Inda koshikalimo

Inda koshikalimo

Ovanyasha, Omushiti weni okwa hala mu kale mwa hafa

Ovanyasha, Omushiti weni okwa hala mu kale mwa hafa

“Oye tuu, ota wanifa omahalelo oye nouwa waye.” — EPS. 103:5.

OMAIMBILO: 135, 39

1, 2. Omolwashike shi li pandunge okupwilikina kOmushiti wetu ngeenge hatu litulile po omalalakano monghalamwenyo? (Tala efano pehovelo loshitukulwa.)

NGEENGE ou li omunyasha, otashi dulika wa pewa omayele mahapu e na sha nonakwiiwa yoye. Ovahongi, ovayandjimayele, ile vamwe otashi dulika ve ku twa omukumo u lalakanene ehongo lopombada noilonga tai futu nawa. Ashike Jehova ote ku ladipike u lalakanene shimwe shi li lili. Okwa hala u longe noudiinini fimbo u li mofikola opo u ka kale nonghalamwenyo i li nawa konima eshi wa mana. (Kol. 3:23) Ashike ngeenge tamu litulile po omalalakano monghalamwenyo, okwa hala mu wilikwe komafinamhango oo a kwatela mo elalakano laye nosho yo osho e tu halela pefimbo e li lexulilo. — Mat. 24:14.

2 Kaleka momadiladilo kutya Jehova oku shii keshe shimwe molwaashi oku shii osho tashi ka ningwa po nosho yo kutya mafiku ounyuni ou li pokuxula po. (Jes. 46:10; Mat. 24:3, 36) Oku tu shii, oku shii osho hashi tu etele embilipalelo nehafo nosho yo osho hashi tu nyemateke nohashi nyono po ehafo letu. Kutya nee omayele ovanhu naa kale taa monika a fa e li nawa, ngeenge kae li metwokumwe nEendjovo daKalunga, kae na eshi taa ti nandenande. — Omayel. 19:21.

“KAPE NOUNONGO . . . MOKUKONDJIFA OMWENE”

3, 4. Ongahelipi okudulika komayele mai kwa kuma Adam naEva nosho yo oludalo lavo?

3 Omayele mai okwa dja nalenale mondjokonona yovanhu eshi Satana a ya moshikunino shaEden. Molwaashi Satana okwa li e na ounhwa nokwe lininga omuyandjimayele, okwa li a lombwela Eva kutya ye nomushamane waye otava dulu okukala va hafa ngeenge ova hoolola onghedi yavo yokukalamwenyo. (Gen. 3:1-6) Oushili oyoo kutya omalinyengotomheno aSatana okwa li okuliholamwene. Okwa li a hala Adam naEva nosho yo oludalo lavo lomonakwiiwa va dulike kuye nove mu longele ponhele yokulongela Jehova. Ndele mbela okwe va etela oilanduliko ya tya ngahelipi? Jehova oye a li e va pa keshe shimwe osho va li ve na, oshikunino shiwaelela nosho yo omalutu avo a wanenena nelalakano lokukala fiyo alushe.

4 Shinyikifa oluhodi, Adam naEva kava li va dulika kuKalunga, ova li ve litukula ko kuye. Ngaashi mu shi shii, oidjemo oya li inyikifa oluhodi. Ngaashi ashike eengala hadi u ko koshimeno, kanini nakanini ova li va hovela okukulupa nosho yo okufya. Ovana vavo navo ohava mono oixuna koulunde. (Rom. 5:12) Ndele nande ongaho, ovanhu vahapu ohava hoolola okuhadulika kuKalunga. Ova hala okukala nonghalamwenyo oyo va hala vo vene. (Ef. 2:1-3) Oidjemo otai ulike kutya, “kape nounongo . . . mokukondjifa Omwene.” — Omayel. 21:30.

