Inda koshikalimo

Inda koshikalimo

Fimaneka “eshi Kalunga e shi tula kumwe”

Fimaneka “eshi Kalunga e shi tula kumwe”

“Eshi Kalunga e shi tula kumwe, inashi kufwa kumwe komunhu.” — MARK. 10:9.

OMAIMBILO: 131, 132

1, 2. Ovaheberi 13:4 otave tu linyengifa tu ninge shike?

MBELA oho hafele ngoo okufimaneka Jehova? Heeno. Okwa lenga efimaneko loye nokwa udaneka kutya naye ote ke ku fimaneka. (1 Sam. 2:30; Omayel. 3:9; Eh. 4:11) Okwa hala yo naave u fimaneke ovanhu she likolelela keendodo davo, ngaashi ovanambelewa vepangelo. (Rom. 12:10; 13:7) Ashike ope na eenghalo dimwe omo wa pumbwa okuulika efimano le likalekelwa. Efimano la tya ngaho oli na okuulikwa mohombo.

2 Omuyapostoli Paulus okwa shanga a ti: “Ohombo nai fimanekwe kwaaveshe, nomutala wohombo nau kale uhe noshipo.” (Heb. 13:4) Paulus ka li ashike ta popi oshinima shongaho. Ponhele yaasho, okwa li ta popi oshinima tashi ti sha, ta ladipike Ovakriste pauhandimwe va fimaneke ohombo, ve i tale ko i na ondilo. Mbela naave osho ngoo ho tale ko ohombo ngaho unene tuu ngeenge ou na kaume kopahombo?

3. Omayele a fimana elipi Jesus a yandja e na sha nohombo? (Tala efano pehovelo loshitukulwa.)

3 Oto ka kala meameno liwa ngeenge owa kala ho fimaneke ohombo. Jesus okwa li a fimaneka ohombo. Eshi Ovafarisai va li ve mu pula kombinga yeteyohombo, okwa li e va lombwela osho Kalunga a popya shi na sha novalihomboli votete a ti: “Omulumenhu oku na okufiya po xe naina nokukanyatela komukainhu waye. Ndele vo otava kala onhumba imwe aike.” Jesus okwa weda ko a ti: “Eshi Kalunga e shi tula kumwe, inashi kufwa kumwe komunhu.” — Lesha Markus 10:2-12; Gen. 2:24.

4. Jehova okwa tula po omufikamhango ulipi u na sha nohombo?

4 Jesus okwa li e shii kutya ohombo oya totwa po kuKalunga nokwa popya kutya oi li oshinima tashi kalelele. Kalunga ka li a lombwela Adam naEva kutya ohombo otai dulu okuxulifwa po moku i teya. Omufikamhango wohombo u na sha nokuhombola omukulukadi ile okuhombolwa komushamane umwe ngaashi sha li moshikunino shaEden, otau ulike kutya ‘ovanhu vavali’ ova li ve na okukala va hangana fiyo alushe.

OMALUNDULUKO OPAKAFIMBO E NA SHA NOHOMBO

5. Efyo ohali kumu ngahelipi ovalihomboli?

5 Ou shi shii kutya oulunde waAdam owa etifa po omalunduluko. Limwe olo efyo, olo tali dulu okukuma ovalihomboli. Osho ohatu dulu oku shi mona mwaasho Paulus a shanga eshi a li ta yelifa kutya Ovakriste kave li koshi yOmhango yaMoses. Okwa holola kutya efyo ohali xulifa po ohombo, na kaume kopahombo oo a xupa po ota dulu ­okuhombolulula ile okuhombolululwa. — Rom. 7:1-3.

