Inda koshikalimo

Inda koshikalimo

 OSHITUKULWA SHOKUKONAKONWA 11

Mbela owa wana okuninginifwa?

Mbela owa wana okuninginifwa?

“Eninginifo olo tali mu xupififa kunena.” — 1 PET. 3:21.

EIMBILO 28 Panga oukaume naKalunga

EXUKU LOSHITUKULWA *

1. Oshike omunhu a pumbwa okuninga ofimbo ina hovela okutunga eumbo?

DILADILA shi na sha nomunhu oo a hala okutunga eumbo. Oha kala e shii kutya okwa hala eumbo la tya ngahelipi. Ndele mbela ota ka ya ashike diva kofitola nokulanda oitungifo nokuhovela okutunga? Hasho nandenande. Ofimbo ina ka landa, ope na oshinima shimwe osho e na okulipula nasho; oku na okuvalula kutya eumbo otali mu pula ingapi. Omolwashike mbela? Omolwaashi okwa pumbwa okushiiva ngeenge oku na oimaliwa ya wana okutunga. Ngeenge okwa valula nawa komesho yefimbo, otashi ke mu kwafela a manife okutunga eumbo laye.

2. Metwokumwe naLukas 14:27-30, oshike u na okulipula moule ofimbo ino ninginifwa?

2 Mbela ohole yoye yokuhola Jehova nosho yo olupandu oye ku linyengifa u kale wa hala okuninginifwa? Ngeenge osho, naave owa taalela onghalo ya fa yomunhu oo a hala okutunga eumbo. Omolwashike hatu tile ngaho? Natu taleni eendjovo daJesus odo di li muLukas 14:27-30. (Lesha.) Jesus okwa li ta yelifa kutya osha hala okutya shike okukala omuhongwa waye. Opo tu ninge ovashikuli vaye, otwa pumbwa okushiiva “oitungifo” oyo ya kwatelwa mo, sha hala okutya omashongo nomaliyambo. (Luk. 9:23-26; 12:51-53) Ofimbo ino ninginifwa, owa pumbwa okulipula moule kombinga yaasho sha kwatelwa mo. Opo nee oto ka kala we lilongekida okulongela Kalunga noudiinini u li Omukriste a ninginifwa.

3. Oshike hatu ka kundafana moshitukulwa eshi?

3 Mbela otashi shiiva ngoo okuninga omuhongwa waKristus a ninginifwa nonande ope na omashongo oo u na okulididimikila nosho yo oinima imwe oyo u na okufiya po? Heeno, otashi shiiva. Eninginifo otali tu yeululile omhito tu ka mone omanangeko noupuna ehe fi okuvalulwa paife nosho yo monakwiiwa. Natu ka kundafaneni omapulo amwe a fimana e na sha neninginifo. Ngeenge owa ningi ngaho otashi ke ku kwafela u nyamukule epulo e li kutya, “Mbela onda wana okuninginifwa?”

 OSHO WA PUMBWA OKUSHIIVA KOMBINGA YELIYAPULO NENINGINIFO

4. (a) Eliyapulo oshike? (b) Osha hala okutya shike ‘okulixupula’ ove mwene ngaashi sha tumbulwa muMateus 16:24?

4 Eliyapulo oshike? Owa pumbwa okuliyapulila Jehova ofimbo ino ninginifwa. Ngeenge to liyapulile Jehova, oho ilikana kuye nomutima aushe to mu lombwele kutya owa hala oku mu longela okukalamwenyo kwoye akushe. Ngeenge owe liyapulile Kalunga, oho ‘lixupula’ ove mwene. (Lesha Mateus 16:24.) Oshi li oufembanghenda munene eshi we liyandja kuJehova. (Rom. 14:8) Owe mu lombwela kutya okudja efiku olo, oto ka yandja elitulemo koku mu longela, ndele ku li vali mewiliko loye mwene. Eliyapulo oli li eano la kwata moiti olo wa udanekela Kalunga. Ashike Jehova ihe tu fininike tu ninge ngaho. Ndele ngeenge otwa ningi eudaneko, oha kala a teelela tu li wanife po. — Eps. 116:12, 14.

5. Eliyapulo ola pambafana ngahelipi neninginifo?

5 Eliyapulo ola pambafana ngahelipi neninginifo? Eliyapulo oli li oshinima shopaumwene, nohali ningwa pokati koye naJehova. Eninginifo ohali ningwa moipafi yovanhu, unene tuu poyoongalele ya kula naayo inini. Ngeenge to ninginifwa, oho ulike moipafi kutya owe liyapulila nale Jehova. * Eninginifo ohali ulike kutya ou hole Jehova Kalunga koye nomutima woye aushe, nomwenyo woye aushe, nomadiladilo oye aeshe neenghono doye adishe nosho yo kutya owa tokola oku mu longela fiyo alushe. — Mark. 12:30.