5. Elineekelo lilipi Kalunga a li e na movanhu, nola li ngoo la wanifwa po?

5 Natango, Jehova okwa li e shii kutya ovanhu vamwe, mwa kwatelwa ovanyasha ovo ve na omitima diwa, otave mu kongo noku mu longela. (Eps. 103:17, 18; 110:3) Ina lenga tuu ovanyasha va tya ngaho! Mbela oho litale ko u li umwe womokati kavo? Ngeenge osho, kape na omalimbililo kutya oho hafele ‘oinima iwa’ ihapu ya dja kuKalunga oyo hai weda ko unene kehafo loye. (Lesha Epsalme 103:5; Omayel. 10:22) Ngaashi hatu ke shi mona, ‘oinima iwa’ oya kwatela mo eendja dopamhepo da henena, ookaume va denga mbada, omalalakano taa ti sha nosho yo emanguluko lashili.

JEHOVA OHA WANIFA PO OMHUMBWE YENI YOPAMHEPO

6. Omolwashike owa pumbwa okulipalula pamhepo, nongahelipi Jehova he ku longekidile eendja?

6 Mepingafano noinamwenyo, nye omu na omhumbwe yopamhepo, oyo Kalunga ta dulu okuwanifa po. (Mat. 4:4) Ngeenge omwa pwilikine kuye nolupandu, otamu ka mona eendunge, ounongo nosho yo ehafo. Jesus okwa ti: “Ovanelao eehepele domhepo,” ile ovo ve shii omhumbwe yavo yopamhepo. (Mat. 5:3) Kalunga oha wanifa po omhumbwe oyo okupitila mEendjovo daye nosho yo meendja dopamhepo da henena odo ha yandje okupitila ‘momupiya omudiinini nomunaendunge.’ (Mat. 24:45) Eendja odo ohadi kala pamaludi nohadi tu pameke. — Jes. 65:13, 14.

7. Omauwa elipi haa di mokulipalula neendja dopamhepo odo Kalunga he tu pe?

7 Eendja dopamhepo odo Kalunga he mu longekidile otadi mu kwafele mu kale mu na ounongo neendunge dokuyoolola, odo tadi dulu oku mu amena meenghalo dihapu. (Lesha Omayeletumbulo 2:10-14.) Pashihopaenenwa, otashi mu kwafele mu didilike mo omahongo oipupulu, ngaashi olo kutya kaku na Omushiti. Otashi dulu oku mu amena koipupulu oyo kutya oimaliwa nomaliko oi li odjo yehafo. Otashi dulu yo oku mu kwafela mu didilike nomu kondjife omahalo a puka nosho yo okulihumbata monghedi yokuliholamwene. Onghee twikileni okulikola ounongo wopakalunga neendunge dokuyoolola, ngaashi omunhu ta kongo omamona. Ngeenge omwa kala mu na omaukwatya oo e na ondilo,  otamu ke shi limonena kutya Jehova oku mu hole nokwe mu halela osho sha denga mbada. — Eps. 34:8; Jes. 48:17, 18.

8. Omolwashike mwa pumbwa okweehena popepi naKalunga paife, nongahelipi osho tashi ke mu etela ouwa monakwiiwa?

8 Mafiku ounyuni waSatana ou li pokuxulifwa po filufilu, na Jehova oye aeke ta ka kala eameno letu. Efimbo otali uya eshi hatu ka kala twe lineekela muye e tu pe eendja. (Hab. 3:2, 12-19) Paife olo efimbo lokweehena popepi naTate weni womeulu nokupameka elineekelo leni muye. (2 Pet. 2:9) Ngeenge omwa ningi ngaho, kashi na nee mbudi kutya opa holoke shike, otamu ka kala mu udite ngaashi omupsalme David a shanga a ti: “Alushe ohandi kwatele Omwene koshipala shange; eshi Ye e li kolulyo lange, ihandi tengauka.” — Eps. 16:8.

JEHOVA OHE MU PE OOKAUME VA DENGA MBADA

9. (a) She likolela kuJohannes 6:​44, oshike osho Jehova ha ningi? (b) Oshike shididilikwedi shi na sha nokushakena nEendombwedi dikweni?