6. Omhango yaMoses oya holola ngahelipi etaleko laKalunga li na sha nohombo?

6 Omhango oyo Kalunga a li a pa oshiwana shaIsrael oya li i na ouyelele u na sha nohombo. Oya li ya pitika okuhombola ombada, osho sha hangwa hashi ningwa nale ofimbo Kalunga ina yandja Omhango oyo. Ashike oya li ya popya kombinga yaavo va hombola ombada, noku va tulila po omangabeko onhumba. Pashihopaenenwa, ngeenge Omuisrael okwa hombola omupika ndele lwanima ta ka hombola omukulukadi omutivali, ke na okuninipika eendja daau wotete noikutu nokunangala naye. Kalunga okwa li a teelela e mu amene noku mu file oshisho. (Ex. 21:9, 10) Fye katu li koshi yOmhango, ashike otai tu kwafele tu mone kutya Jehova okwa lenga ohombo. Mbela osho itashi ku linyengifa u kale wa fimaneka ohombo?

7, 8. (a) She likolelela kuDeuteronomion 24:1, Omhango oya li i na efiloshisho lilipi li na sha neteyohombo? (b) Jehova oha tale ko ngahelipi eteyohombo?

7 Oshike sha li hashi ningwa po shi na sha nokuteya ohombo koshi yOmhango? Kalunga okwa lenga unene ohombo, ashike omolwokunakonasha kwaye okwa pitika eteyohombo. (Lesha Deuteronomion 24:1.) Omulumenhu Omuisrael okwa li ta dulu okuhenga po omukulukadi waye ngeenge “okwa mona sha muye showii.” Omhango inai yelifa kutya ‘owii’ owa kwatela mo shike. Oshi na okukala oshinima shi fifa ohoni ile sha kwata moiti, ndele kashi fi enyono linini. (Deut. 23:14) Shinyikifa oluhodi, Ovajuda vopefimbo laJesus ova li hava teya ohombo “omolwondjovo keshe.” (Mat. 19:3) Inatu hala nande okukulika oikala ya fa yavo.

8 Omuprofeti Malakia okwa holola etaleko laKalunga li na sha neteyohombo. Osha li opefimbo olo eshi la li hali ningwa unene opo omulumenhu oo e na eteke aha henge po ‘omwalikadi waye womounyasha,’ tashi dulika te shi ningi nelalakano opo a hombole omunyasha, omukainhu omupaani. Malakia okwa shanga shi na sha netaleko laKalunga, a ti: “Ame ohandi tondo eteyo lohombo.” (Mal. 2:14-16) Osho osha li metwokumwe naasho Eendjovo daKalunga da popya kombinga yohombo yotete da ti: “Omulumenhu oku na okufiya po xe naina nokukanyatela komukainhu waye.” (Gen. 2:24) Jesus okwa li a yambidida etaleko laXe li na sha nohombo, eshi a ti: “Osho Kalunga e shi tula kumwe, inashi kufwa kumwe komunhu.” — Mat. 19:6.

OPE NA ASHIKE ETOMHENO LIMWE LOKUTEYA OHOMBO

9. Eendjovo daJesus odo di li muMarkus 10:11, 12 odi na okuudiwa ko ngahelipi?

9 Otashi dulika umwe a pule kutya, ‘Mbela ope na ngoo etomheno olo tali ufa Omukriste a teye ohombo nokuhombolulula ile okuhombolululwa?’ Jesus okwa popya etaleko laye li na sha neteyohombo a ti: “Ou ta henge po omukainhu waye, ndele ta hombola umwe, oye ta nyono ohombo kuye. Nomukainhu ngeenge ta henge po omulumenhu waye, ndele ta hombolwa kuumwe, ye ota nyono ohombo.” (Mark. 10:11, 12; Luk. 16:18) Osha yela kutya Jesus okwa li a fimaneka ohombo nokwa hala vamwe va ninge ngaho. Omulumenhu oo ta henge po omukainhu waye omudiinini (ile omukainhu ta henge po omulumenhu waye omudiinini) molwomalipopilo onhumba nokuhombolulula ile okuhombolululwa ota nyono ohombo. Osho oshoshili molwaashi okufiya po kaume koye kopahombo inashi xulifa po ohombo. Pataleko laKalunga, ovanhu ovo vavali ove li natango “onhumba imwe aike.” Shikwao vali, Jesus okwa ti kutya omulumenhu oo ta henge po omukainhu waye oo ehe na etimba ote mu twalifa moluhaelo. Ngahelipi mbela? Pefimbo lonale, omukainhu oo a hengwa otashi dulika a fininikwe a hombolululwe opo a mone eyambidido lopashimaliwa. Okuhombolululwa kwa tya ngaho ohaku etifa oluhaelo.

