Inda koshikalimo

Inda koshikalimo

Okukala wa pyokoka pamhepo osha hala okutya ngahelipi?

Okukala wa pyokoka pamhepo osha hala okutya ngahelipi?

“Kalunga . . . ne mu kwafe mu kale hamu udafana pamadiladilo aKristus Jesus.” — ROM. 15:5.

OMAIMBILO: 17, 13

1, 2. (a) Ovanhu vahapu ova tala ko ngahelipi oinima yopamhepo? (b) Omapulo elipi a fimana e na sha noinima yopamhepo hatu ka kundafana?

OMUMWAMEME umwe wokoCanada okwa ti: “Okukala nda pyokoka pamhepo osha kwafela nge ndi kale nda hafa nondi ungaunge nomupondo nomayeleko akeshe efiku.” Omumwatate wokoBrazil okwa ti: “Omido 23 odo twa kala mohombo, otwa kala twa hafa omolweenghendabala odo twa ninga opo tu kale tu na oupamhepo muwa.” Natango, omumwatate wokoPhilippines okwa ti: “Okukala nda pyokoka pamhepo osha kwafela nge ndi kale ndi na ombili yopamadiladilo, nosha kwafela nge ndi xwepopaleke onghedi oyo handi ungaunga novamwatate vomomaputuko a yoolokafana.”

2 Osho ovamwatate va popya metetekelo otashi ulike kutya osha fimana okukala tu na oupamhepo muwa. Onghee hano, ohatu dulu okulipula kutya, ‘Ongahelipi handi dulu okukala nda pyokoka pamhepo opo ndi hafele pauyadi omauwa oo a tumbulwa pombada?’ Ofimbo inatu nyamukula epulo olo, otwa pumbwa okuuda ko nawa osho Ombiibeli tai ti kombinga yovanhu ovo va pyokoka pamhepo ile ve na oupamhepo muwa. Moshitukulwa eshi, ohatu ka nyamukula omapulo atatu a fimana. (1) Osha hala kutya ngahelipi okukala wa pyokoka  pamhepo? (2) Oihopaenenwa ilipi tai ke tu kwafela tu ninge exumokomesho lopamhepo? (3) Ongahelipi eenghendabala detu dokukala tu na “omadiladilo aKristus” tadi ke tu kwafela tu kale twa pyokoka pamhepo?

OMUNHU A PYOKOKA PAMHEPO OKWA TYA NGAHELIPI?

3. Ombiibeli oya yelifa ngahelipi eyooloko pokati komunhu wopashitwe nomunhu wopamhepo?

3 Omuyapostoli Paulus okwe tu kwafela tu ude ko nawa kutya omunhu oo a pyokoka pamhepo okwa tya ngahelipi, mokuyelekanifa “omunhu wopamhepo” ‘nomunhu wopashitwe.’ (Lesha 1 Ovakorinto 2:14-16.) Eyooloko oli li peni? “Omunhu wopashitwe” okwa popiwa e li omunhu oo “iha tambula osho shOmhepo yaKalunga, osheshi ohe shi tale oulai, oye ita dulu oku shi shiiva.” Ashike “omunhu wopamhepo” omunhu oo ha “koneke aishe” noku na “omadiladilo aKristus.” Paulus okwe tu ladipika tu kale twa pyokoka pamhepo. Omeenghedi vali dilipi omunhu wopashitwe nowopamhepo va yoolokafana?

4, 5. Omunhu wopashitwe oha ulike omaukwatya elipi?

4 Diladila ashike manga koikala yomunhu wopashitwe. Ounyuni ou na oikala oyo hai nwefa mo ovanhu va kale tava yandje elitulemo koinima yopambelela. Paulus okwe i popya i li “pamhepo yomupangeli ou ta longo paife movana vokuhadulika.” (Ef. 2:2) Omhepo oyo ohai nwefa mo ovanhu vahapu va tambule ko oikala oyo i li apeshe, molwaashi ohava landula ashike eemhunga. Ohava yandje elitulemo koinima yopambelela. Oshidjemo, vahapu ove udite kutya osho hava ningi oshi li mondjila pataleko lavo, noihava ningi eenghendabala va kale metwokumwe nomifikamhango daKalunga. Omunhu wopashitwe ile oo ha diladila pambelela, luhapu oha kala unene te lipula shi na sha nefimano noha lalakanene oinima yopamaliko ile a ninge osho e udite kutya oshi li mondjila.