6-7. Metwokumwe 1 Petrus 3:18-22, omatomheno avali elipi taa ulike kutya eninginifo ola pumbiwa?

6 Mbela owa pumbwa ngoo okuninginifwa? Natu ka kundafaneni eendjovo odo di li mu 1 Petrus 3:18-22. (Lesha.) Ngaashi ashike onguluwato ya li ya ulika kutya Noa oku na eitavelo, eninginifo loye nalo otali ka ulika kutya owe liyapulila Jehova. Ndele mbela eninginifo ola pumbiwa ngoo? Heeno. Petrus okwa yelifa kutya omolwashike. Shotete, otali ku “xupififa.” Eninginifo otali tu xupififa ngeenge otwa katuka eenghatu twa mana mo opo tu ulike kutya otu na eitavelo muJesus nokwiitavela kutya okwe tu fila, a nyumukila meulu nopaife oku li “kolulyo laKalunga.”

7 Oshitivali, eninginifo ohali tu kwafele tu kale tu na “eliudo liwa.” Ohatu kala tu na ekwatafano le likalekelwa naKalunga ngeenge otwe mu liyapulile nokuninginifwa. Kalunga ohe tu dimine po omatimba etu molwaashi otwe lidilulula notwa itavela mekulilo. Onghee ohatu dulu okukala tu na eliudo la koshoka koshipala shaye.

8. Etokolo loye lokukala wa hala okuninginifwa oli na okukala la kanghamena koshike?

8 Etokolo loye lokukala wa hala okuninginifwa oli na okukala la kanghamena koshike? Eshi wa konakona Ombiibeli, owe lihonga okukala u hole Jehova, osho sha kwatela mo omaukwatya aye nosho yo eendjila daye. Osho we lihonga oshe ku kuma komutima noshe ku linyengifa u kale u mu hole neenghono. Etokolo loye lokukala wa hala okuninginifwa oli na okukala la kanghamena kohole yokuhola Jehova.

9. Osha hala okutya ngahelipi okuninginifwa medina laXe nolOmona nolomhepo iyapuki ngaashi tashi hangwa muMateus 28:19, 20?

9 Etokolo loye lokukala wa hala okuninginifwa oli na yo okukala la kanghamena koshili yOmbiibeli. Diladila kwaasho Jesus a popya eshi a yandja oshipango shokuninga ovanhu ovahongwa. (Lesha Mateus 28:19, 20.) Jesus okwa popya kutya ovo tava ninginifwa ove na okuninginifwa “medina laXe nolOmona nolomhepo iyapuki.” Mbela osho osha hala okutya shike? Ou na okukala wa tambula ko  nomutima aushe oshili yOmbiibeli i na sha naJehova; Omona waye, Jesus nosho yo omhepo iyapuki. Oshili ya tya ngaho oi na eenghono noya pumbwa okukuma omutima woye. (Heb. 4:12) Natu ka taleni kuimwe yomuyo.

10-11. Oshili ilipi we lihonga kombinga yaTate yetu womeulu?

10 Diladila nghee we lihonga oshili kombinga yaXo womeulu: Edina laye “oJehova,” noku li “Omukombadambada medu alishe” noye aeke “Kalunga kashili.” (Eps. 83:18; Jes. 37:16, NW) Oye Omushiti wetu ‘nexupifo oli li muye.’ (Eps. 3:8; 36:9) Okwa ninga elongekido opo e tu xupife moulunde nefyo noku tu pa eteelelo lomwenyo waalushe. (Joh. 17:3) Eliyapulo neninginifo ohali ku didilikifa mo kutya ou li Ondombwedi yaJehova. (Jes. 43:10-12) Oto ka kala oshitukulwa shoukwaneumbo waKalunga mounyuni aushe oo u na ovanhu ovo va lukilwa edina laye nohava shiivifile vamwe ve mu shiive. — Eps. 86:12.

11 Kashi fi tuu oufembanghenda okushiiva osho Ombiibeli tai hongo kombinga yaTate yetu womeulu! Ngeenge owa tambula ko oshili oyo i na ondilo, otashi ke ku linyengifa u liyapulile Jehova nokuninginifwa.

12-13. Oshili ilipi we lihonga nowa tambula ko kombinga yOmona waKalunga?