10. Etomheno limwe lilipi tali dulu okuningifa Omukriste a teye ohombo nokukala a manguluka okuhombolulula ile okuhombolululwa?

10 Jesus okwa popya etomheno limwe olo ovalihomboli tava dulu okuteya ohombo a ti: “Ndelenee Ame ohandi mu lombwele: Ou ta henge po omukainhu waye omolwoshinima shimwe shihe fi oluhaelo [mOshigreka, por·neiʹa], ndele ta hombola umwe, ye ta haele; naau ta hombola po omuhengwa, ye ota haele.” (Mat. 19:9) Okwa popya oshinima sha faafana mEudifo lokOmhunda. (Mat. 5:31, 32) Pomhito keshe, Jesus okwa popya shi na sha ‘noluhaelo.’ Outumbulilo oo tau ulike koinima ya yoolokafana i na sha nonyata yoluhaelo kondje yohombo, ngaashi: oluhaelo, oumbwada, ekwatafano lopamilele pokati kovanhu inava hombola, oushenge nosho yo okunangala noimuna. Pashihopaenenwa, ngeenge omulumenhu a hombola okwa i moluhaelo, omukulukadi waye ota dulu okutokola ngeenge ote mu henge po ile hasho. Ngeenge okwe mu henge po, kungaho ohombo oya xula po pataleko laKalunga.

11. Omolwashike Omukriste ta dulu okutokola aha teye ohombo nokuli nonande ope na etomheno lopaMbiibeli loku shi ninga?

11 Shididilikwedi oshosho kutya, Jesus ina popya kutya ngeenge kaume kopahombo umwe okwa haele (por·neiʹa) ove na okuteya ohombo. Pashihopaenenwa, omukulukadi ota dulu okuhoolola okukala nomulumenhu waye nonande okwa li a ya moluhaelo. Otashi dulika e mu hole natango; otashi dulika a hala oku mu dimina po nosho yo okulonga pamwe naye opo va xwepopaleke ohombo yavo. Oushili oyo kutya ngeenge okwa teya ohombo ndele ta kala ina hombolululwa, ota ka shakeneka omashongo. Ongahelipi shi na sha neemhumbwe daye dopaumwene nodopamilele? Ongahelipi shi na sha noudja? Mbela ope na ounona ovo ve na okufilwa oshisho? Mbela oto ka dula ngoo okutekulila ounona voye moshili ngeenge owa teya ohombo? (1 Kor. 7:14) Osha yela kutya oo a hengwa po ehe na ondjo ota ka taalela omaupyakadi a kwata moiti.

12, 13. (a) Oshike sha li sha ningwa po mohombo yaHosea? (b) Omolwashike Hosea a li a tambula ko Gomer, noshike hatu lihongo mo shi na sha nohombo kunena?

12 Oshihopaenenwa shomuprofeti Hosea oshi li oshilihongomwa kufye. Kalunga okwa li a lombwela Hosea a kufe omwalikadi (Gomer), oo ta ka ninga ‘omwalikadi ombwada, noku dale ounona nombwada.’ Gomer okwa li a ‘ninga oufimba, ndele ta dalele Hosea omumati.’ (Hos. 1:2, 3) Lwanima, okwa ka mona omonakadona nomonamati, aveshe ova li va dalelwa moluhaelo. Nonande Gomer okwa haela lwoikando, Hosea ka li e mu henga po. Xuuninwa, okwa ka fiya po Hosea ndele ta ka ninga omupika. Natango, Hosea okwa li e mu landa ko. (Hos. 3:1, 2) Jehova okwa li a longifa Hosea opo a ulike nghee a li a dimina po lwoikando Ovaisrael ovo va li hava i moluhaelo. Oshike hatu dulu okulihonga mo moshinima osho?

