Inda koshikalimo

Inda koshikalimo

 OSHITUKULWA SHOKUKONAKONWA 4

Ouvalelo uyapuki u li paunafangwa otau tu hongo shike kombinga yOhamba yomeulu

Ouvalelo uyapuki u li paunafangwa otau tu hongo shike kombinga yOhamba yomeulu

“Eshi olutu lange. . . olo ohonde yange, ohonde yehangano.” — MAT. 26:26-28.

EIMBILO 16 Tanga Jehova omolwOmona waye Omuvaekwa

EXUKU LOSHITUKULWA *

1-2. (a) Omolwashike Jesus e tu tulila po oshihopaenenwa shi li paunafangwa shi na nokudimbuluka efyo laye ? (b) Omaukwatya amwe aJesus elipi hatu ka konakona?

MBELA oto dulu okuyelifa kutya oshike hashi ningwa pEdimbuluko lokomudo lefyo laKristus? Vahapu vomufye ohatu dimbuluka oinima oyo hai ningwa po pOuvalelo wOmwene. Omolwashike? Omolwaashi ouvalelo ohau kala paunafangwa. Ashike oshiningwanima sha tya ngaho osha fimanenena. Onghee otashi dulika tu lipule kutya, ‘Omolwashike elongekido olo li li paunafangwa?’

2 Jesus okwa li ha hongo oshili ya fimana monghedi i li paunafangwa, ya yela noi shii okuudiwa ko pefimbo loukalele waye kombada yedu. (Mat. 7:28, 29) Sha faafana, okwe tu tulila po oshihopaenenwa shi li paunafangwa shi na sha nokudimbuluka * efyo laye. Natu ka konakoneni moule shi na sha nEdimbuluko olo nosho yo oinima imwe oyo Jesus a popya nokwa ninga. Osho otashi ke tu kwafela tu ude ko nawa elininipiko, ouladi nosho yo ohole yaJesus shi dulife nale, nohatu ke lihonga nghee hatu dulu oku mu hopaenena.

JESUS OMULININIPIKI

Omadidiliko oo ha longifwa pEdimbuluko, omungome nomaviinyu, otae tu dimbulukifa kutya Jesus okwa yandja omwenyo waye omolwetu nopaife oku li Ohamba tai pangele meulu (Tala okatendo 3-5)

3. Ngaashi sha ulikwa muMateus 26:26-28, Jesus okwa li a dika po ngahelipi Edimbuluko li li paunafangwa, nomungome uhe na onhafi nosho yo omaviinyu otai faneke shike?

3 Jesus okwa li novayapostoli vaye ovadiinini 11 eshi a dika po Edimbuluko lefyo laye. Okwa li a longifa osho sha li sha xupa po  pouvalelo wOpaasa, ndele ta ningi edimbuluko li li paunafangwa. (Lesha Mateus 26:26-28.) Okwa li ashike a longifa omungome uhe na onhafi nosho yo omaviinyu oo a li a xupa po. Jesus okwa li a lombwela ovayapostoli vaye kutya oinima oyo ivali otai faneke olutu laye la wanenena nosho yo ohonde yaye, oyo a li po ku ka yandja ponhele yavo. Ovayapostoli otashi dulika vaha li va kuminwa ouvalelo wa fimana oo wa li paunafangwa. Omolwashike mbela?

4. Ongahelipi omayele oo Jesus a li a pa Marta tae tu kwafele tu ude ko kutya omolwashike a li a tota po Edimbuluko li li paunafangwa?

4 Diladila kwaasho sha li sha ningwa po eemwedi donhumba da tetekela, momukokomoko womudo omutitatu woukalele waJesus, eshi a li a ka talela po ookaume kaye vopofingo Lasarus, Marta, naMaria. Fimbo ve li meumbo, Jesus okwa li a hovela oku va honga. Marta naye omo a li, ashike okwa li e lipyakidila nokulongekidila Jesus eendja dihapu. Eshi Jesus e shi didilika, okwa li a pukulula Marta nonghenda, te mu kwafele a mone kutya haalushe sha fimana okulongekida eendja dihapu. (Luk. 10:40-42) Konima ashike yeevili donhumba ofimbo Jesus ina fya, okwa li a tula moilonga omayele aye mwene. Okwa li a shilipaleka kutya Edimbuluko oli li paunafangwa. Osho otashi tu hongo shike kombinga yaJesus?