5 Oshike vali tashi dulu okudidilikifa mo omunhu wopashitwe? Ovanhu ovo hava longo oludi keshe ‘loilonga yombelela’ navo ove li mongudu oyo. (Gal. 5:19-21) Onhumwafo oyo Paulus a li a shangela eongalo lokuKorinto oya popya vali omaukwatya onhumba aavo ve na oikala yopambelela. Oikala oyo oya kwatela mo: etondafano, olwaamambinga, eemhata, okulitwala keemhangu, okuhe na olupandu laavo tava kwatele komesho nosho yo okukala nefukutu loikulya noloikunwa. Ngeenge omunhu oo ha diladila pambelela okwa hangwa keyeleko, oha nghundipala ndele te liyandje. (Omayel. 7:21, 22) Judas okwa popya kombinga yaavo hava nghundipala fiyo oposhitwa shokukala ‘vehe na oupamhepo.’ — Jud. 18, 19.

6. Oshike hashi didilikifa mo omunhu kutya oku na oupamhepo muwa?

6 Osha hala kutya ngahelipi okukala “omunhu wopamhepo,” kokutya e na oupamhepo muwa? Mepingafano nomunhu wopashitwe, ile wopambelela, omunhu oo oha kala te lipula shi na sha naKalunga. Oha kendabala ‘okuhopaenena Kalunga.’ (Ef. 5:1) Sha hala kutya oha ningi eenghendabala a kale ta diladila nokutala ko oinima ngaashi Jehova he i tale ko. Oha tale ko Kalunga e li omunhu wolela kuye. Mepingafano naao ha diladila pambelela, oha kendabala okuninga oinima aishe metwokumwe nomifikamhango daJehova. (Eps. 119:33; 143:10) Ponhele yokuyandja elitulemo koilonga yombelela, oha kendabala okwiimika “oiimati yOmhepo.” (Gal. 5:22) Ohatu dulu yo oku shi faneka ngaha: Opo omunhu a ifanwe omunangeshefa, oku na okukala ha diladila kombinga yeengeshefa noku na owino mudo. Sha faafana, omunhu oo a pyokoka pamhepo oku na okukala ha diladila kombinga yoinima yopakalunga ile tu tye yopamhepo.

7. Ombiibeli oya popya shike shi na sha naavo hava diladila pamhepo?

7 Ombiibeli oya popila mouwa ovo hava diladila pamhepo. Mateus 5:3 okwa popya shi na sha naavo ve na ondjala yopamhepo a ti: “Ovanelao eehepele domhepo, osheshi Ouhamba weulu owavo.” Ovaroma 8:6 ova popya shi na sha nouwa wokukala ho diladila pamhepo, va ti:  “Omadiladilo ombelela oo efyo, ndele omadiladilo Omhepo omwenyo nombili.” Ngeenge otwa yandje elitulemo koinima yopamhepo, ohatu ka mona ombili yaKalunga paife nosho yo eteelelo loku ka kala nomwenyo waalushe monakwiiwa.

8. Omolwashike twa pumbwa okuninga eenghendabala opo tu kale twa pyokoka pamhepo nokukaleka po oupamhepo wetu?

8 Otu li mounyuni wa nyika oshiponga. Otwa pumbwa okukala hatu ningi eenghendabala opo tu kale twa pyokoka pamhepo nokwaamena oupamhepo wetu, molwaashi otwa dingililwa kovanhu ovo ve na oikala ii. Ngeenge omunhu okwa kanifa oupamhepo waye, otashi dulika a nwefwe mo ‘komhepo’ younyuni ou. Oshike tashi dulu oku tu kwafela tuha efe osho shi tu ningilwe? Ongahelipi hatu dulu okuninga exumokomesho lopamhepo?

