OSHIKE hashi uya momadiladilo oye ngeenge wa udu oshitya “efyuululo”? Otashi dulika u diladile koimaliwa, konhele, ile kemona li na ondilo olo tashi dulika la kala moukwaneumbo weni oule wefimbo. Kashi na nee mbudi kutya oshike hashi uya momadiladilo oye, efyuululo oshinima shi na ondilo noto ka kala wa hala oku shi fila oshisho.

Ombiibeli oya popya kutya ounona ove li “efyuululo la dja kuJehova.” (Eps. 127:3) Ovadali Ovakriste ova tala ko ovana vavo ve li oshali i na ondilo ya dja kuXe womeulu nohava ningi ngaashi tava dulu ve va amene nove va file oshisho palutu, pamaliudo nopamhepo.

Ndele shinyikifa oluhodi, ovadali vamwe inava tala ko ounona vavo ve li oshali ya dja kuKalunga. (Jes. 49:15; 2 Tim. 3:​1-3) Vamwe otashi dulika va hala okufila oshisho ovana vavo, ashike oshidjuu kuvo okuninga ngaho omolwomashongo e lili noku lili. Omashongo amwe elipi e shi ningifa shidjuu kovadali okufila oshisho ovana vavo? Jehova okwa teelela ovadali va ninge shike? Nongahelipi ovadali Ovakriste tava dulu okupondola mokutekula ovana vavo?

OMASHONGO

• Omafininiko okudja momudingonoko nosho yo kovapambele. Moitukulwa imwe mounyuni, ovadali ovo ve na ounona vahapu ova fimanekwa momudingonoko. Nomolwaasho ovalihomboli otashi dulika va fininikwe kovapambele, ile kovashiinda va dale ounona vahapu, tashi dulika nokuli vahapu ovo itava dulu okufila oshisho.

• Okulipula shi na sha nonakwiiwa. Moilongo omo omafyo ounona a hapupala omolwomanyutu, omikifi nosho yo omhumbwe youhaku, ovalihomboli vamwe ohava mono ounona vahapu, opo va shilipaleke kutya opa xupa vamwe. Ovalihomboli vamwe otashi dulika va hoolole okudala ounona vahapu, opo va shilipaleke kutya otava ka filwa oshisho ngeenge va kulupa. Osho ohashi ningwa unene moilongo omo ovakulupe ihava mono oshikuvila kepangelo.

• Okungabeka oludalo. Moitukulwa imwe, ovalihomboli vamwe ihava mono oikwafifo yokungabeka oludalo. Vamwe ohava tila okweehama, molwaashi oikwafifo oyo ve na ohai va etele oidjemo ii. Ofimbo vakwao ihava mono oikwafifo yokungabeka oludalo, molwaashi oi na ondilo unene. a

JEHOVA OKWA TEELELA OVADALI VA NINGE SHIKE?

Wanifa po eemhumbwe dounona voye. Jehova okwa teelela ovadali va wanife po oshinakuwanifwa shokuwanifa po eemhumbwe dopalutu dovana  vavo. Jehova okwa teelela ovadali va longe noudiinini, opo va file oshisho okaana keshe moku ka pa oikulya, oikutu nonhele yokukala. Jehova okwa teelela yo ovadali va honge ovana vavo. Onghee ovadali Ovakriste ihava tumu ovana vavo keefikola odo di li kokulekule. Ponhele yaasho, ohava shilipaleke kutya ovana vavo ohava di meumbo, fiyo osheshi va kula, opo va dule okumona ehongo tali wapalele nokukala navo efimbo. Oinima oyo ohai va ningifa va kale ve udite ve li meameno nove holike. Shikwao vali, Jehova oku na ondjele; ina teelela ovadali va kale va punapala. Jehova okwa li a hoolola ovadali hava longo noudiinini, opo va tekule Omonamati waye omuholike, ashike ova hepa. — Mat. 13:​55, 56; Luk. 2:24.

Efinamhango lopaMbiibeli: “Ngeenge ope na ou iha file oshisho ovakwao, unene tuu ava vambulaye, ote lidimbike eitavelo, nomunhu a tya ngaho oku dulike kwaao ehe na eitavelo.” — 1 Tim. 5:8.

Jehova oku udite ko kutya ovadali otashi dulika va ka pumbwe ekwafo lokondadalunde, eshi tava ende tava kulupa. Oshoshili kutya onghedi imwe omo ovana tava dulu okuulika kutya ova fimaneka ovadali vavo omokuninga omalongekido e na sha nanghee tava dulu oku ke va fila oshisho monghalamwenyo yavo. (Ex. 20:12; 1 Tim. 5:4) Ashike Jehova oha kala a hafa, ngeenge ovadali tava diladila tete kombinga yanghee tava dulu okufila oshisho ovana vavo, ponhele yanghee ovana vavo tave ke va fila oshisho. — 2 Kor. 12:14.