5. Ouvalelo oo u li paunafangwa otau ulike shike shi na sha naJesus, naasho otashi tu kumwe ngahelipi nOvafilippi 2:5-8?

5 Jesus okwa li omulininipiki mukeshe osho a popya nokwa ninga. Onghee itashi kumwifa eshi a li a ulika elininipiko moufiku waye wa xuuninwa kombada yedu. (Mat. 11:29) Okwa li e shii kutya oku li po ku ka yandja eyambo linenenene mondjokonona yovanhu nosho yo kutya Jehova ote ke mu nyumuna a ninge Ohamba meulu. Ashike nande ongaho, ka li a yukifa elitulemo la pitilila kuye mwene mokutota po Edimbuluko lefyo laye la tata la indula. Ponhele yaasho, okwa li a lombwela ovahongwa vaye kutya nava kale have mu dimbuluka lumwe momudo tave shi ningi monghedi i li paunafangwa. (Joh. 13:15; 1 Kor. 11:23-25) Ouvalelo u li paunafangwa notau wa palele owa ulika kutya Jesus ka li omulinenepeki. Otwa hafa molwaashi otu shii kutya elininipiko olo limwe lomomaukwatya a denga mbada Ohamba yetu yomeulu. — Lesha Ovafilippi 2:5-8.

6. Ongahelipi hatu dulu okuhopaenena elininipiko laJesus ngeenge twa taalela omayeleko?

6 Ongahelipi hatu dulu okuhopaenena elininipiko laJesus?  Ohatu dulu oku shi ninga mokupitifa ouwa wavamwe komesho. (Fil. 2:3, 4) Diladila koufiku waxuuninwa waJesus kombada yedu. Okwa li e shii kutya oku li po ku ka fya efyo linyanyalifi; ashike okwa li te lipula unene shi na sha novayapostoli vaye ovadiinini ovo va li tava ka nyika oluhodi omolwaye. Onghee okwa li a kala navo oufiku wa xuuninwa te va hongo, te va ladipike noku va hekeleka. (Joh. 14:25-31) Jesus okwa li a ulika kutya oku na ko nasha unene nonghalonawa yavamwe shi dulife yaye mwene. Kashi fi tuu oshihopaenenwa shiwa osho e tu tulila po!

JESUS OMULADI

7. Jesus okwa ulika ngahelipi ouladi konima eshi a dika po Ouvalelo wOmwene?

7 Konima eshi Jesus a dika po Ouvalelo wOmwene, okwa li a ulika ouladi. Ngahelipi mbela? Jesus okwa li a tokola okulonga ehalo laXe, nonande okwa li e shii kutya ota ka dipawa monghedi ififa ohoni onga omushekikalunga. (Mat. 26:65, 66; Luk. 22:41, 42) Okwa li a kanyatela oudiinini waye opo a fimanekife edina laJehova, noku yambidide ounamapangelo waJehova noku shi ningifa tashi shiiva opo ovanhu ovo ve lidilulula va ka mone omwenyo waalushe. Nopefimbo opo tuu opo, okwa li a kwafela ovashikuli vaye ve lilongekidile eenghalo odo va li tava ka taalela.

8. (a) Jesus okwa li a lombwela shike ovayapostoli vaye ovadiinini? (b) Ovahongwa vaJesus ova li va shikula ngahelipi oshihopaenenwa shaye shouladi konima yefyo laye?

8 Jesus okwa li yo a ulika ouladi mokuhadiladila koisho oyo tashi dulika a li e na nokwa li ta yandje elitulemo keemhumbwe dovayapostoli vaye ovadiinini. Ouvalelo oo u li paunafangwa owa li wa dikwa po konima eshi a lekela Judas. Owa li tau ka dimbulukifa ovo tava ka ninga ovashikuli vaJesus ovavaekwa omauwa etiko lohonde yaye nokukala kwavo ve li oshitukulwa  shehangano lipe. (1 Kor. 10:16, 17) Opo Jesus a kwafele ovashikuli vaye va kale ovadiinini nova ka kale pamwe naye meulu, okwa li e va lombwela osho ye naXe va teelela va ninge. (Joh. 15:12-15) Jesus okwa li yo a lombwela ovayapostoli omayeleko oo tava ka shakeneka. Eshi a li te va lombwele va shikule oshihopaenenwa shaye, okwe va ladipika va kale ‘ovaladi.’ (Joh. 16:1-4a, 33) Konima yomido dihapu, ovahongwa vaJesus ova li natango tava shikula oshihopaenenwa shaye sheliyambo noshokuulika ouladi. Nonande ova li ve na okumona oixuna, ova li hava yambididafana momayeleko avo a yoolokafana. — Heb. 10:33, 34.

9. Ongahelipi hatu dulu okuhopaenena Jesus mokuulika ouladi?

9 Kunena, ohatu shikula oshihopaenenwa shaJesus shokuulika ouladi. Pashihopaenenwa, ohashi pula ouladi okuyambidida ovamwatate ovo tava hepekelwa eitavelo lavo. Omafimbo amwe, ovamwatate otashi dulika va tulwe modolongo shihe li pauyuki. Ngeenge osho osha ningwa, natu ninge ngaashi hatu dulu, mwa kwatela oku va popila. (Fil. 1:14; Heb. 13:19) Onghedi imwe hatu dulu okuulika ouladi omokutwikila okuudifa “nouladi.” (Oil. 14:3) Ngaashi Jesus, otwa tokola okuudifa etumwalaka lOuhamba, nokuli nonande ovanhu otashi dulika tave tu pataneke noku tu hepeka. Ashike omafimbo amwe, otashi dulika tu kale tuhe na ouladi. Oshike tu na okuninga po?