OIHOPAENENWA OYO HATU DULU OKULIHONGA KUYO

9. (a) Oshike tashi dulu oku tu kwafela tu ninge exumokomesho lopamhepo? (b) Ohatu ka kundafana oihopaenenwa ilipi yovanhu ovo va pyokoka pamhepo?

9 Okaana otaka dulu okukala ka pyokoka mokutala kovadali vako nokuhopaenena oshihopaenenwa shavo shiwa. Sha faafana, nafye ohatu dulu okuninga exumokomesho lopamhepo mokukala hatu tale nokuhopaenena ovo va pyokoka pamhepo. Ashike ovanhu ovo hava diladila pambelela ove li oihopaenenwa yelondwelo kufye. (1 Kor. 3:1-4) MOmbiibeli omu na oihopaenenwa oyo yopavali. Ndele molwaashi elalakano letu okuninga exumokomesho lopamhepo, natu ka taleni koihopaenenwa imwe iwa yavamwe oyo hatu dulu okuhopaenena. Ohatu ka kundafaneni oshihopaenenwa shaJakob, Maria naJesus.

Oshike hatu dulu okulihonga koshihopaenenwa shaJakob? (Tala okatendo 10)

10. Ongahelipi Jakob a li a ulika kutya okwa pyokoka pamhepo?

10 Tete, natu ka taleni koshihopaenenwa shaJakob. Ngaashi ashike shi li kuvahapu vomufye kunena, onghalamwenyo kaya li ipu kuJakob. Okwa li e na okulididimikila omumwaina, Esau, oo a li ha diladila pambelela nokwa li a hala oku mu dipaa. Kakele kaasho, okwa li e na okulididimikila xemweno omukengeleledi, oo a li a hala ashike oku mu ningilila mo. Nonande Jakob okwa li a dingililwa kovanhu ‘vopashitwe,’ okwa kala omulumenhu  e na oupamhepo muwa. Okwa li e na eitavelo meudaneko olo la li la udanekelwa Abraham, nokwa li a tokola okufila oshisho oukwaneumbo waye oo wa li tau ka dana onghandangala ya fimana mokuwanifwa po kwelalakano laJehova. (Gen. 28:10-15) Eendjovo nosho yo eenghatu daJakob oda ulika kutya okwa lenga omifikamhango nosho yo ehalo laKalunga. Pashihopaenenwa, eshi a li a ningilwa omatilifo kuEsau, okwa lombwela Kalunga a ti: “Xupife nge . . . Oove mwene wa tile: ‘Oshili Ame ohandi ke ku ningila ouwa nokuhapupalifa oludalo loye li fike pefuta.’” (Gen. 32:6-12) Osho otashi ulike kutya okwa li e lineekela momaudaneko aJehova, oo a li e mu udanekela nosho yo ooxekulululwa, nokwa li a hala okukala metwokumwe nehalo nosho yo nelalakano laJehova.

Oshike hatu dulu okulihonga koshihopaenenwa shaMaria? (Tala okatendo 11)

11. Oshike tashi ulike kutya Maria okwa li a pyokoka pamhepo?

11 Paife natu ka taleni vali koshihopaenenwa shikwao, shaMaria. Omolwashike Jehova a li a hoolola Maria a ninge ina yaJesus? Omolwaashi Maria okwa li e hole unene oinima yopamhepo. Osho otu shi shii ngahelipi? Okwa ulika oumbangi wa yela kutya oku na oupamhepo muwa meendjovo daye dihokwifa dolupandu, eshi a li a ka talela po ovapambele vaye Sakaria naElisabet. (Lesha Lukas 1:46-55.) Eendjovo daMaria oda ulika kutya okwa li e hole neenghono Eendjovo daKalunga nokwa li e shii nawanawa Omishangwa dOshiheberi. (Gen. 30:13; 1 Sam. 2:1-10; Mal. 3:12) Didilika yo kutya ye naJosef, nonande ova li opo va hombola, kava li va ya momilele fiyo osheshi Jesus a dalwa. Osho osha li tashi ulike shike? Osha li tashi ulike kutya aveshe ova li va hala okulonga ehalo laJehova shi dulife okuwanifa po omahalo avo opaumwene. (Mat. 1:25) Mokweendela ko kwefimbo, Maria okwa li a didilika oinima aishe oyo ya li ya ningwa monghalamwenyo yaJesus nokwa li a yandja elitulemo keendjovo dounongo odo Jesus a li a popya. Shikwao vali, okwa li a “tuvikila eendjovo odo adishe momutima waye.” (Luk. 2:51) Okwa li e na ohokwe melalakano laKalunga li na sha naMessias. Mbela oshihopaenenwa shaMaria itashi tu kwafele tu diladile nghee hatu dulu okupitifa komesho ehalo laKalunga monghalamwenyo yetu?

