Inda koshikalimo

Inda koshikalimo

“Oye ota pe ava va loloka ouladi”

“Oye ota pe ava va loloka ouladi”

Omushangwa wetu womudo 2018: “Ovo hava teelele Omwene, otava pewa eenghono dipe.” — JES. 40:31.

OMAIMBILO: 3, 47

1. Otu na okuungaunga nomaupyakadi elipi, naJehova oku na etomheno lilipi lokuhafela ovapiya vaye ovadiinini? (Tala efano pehovelo loshitukulwa.)

NGAASHI u shi shii, onghalamwenyo monghalelo ei yoinima oi na omaupyakadi mahapu. Ovamwatate novamwameme vahapu otave lididimikile ouyahame wa kwata moiti. Nonande vamwe ove li nawa, otava kwafele ovapambele ovanamido. Natango vamwe otava kendabala va kwafele ovapambele noipumbiwa yakwalukeshe, ndele hanoinima yondilo. Otu shi shii kutya vahapu otava ungaunga nomaupyakadi a tya ngaho e dulife pulimwe poshikando. Osho otashi pula efimbo lihapu, eenghono dopamaliudo nosho yo oshimaliwa shihapu. Onghee hano, elineekelo loye momaudaneko aKalunga oli li eitavelo ihali tengauka li na sha nonakwiiwa. Osho itashi hafifa tuu Jehova!

2. Etwomukumo lilipi hatu hange muJesaja 40:29, nepuko lilipi la kwata moiti hatu dulu okuninga?

2 Mbela omafimbo amwe oho kala u udite kutya omafininiko ounyuni okwe ku ngabeka? Ngeenge osho, haave auke. Ombiibeli oya ulika kutya ovapiya ovadiinini vopefimbo lonale luhapu ova li hava kala ve udite kutya itava dulu okutwikila okulongela Kalunga. (1 Eeh. 19:4; Job 7:7) Ashike ponhele yokusholola, ova li va pula  Jehova e va pe eenghono. Kava li va teka omukumo, molwaashi Kalunga ketu oha “pe ava va loloka ouladi.” (Jes. 40:29) Shinyikifa oluhodi, vamwe vomoshiwana shaKalunga shopefimbo letu ova fika pexulifodiladilo kutya onghedi iwa to dulu okuungaunga nomafininiko onghalamwenyo ‘okufiya po oshili oule wokafimbo,’ ngaashi hava ti kutya oilonga yetu yopaKriste oi li omutengi ponhele yokukala enangeko noupuna. Onghee ohava xulifa po okulesha Eendjovo daKalunga, okuya kokwoongala nosho yo okukufa ombinga moukalele, ngaashi ashike Satana a hala va ninge.

3. (a) Ongahelipi hatu dulu okufinda elalakano laSatana loku tu nghundipaleka? (b) Oshike hatu ka kundafana moshitukulwa eshi?

3 Ondiaboli oi shi shii nawa kutya okukufa ombinga pauyadi moilonga yopaKriste otaku dulu oku tu pameka, noinai hala tu kale twa pama. Ngeenge ou udite kutya owa nghundipala palutu nopamaliudo, ino liteeka po Jehova. Ehena popepi elela naye, osheshi ‘ote ku yambidida, note ku pameke.’ (1 Pet. 5:10; Jak. 4:8) Moshitukulwa eshi, ohatu ka kundafana eenghalo mbali odo tadi dulu oku tu efifa po okulongela Kalunga, nohatu ka kundafana nghee okutula moilonga omafinamhango Ombiibeli taku dulu oku tu kwafela tu lididimike. Natu ka yandje elitulemo kunghee Jehova ta dulu oku tu pameka, ngaashi sha ulikwa muJesaja 40:26-31.