10. Oshike tu na okuninga moivike oyo tai tetekele Edimbuluko, nomolwashike?

10 Ngeenge otwa kala hatu diladila keteelelo olo tu na omolwekuliloyambo, ohatu ka kala tu na ouladi. (Joh. 3:16; Ef. 1:7) Moivike oyo tai tetekele Edimbuluko, otu na omhito ye likalekelwa yokukulika olupandu letu li na sha nekulilo. Pefimbo olo, kala ho lesha elesho lOmbiibeli shi na sha nEdimbuluko nokudilonga pamwe neilikano koiningwanima oyo ya ningwa pefyo laJesus. Ngeenge twa ongala  pefimbo lOuvalelo wOmwene, ohatu udu ko filufilu efimano lomadidiliko Edimbuluko nosho yo eyambo le likalekelwa olo taa faneke. Ngeenge otwa udu ko osho Jesus naJehova ve tu ningila nanghee hashi tu etele ouwa nosho yo vamwe, eteelelo letu li na sha nonakwiiwa otali ka kala la twa notashi ke tu linyengifa tu lididimike nouladi fiyo okexulilo. — Heb. 12:3.

11-12. Fiyo opapa otwe lihonga shike?

11 Fiyo opapa otwe lihonga kutya Ouvalelo womwene itau tu dimbulukifa ashike ondilo yekulilo, ndele nomaukwatya yo a denga mbada aJesus, elininipiko nosho yo ouladi. Otwa pandula eshi tu shii kutya Jesus e li Omupristeri Omukulunhu meulu ota twikile okuulika omaukwatya oo, noha ilikana noponhele yetu. (Heb. 7:24, 25) Opo tu ulike olupandu tali di komutima, otu na okudimbuluka efyo laJesus ngaashi naanaa a popya. (Luk. 22:19, 20) Ohatu ningi ngaho mefiku olo tali tu kumwe nomafiku 14 Nisan, efiku la fimanenena momudo.   

12 Ohatu dulu okulihonga oukwatya umwe oo we linyengifa Jesus a fye ponhele yetu kOuvalelo wOmwene oo u li paunafangwa. Eshi a li kombada yedu okwa li e shiivikile oukwatya oo. Oukwatya oo oulipi?

JESUS OMUNAHOLE

13. Johannes 15:9 na 1 Johannes 4:8-10 ova ulika ngahelipi kutya Jehova naJesus ove tu hole, noolyelye hava mono ouwa mohole yavo?

13 Jesus okwe tu ulikila filufilu ohole ya fa yaJehova yomoule mwaashishe osho a ninga. (Lesha Johannes 15:9; 1 Johannes 4:8-10.) Komesho yaaishe, Jesus okwa li e linyengifwa a yandje omwenyo waye nehalo liwa ponhele yetu. Kutya nee otu li ovavaekwa ile “eedi” dimwe, ohatu mono ouwa mohole oyo Jehova nosho yo Omona waye ve tu ulikila okupitila meyambo olo. (Joh. 10:16; 1 Joh. 2:2) Diladila yo koinima oyo hai longifwa pEdimbuluko, ohai ulike ohole yaJesus nosho yo okunakonasha novahongwa vaye. Ngahelipi mbela?

Jesus okwa dika po pahole Edimbuluko li li paunafangwa opo li dimbulukiwe oule womido dihapu nomeenghalo da yoolokafana (Tala okatendo 14-16) *

14. Omonghedi ilipi Jesus a ulikila ovahongwa vaye ovavaekwa ohole?

14 Jesus okwa ulikila ovahongwa vaye ovavaekwa ohole eshi a dika po ouvalelo u li paunafangwa, ponhele yoku va pula va kale tava ningi oinima ya kitakana. Ovavaekwa ovo ova li ve na okudana Edimbuluko omudo keshe, kashi na nee mbudi kutya ove li meenghalo da yoolokafana, mwa kwatelwa okutulwa modolongo. (Eh. 2:10) Mbela ova li ngoo va dulika kuJesus? Heeno.

15-16. Nonande vamwe ova li meenghalo didjuu, ongahelipi va dula okukala pOuvalelo wOmwene?