Honga ovana voye kombinga yaJehova. Ovadali Ovakriste ove na yo oshinakuwanifwa shokuhonga ovana vavo va kale ve hole Jehova noku mu longela. Jehova okwa tala ko edeulo lopamhepo la tya ngaho, olo ovadali hava pe ovana vavo, li li oshitukulwa sha fimana shokutekula ounona vavo. — Deut. 6:​6, 7.

Efinamhango lopaMbiibeli: “Tekuleni [ovana veni] noku va deula metwokumwe newiliko laJehova.” — Ef. 6:4.

JEHOVA OKWA HALA MU PONDOLE

Ninga eemhangela komesho yefimbo. Ngeenge otamu diladila okumona ounona, diladileni noukeka keenghalo deni. Pashihopaenenwa, mbela otamu ka kala ngoo mu na oimaliwa ya wana okulanda oikulya, oikutu nokuhonga ounona vahapu? Ngeenge hasho, kundafana nakaume koye kopahombo, opo mu dule okungabeka omuvalu woukwaneumbo weni, opo mu dule okuwanifa po omhumbwe yokaana keshe metwokumwe naasho Jehova a teelela mu ninge. Oshoshili kutya Jehova oku udite ko kutya hainima aishe tai dulu okuningwa komesho yefimbo. (Omuud. 9:11) Ashike ota ka nangeka noupuna eenghendabala deni da mana mo, opo mu dule okupondola mu li ovadali.

 Omafinamhango Ombiibeli: “Eemhangela daavo hava longo noudiinini otadi eta ouwa, ndele aveshe ovo hava endelele otave lietele oluhepo.” — Omayel. 21:5.

“Olyelye womunye ngeenge a hala okutunga oshungongulu ita kala omutumba tete ndele ta valula a tale ngeenge oku na oitungifo ya wana?” — Luk. 14:28.

Pitifeni tete komesho Jehova moukwaneumbo weni. Shilipalekeni kutya okulongela Kalunga osho oshinima sha fimanenena moukwaneumbo weni. Ngeenge omu na nale ounona, kaleni mwa tokola toko mu honge ounona aveshe va kale ve hole Jehova. Va kwafeleni va kale tava yandje elitulemo nokulihonga pokwoongala. Kaleni hamu ningi elongelokalunga lOukwaneumbo oshivike keshe. Deuleni ounona veni va kale hava kufa ombinga moukalele. Inamu yandja po oshinakuwanifwa sheni shokutekula ounona kovana veni ovo va kula, ile kovapambele vamwe. Okutekula ounona va kale ve hole Jehova, ohashi pula efimbo neenghendabala, ashike ohashi eta oidjemo iwa.

Efinamhango lopaMbiibeli: “Osha hafifa nge neenghono eshi nda uda kutya ovana vange ova diinina oshili.” — 3 Joh. 4. b

Lineekela muJehova. Kashi na nee mbudi kutya otamu diladila okukala mu na ounona, ile omu na nale ounona, kaleni mwa tomhwa kutya omifikamhango daJehova oda fimanenena di dule omifyuululwakalo, ile eenghedindjikilile domoshitukulwa.

Ngeenge omwa hoolola okungabeka omuvalu wounona veni ovo tamu ka mona, kaleni mwe lineekela kutya Jehova ote ke mu fila oshisho, ngeenge mwa kulupa. Kashi na nee mbudi kutya ovanhu otava diladila shike, inamu kala mu udite kutya omu na okudala ounona, opo va ka longe ve mu file oshisho, ngeenge mwa kulupa. Inamu kala mwa tila kutya kape na oo te ke mu fila oshisho. Jehova okwa udaneka kutya ote ke mu fila oshisho, nota kala alushe metwokumwe nomaudaneko aye. — Jos. 23:14.

Omafinamhango Ombiibeli: “Lineekela muJehova nomutima woye aushe, ino lineekela meendunge doye mwene. Mu kaleka momadiladilo meendjila doye adishe, nota ka yukililifa omalila oye.”— Omayel. 3:​5, 6.

“Onda li omunyasha, ndele paife onda kulupa; ashike inandi mona nande omuyuki umwe a efiwa, ile oludalo laye tali ehela omungome.” — Eps. 37:25.

“Hano kaleni tamu kongo tete Ouhamba nouyuki waye, noinima aishe ikwao otamu ke i wedelwa ko.” — Mat. 6:33.

Ounona ove li eeshali di na ondilo odo Jehova e lineekelela ovadali. Jehova iha kala tuu a hafa, ngeenge ovalihomboli Ovakriste tava file oshisho ovana vavo! Ohava diladila komesho yefimbo kutya otava ka mona ounona vangapi, hava pitifa komesho oiteelelwa yaJehova ponhele yomufyuululwakalo, ile eenghedindjikilile domoshitukulwa nokuwanifa po eemhumbwe dopalutu, dopamaliudo nodopamhepo dovana vavo. Ngeenge ovalihomboli Ovakriste ova ningi ngaho, otava ka ulika kutya ovana vavo ove li oshali ya denga mbada, oyo i li “efyuululo la dja kuJehova.”