1. (a) Omauwa amwe elipi hatu mono ngeenge otwa ninginifwa? (b) Oshike hatu ka kundafana moshitukulwa eshi?

 MBELA owe liyapulila Jehova nowe shi ulika okupitila meninginifo loye? Ngeenge osho, otashi ulike kutya owa hala okukala u na eliudo la yela koshipala shaKalunga. (1 Pet. 3:21) Eshi wa ninga ngaho, owa tulila po ovanyasha oshihopaenenwa shiwa nosho yo ovo hava endafana neongalo. Onghee owa ninga etokolo la denga mbada! Ashike ongahelipi ngeenge ino ninginifwa natango? Kape na omalimbililo kutya ou hole Jehova nowa hala okulonga ehalo laye. Ou shii kutya, opo u diminwe po omanyono oye nokukala wa hokiwa kuJehova owa pumbwa okuninginifwa. (Oil. 2:​38-40) Ashike natango otashi dulika u ongaonge. Oshike tashi dulu oku ku kwafela? Moshitukulwa eshi, ohatu ka kundafana (1) kutya omolwashike vamwe hava ongaonga okuninginifwa, (2) kutya omolwashike shi li pandunge okukaleka exulilo momadiladilo nosho yo (3) nghee to dulu okumona ouwa, ngeenge owa ningi eenghendabala u hange elalakano loye lokuninginifwa nopehe na okwoongaonga.

OMOLWASHIKE VAMWE HAVA ONGAONGA OKUNINGINIFWA?

2. Omolwashike vamwe hava ongaonga okuninginifwa?

² Vamwe ohava ongaonga okuninginifwa omolwoumbada. Pashihopaenenwa, nonande ova hala okulongela Jehova, ohava kala va tila kutya kave na efiku va ninge sha shiwa tashi mu hafifa. Ngeenge oho kala u udite ngaho, lesha omishangwa odo tadi ku kwafele u mone kutya Jehova ina teelela u kale wa wanenena noha kala a hafa, eshi to mu longele ngaashi to dulu. (Eps. 103:​13, 14; Kol. 3:23) Ngeenge owa tila omapataneko, pula Jehova e ku kwafele u kale u udite ngaashi omupsalme, oo a shanga a ti: “Jehova oku li pamwe naame; itandi tila  sha. Omunhu ota dulu okuninga nge shike?” — Eps. 118:6.

3. Oshike tashi dulu oku imba vamwe va ninginifwe? (Tala yo efano kombada yoshifo.)

³ Vamwe ovo ve hole Jehova ohava ongaonga okuninginifwa, molwaashi ohava diladila kutya kave na eshiivo la wana. Ashike mbela owa pumbwa okushiiva keshe shimwe kombinga yOmbiibeli, opo u ninginifwe? Hasho. Natu ka tale koshihopaenenwa shopaMishangwa. Omuyapostoli Paulus naSilas ova li va mona omhito yokuudifila omukeleli wodolongo novaneumbo laye, konima yekakamo ledu olo la li la ningwa modolongo. Omukeleli wodolongo novaneumbo laye otashi dulika va li ve shii kutya opa ningwa oshikumwifilonga. Shikwao vali, ova li ve lihonga oshinima sha fimanenena oufiku oo. Naasho osha li she ve linyengifa va ‘ninginifwe diva.’ (Oil. 16:​25-33) Ngeenge ou shii Jehova, u mu hole nomutima woye aushe, u shii omahovelohongo Ombiibeli, we lidilulula nowa tokola toko okukala metwokumwe nomifikamhango daye, owa wana okuninginifwa. — Mark. 12:30.

4. Vamwe ohava yandje elitulemo kushike, osho tashi dulu oku va imba va ninginifwe? (Tala yo efano.)

⁴ Vamwe ovo va hala okuhafifa Kalunga, ohava yandje elitulemo kwaashishe osho sha kwatelwa mo. Oshoshili kutya oshi li pandunge okudiladila kwaashishe osho sha kwatelwa mo metokolo keshe to ningi. (Luk. 14:​27-30) Ndele vamwe have lipula shi na sha nomaliyambo oo tava ka ninga, opo va longele Kalunga. Candace, oo a kulila moshili, osho a li e udite ngaho, eshi a li a hovela vali okukonakona Ombiibeli konima eshi a kula. Okwa ti: “Onda li ndi shii kutya oshike ndi na okuningila Jehova, ashike onda li ndi hole onghedi yange yokukalamwenyo, nonande ondi shii kutya itai mu hafifa. Onda li ndi shii kutya oshidjuu okweefa po onghalamwenyo ya tya ngaho.” Vamwe ohave lipula shi na sha nomifikamhango dOmbiibeli di na sha nelihumbato, odo ovo va ninginifwa ve na okudulika kudo. Ohave lipula kutya konima ngeenge va ninginifwa otava ka nyona enyono la kwata moiti nokukufwa mo meongalo. Ngeenge omadiladilo a tya ngaho ohae ku imbi u ninginifwe, oshike to dulu okuninga?