9 Jehova oha nane ovo a pitika va ninge oilyo youkwaneumbo waye wopamhepo, moku va nanena kelongelokalunga lashili. (Lesha Johannes 6:44.) Eshi wa shakena nomunhu oo ehe li moshili oshikando shotete, mbela owa li u shii shike kombinga yaye? Owa li ashike u shii kanini, edina laye nosho yo eholokepo laye. Ashike osho hasho shi li ngaho ngeenge owa shakene naumwe oshikando shotete oo e shii noku hole Jehova. Nonande omunhu oo okwa dja meputuko, moshilongo, moshiwana, ile momuhoko wa yoolokafana, ou shii nale shihapu kombinga yaye, naye oku shii shihapu kombinga yoye.

Jehova okwa hala tu kale tu na ookaume va denga mbada notu litulile po omalalakano opamhepo (Tala okatendo 9-12)

10, 11. Oukwatya wa faafana ulipi oshiwana shaJehova shi na, nohau tu etele ouwa ngahelipi?

10 Pashihopaenenwa, keshe umwe ota ka didilika mo diva ‘elaka’ lamukwao, “omilungu da koshoka” ile tu tye elaka la koshoka loshili. (Sef. 3:9) Oshidjemo, oto ka kala u shii kutya mukweni okwa itavela shike kombinga yaKalunga, yomifikamhango dopaenghedi nosho yo yeteelelo li na sha nonakwiiwa okutumbula po ashike inini. Shikwao vali, oyo oyo oinima ya fimana okushiiva kombinga yomunhu, ohai mu kwafele mu kale mwe lineekelafana nomwafimanekafana. Ohai mu kwafele yo mu pange oukaume wopofingo notau kalelele.

 11 Kashi fi omutotolombo okupopya kutya u li omulongeli waJehova, ou na ookaume va denga mbada, nove li mounyuni aushe. Ou na natango okushakena navahapu vomuvo. Kakele koshiwana shaJehova, oolyelye hava hafele oshali oyo ya denga mbada?

JEHOVA OKWA HALA MU LALAKANENE OMALALAKANO TAA TI SHA

12. Omalalakano opamhepo a denga mbada elipi to dulu okulitulila po?

12 Lesha Omuudifi 11:9–12:1. Mbela ou na elalakano limwe ile mahapu oo to lalakanene okuhanga? Otashi dulika ho kendabala okulesha oshitukulwa mOmbiibeli efiku keshe. Ile otashi dulika to kendabala okuxwepopaleka onghedi yoye yokupopya noyokuhonga. Kashi na nee mbudi kutya oshike, mbela oho kala u udite ngahelipi ngeenge owa mono oidjemo iwa, ile vamwe ngeenge ove i mono ndele tave ku pandula? Kape na omalimbililo, oho kala u udite wa pondola nowa hafa. Osho u na okukala u udite ngaho, molwaashi owa pitifa komesho Kalunga ponhele youwa woye mwene, to hopaenene Jesus. — Eps. 40:8; Omayel. 27:11.

13. Oshike sha ningifa okulongela Kalunga ku kale kwe likalekelwa noku didilikwedi okuyelekanifa nomalalakano omounyuni ou?

13 Ngeenge owa kala to yandje elitulemo komalalakano opamhepo, oto longo yo osho tashi eta embilipalelo lashili molwaashi okuninga ngaho kashi fi oshinima shongaho. Omuyapostoli Paulus okwa shanga a ti: “Kaleni mwa pama, muha tengauke, alushe kaleni ovaladi moilonga yOmwene, mu kale mu shi shii nokutya, oshilonga sheni kashi fi oshimha omOmwene.” (1 Kor. 15:58) Mepingafano naasho, omunhu oo ta ­lalakanene oinima yomounyuni ou, nonande ota monika a fa ta pondola, xuuninwa ohe ke lihanga ashike kekwena la fita. (Luk. 9:25) Umwe oo a li e shi limonena ye mwene, nokwe tu tulila po oshihopaenenwa, ohamba Salomo. — Rom. 15:4.