13 Ngeenge kaume kopahombo oo ehe fi Omukriste okwa i moluhaelo, kaume kopahombo Omukriste oo ehe na ondjo oku na okuninga etokolo. Jesus okwa ti oo ehe na ondjo oku na etomheno lokuteya ohombo nokwa manguluka okuhombolulula ile okuhombolululwa. Shikwao vali, kaume kopahombo oo ehe na ondjo ota dulu okudimina po mukwao. Inashi puka okuninga ngaho. Hosea okwa li a dimina po Gomer. Eshi Gomer a li a shuna kuHosea, ka li vali e na ekwatafano novalumenhu vamwe. Hosea ka li a “nangala” naGomer oule wefimbo lile. (Hos. 3:3) Ndele mokweendela ko kwefimbo, ova ka hovela vali okuya momilele, naasho otashi ulike kunghee Kalunga a li a tambula ko oshiwana shaye nehalo liwa nokutwikila okuungaunga nasho nawa. (Hos. 1:11; 3:3-5) Mbela osho oshi na ekwatafano lashike li na sha nohombo kunena? Ngeenge kaume kopahombo oo ehe na ondjo okwa tokola okukala mohombo nova twikila okuya momilele, otashi ulike kutya okwa dimina po mukwao. (1 Kor. 7:3, 5) Kungaho, ke na vali etomheno lokuteya ohombo. Okudja opo, ovalihomboli ovo ove na okukendabala okuulika kutya ohava tale ko ohombo ngaashi Kalunga.

KALA WA FIMANEKA OHOMBO NONANDE OMU NA OMAUPYAKADI

14. She likolelela ko 1 Ovakorinto 7:10, 11, oshike tashi dulu okuningwa po mohombo?

14 Ovakriste aveshe ove na okukendabala okufimaneka ohombo, ngaashi Jehova naJesus. Ashike molwaashi ovanhu inava wanenena, vamwe otava ka dopa okuninga ngaho. (Rom. 7:18-23) Nomolwaasho kashi na oku tu kumwifa eshi Ovakriste vamwe vomefelemudo lotete va li ve na omaupyakadi meehombo. Paulus okwa shanga kutya “omukainhu ina henga omulumenhu waye”; ashike peemhito dimwe osho osha li sha ningwa. — Lesha 1 Ovakorinto 7:10, 11.

Oshike tashi dulu okuningwa po opo ku xupifwe nokuli nohombo oyo i na oupyakadi? (Tala okatendo 15)

15, 16. (a) Nonande mohombo omu na omaupyakadi, elalakano letu olashike, nomolwashike? (b) Osho otashi longo ngahelipi ngeenge kaume kopahombo umwe ke fi omwiitaveli?

15 Paulus ina yelifa kutya oshike sha li sha etifa po ehengafano la tya ngaho. Pashihopaenenwa, oupyakadi kawa li kutya omushamane okwa ya moluhaelo opo a pe omwalikadi etomheno lokuteya ohombo nokuhombolululwa. Paulus okwa shanga kutya omwalikadi oo ta henge po omushamane waye “na kale ina hombolwa, ile nava paafane ombili nomulumenhu waye.” Onghee aveshe vavali ova hangana natango pataleko laKalunga. Paulus okwa yandja omayele kutya kashi na nee mbudi kutya ope na oupyakadi washike, ngeenge inau kwatela mo oluhaelo, elalakano nali kale okupaafana ombili. Ovalihomboli ovo vavali otava dulu okukonga ekwafo okudilila mOmbiibeli kovakulunhuongalo. Ovakulunhuongalo otava dulu okuyandja omayele opaMbiibeli, nove na okuhenuka olwaamambinga.