OVO HAVA TEELELE JEHOVA, OTAVA PEWA EENGHONO DIPE

4. Oshike hatu lihongo muJesaja 40:26?

4 Lesha Jesaja 40:26. Kape na nande omunhu umwe a dula okuvala eenyofi adishe odo dili mevalelwa. Ovanongononi ova itavela kutya omuhalavili wetu, oo hau ifanwa Milky way, ou na eenyofi omabiliyona 400. Ashike, Jehova okwa luka onyofi keshe edina. Osho otashi tu hongo shike? Ngeenge Jehova oku na ko nasha noishitwa oyo ihe na omwenyo, diladila kunghee e ku uditile ove ou ho mu longele, hamolwaashi wa fininikwa u shi ninge, ndele osheshi u mu hole. (Eps. 19:1, 3, 14) Tate yetu oku ku shii nawanawa. Okwa vala yo ‘eexwiki doye adishe dokomutwe.’ (Mat. 10:30) Omupsalme okwe tu shilipaleka kutya: “Omafiku ovayuki Omwene oku a shii.” (Eps. 37:18) Oku wete omayeleko aeshe oo to shakeneke nota dulu oku ku pa eenghono u lididimikile keshe limwe.

5. Ongahelipi hatu dulu okukala noushili kutya Jehova ota dulu oku tu pameka?

5 Lesha Jesaja 40:28. Jehova oye Odjo yeenghono dinenenene. Pashihopaenenwa, diladila keenghono odo ha yandje ketango. Omunongononi umwe, David Bodanis, okwa ti: “Ondjudo yoihovelitungifi oyo etango letu hali topifa mosekonde keshe oi fike peeboma dolute omabiliyona.” Natango omunongononi umwe okwa ti kutya, “eenghono odo hadi yandjwa ketango mosekonde imwe otadi dulu okuwanifa po eemhumbwe dovanhu oule womido 200 000.” Mbela Jehova oo ha yandje eenghono ketango ota nyengwa oku tu pa eenghono odo twa pumbwa opo tu lididimikile oupyakadi keshe?

6. Omeityo lilipi ondjoko yaJesus iwa, naasho oshe tu kuma ngahelipi?

6 Lesha Jesaja 40:29. Okulongela Jehova ohaku tu etele ehafo linene. Jesus okwa lombwela ovahongwa vaye a ti: “Litwikeni ondjoko yange.” Okwa weda ko a ti: “Tamu monene eemwenyo deni etulumuko. Osheshi ondjoko yange oiwa nomutengi wange omupu.” (Mat. 11:28-30) Eendjovo odo kadi fi tuu doshili! Omafimbo amwe otashi dulika hatu kala twa loloka ngeenge hatu i kokwoongala ile hatu kufa ombinga moukalele. Ndele mbela ohatu kala tu udite ngahelipi ngeenge hatu aluka? Oho kala wa pepelelwa nowe lilongekida okutaalela omashongo onghalamwenyo. Ondjoko yaJesus oiwa shili.

7. Hokolola oshimoniwa osho tashi holola oushili oo u li muMateus 11:28-30.

 7 Omumwameme umwe, oo hatu mu luku Kayla, okwa kala e na omukifi weloloko, wepolimano nomutwe woshipwataula. Omafimbo amwe oha mono shidjuu okuya kokwoongala. Ashike, konima eshi a ninga eenghendabala a ye kokwoongala kwomoipafi, okwa ti: “Oshipopiwa osha li tashi popi kombinga yetekomukumo. Ouyelele owa li wa yandjwa nonghenda nosho yo noku na ko nasha, nonda li nda lila. Onda li nda dimbulukifwa kutya onda pumbwa okukala handi kala pokwoongala keshe.” Ka li tuu a hafa eshi a ninga eenghendabala a ye kokwoongala oko!

8, 9. Omuyapostoli Paulus okwa li a hala okutya shike eshi a ti: “Ngeenge ondi li oshingone, aame omunaenghono”?

