudulika moinima aishe nokuhenuka oikala yokulineekela meendunge detu vene. (Omayel. 3:5) Ngeenge otwa shiiva kombinga yomaukwatya aJehova a denga mbada, otashi ka kala shipu okudulika kuye. Omolwashike mbela? Omolwaashi omaukwatya oo oo hae mu linyengifa a ninge keshe shimwe. (Eps. 145:9) Ohatu ka kala tu hole Jehova neenghono ngeenge otwe lihongo kombinga yaye. Ngeenge otu mu hole shili, itatu ka pumbwa omusholondodo weemhango odo tadi tu lombwele osho tu na  okuninga naasho tuhe na okuninga. Ohatu kendabala okudiladila nokutala ko oinima ngaashi Jehova he i tale ko, nokuhenuka osho shii. (Eps. 97:10) Omafimbo amwe ohashi kala shidjuu okudulika kuJehova. Omolwashike mbela? Oshike ovakulunhuongalo, ooxe nosho yo ovadalakadi tava dulu okulihonga koshihopaenenwa sha ngoloneya Nehemia, shohamba David nosho yo shaMaria ina yaJesus? Oshitukulwa eshi otashi ka nyamukula omapulo oo.

OMOLWASHIKE OKUDULIKA KUJEHOVA TAKU DULU OKUKALA ESHONGO?

4-5. PavaRoma 7:21-23, omolwashike tashi dulu okukala eshongo okudulika kuJehova?

4 Etomheno limwe kutya omolwashike hashi kala shidjuu kufye okudulika kuJehova, ololo kutya atushe otwa fyuulula oulunde noinatu wanenena. Onghee otu na eamo lounashibofa. Konima eshi Adam naEva va tukulila Kalunga oshibofa, nova lya oshiimati osho va kelelwa, ova tota po omifikamhango davo vene. (Gen. 3:22) Kunena, ovanhu vahapu natango ihava dulika kuJehova nohava tokola kuvo vene osho sha puka naasho shi li mondjila.

5 Nokuli naavo ve shii Jehova nove mu hole ohava mono shidjuu okudulika kuye filufilu. Omuyapostoli Paulus naye okwa li a taalela eshongo olo. (Lesha Ovaroma 7:21-23.) Ngaashi Paulus, nafye otwa hala okuninga osho sha yuka momesho aJehova. Ndele otu na okutwikila okukondjifa eamo lokuninga osho sha puka.

6-7. Oshike vali hashi shi ningifa shidjuu kufye okudulika kuJehova? Yandja oshihopaenenwa.

6 Oshinima shimwe vali osho hashi shi ningifa shidjuu kufye okudulika kuJehova, oshosho kutya otwa nwefwa mo komudingonoko omo twa kulila. Omadiladilo ovanhu vahapu oku li omhinge nehalo laJehova. Onghee otu na okutwikila okukondjifa onghedi ya tya ngaho yokudiladila. Natu ka taleni koshihopaenenwa shimwe.

7 Moitukulwa imwe osha sha okufininika ovanyasha va lalakanene okukala noimaliwa ihapu. Omumwameme umwe wedina Mary * okwa li a taalela eshongo olo. Ofimbo ine lihonga kombinga yaJehova, okwa li ha fikola kuimwe yomeefikola odo da denga mbada moshilongo shavo. Ovapambele vaye ova li tave mu fininike a mone oilonga oyo hai futu nawa noku kale a fimanekwa kuvamwe. Naye osho a li a hala. Konima eshi e lihonga kombinga yaJehova, nokukala e mu hole okwa lundulula omalalakano aye. Ashike nande ongaho okwa ti: “Omafimbo amwe ohandi mono eemhito dokulonga oimaliwa ihapu, ndele ondi shi shii kutya osho otashi imbi nge okulongela Jehova ngaashi handi shi ningi paife. Omolweputuko lange, natango ohandi mono shidjuu okuhenuka eemhito odo. Onghee ohandi ilikana kuJehova a kwafele nge ndi kondjife eyeleko lokutambula ko oilonga oyo tai dulu okwiimba nge ndi mu longele.” — Mat. 6:24.

8. Oshike hatu ka kundafana paife?

8 Otashi tu etele ouwa ngeenge otwa kala hatu dulika kuJehova. Ndele ovo ve na eenghonopangelo, ngaashi ovakulunhuongalo, ooxe novadalakadi, ove na vali etomheno limwe lokushikula ewiliko laJehova, opo va dule okukwafela vamwe. Natu ka kundafaneni koihopaenenwa imwe yopaMbiibeli oyo tai tu hongo nghee tu na okulongifa eenghonopangelo monghedi oyo tai hafifa Jehova.

