Inda koshikalimo

Inda koshikalimo

Omapulo a dja kovaleshi

Omapulo a dja kovaleshi

Omolwashike omahokololo oo e li membo laMateus nosho yo membo laLukas, e na sha nonghalamwenyo yaJesus yopehovelo, a yoolokafana?

Ehokololo laMateus, li na sha noiningwanima i na sha nokudalwa kwaJesus nosho yo nonghalamwenyo yaye eshi a li munini, ola yooloka ko kwaalo laLukas, molwaashi ovashangi vOmavaengeli ova shanga oiningwanima oyo meenghedi da yoolokafana.

Ehokololo laMateus otali yandje unene elitulemo koiningwanima oyo ya kwatela mo Josef. Ola popya shi na sha nanghee Josef a li e linyenga koufimba waMaria, kondjodi oyo omweengeli a li e mu yelifila i na sha noufimba waMaria nosho yo nghee a li a tambula ko oshinima osho. (Mat. 1:19-25) Mateus okwa twikila nokupopya kombinga yondjodi yaJosef omo omweengeli e mu lombwela a ye onhapo kuEgipti, okuya kwavo kuEgipti, ondjodi omo omweengeli a lombwela Josef va shune kuIsrael, olweendo lavo lokushuna kuIsrael nosho yo etokolo laye lokuya kuNasaret. (Mat. 2:13, 14, 19-23) Momatukulwa otete Evaengeli laMateus, edina laJosef ola tumbulwa mo oikando ihetatu ofimbo laMaria la tumbulwa mo ashike oikando ine.

Shikwao vali, ehokololo laLukas otali yandje unene elitulemo kuMaria. Ola kwatela mo eshi Maria a li a talelwa po komweengeli Gabriel, eshi a li a ka talela po omupambele waye Elizabeth, nosho yo nghee a li ta hambelele Jehova. (Luk. 1:26-56) Natango Lukas okwa tumbula eendjovo daSimeon odo a li a lombwela Maria shi na sha nanghee Jesus a li ta ka mona oixuna. Nokuli nomehokololo li na sha noukwaneumbo wavo eshi wa li wa ya kotembeli, eshi Jesus a li e nomido 12, Lukas okwa tofa eendjovo daMaria ndele ka di fi daJosef. Lukas okwa weda ko vali kutya oiningwanima aishe oyo oya li ya kuma Maria neenghono. (Luk. 2:19, 34, 35, 48, 51) Momatukulwa avali otete mEvaengeli laLukas, edina laMaria ola tumbulwa mo oikando 12, ofimbo laJosef la tumbulwa mo ashike oikando 3. Onghee hano, Mateus okwa popya shihapu shi na sha naJosef nosho yo oilonga yaye, ofimbo Lukas a yandja ouyelele kombinga yonghandangala oyo Maria a dana nosho yo oimoniwa yaye.

Sha faafana, omisholondodo domapata odo da shangwa kovashangi vOmavaengeli avali oda yoolokafana. Mateus okwa shanga kombinga yepata laJosef nokwa ulika kutya Jesus, oo a tekulwa kuJosef, omufyuululi wopaveta wouhamba waDavid. Mbela omolwashike? Omolwaashi Josef okwa li a dja moludalo lohamba David okupitila momonamati waye, Salomo. (Mat. 1:6, 16) Ashike Lukas okwa popya kombinga yepata laMaria nokwa ulika kutya Jesus okwa li omufyuululi wouhamba waDavid “kombinga yombelela.” (Rom. 1:3) Mbela omolwashike? Omolwaashi Maria okwa li a dja moludalo lohamba David, okupitila momonamati waye, Natan. (Luk. 3:31) Ndele omolwashike Lukas ina tumbula Maria momusholondodo wepata lavo e li omonakadona waEeli, tate waye? Omolwaashi nale paveta omisholondodo domapata oda li hadi valulwa ashike okupitila movalumenhu. Osha li shi shii okuudiwa ko eshi Lukas a popya kombinga yaJosef e li omonamati waEeli, molwaashi Josef okwa li oshitenya shaEeli. — Luk. 3:23.

Omisholondodo domapata odo di li muMateus nomuLukas oda ulika filufilu kutya Jesus oye a li Messias oo a xunganekwa. Oshoshili kutya oushili kombinga yepata laJesus owa kala u shiivike, nokuli nOvafarisai nosho yo Ovasadukai kava li tava dulu okupataneka oushili oo. Kunena, omisholondodo domapata odo da shangwa kuMateus naLukas odi li ekanghameno leitavelo letu notadi tu pe oushili womaudaneko aKalunga.