8 Lesha Jesaja 40:30. Kashi na nee mbudi kutya otu na ounongo u fike peni, itatu dulu okupondola sha kufye vene molwaashi otwa ngabekwa. Osho oshilihongomwa kufye atushe. Nonande omuyapostoli Paulus okwa li omulumenhu ha pondola, okwa li e na omangabeko oo hae mu imbi a longe osho a hala okulonga. Eshi a li a lombwela Kalunga osho a li te lipula nasho, okwe mu nyamukula a ti: “Eenghono dange otadi wanenene pombada omoungone.” Paulus okwa li a uda ko nawa oshitwa. Okwa xulifa a ti: “Ngeenge ondi li oshingone, aame omunaenghono.” (2 Kor. 12:7-10) Mbela okwa li a hala okutya shike eshi a ti ngaho?

9 Paulus okwa li a mona kutya kali ta dulu okuninga shihapu nopehe na ekwafo laKalunga. Omhepo iyapuki yaKalunga oya li tai dulu okupa Paulus eenghono odo a li a pumbwa. Hasho ashike osho, omhepo yaKalunga oya li vali ye mu nghonopaleka opo a longe oilonga oyo a li ita dulu okulonga keenghono daye mwene. Osho otashi dulu yo oku tu ningilwa. Ohatu ka kala twa pama shili, ngeenge eenghono odo tu na oda dja kuJehova.

10. Ongahelipi Jehova a li a kwafela David a ungaunge nomashongo oo a li a taalela?

10 Omupsalme David okwa li ha mono luhapu eenghono domhepo iyapuki yaKalunga. Okwa imba a ti: “Heeno, ngeenge ndi li pamwe naave, ohandi totele ongudu yoimhulu; pamwe naKalunga kange ohandi nhuka engholo.” (Eps. 18:29) Otwa pumbwa ekwafo laJehova, molwaashi ope na omaupyakadi amwe oo itatu dulu okukandula po keenghono detu vene.

11. Yelifa nghee omhepo iyapuki hai dana onghandangala moku tu kwafela tu ungaunge nomaupyakadi.

11 Lesha Jesaja 40:31. Onhwa itai dulu okutuka i ye moule nokutelaana momhepo oshinano shile keenghono dayo vene. Ohai kwafelwa komhepo ipyu oyo tai di kombada yedu, nokungaho ohashi i kwafele i xupife eenghono dayo. Onghee hano, ngeenge owa taalela oshilonga shidjuu, dimbulukwa onhwa. Ilikana Jehova e ku pe “eenghono” okupitila ‘momupopili, omhepo iyapuki.’ (Joh. 14:26) Lao linene, ohatu dulu oku i mona efimbo keshe twe i pumbwa. Otashi dulika tu kale twa pumbwa unene ekwafo laKalunga ngeenge opa holoka okuhaudafana pokati ketu noshilyo sheongalo. Omolwashike hapa holoka eenghalo da tya ngaho?

12, 13. (a) Omolwashike hapa holoka omaupyakadi pokati kOvakriste? (b) Ehokololo laJosef otali tu hongo shike kombinga yaJehova?

12 Molwaashi inatu wanenena, ohapa holoka omaupyakadi pokati ketu navamwe. Ope na omafimbo amwe hatu udifwa nai keendjovo ile keenghatu dovaitaveli vakwetu, ile va udifwe nai ku detu. Osho otashi dulu okukala eyeleko la kwata moiti. Ngaashi omayeleko akwao, Jehova ohe tu pitike tu ulike oudiinini wetu mokulihonga okulonga moukumwe novalumenhu novakainhu ovo ve mu liyapulila noku va hole, nonande inava wanenena.

Jehova kali a efa nande Josef; noite ke ku efa (Tala okatendo 13)

13 Ngaashi sha ulikwa mehokololo laJosef, Jehova iha kelele ovapiya vaye vaha yelekwe. Fimbo Josef a li omunyasha, okwa li a landifwa  po moupika kovamwaxe ovo va li ve mu twila ondubo nokwa li a twalwa kuEgipti. (Gen. 37:28) Jehova okwa li a mona ashishe osho sha ningwa po, nokwa li a nyika oluhodi eshi a mona kaume kaye, Josef omuyuki, a li ta ungaungiwa naye. Ashike kali a ya mo olunyala. Lwanima eshi Josef a li a lundilwa kutya okwa li ta kendabala okukwata keenghono omukulukadi waPotifar ndele ta tulwa modolongo, Jehova kali natango a ya mo olunyala. Mbela Kalunga okwa li a ekelashi Josef? Mepingafano naasho, “Keshe eshi sha longwa [kuJosef] Omwene okwe shi nangeka noupuna.” — Gen. 39:21-23.