16 Otashi dulika pa kale oupyakadi muhapu ngeenge kaume kopahombo oo e li omwiitaveli oye ashike a hala okukala metwokumwe nomifikamhango daKalunga. Okutala komaupyakadi oo a holoka po nale, mbela etukauko olo ekandulepo loupyakadi? Ngaashi sha popiwa nale, Omishangwa oda popya kutya oluhaelo olo ashike etomheno tali dulu okuteyifa ohombo, ndele inadi popya omatomheno a yoolokafana e na sha netukauko. Paulus okwa shanga a ti: “Ngeenge oku na omukainhu e nomulumenhu ehe fi omwiitaveli, nokwa hala okukala naye, ina henga omulumenhu waye.” (1 Kor. 7:12, 13) Osho otashi longo yo nopefimbo letu.

17, 18. Omolwashike Ovakriste vamwe va kala mohombo mu na omaupyakadi?

17 Ope na eemhito dimwe opo “omulumenhu ehe fi omwiitaveli” tashi dulika a ulike kutya ina ‘hala okukala nomwalikadi waye.’ Otashi dulika he mu monifa unene oixuna palutu, nokuli fiyo oposhitwa opo omukulukadi e udite kutya oukolele waye ile onghalamwenyo yaye oi li moshiponga. Otashi dulika a anye oku mu yambidida nosho yo oukwaneumbo ile a tule moshiponga ekwatafano laye naJehova. Meenghalo da tya ngaho, Ovakriste vamwe ova tokola kutya, kashi na nee mbudi kutya ota ningi omalipopilo elipi, otashi ulike kutya ina ‘hala okukala’ pamwe naye nonokutya ova pumbwa okutukauka. Ashike Ovakriste vamwe ovo ve li meenghalo da tya ngaho, ova hoolola okulididimikila ookaume kavo kopahombo notava kendabala okuxwepopaleka onghalo omo ve li. Omolwashike mbela?

18 Nonande ova tukauka, natango ove li ookaume kopahombo. Ngeenge ove lyaafane kokule, keshe umwe ota dulu okushakeneka omashongo, ngaashi sha popiwa metetekelo. Omuyapostoli Paulus okwa yandja etomheno limwe vali lokukala va hangana. Okwa shanga a ti: “Omulumenhu ehe fi omwiitaveli, a yapulwa omolwomukainhu, nomukainhu ehe fi omwiitaveli a yapulwa omolwomulumenhu omwiitaveli; ngeno kakwa li ngaha, ngeno ovana veni ova nyata, ndelenee paife ovo ovayapuki.” (1 Kor. 7:14) Ovakriste ovadiinini vahapu ova kala nookaume kavo kopahombo ovo vehe fi ovaitaveli nonande ope na omaupyakadi. Otava dulu okukoleka kutya okuninga ngaho okwa li taku ti sha monghedi ye likalekelwa eshi ookaume kavo kopahombo va ninga ovalongelikalunga vashili. — Lesha 1 Ovakorinto 7:16; 1 Pet. 3:1, 2.

19. Omolwashike momaongalo opaKriste mu na ovalihomboli vahapu tave shi endifa nawa meehombo davo?

19 Jesus okwa yandja omatyekosha e na sha neteyo lohombo, nomuyapostoli Paulus okwa yandja omayele a nwefwa mo e na sha netukauko. Aveshe ova hala ovapiya vaKalunga va kale va fimaneka ohombo. Mounyuni aushe kunena, momaongalo opaKriste omu na ovalihomboli vahapu ovo tave shi endifa nawa meehombo davo. Oto dulu okumona ovalihomboli vahapu va hafa meongalo lomoshitukulwa sheni. Ovalihomboli ovo ove li ovamwatate ovadiinini ovo ve hole ovakulukadi vavo nosho yo ovakulukadi ovadiinini ovo va ulika kutya ove hole ookaume kavo kopahombo, aveshe otava ulike kutya ohombo otai dulu okufimanekwa. Ohatu dulu okukala twa hafa eshi ovanhu omamiliyona va ulika oumbangi u na sha noshili yEendjovo daKalunga odo tadi ti: “Onghee hano omulumenhu e nokufiya po xe naina nokulimangela komukainhu waye, vo vavali tava ningi omunhu umwe.” — Ef. 5:31, 33.