12 Owa li we linyenga ngahelipi eshi we lihonga oshili kombinga yOmona waKalunga? Jesus oye omunhu omutivali a fimanenena meshito alishe. Oye Omukulili wetu nokwe tu yandjela omwenyo waye. Ngeenge eenghatu detu oda ulike kutya otu na eitavelo mekuliloyambo, ohatu ka diminwa po omatimba etu, hatu ka kala tu na oukaume naKalunga noku ka mona omwenyo waalushe. (Joh. 3:16) Jesus oye Omupristeri wetu Munene. Okwa hala oku tu kwafela tu mone ouwa mekuliloyambo notu pange oukaume wopofingo naKalunga. (Heb. 4:15; 7:24, 25) E li Ohamba yOuhamba waKalunga, oye te ke shi ninga tashi shiiva opo Jehova a yapulife edina laYe, okuxulifa po oukolokoshi nokweeta omanangeko noupuna taa kalelele mOparadisa oyo i li popepi. (Mat. 6:9, 10; Eh. 11:15) Jesus oye omuhopaenenwa wetu, oo tu na okushikula. (1 Pet. 2:21) Okwe tu tulila po oshihopaenenwa eshi e liyandja a longe ehalo laKalunga. — Joh. 4:34.

13 Ngeenge otwa tambula ko osho Ombiibeli tai hongo kombinga yaJesus, ohatu ka kala tu mu hole neenghono. Ohole ya tya ngaho otai ke tu linyengifa tu longe ehalo laKalunga ngaashi Jesus a li a ninga. Naasho otashi ke tu ningifa tu kale twa hala okuliyapulila Jehova nokuninginifwa.

14-15. Oshili ilipi we lihonga kombinga yomhepo iyapuki nowe i tambula ko?

14 Owa li u udite ngahelipi eshi we lihonga oshili tai shikula kombinga yomhepo iyapuki? Omhepo iyapuki kai fi omunhu, ndele oi li eenghono daKalunga tadi longo. Jehova okwa li a longifa omhepo iyapuki i wilike ovo va shanga Ombiibeli, notai dulu oku tu kwafela tu ude ko osho twe lihonga mOmbiibeli noku shi tula moilonga. (Joh. 14:26; 2 Pet. 1:21) Jehova ohe tu pe “eenghono di dule dopaushitwe” okupitila muyo. (2 Kor. 4:7) Omhepo iyapuki ohai tu nghonopaleke tu udife onghundana iwa, tu kondjife omayeleko, tu ungaunge netekomukumo nokufinda omashongo. Ohai tu kwafele tu kulike omaukwatya mawa oo e li “oiimati yomhepo.” (Gal. 5:22) Kalunga oha yandje nehalo liwa omhepo iyapuki kwaavo ve mu lineekela nohave i pula va mana mo. — Luk. 11:13.

15 Itashi hekeleke tuu okushiiva kutya ovapiya vaKalunga ohava kwafelwa komhepo iyapuki opo ve mu longele! Ngeenge owa tambula ko oshili oyo we lihonga i na sha nomhepo iyapuki, otashi ke ku linyengifa u kale wa hala okuliyapulila Kalunga nokuninginifwa.

16. Oshike twe lihonga fiyo opapa moshitukulwa eshi?

 16 Ngeenge owa tokola okuliyapulila Kalunga nokuninginifwa, oto katuka onghatu ya fimana. Ngaashi twe lihonga, ou na okukala wa halelela okutambula ko oitungifo, oyo ya kwatela mo omashongo nomaliyambo. Ndele oto ka mona omanangeko noupuna mahapu e dule omaliyambo oo to ka ninga. Eninginifo otali ku xupififa notali ku kwafele u kale u na eliudo liwa koshipala shaKalunga. Etokolo loye lokuninginifwa oli na okukala la kanghamena kohole yokuhola Jehova Kalunga. Ou na yo okwiitavela nomutima aushe oshili oyo we lihonga i na sha naXe, nOmona nosho yo nomhepo iyapuki. Okutala kwaasho twe lihonga fiyo opapa, oto nyamukula ngahelipi epulo eli, “Mbela onda wana okuninginifwa?”

OSHO WA PUMBWA OKUNINGA FIMBO INO NINGINIFWA

17. Eenghatu dimwe dilipi wa pumbwa okukatuka opo u kale wa wana okuninginifwa?

17 Ngeenge ou wete kutya owa wana okuninginifwa, osha yela kutya owa katuka nale eenghatu opo u pameke ekwatafano loye naJehova. * Oto ka shiiva nawa Jehova naJesus ngeenge owa kala ho konakona Ombiibeli pandjikilile. Ou na eitavelo. (Heb. 11:6) Owe lineekela momaudaneko aJehova oo taa hangwa mOmbiibeli, nowa tomhwa kutya eitavelo mekuliloyambo laJesus otali dulu oku ku xupifa koulunde nefyo. Owe lidilulula koulunde; nowe livela ombedi omolwomapuko oye oo wa ninga, nowa pula Jehova e ku dimine po. Owa efa po elihumbato loye lii lonale, nowa hovela okukala mondjila oyo tai hafifa Kalunga. (Oil. 3:19) Owa halelela okulombwela vamwe kombinga yeitavelo loye. Owa wana okuninga omuudifi ina ninginifwa, nokuhovela okuudifa neongalo. (Mat. 24:14) Jehova oku udite etumba eshi wa katuka eenghatu da tya ngaho. Owa hafifa omutima waye. — Omayel. 27:11.