OSHO OVAKULUNHUONGALO TAVA DULU OKULIHONGA KUNEHEMIA

Ovakulunhuongalo tava kufa ombinga moilonga oyo tai longwa pOlupale lOuhamba, ngaashi ashike Nehemia a li a yambidida mokutungwa kwaJerusalem (Tala okatendo 9-11)) *

9. Nehemia okwa li a taalela omashongo elipi?

9 Jehova okwe lineekelela ovakulunhuongalo oshinakuwanifwa sha fimana shokufila oshisho oshiwana shaye. (1 Pet. 5:2)  Ovakulunhuongalo otava dulu okulihonga shihapu kunghee Nehemia a li a ungaunga noshiwana shaJehova. Nehemia okwa li e na eenghonopangelo dihapu e li ngoloneya waJuda. (Neh. 1:11; 2:7, 8; 5:14) Diladila komashongo amwe oo Nehemia a li a taalela. Okwa li a didilika kutya ovanhu ova li va nyateka otembeli nokava li tava yambidida Ovalevi pashimaliwa ngaashi sha popiwa mOmhango. Ovajuda ova li tava nyono omhango yEshabata, novalumenhu vamwe ova li va hombola ovakainhu ovanailongo. Ngoloneya Nehemia okwa li a ungaunga nonghalo oyo idjuu. — Neh. 13:4-30.

10. Nehemia okwa li a ungaunga ngahelipi nomashongo oo a li a taalela?

10 Nehemia ka li a longifa nai eenghonopangelo daye mokufininika ovanhu va landule omadiladilo aye. Ponhele yaasho okwa li a konga ewiliko okupitila meilikano, nokwa honga ovanhu Omhango yaJehova. (Neh. 1:4-10; 13:1-3) Nehemia okwa li yo a longa nelininipiko pamwe novamwaxe, mokukwafela okutunga ekuma laJerusalem. — Neh. 4:15.

11. Metwokumwe no 1 Ovatessaloniki 2:7, 8, ovakulunhuongalo ove na okuungaunga ngahelipi neongalo?

11 Ovakulunhuongalo otashi dulika itava ungaunga nomaupyakadi a fa aNehemia, ndele otava dulu oku mu hopaenena meenghedi dihapu. Pashihopaenenwa, ohava longo noudiinini opo va kwafele ovamwaxe. Ihave litale ko yo ve dule vamwe omolweenghonopangelo odo ve na. Ponhele yaasho, ohava ungaunga pahole noilyo yeongalo. (Lesha 1 Ovatessaloniki 2:7, 8.) Molwaashi ove lininipika nove hole ovanhu, ohava popi navo nonghenda. Andrew oo a kala omukulunhuongalo omido dihapu okwa ti: “Onda didilika kutya ngeenge omukulunhuongalo oku na onghenda nomhepo youkaume ohashi kumu omitima dovamwaxe. Omaukwatya oo ohae linyengifa oilyo yeongalo i longele kumwe novakulunhuongalo.” Tony oo naye a kala omukulunhuongalo omido dihapu okwa ti: “Ohandi kendabala okutula moilonga omayele oo taa hangwa mOvafilippi 2:3, nohandi longo noudiinini opo ndi  tale ko vamwe ve dule nge. Osho ohashi kwafele nge opo ndiha kale nda fa kanyamukulwa.”

12. Omolwashike sha fimana kovakulunhuongalo okukala ovalininipiki?

12 Ovakulunhuongalo ova pumbwa okukala ovalininipiki ngaashi ashike Jehova omulininipiki. Nonande Jehova oku li Omupangeli Munenenene meshito, oha “tale mokule” ‘nohepele ote i tumbu mo mondwi yedu.’ (Eps. 18:35; 113:6, 7) Kakele kaasho, Jehova oku tonde ovalinenepeki. — Omayel. 16:5.

13. Omolwashike omukulunhuongalo e na ‘okupangela elaka laye’?

13 Omukulunhuongalo oo ha dulika kuJehova oku na ‘okupangela elaka laye.’ Ngeenge hasho, otashi dulika a popye nai naumwe oo ine mu fimaneka. (Jak. 1:26; Gal. 5:14, 15) Andrew oo a popiwa metetekelo okwa ti: “Omafimbo amwe ohandi kala nda hala okunyamukula nai omumwatate ile omumwameme oo ndi wete kutya ina fimaneka nge ndi li omukulunhuongalo. Ashike onda dilonga koihopaenenwa yovalumenhu ovadiinini ovo va popiwa mOmbiibeli, oyo ya kwafela nge ndi lihonge oshilihongomwa sha fimana shi na sha nokukala omulininipiki.” Ovakulunhuongalo ohava ulike kutya ohava dulika kuJehova mokukala ovanahole, nokupopya nonghenda noilyo yeongalo, mwa kwatelwa ovakulunhuongalo vakwao. — Kol. 4:6.