14. Omauwa elipi opamhepo noopalutu hatu dulu okumona ngeenge otwa “efa” ehandu?

14 Apa ota pa shikula vali oshihopaenenwa shimwe. Ovanhu vamwe ova kala tava ungaungiwa navo nonyanya ngaashi David. Ashike, kaume kaKalunga oo kali a efa onghone i kule muye. Ponhele yaasho, okwa shanga a ti: “Efa ehandu, u dje mo monya. Ino mbilingwa; opo uha longe owii.” (Eps. 37:8) Etomheno la fimana ‘lokweefa’ ehandu olo okuhopaenena Jehova, oo “ite tu ningile eshi sha yeleka omatimba etu.” (Eps. 103:10) Ashike ope na natango omauwa amwe ‘okweefa’ ehandu. Ehandu otali dulu okweetifa omaupyakadi opalutu ngaashi ohonde ya londa nosho yo omaudu amwe vali. Otali dulu okukuma exuli nosho yo ondabalamba notali dulu yo okweetifa po omaupyakadi okomandjadja. Ngeenge twa handuka, haalushe hatu diladila pandunge. Nomafimbo amwe okukala twa handuka ohashi tu kaleke twa polimana oule wefimbo lonhumba. Mepingafano naasho, Ombiibeli oya ti: “Omutima u nombili, oo omwenyo wombelela.” (Omayel. 14:30) Ongahelipi to dulu okuungaunga nomaliudo mai nokulikola omumwaxo? Ohatu dulu okupondola mokutula moilonga omayele Ombiibeli.

NGEENGE TWA UDIFWA NAI KOVAMWATATE

15, 16. Ongahelipi hatu dulu okupopya naumwe oo e tu udifa nai?

15 Lesha Ovaefeso 4:26. Ihashi tu kumwifa ngeenge hatu lididimikile omahepeko oo hae tu dilile mounyuni. Ashike ngeenge omwiitaveli mukwetu ile oshilyo shimwe shomoukwaneumbo wetu osha popi ile sha ninga sha osho she tu udifa nai unene, otashi dulika tu kale twa nyemata. Natu tye nee ngeno itatu dulu okudimbwa oshinima osho sha ningwa po. Mbela ohatu ka kala twa kwata onghone oule womido? Ile ohatu ka shikula omayele Ombiibeli opandunge opo tu pongolole po diva omaupyakadi? Ngeenge otwa efa pa pite efimbo lile inatu ungaunga nonghalo oyo, osho ngoo tashi ka kala shidjuu kufye okupanga ombili nomumwatate.

16 Natu tye nee owa udifwa nai komumwatate noito dulu okudimbwa osho e ku ningila. Mbela ou na okukatuka eenghatu dilipi opo u pange ombili? Tete, ilikana kuJehova tashi di komutima.  Mu pula e ku kwafele opo mu ka ninge eenghundafana tadi tungu nomumwatate. Dimbuluka, naye oku li umwe womookaume kaJehova. (Eps. 25:14) Kalunga oku mu hole. Oha ungaunga nookaume kaye nonghenda nokwa teelela tu ninge sha faafana. (Omayel. 15:23; Mat. 7:12; Kol. 4:6) Oshitivali, diladila kutya oto ka popya shike. Ino diladila kutya omumwatate okwe shi ningila owina e ku udife nai, ndele mu diladilila yo ouwa. Dimina yo kutya naave otashi dulika u na mo ombinga moupyakadi. Oto dulu okuhovela eenghundafana to ti kutya, “Otashi dulika nda li nda uda nai diva, ashike onghela eshi wa popya naame, onda li ndi udite . . . .” Ngeenge eenghundafana odo inadi eta oidjemo iwa, oto dulu okukonga omhito imwe vali opo u pange ombili. Fimbo wa teelela, ilikanena omumwatate; pula Jehova e mu nangeke noupuna. Mu pula yo e ku kwafele u yandje elitulemo komaukwatya mawa omumwatate. Kutya nee oidjemo oya tya ngahelipi, oto dulu okukala noushili kutya Jehova okwa hafela eenghendabala doye dokupanga ombili nomumwatate, oo e li kaume kaye.