5. Oshike tu na okudiladila kusho, ngeenge ohatu ongaonga okuninginifwa? (Mateus 13:​44-46)

⁵ Ngeenge twa hala okulanda oshinima shonhumba, ihatu tale ashike kutya oshi na ingapi, ndele ohatu tale yo nokongushu yasho. Ngeenge oshinima osho oshi na ongushu i  dule yoshimaliwa osho hatu longifa, otashi dulika tu ke shi lande. Sha faafana, ngeenge ohatu diladila okuninginifwa, inatu diladila ashike komalunduluko oo hatu ka ninga, ndele natu diladile kekwatafano liwa olo hatu ka kala tu na naJehova. Jesus okwa li a longifa omafaneko avali, opo a yelife oshitwa osho. (Lesha Mateus 13:​44-46.) Mefaneko keshe, omulumenhu okwa li a landifa po oinima aishe oyo a li e na, opo a dule okulanda oshinima osho a mona shi na ongushu. Naave owa mona oshinima shi na ongushu inene, oshili kombinga yOuhamba. Ngeenge oto ongaonga okuninga omalunduluko, opo u ninginifwe, diladila noukeka komafaneko aJesus. Oto dulu okulipula kutya: ‘Mbela onda tomhwa ngoo kutya oshinima osho nda mona oshi na ongushu? Mbela onda lenga ngoo ekwatafano lange naJehova, eteelelo olo a pa nge nosho yo oumwainafana unahole wovamwatate novamwameme?’ She likolelela komanyamukulo oye, oto dulu okukala ho dilonga kolupandu olo u na li na sha noshili, ile okutala kutya oshike tashi ku imbi u tule moilonga osho u shii.

6. Ongahelipi hatu dulu okukala tu na oikala iwa yomomutima?

⁶ Mefaneko laJesus li na sha nomukuni, okwa popya kombinga yoikala yomomutima oyo tai dulu oku imba omunhu a ninge exumokomesho lopamhepo. Ashike Jesus okwa ulika yo kutya vamwe otava ka ‘tambula ko’ etumwalaka lOuhamba, ‘nokudiinina’ osho ve lihonga. (Luk. 8:​5-15) Ngeenge oto lipula, molwaashi uhe na oushili ngeenge efiku limwe oto ka tula ngoo moilonga osho we lihonga, ino sholola. Kekwafo laJehova, oto dulu “okulikongela omutima mupe,” opo u kale wa hala okudulika kuye. Pula Jehova okupitila meilikano, e ku kwafele u kale u hole osho to lihongo, noku shi tula moilonga monghalamwenyo yoye. — Hes. 18:31; 36:26.

7-8. Omolwashike ovanyasha vamwe hava dopa okuninga exumokomesho, opo va ninginifwe? (Tala yo efano.)

⁷ Ovanyasha vamwe ovo ve hole Jehova ohava dopa okuninga exumokomesho, opo va ninginifwe omolwenwefemo lavamwe. Pashihopaenenwa, ovahongifikola vamwe otashi dulika va ladipike ovanafikola va “dje konima yefiya,” ngeenge tashi uya pomifikamhango dopaenghedi, nokuli nonande dimwe otadi nyono omifikamhango daKalunga. Ashike omayele a tya ngaho otaa dulu okweetifa oilanduliko ii. (Eps. 1:​1, 2; Omayel. 7:​1-5) Oto dulu okuhenuka oupyakadi oo, mokushikula oshihopaenenwa shomupsalme oo a lombwela Jehova a ti: “Ondi na eendunge dihapu ndi dule ovahongi vange aveshe, molwaashi ohandi dilonga komadimbulukifo oye.” — Eps. 119:99.

⁸ Osha fa shi li ngaha kutya ovadali vamwe ovo ve li Eendombwedi ohave shi ningifa shidjuu kovana vavo okuninginifwa. Ovadali ohave lipula unene shi na sha nehongo lovana vavo nosho yo oilonga oyo tava ka mona, ile tashi dulika va dope okuladipika ovana vavo ve litulile po omalalakano oo taa dulu oku va kwafela va ehe ne popepi naJehova. Mbela ovadali voye otava dulu oku ku kwafela u ninge exumokomesho lopamhepo? Omolwashike ito kundafana navo oshinima osho? Kashi na nee mbudi kutya ou na omido ngapi, inadi ku imba okukala u na ekwatafano lopofingo naJehova. — Omayel. 20:11.