OSHO OOXE TAVA DULU OKULIHONGA KOHAMBA DAVID

14. Jehova okwa yandja oshinakuwanifwa shilipi kooxe, nokwa teelela va ninge shike?

14 Jehova okwa nangeka po ooxe va kale omitwe domaukwaneumbo, nokwa teelela va deule nokuyandja outekuduliko kounona vavo. (1 Kor. 11:3; Ef. 6:4) Ndele ove na eenghonopangelo da ngabekwa, nove na oku ke lihokolola kuJehova oo epata keshe le mu lukilwa. (Ef. 3:14, 15) Ooxe ohava ulike kutya ohava dulika kuJehova mokulongifa eenghonopangelo davo monghedi oyo tai mu hafifa. Otava dulu okulihonga shihapu mokukonakona onghalamwenyo yohamba David.

Omailikano ooxe Ovakriste oku na okuulika kutya ovalininipiki (Tala okatendo 15-16) *

15. Omolwashike ooxe va pumbwa okukonakona oshihopaenenwa sha denga mbada shohamba David?

15 Jehova okwa li a nangeka po David a ninge omutwe woukwaneumbo waye nosho yo woshiwana ashishe shaIsrael. David okwa li e na eenghonopangelo dihapu e li ohamba. Omafimbo amwe okwa li a longifa nai eenghonopangelo daye nokwa li a ninga omapuko a kwata moiti. (2 Sam. 11:14, 15) Ndele okwa li a dulika kuJehova eshi a tambula ko outekuduliko. Okwa li a mbubulila Jehova omutima waye okupitila meilikano. Okwa li yo a ninga ngaashi ta dulu opo a tambule ko omayele aJehova. (Eps. 51:1-4) Kakele kaasho, okwa ulika  yo elininipiko eshi a tambula ko omayele mawa okudja kovalumenhu nokovakainhu. (1 Sam. 19:11, 12; 25:32, 33) David okwa li e lihonga komapuko aye nokwa li a pitifa komesho okulongela Jehova.

16. Oilihongomwa ilipi ooxe tava dulu okulihonga kuDavid?

16 Diladila koilihongomwa imwe oyo ooxe tava dulu okulihonga kohamba David: Ino longifa nai eenghonopangelo odo wa pewa kuJehova. Dimina omapuko oye nokutambula ko omayele avamwe a kanghamena kOmbiibeli. Ngeenge owa ningi ngaho, ovaneumbo loye otave ke ku fimaneka omolwelininipiko loye. Mbubulila Jehova omutima woye ngeenge to ilikana novaneumbo loye opo va mone kutya owe mu lineekela. Osho sha fimanenena, kala wa pitifa komesho okulongela Jehova. (Deut. 6:6-9) Oshihopaenenwa shoye shiwa, osho oshali ya denga mbada oyo to dulu okuyandja kovaneumbo loye.

OSHO OVADALAKADI TAVA DULU OKULIHONGA KUMARIA

17. Jehova okwa yandja oshinakuwanifwa shilipi kovadalakadi?

17 Jehova okwa pa ovadalakadi oshinakuwanifwa sha fimanenena moukwaneumbo, nokwe va pa eenghonopangelo dokuwilika ounona. (Omayel. 6:20) Onghee osho ovadalakadi hava popi nohava ningi otashi dulu okunwefa mo onghalamwenyo younona. (Omayel. 22:6) Didilika osho ovadalakadi tava dulu okulihonga kuMaria ina yaJesus.

18-19. Oshike ovadalakadi tava dulu okulihonga koshihopaenenwa shaMaria?

18 Maria okwa li e shii nawa omishangwa. Okwa li a fimaneka Jehova neenghono nokwa panga oukaume wopofingo naye. Okwa li ha dulika nehalo liwa kewiliko laJehova, nokuli nonande okwa li tashi pula a ninge omalunduluko monghalamwenyo yaye. — Luk. 1:35-38, 46-55.