NGEENGE ONAKUDIWA YETU TAI TU HEPEKE

17. Jehova oha longifa eenghedi dilipi opo e tu kwafele ngeenge twa nyona, nomolwashike tu na okulongifa efiloshisho la tya ngaho?

17 Vamwe ohava kala ve udite kutya itava dulu okulongela Jehova, molwaashi ova nyona enyono la kwata moiti. Okukala u udite ondjo otaku dulu oku ku djuupalela. Ohamba David, oyo ya li yi udite ondjo, oya ti: “Eshi nda li inandi hepaulula omatimba, omakipa ange a li a tekauka molweemhata domeni lange efiku alishe. Osheshi omutenya noufiku, eke loye ola li la [minikila] nge poshi.” Shihokwifa, David okwa li a ungaunga noupyakadi oo ngaashi omulumenhu e na oupamhepo muwa. Okwa ti: “Opo nee onde ku hepaululila omatimba ange. Opo ove owa kufila nge po owii womatimba ange.” (Eps. 32:3-5) Ngeenge owa nyona sha kwata moiti, Jehova okwe lilongekida oku ku kwafela. Ashike ou na okutambula ko ekwafo olo ha yandje okupitila meongalo. (Omayel. 24:16; Jak. 5:13-15) Ino ongaonga, onakwiiwa yoye yaalushe oi li monghuwo i na onghambe. Mbela eliudo loye ohali kala tali ku nyenyetele konima eshi wa diminwa po omanyono oye omonakudiwa?

18. Ongahelipi oshihopaenenwa shaPaulus tashi dulu okukwafela ovo ve udite vehe na oshilonga?

18 Opa li omafimbo amwe omuyapostoli Paulus a li ha kala a wililwa po komanyono aye omonakudiwa. Okwa ti: “Ame ondi dulike kovayapostoli aveshe, inandi wana okwiifanwa omuyapostoli, osheshi ame nda taataele eongalo laKalunga.” Natango Paulus okwa weda ko a ti: “Okefilonghenda laKalunga ame ondi li po ngaashi ndi li.” (1 Kor. 15:9, 10) Jehova okwa li a tambula ko Paulus e li ngaashi e li nokwa li a teelela eshi limonene ye mwene. Ngeenge owe livela ombedi shili omolwomanyono oye omonakudiwa noku a hepaulula, oto dulu okukala noushili kutya Jehova ote ke ku fila onghenda. Onghee hano, dimina osho Jehova a popya nokutambula ko ediminepo laye. — Jes. 55:6, 7.

19. Omushangwa womudo 2018 otau ti shike, nomolwashike tau wapalele?

19 Eshi exulilo lounyuni ou tali ende tali ehene popepi, otwa teelela omaupyakadi onghalamwenyo a hapupale. Ashike kala u na oushili oo kutya Jehova oo ha ‘pe ava va loloka ouladi, ndele ta hapupalifa eenghono daau ehe na eenghono’ ota dulu oku ku pa keshe osho wa pumbwa opo u twikile. (Jes. 40:29; Eps. 55:22; 68:19) Momukokomoko wo 2018, ohatu ka dimbulukifwa efimbo keshe oushili oo wa fimana eshi hatu i kokwoongala kOlupale lOuhamba. Oushili oo otau kolekwa komushangwa wetu wokomudo oo tau ti: “Ovo hava teelele Omwene, otava pewa eenghono dipe.” — Jes. 40:31.