12. (a) Omeenghedi dilipi Jesus a li a fa Xe? (b) Ongahelipi hatu dulu okushikula oshihopaenenwa shaJesus? (Tala efano pehovelo loshitukulwa.)

12 Movanhu aveshe ovo va li ko nale, olyelye mbela e li oshihopaenenwa sha denga mbada shokukala a pyokoka pamhepo? OJesus. Monghalamwenyo nomoukalele waye, okwa li a ulika kutya okwa hala okuhopaenena Xe, Jehova. Okwa li ha diladila, ha kala e udite noha katuka ngaashi Jehova, nokwa kala metwokumwe nehalo nosho yo nomifikamhango daye. (Joh. 8:29; 14:9; 15:10) Pashihopaenenwa, didilika nghee omuprofeti Jesaja a li a popya shi na sha nanghee Jehova ha udile ovanhu olukeno, ndele to shi yelekanifa naasho Markus a popya shi na sha nomaliudo aJesus. (Lesha Jesaja 63:9; Markus 6:34.) Mbela nafye otwa fa ngoo Jesus? Ngeenge otwa shakeneke ovanhu va pumbwa ekwafo, otwe lilongekida ngoo oku va ulikila olukeno? Shimwe vali, Jesus okwa li e liyandja moilonga yokuudifa nokuhonga ovanhu onghundana iwa. (Luk. 4:43) Eenghatu da tya ngaho otadi ulike kutya okwa li a pyokoka pamhepo.

13, 14. (a) Oshike hatu lihongo moihopaenenwa yokunena yaavo ve na oupamhepo muwa? (b) Yandja oshihopaenenwa.

13 Kakele ashike koihopaenenwa yopamishangwa, nokunena oku na oihopaenenwa ihapu yaavo va pyokoka pamhepo ovo va ninga exumokomesho linene mokuulika omaukwatya a fa aKristus. Otashi dulika wa didilika ouladi wavo moukalele, okuyakula vamwe kwavo, olukeno lavo, ile omaukwatya vali amwe mawa. Ngaashi fye, navo otava kondjifa omaunghundi nosho yo okuhawanenena nopefimbo opo tuu opo otava kendabala okukulika omaukwatya opakalunga. Rachel, omumwameme wokoBrazil, okwa ti: “Onda li ndi hole okushikula omoode younyuni. Oshidjemo, kanda li handi djala nawa. Ashike eshi nde lihonga oshili oshe linyengifa nge ndi ninge  eenghendabala opo ndi kale nda pyokoka pamhepo. Kasha li shipu okuninga omalunduluko, ashike onda ka kala nda hafa nonda mona elalakano lashili li na sha nonghalamwenyo.”

14 Reylene, wokoPhilippines, okwa li e na eshongo li lili. Okwa li ta yandje elitulemo kehongo lopombada nosho yo koilonga tai futu nawa opo a xume komesho monghalamwenyo. Okwa ti: “Kanda li vali ndi na omalalakano oinima yopamhepo. Ashike onda li nda mona kutya ope na sha sha kambela mo monghalamwenyo yange, osho sha fimana shi dulife oilonga yange. Oshidjemo, onda li nda yandja elitulemo kokulongela Jehova.” Okudja opo, Reylene okwa kala e li oshihopaenenwa sheitavelo meudaneko laJehova olo tali hangwa muMateus 6:33, 34. Okwa ti: “Ondi shi shii nawanawa kutya Jehova ota file nge oshisho.” Otashi dulika u shii vamwe meongalo leni ovo ve li oihopaenenwa ya fa oyo. Mbela inatu linyengifwa tu hopaenene ovadiinini ovo eshi tava shikula Kristus? — 1 Kor. 11:1; 2 Tes. 3:7.