9. Omolwashike tashi dulika vamwe hava ongaonga okuninginifwa?

⁹ Vamwe ovo va wana okuninginifwa, otashi dulika va ongaonge okuninginifwa omolwomafininiko, tashi dulika nokuli va teelela omunhu wonhumba va ninginifilwe oshita naye. Pashihopaenenwa, otashi dulika va kale  va hala okuninginifwa mefiku limwe nookaume kavo, ile nomupambele wavo. Oshoshili kutya oto dulu okuninginifwa mefiku limwe nookaume koye. Ndele mbela osho oshi na oku ku imba u ninginifwe? Dimbuluka kutya, eshi we liyapulila Kalunga owe shi ninga paumwene. Eninginifo loye inali kala le likolelela kwaasho umwe ta ningi. — Rom. 14:12.

OMOLWASHIKE U NA OKUKALEKA MOMADILADILO EXULILO?

10. Omolwashike vamwe tashi dulika hava ongaonga okuninga exumokomesho lopamhepo?

¹⁰ Okuweda ko komatomheno oo a popiwa metetekelo, vamwe ohava ongaonga okuninga exumokomesho lopamhepo, molwaashi tava diladila kutya oku na natango efimbo lihapu, opo exulilo li uye. Mbela okudiladila kwa tya ngaho oku li ngoo pandunge? Jesus okwa londwela ovahongwa vaye a ti: “Kaleni mwe lilongekida, osheshi Omona womunhu ote uya pefimbo olo inamu teelela.” — Luk. 12:40.

11. She likolelela kEpsalme 119:​60, otu uditile ngahelipi oipango yaJehova, eshi twe mu shiiva?

¹¹ Ohole oyo nai tu linyengife tu liyapulile Jehova. Ngeenge otwa kala tu hole Kalunga ketu omunahole, otashi ke tu linyengifa tu kale tu hole oipango yaye nokudulika kuyo. (Lesha Epsalme 119:60.) Omuhongwa Jakob okwa divilika vali etomheno la fimana li na sha nokudulika koipango yaJehova: Kape na umwe womufye e shii kutya efiku lomongula otali uya nashike. Onghee efiku keshe natu ‘longe ouwa,’ sha hala okutya, hatu longo osho tu shii kutya Jehova osho a hala tu longe. — Jak. 4:​13-17.

12. Oshike hatu lihongo mefaneko laJesus li na sha noshikunino shomandjebele?

¹² Ongahelipi shi na sha nefaneko laJesus loshikunino shomandjebele? Mbela ina popya kutya vamwe otava ka longa ashike ovili imwe, ndele otava ka mona ashike ondjabi i fike pamwe naavo va longa efiku alishe? Osho a popya. Ashike didilika etomheno olo la yandjwa kwaavo va longa ashike ovili imwe. Ova ti: “Osheshi kaku na ou e tu shiva.” Ovalongi ovo kava li ovakwandede, ova li tava dulu okulonga efiku alishe, ashike kaku na oo e va shiva. Diva konima eshi va shivwa, ova li va waimina oilonga. (Mat. 20:​1-16) Kunena, Jesus okwe tu shiva tu ninge ovahongwa vaye, notu udife kombinga yOuhamba. Onghee natu nyamukule diva ngeenge otashi shi shiiva, ngeenge otwa shivwa.

13. Oshike hatu dulu okulihonga komukulukadi waLot?

¹³ Keshe oo a ongonga okuninga exumokomesho lopamhepo, otashi dulika a ka mona  kutya okuninga omalunduluko komunute waxuuninwa, opo u hafife Kalunga, ohashi kala shidjuu neenghono. Jesus okwa li e shi shii oshinima osho, nokwa li a londwela ovahongwa vaye a ti: “Dimbulukeni omukulukadi waLot.” (Luk. 17:​31-35) Omukulukadi waLot okwa li e shii kutya mafiku Kalunga ota ka tokola Sodom naGomorra; ashike osha fa shi li ngaha kutya omukulukadi waLot ka li a hala okweefa po okudiladila kombinga yoinima oyo a fiya po. (Gen. 19:​23-26) Oshimoniwa shaye otashi tu dimbulukifa yo kutya omuvelo wexupifo itau ka kala wa yeuluka fiyo alushe. Pefimbo laKalunga la wapala, omuvelo oo tau ka idila notau ka pata fiyo alushe. — Luk. 13:​24, 25.