15 Okudja mefelemudo lotete fiyo okunena, Ovakriste vashili ohava ningi eenghendabala va dimbuluke efyo laJesus. Ohava ningi ngaashi tava dulu mokushikula omulandu u na sha nOuvalelo wOmwene nonande omafimbo amwe ove li meenghalo didjuu. Didilika oihopaenenwa tai shikula. Eshi omumwatate Harold King a li oye aeke mokanduda kodolongo moChina okwa li e na okukonga ondunge opo a dane Edimbuluko. Okwa li a longekida meholeko omadidiliko oo haa longifwa pEdimbuluko a longifa oinima oyo a li e na. Okwa li yo a valula omafiku noukeka opo a mone kutya Edimbuluko otali ka kala ko naini. Eshi Edimbuluko la fika, okwa li a imba, a ilikana ndele ta yandje oshipopiwa e li oye aeke mokanduda kodolongo.

16 Apa otapa shikula oshihopaenenwa shimwe vali. Ongudu yovamwameme ovo va li va tulwa modolongo mokamba yeenghwate ova li va tula eemwenyo davo moshiponga opo va ka kale pOuvalelo wOmwene. Molwaashi oinima oyo hai longifwa poshiningwanima osho oi li paunafangwa, ova li va dula okudana Edimbuluko meholeko. Ova ti: “Otwa li twa yala okataafula nelapi litoka, ndele hatu tenheke ko  omaviinyu nomungome notwa kala ofika twe ka dingilila. Otwa li twa tema okalexita ponhele yeelamba dolusheno opo tuha monike. . . Otwa li twa diinina eano letu olo twa udanekela Tate yetu tu longife eenghono detu tu yukipalife edina laye liyapuki.” Kava li tuu va ulika eitavelo la pama! Jesus ina ulika tuu ohole eshi e shi ninga tashi shiiva opo tu dane Edimbuluko nokuli nonande otu li meenghalo didjuu!

17. Omapulo elipi tashi dulika tu lipule?

17 Eshi Edimbuluko tali ehene popepi, oshiwa okulipula omapulo taa shikula: ‘Ongahelipi handi dulu okuhopaenena Jesus mokuulika ohole? Mbela onda pitifa komesho eemhumbwe dovaitaveli vakwetu shi dulife dange mwene? Mbela onda teelela ovamwatate novamwameme va pe nge shihapu shi dulife pwaasho tava dulu, ile ondi shii ngoo omangabeko avo?’ Natu hopaenene alushe Jesus “nokufilafana onghenda.” — 1 Pet. 3:8.

KALEKA OILIHONGOMWA EI MOMADILADILO OYE

18-19. (a) Oushili ulipi hatu dulu okukala tu na? (b) Owa tokola okuninga shike?

18 Edimbuluko lefyo laJesus itali kalelele. Eshi Jesus te ke “uya” pefimbo loudjuu munene, ota ka ongela ko “ovahoololwa” vaye ovo va xupa ko ndele te va twala meulu, nEdimbuluko itali ka danwa vali. — 1 Kor. 11:26; Mat. 24:31.

19 Nokonima eshi Edimbuluko tali ka xula po filufilu, ohatu dulu okukala noushili kutya oshiwana shaJehova otashi ka dimbuluka nehafo onghedi i li paunafangwa omo la li hali danwa nonokutya ola li la holola omaukwatya aJesus ngaashi elininipiko, ouladi nohole. Pefimbo opo, ovo va li hava kala pouvalelo oo wa denga mbada otava ka popya kombinga yao, opo ovo tava ka kala nomwenyo pefimbo opo va mone mo ouwa. Ashike opo tu mone mo ouwa paife mouvalelo oo, natu kale twa tokola okuhopaenena elininipiko, ouladi nosho yo ohole yaJesus. Ngeenge otwa ningi ngaho, ohatu ka kala noushili kutya Jehova ote ke tu pa ondjabi. — 2 Pet. 1:10, 11.

EIMBILO 13 Kristus, omuhopaenenwa wetu

^ par. 5 Mafiku ohatu ka kala pOuvalelo wOmwene tu dimbuluke efyo laJesus Kristus. Ouvalelo oo u li paunafangwa otau tu hongo shihapu shi na sha nelininipiko, ouladi nosho yo ohole yaJesus. Moshitukulwa eshi ohatu ka kundafana nghee hatu dulu okuhopaenena omaukwatya e na ondilo oo a li a ulika.

^ par. 2 OUTUMBULILO WA YELIFWA: Okudimbuluka otashi ti kutya okuninga oshinima she likalekelwa nelalakano lokudimbuluka ile okufimaneka oshiningwanima sha fimana ile omunhu.

^ par. 56 OMASHANGELO OMAFANO: Omafano taa ulike ovapiya ovadiinini tava dana Edimbuluko meongalo lomefelemudo lotete; mo 1800 nasha; mokamba yeenghwate yaNazi; nosho yo pefimbo letu, ve li mOlupale lOhamba moSouth America pefimbo lokwenye.