Ngeenge omudalakadi okwa loloka, ile a udifwa nai oku na okukendabala a mana mo opo a ulikile oukwaneumbo waye ohole (Tala okatendo 19) *

19 Ovadalakadi otamu dulu okuhopaenena Maria meenghedi dihapu. Ngahelipi mbela? Shotete, omokukaleka po oukaume wopofingo naJehova okupitila mekonakonombiibeli nomeilikano lopaumwene. Oshitivali, omokuninga omalunduluko nehalo liwa opo mu hafife Jehova. Pashihopaenenwa, otashi dulika mwa tekulwa kovadali ovo hava handuka diva nohava hanyaukile ovana vavo. Otashi dulika mwa li hamu diladila kutya ei oyo onghedi ya denga mbada yokutekula ounona. Nokuli nokonima eshi mwe lihonga omifikamhango daJehova otashi dulika hamu mono shidjuu okukala mwa ngungumana nokulididimikila ounona, unene tuu ngeenge omwa loloka, ndele itave lihumbata nawa. (Ef. 4:31) Peemhito da tya ngaho, osha fimanenena okupula ekwafo kuJehova okupitila meilikano. Omudalakadi umwe  wedina Lydia okwa ti: “Omafimbo amwe ohandi ilikana nda mana mo opo ndiha popye nda handuka ngeenge omonamati wange ina dulika kwaame. Ohandi litete melaka omafimbo amwe, ndele handi ilikana momutima kuJehova a kwafele nge. Eilikano ohali kwafele nge ndi kale nda ngungumana.” — Eps. 37:5.

20. Omashongo elipi ovadalakadi vamwe va taalela, nongahelipi tava dulu oku a finda?

20 Ovadalakadi vamwe ohava mono shidjuu okuulikila ovana vavo ohole. (Tit. 2:3, 4) Ovadalakadi vamwe ova kulila momaukwaneumbo omo ovadali vehe na ekwatafano lopofingo novana vavo. Ngeenge owa putukila moukwaneumbo wa tya ngaho, ino endulula epuko lovadali voye. Omudalakadi oo ha dulika kuJehova oku na okulihonga okuulikila ovana vaye ohole. Otashi dulika shi kale shidjuu kuye a lundulule onghedi yaye yokudiladila, omaliudo neenghatu daye. Ashike otashi dulu okuningwa, notashi dulu oku mu etela ouwa noukwaneumbo waye.

TWIKILA OKUKALA HO DULIKA KUJEHOVA

21-22. Metwokumwe naJesaja 65:13, 14, omauwa elipi hatu mono ngeenge otwa kala hatu dulika kuJehova?

21 Ohamba David oya li i shii kutya oshi na ouwa okudulika kuJehova. Oya ti: “Omalombwelo Omwene okwa yuka, taa hafifa omutima; omhango yOmwene oi yela sheke, tai minikile omesho. Omupiya woye ote liefele yo okulondwelwa kudo; moku di diinina, otamu di ondjabi inene.” (Eps. 19:8, 11) Kunena otu wete eyooloko pokati kaavo hava dulika kuJehova naavo ihava tambula ko omayele aye opahole. Ovo hava dulika kuJehova otava ka “kuwilila ehafo lokomutima.” — Lesha Jesaja 65:13, 14.

22 Ngeenge ovakulunhuongalo, ooxe novadalakadi ova dulika kuJehova otava ka kala ve na onghalamwenyo ya denga mbada, omaukwaneumbo a hafa neongalo alishe otali ka kala la hangana. Osho sha fimanenena, otava ka hafifa omutima waJehova. (Omayel. 27:11) Osho itashi tu etele tuu ehafo linene!

EIMBILO 123 Natu kaleni ovadiinini kuKalunga

^ par. 5 Moshitukulwa eshi ohatu ka kundafana kutya omolwashike tu na okudulika kuJehova. Ohatu ka kundafana yo nghee ovakulunhuongalo, ooxe novadalakadi ve na okulongifa eenghonopangelo davo, nanghee tava dulu okulihonga koshihopaenenwa shangoloneya Nehemia, shohamba David noshaMaria ina yaJesus.

^ par. 1 OUTUMBULILO WA YELIFWA: Oshitya okudulika ohashi yandje eityo lii kwaao ta fininikwa a dulike kuumwe. Kakele kaasho, ovapiya vaJehova ova hoolola okudulika kuye, onghee kuvo oshitya okudulika kashi na eityo lii.

^ par. 7 Omadina oo hao ovanhu ovo lelalela.

^ par. 62 OMASHANGELO OMAFANO: Omukulunhuongalo ta longo pamwe nomonamati waye tava wapekulula Olupale lOuhamba, ngaashi ashike Nehemia a li a kwafela mokutungulula ekuma laJerusalem.

^ par. 64 OMASHANGELO OMAFANO: Omushamane ta ilikana kuJehova nelitulemo pamwe noukwaneumbo waye.

^ par. 66 OMASHANGELO OMAFANO: Okamati ka kala efimbo lihapu taka dana ou-game, ashike inaka mana oilonga yokofikola ile yomeumbo. Ina yako oo dja koilonga a loloka ote ka pe outekuduliko ina handuka noite ka hanyaukile.