14. Oshike to lihongo koshimoniwa shaSalomo shi na sha nomalihafifo?

14 Salomo, oo a li oshipuna sha shiya ko noku na eenghonopangelo, okwa li a kendabala ‘okuliyeleka nehafo nokutala kutya otamu mu dile ouwa washike.’ (Omuud. 2:1-10) Okwa li e litungila eengulu, e likokolela oikunino nosho yo eeparka, nokwa li a lalakanena keshe shimwe osho a li a hala. Mbela okwa ka kala e udite ngahelipi lwanima? Mbela okwa li a wanenwa, ile a mbilipalelwa? Inatu pumbwa okutengeneka. Salomo okwe shi tu lombwela ye mwene. Okwa shanga a ti: “Nda tala oilonga yange aishe omake ange a longa, . . . tala, oyo aishe oyongahoelela . . . Ndele ashishe . . . kashi nekwafo.” (Omuud. 2:11) Kashi fi tuu oshilihongomwa sha denga mbada! Mbela oto ke shi tula ngoo moilonga?

15. Ngaashi sha tumbulwa mEpsalme 32:​8, omolwashike eitavelo la fimana, noli na omauwa elipi?

15 Jehova okwa hala oku ku amena monghalamwenyo uhe lihonge oilihongomwa monghedi idjuu. Owa pumbwa eitavelo opo u dulike kuKalunga nou pitife komesho ehalo laye monghalamwenyo yoye. Eitavelo olo oli na ondilo, noka li na efiku li ku nyemateke nandenande. Jehova ita ka dimbwa nandenande ‘ohole yeni mokufimanekifa edina laye.’ (Heb. 6:10) Onghee longeni noudiinini opo mu kale mu na eitavelo la kola, opo nee otamu ke shi limonena nye vene kutya Tate weni womeulu okwe mu halela osho sha denga mbada. — Lesha Epsalme 32:8.

JEHOVA OHE MU PE EMANGULUKO LASHILI

16. Omolwashike twa pumbwa okukala twa lenga emanguluko letu noku li longifa pandunge?

16 Paulus okwa shanga a ti: ‘Apa omhepo yOmwene tai kala po, ope nemanguluko.’ (2 Kor. 3:17) Jehova oku hole emanguluko, nokwa tula ohole oyo momitima deni. Ashike pefimbo opo tuu opo, okwa hala mu longife nawa emanguluko leni, olo li li eameno leni. Otashi dulika u shii ovanyasha vamwe ovo hava tale omafano oipala ile hava kufa ombinga moluhaelo, momaudano a  nyika oshiponga, ile hava longifa oingangamifi nosho yo hava longifa nai oikolwifa. Otava dulu okuhafela omalihafifo onhumba pakafimbo. Ndele luhapu ehafo la tya ngaho ohali di poudjuu, otashi dulika li etife omukifi wonhumba, li ku ningife u kale wa pikwa, ile nokuli efyo. (Gal. 6:7, 8) Osha yela kutya “emanguluko” lavo otali va pukifa. — Tit. 3:3.

17, 18. (a) Ongahelipi okudulika kuKalunga haku mangulula ovanhu? (b) Ongahelipi emanguluko olo la li hali hafelwa kuAdam naEva pehovelo tali dulu okuyelekanifwa naalo hali hafelwa kovanhu kunena?

17 Mepingafano naasho, ovanhu vangapi mu shii tava yahama molwaashi ve li metwokumwe nomifikamhango dOmbiibeli? Osha yela kutya okudulika kuJehova oku na oukolele nohaku mangulula ovanhu. (Eps. 19:7-11) Ngeenge omwa longifa emanguluko leni pandunge metwokumwe neemhango nomafinamhango aKalunga a wanenena, kungaho otamu ulikile Kalunga nosho yo ovadali veni kutya otamu dulu okulineekelelwa emanguluko lihapu. Oshi li elalakano laKalunga xuuninwa a ka pe ovapiya vaye ovadiinini emanguluko la wanenena, olo la popiwa mOmbiibeli li li ‘emanguluko loshinge shovana vaKalunga.’ — Rom. 8:21.