18. Oshike vali wa pumbwa okuninga ofimbo ino ninginifwa?

18 Fimbo ino ninginifwa, ope na oinima yonhumba oyo wa pumbwa okuninga. Ngaashi twe lihonga pehovelo, ou na okuliyapulila Kalunga. Ou na okukonga onhele ye limwenena nokwiilikana kuye wa mana mo to mu udanekele kutya oto ka longa ehalo laye. (1 Pet. 4:2) Opo nee to shiivifile omuunganeki wolutu lovakulunhuongalo kutya owa hala okuninginifwa. Ota ka pula ovakulunhuongalo vamwe va kundafane naave. Ino kala wa tila eshi tave uya okukundafana naave. Nopehe na omalimbililo, ovamwatate va tya ngaho ove ku shii nale nove ku hole. Otava ka kundafana naave omahovelohongo Ombiibeli oo we lihonga. Otava ka shilipaleka ngeenge ou udite ko omahongo a tya ngaho, nongeenge ou shii ngoo kutya osha fimana okuliyapulila Kalunga nokuninginifwa. Ngeenge ova dimine kutya owa wana, otave ke ku shiivifila kutya oto dulu okuninginifwa poshoongalele tashi landula ko.

 OSHO WA PUMBWA OKUNINGA KONIMA YENINGINIFO

19-20. Oshike wa pumbwa okuninga ngeenge owa ninginifwa, nou na oku shi ninga ngahelipi?

19 Ngeenge owa ninginifwa, oshike wa pumbwa okuninga? * Dimbuluka kutya eliyapulo olo eano olo Jehova a teelela u wanife po. Onghee ngeenge owa ninginifwa, ou na okukala metwokumwe neliyapulo loye. Ongahelipi to dulu okuninga ngaho?

20 Kala ho endafana neongalo. U li Omukriste a ninginifwa, paife ou li oshitukulwa ‘shovamwatate aveshe.’ (1 Pet. 2:17) Ovamwatate novamwameme meongalo ove li ovapambele voye vopamhepo. Ngeenge owa kala ho ongala pandjikilile, oto ka kala u na ekwatafano la kola navo. Kala ho lesha Eendjovo daKalunga nokudilonga kudo efiku keshe. (Eps. 1:1, 2) Ngeenge owa lesha eevelishe donhumba mOmbiibeli, konga efimbo u dilonge moule kombinga yado. Nokungaho, otadi ka hanga omutima woye. ‘Twikila okukala ho ilikana.’ (Mat. 26:41) Omailikano oye taa di komutima otae ke ku nanena popepi elela naJehova. Ombiibeli oya ti: “Kaleni tamu kongo tete Ouhamba.” (Mat. 6:33) Oto dulu okuninga ngaho ngeenge owa kala wa pitifa komesho oilonga yokuudifa. Ngeenge owa kala ho kufa ombinga moukalele pandjikilile, otashi ka pameka eitavelo loye, noto ka kwafela vamwe va mone ondjila oyo tai twala komwenyo waalushe. — 1 Tim. 4:16.

21. Eninginifo otali ku yeululile omhito ilipi?

21 Etokolo lokuliyapulila Jehova nosho yo okuninginifwa oli li etokolo la fimanenena olo to dulu okuninga. Oshoshili kutya osho osha kwatela mo oitungifo yopafaneko. Mbela oitungifo oyo oi na ngoo ondilo? Heeno! Omaupyakadi aeshe oo tashi dulika tu shakeneke mounyuni ou wa kulupa “oopakafimbo noinaa kwata moiti.” (2 Kor. 4:17) Mepingafano naasho, eninginifo otali ku kwafele u kale nonghalamwenyo tai ti sha paife, nosho yo “omwenyo washili” oo to ka mona. (1 Tim. 6:19) Onghee hano, diladila moule pamwe neilikano nokutala ngeenge oto dulu okunyamukula epulo eli, “Mbela onda wana okuninginifwa?”

EIMBILO 50 Eilikano lange leliyapulo

^ okat. 5 Mbela owa hala okuninginifwa? Ngeenge osho, oshitukulwa eshi oove sha nuninwa. Moshitukulwa eshi ohatu ka kundafana omapulo amwe a fimana. Omanyamukulo oye otae ke ku kwafela u mone ngeenge owa wana okuninginifwa.

^ okat. 19 Ngeenge ino mana ko natango okukonakona embo Oshike hatu lihongo mOmbiibeli? nosho yo Nghee to dulu okulikaleka mohole yaKalunga, ou na okutwikila oku a konakona nomuhongi woye fiyo osheshi we a mana ko aeshe.