14. Omaxunganeko Ombiibeli e na sha nexulilo oku na oku ku kuma ngahelipi?

¹⁴ Efiku keshe, oiningwanima oyo tai ningwa mounyuni otai wanifa po omaxunganeko Ombiibeli e na sha nounyuni waSatana. Nokuli nonande ino kumwa koiningwanima imwe yomwaayo odikilila, okutala kwaasho tashi ningwa keenhele di lili noku lili nashi ku linyengife u ninge exumokomesho diva ngaashi tashi dulika, opo u ninginifwe. Diladila koshihopaenenwa shopefimbo lovayapostoli. Omuyapostoli Petrus okwa li a shangela Ovakriste va kale ve “lilongekida,” ile ve li “oupafi,” molwaashi “exulilo loinima aishe ola ehena popepi.” (1 Pet. 4:7; esh.) “Exulilo” ola li tali ulike pefimbo opo Jerusalem nosho yo otembeli ya li tai ka hanaunwa po. Ovo Petrus a li a shangela ova li kokule naJerusalem, onghee kava li va kwatelwa mo mehanauno loshilando osho. (1 Pet. 1:1) Ashike eshi va mona omaxunganeko taa wanifwa, osha li sha pameka eitavelo lavo momaudaneko aeshe makwao aJehova. Sha faafana, eshi u wete omaxunganeko e na sha nexulilo taa wanifwa po, otashi ke ku linyengifa u li longekide, mokulitulila po elalakano lokuninginifwa.

15. Otu na okutala ko ngahelipi efiku laJehova? (2 Petrus 3:​10-13)

¹⁵ Petrus okwa popya nghee tu na okutala ko efiku laJehova li na sha netokolo, monhumwafo yaye onhivali ya nwefwa mo. Efiku olo ola li natango li li kokule kOvakriste ovo va li ko pefimbo lovayapostoli, ashike Petrus okwa  li e va lombwela va “kaleke momadiladilo” efiku olo, ile va kale ve li “halelela.” (Lesha 2 Petrus 3:​10-13; esh.) Ohatu dulu okukaleka momadiladilo efiku olo, mokukala twe lilongekida nokukala twa hala li uye. Ohatu ulike kutya otwa halelela ‘mokukala tu na elihumbato la koshoka nokulonga oilonga yometilokalunga. Diladila nghee tashi ka hafifa Jehova, eshi e ku wete to “longo oilonga yometilokalunga!” Ota ka kala a hafa neenghono oku ku mona to mu liyapulile nokuninginifwa.

OMAUWA OO HAA DI MOKUKATUKA EENGHATU PAIFE

16. Onaini shi li efimbo la denga mbada lokuninga exumokomesho fiyo wa ninginifwa? (2 Ovakorinto 6:​1, 2) (Tala yo omafano.)

¹⁶ Paife olo efimbo la denga mbada lokuninga exumokomesho fiyo wa ninginifwa. (Lesha 2 Ovakorinto 6:​1, 2.) Elenga lokuEtiopia, olo la li la shakena naFilippus, ola li la didilika kutya ola pumbwa okukatuka eenghatu diva. Eshi le lihonga onghundana iwa, nokumona omhito lininginifwe, kala li le lipopila la ti: ‘Onda hala okulihonga shihapu tete kombinga yonghundana iwa. Natango mondjila ohatu ka hanga mo omeva.’ Ndele ponhele yaasho ola pula Filippus la ti: “Oshike tashi imbi nge ndi ninginifwe?” (Oil. 8:​26, 27, 35-39) Mbela osho kashi fi tuu oshihopaenenwa sha denga mbada! Konima eshi elenga la ninginifwa, “ola twikila nondjila yalo la hafa.”

17. Ohatu dulu okukala tu na oushili ulipi?

¹⁷ Ngeenge oto ongaonga okuninginifwa, kala wa shilipalekwa kutya Jehova okwe lilongekida oku ku kwafela, opo u kale u na ekwatafano liwa naye. (Rom. 2:4) Ota dulu oku ku kwafela u finde oumbada, omalipulo, ile omanwefemo mai oo tashi dulika e ku imbe u ninge exumokomesho. Ngeenge owa kala u na eliudo liwa koshipala shaKalunga, okupitila meninginifo loye, oto ka mona kutya “oinima ei yokonima” kai na vali oshilonga kwoove. (Fil. 3:​8, 13) Opo nee oto ka kala wa teelela nodjuulufi “oinima yokomesho,” sha hala okutya, omaudaneko aJehova, oo taa ka wanifilwa ovo ve mu liyapulila nova ninginifwa. — Oil. 3:19.