18 Adam naEva ova li hava hafele emanguluko olo. Oipango ingapi ya li tai dengele oyo Kalunga a li e va pa moshikunino shaEden? Shimwe ashike. Kava li ve na okulya oiimati yokomuti umwe. (Gen. 2:9, 17) Mbela ou udite kutya oshipango osho shimwe osha li she va ngabeka ile sha yandjwa nonyanya? Hasho nandenande! Shi yelekanifa ashike neemhango dihapuhapu odo da totwa po kovanhu, nohadi fininikilwa ovanhu ve di lihonge nova dulike kudo.

19. Omeenghedi dilipi hatu hongwa opo tu kale twa manguluka?

19 Jehova oha ungaunga novapiya vaye monghedi yefimaneko. Ponhele yoku tu pa eemhango dihapuhapu, ohe tu hongo nelididimiko tu landule omhango yohole. Okwa hala tu kale metwokumwe nomafinamhango aye notu kale tu tonde osho shii. (Rom. 12:9) Eudifo laJesus lokOmhunda oli li oshihopaenenwa shiwa shehongo olo, molwaashi omwa popiwa oinima oyo hai etifa omanyono. (Mat. 5:27, 28) Kristus e li Ohamba yOuhamba waKalunga, ota ka twikila oku tu honga mounyuni mupe opo tu kale tu na etaleko la fa laye li na sha nouyuki nosho yo oumbudi. (Heb. 1:9) Ote ke tu kwafela yo tu kale twa wanenena palutu nopamadiladilo. Itamu ka kala vali mu udite mu li meemhango doulunde noitamu ka mona vali oidjemo youlunde inyikifa oluhodi. Opo nee hauxuninwa, otamu ka hafela ‘emanguluko loshinge’ olo Jehova e mu udanekela.

20. (a) Jehova oha longifa ngahelipi emanguluko laye? (b) Ongahelipi tamu dulu okumona ouwa moshihopaenenwa shaKalunga?

20 Emanguluko letu itali ka kala inali ngabekwa. Otali ka wilikwa kohole yetu yokuhola Kalunga nosho yo ovanhu vakwetu. Jehova ote tu pula ashike tu mu hopaenene. Oku na emanguluko inali ngabekwa; ashike okwa hoolola okuwilikwa kohole eshi ta ungaunga nafye. (1 Joh. 4:7, 8) Osho otashi ulike kutya emanguluko letu otali ka kala tali ti sha ngeenge ola kala tali wilikwa kohole yopakalunga.

21. (a) David okwa li e uditile ngahelipi Jehova? (b) Oshike hatu ka kundafana moshitukulwa tashi landula ko?

21 Mbela ohamu pandula ngoo ‘oinima iwa’ ihapu oyo Jehova e mu pa, ngaashi eendja dopamhepo da henena, ookaume vawa, omalalakano taa ti sha nosho yo eteelelo li na sha nemanguluko la wanenena? (Eps. 103:5) Ngeenge osho, eendjovo deilikano odo tadi hangwa mEpsalme 16:11 nadi kale yo tadi ti sha kunye odo tadi ti: “Ove to shiivifile nge ondjila yomwenyo; ouyadihafo ou li koshipala shoye, ouwapalinyenye ou li meke lokolulyo loye fiyo alushe.” Oshitukulwa tashi landula ko otashi ka kundafana omamona amwe opamhepo oo taa hangwa mEpsalme 16. Omamona oo otaa ka yandja ouyelele muhapu u na sha nodjo yokukala wa mbilipalelwa shili monghalamwenyo.