KALENI MU NA “OMADILADILO AKRISTUS”

15, 16. (a) Otwa pumbwa okuninga shike opo tu kale twa fa Kristus? (b) Ongahelipi hatu dulu okweefa omadiladilo etu a nwefwe mo ‘komadiladilo aKristus’?

15 Ongahelipi hatu dulu okuhopaenena Kristus pauhandimwe? Ombiibeli oya popya 1 Ovakorinto 2:16 kutya natu kale tu na “omadiladilo aKristus.” Ovaroma 15:5 navo ova popya kombinga yokukala hatu “udafana pamadiladilo aKristus Jesus.” Onghee hano, opo tu kale twa fa Kristus, otwa pumbwa okushiiva nghee ha diladila nosho yo omaukwatya aye, ndele hatu shikula eenghatu daye. Jesus okwa li ha yandje alushe elitulemo kekwatafano laye naKalunga. Onghee okukala twa fa Jesus otaku tu ehenifa popepi naJehova. Omolwomatomheno oo, otwa mona nghee sha fimana okudiladila ngaashi Jesus.

16 Ongahelipi hatu dulu okuninga ngaho? Ovahongwa vaJesus ova li va mona oikumwifilonga oyo a longa, va uda oipopiwa yaye, va mona nghee ta ungaunga novanhu vomaludi aeshe, nanghee ta tula moilonga omafinamhango aKalunga. Ova ti: “Ofye ava eendobwedi daai aishe e i longa.” (Oil. 10:39) Fye itatu dulu oku mu mona nomesho etu. Ashike Jehova okwa yandja pahole omahokololo oo e li mOmavaengeli oo taa dulu okuningifa omaukwatya aJesus a kale olela kufye. Ngeenge otwa kala hatu lesha nokudilonga kembo laMateus, Markus, Lukas naJohannes, ohatu ka efa omadiladilo etu a nwefwe mo komadiladilo aKristus. Onghee hano, ohatu dulu ‘okushikula oshikoti shaye nokutambula omadiladilo aa ngaashi oshilwifo,’ ngaashi Kristus a li a ninga. — 1 Pet. 2:21; 4:1.

17. Okudiladila ngaashi Kristus otaku tu kwafele ngahelipi?

17 Ongahelipi okudiladila ngaashi Kristus taku tu kwafele? Ngaashi ashike oikulya i na oitungifi hai tungu olutu lopambelela, okupalula omadiladilo etu nokudiladila kwaKristus otaku pameke oupamhepo wetu. Otwe lihonga osho ngeno Kristus ta dulu okuninga po monghalo keshe. Osho otashi tu kwafele tu ninge omatokolo oo tae tu fiye neliudo la koshoka notwa hokiwa kuKalunga. Mbela ito dimine kutya omauwa oo okwe tu pa etomheno liwa tu “djaleni Omwene Jesus Kristus”? — Rom. 13:14.

18. Owe lihonga shike meenghundafana odo di na sha nokukala omunhu a pyokoka pamhepo?

18 Otwa kundafana kutya okukala omunhu a pyokoka pamhepo otashi ti shike. Otwa mona yo kutya ohatu dulu okulihonga koihopaenenwa iwa yaavo va pyokoka pamhepo. Xuuninwa, otwe lihonga nghee okukala “nomadiladilo aKristus” taku tu kwafele tu ninge exumokomesho lopamhepo. Ashike nande ongaho, ope na vali omaukwatya akwao opamhepo oo hatu ka kundafana. Pashihopaenenwa, ongahelipi hatu dulu okumona kutya oupamhepo wetu owa pama? Oshike vali hatu dulu okuninga opo tu u kulike? Nongahelipi oupamhepo wetu tau dulu okunwefa mo onghalamwenyo yetu yakeshe efiku? Oshitukulwa tashi landula ko otashi ke tu kwafela tu nyamukule omapulo oo.